Olaanne Carkkuwa Hanotaa Laamiya Gaasuwan Kumetta Saꞌan Suullida Kattaa Qