Ha Wodiyan Deꞌiya Koshaabaa Geeshsha Maxaafay Woygii?

“Ooninne namisettoppo.” Hagee saꞌaa kawotettan haariyageeti asaa naatu gita metotuppe issuwa gididaagaa qaaranawu halchchidi haasayidoba; hegeekka ha saꞌan deꞌiya ooninne namisettennaadan oottanaassa.a Shin ha saꞌaappe koshay xayanee? Geeshsha Maxaafay woygii?

Ha wodiyan deꞌiya koshaabay Geeshsha Maxaafan kasetidi odettiis

Geeshsha Maxaafay ‘wurssetta gallassaa’ giyo nu wodiyan koshay deꞌanaagee kasetidi odettiis. (2 Ximootiyoosa 3:1) Koshay deꞌanaadan oottiday Xoossaa gidenna, shin I hegaabaa nuussi yootiis. (Yaaqooba 1:13) Geeshsha Maxaafan kasetidi odettida naaꞌꞌubaa akeeka.

“Dumma dumma heeran koshay denddana.” (Maatiyosa 24:7) Darosan koshay deꞌanaagee Geeshsha Maxaafan kasetidi odettiis. Kattaa mokissiyonne asawu gattiyo ogiyabaa pilggiyageeti giigissido issi iripporttee hagaadan gees: “Koshaara, qassi bollawu goꞌꞌiyanne gidiyagaa keena kattay baynnaagaara gayttidaagan alamiya hanotay yaa iiti iiti bees.”b Daro biittatun xeetu miilooniyan qoodettiya asay koshshiya qumaa demmana danddayenna. Hegaappe denddidaagan he asaappe daroy hayqqiyogee azzanttiyaba.

Ajjuutaa shemppo 6n odettidaagaadan, amara paraa toggida gilqqidaagee ba kushiyan meezaanaa oyqqiis.

“Amara parai kiyidaagaa be7aas; qassi he paraa toggidaagee ba kushiyan meezaanaa oiqqiis.” (Ajjuutaa 6:5) Ha hiraagan odettida leemiso paraynne A toggidaagee ha wurssetta gallassatun deꞌiya koshaa bessees.c Paraa toggidaagaa kushiyan deꞌiya meezaanay kattaa meezaanidi gishiyogaa bessiyaba. He paraaway toggidaashin, issi cenggurssay kattaa waagay keehi gujjanaagaanne asay kattaa qoraphphana koshshiyogaa yootiis. (Ajjuutaa 6:6) Hagee, biilooniyan qoodettiya asay bollawu goꞌꞌiya qumaa demmana woy shammana danddayenna, ubbasan kattay qaxuwatiyo nu wodiya loytti qonccissiyaba.

Koshay waanidi xayanee?

Biittay ha saꞌan deꞌiya asawu gididi palahiya kattaa mokissiyogaa eranchchati yootoosona. Yaatin, kattay qaxuwatanaadan oottidabay aybee? Nuna Medhdhidaagee, Yihoowayd ha metuwa qaaranawu ay oottanaagaa Geeshsha Maxaafay yootii?

Kawotettaa ooso keettaa penggen eqettiyageeti eqqidoogaa bessiya misiliya.

Metuwa: Kawotettati asay namisettanaadan oottiya hiyyeesatettaanne pirdda pacaa xayssana danddayokkona.

Metoy qaarettiyo ogiya: Polo gidenna asaa kawotettay xayin polo, gidida Xoossaa kawotettay haarana. (Daaneela 2:44; Maatiyosa 6:10) Ha wodiyan, hiyyeesa gidida daro asay qumaa shammanawu keehi metootees, shin Xoossaa Kawotettan hegee laamettana. Geeshsha Maxaafay Xoossaa Kawotettaa Kawo gidida Yesuus Kiristtoosabaa hagaadan gees: “A xeesiya hiyyeesata, naaqettidaageetanne maaddiyaabi bainnaageeta i ashshees. . . . Biittan daro kattai mokko; dereti kattan kamettona.”—Mazamure 72:12, 16.

Karttaa, tankkiyanne olaa horophphilliya bessiya misiliya.

Metuwa: Olay bashshaanne miishshaa metuwa kaalettees; hegaappe denddidaagan asay koshshiya qumaa demmanawu metootees.

Metoy qaarettiyo ogiya: “[Yihooway] sa7aa gaxaa gakkanaassi de7iya olaa teqqees; wonddafiyaa menttees; tooraa kinchchees; gonddalliyaakka taman xuuggees.” (Mazamure 46:9) Xoossay olaa miishshatanne olawu gaaso gidida asata xayssana. Hegaappe denddidaagan ubba asay metootennan qumaa demmana. Geeshsha Maxaafay hagaadan gees: “Xillotettai daayo; . . . sarotettai daro.”—Mazamure 72:7.

Awaa ayfiyanne melida biittan shulliya dozaa bessiya misiliya.

Metuwa: Iita carkkuwa hanotaynne meretay gattiyo daafabay kattay qohettanaadaaninne mehee hayqqanaadan oottees.

Metoy qaarettiyo ogiya: Xoossay kattay loytti mokkanaadan oottiya ogiyan, ha saꞌaa carkkuwa hanotaa giigissana. Geeshsha Maxaafay hagaadan gees: “[Yihooway] gotiyaa co77u oottiis; abbaa dambbalaakka sirphphi oottiis. . . . I mela bazzuwan haattai eellanaadan, qassi mela biittan pulttoi xuuqqanaadan oottiis. Namisettidaageeta he sohuwan wottiis; . . . Eti bantta goshshan zeridi, woiniyaa tokkidi, daro murutaa shiishshidosona.”—Mazamure 107:29, 35-37.

Naaꞌꞌu asati issoy issuwa sarotidi issoy issuwawu miishshaa immishin bessiya misiliya.

Metuwa: Yaaretiyanne bessennabaa oottiya asati bollaa qohiya kattaa zeroosona woy kattay koshshiyo asawu gakkennaadan oottoosona.

Metoy qaarettiyo ogiya: Ammanettennanne bessennabaa oottiya asaa ubbaa Xoossaa Kawotettay xayssana. (Mazamure 37:10, 11; Isiyaasa 61:8) Geeshsha Maxaafay Xoossaa Yihooway “naaqettidaageetau pirddiyaagaa; namisettidaageetau qumaa immiyaagaa” gidiyogaa yootees.—Mazamure 146:7.

Pituwa oliyosan deꞌiya moorettida qumaa bessiya misiliya.

Metuwa: Alamiyan deꞌiya kattay heezzaappe issi kushee coo moorettees woy xayees.

Metoy qaarettiyo ogiya: Xoossaa Kawotettaa haaruwan, aawatettay deꞌiyogeeti ubba asay kattaa bessiya ogiyan demmanaadan oottana. Yesuusi saꞌan deꞌiyo wode, qumay coo moorettennaadan oottiis. Leemisuwawu, I issi wode 5,000ppe dariya asaa malaaliya ogiyan qumaa miziis. Guyyeppe, I bana kaalliyageeta, “Issibaikka moorettenna mala, attida xarzzaa shiishshite” giidi azaziis.—Yohaannisa 6:5-13.

Xoossaa Kawotettay asay namisettanaadan oottiya waanna gaasuwa xayssiyo gishshawu, ubba asawu bollawu goꞌꞌiya loꞌꞌo qumay kumi palahana. (Isiyaasa 25:6) Xoossaa Kawotettay hegaa oottanay awudekko eranawu, “Xoossaa Kawotettay Saꞌaa Awude Haaranee?” giya huuphe yohuwa xeella.

a 2030wu Ammanttiya Dichchaa, 2015n Kawotettatu Issippetettaa Yara Biittati ubbay maayettidoogaa.

b Kawotettatu Issippetettaa Qumaanne Goshshaa Dirijjitee, Kumetta Saꞌaa Goshshaa Dichchaa Fanddee, Kawotettatu Issippetettaa Naatu Fanddee, Kawotettatu Issippetettaa Alamiya Qumaa Prograamee, qassi Alamiya Payyatettaa Dirijjitee issippe kessido irpporttiya.

c Ajjuutaa maxaafan odettida oyddu para asatubaa gujjada eranawu, “Oyddu Paraasata—Eti Oonee?” giya huuphe yohuwa nabbaba.

d Yihoowa giyogee Xoossawu buzo sunttaa. (Mazamure 83:18, NW) “Yihooway Oonee?” giya huuphe yohuwa nabbaba.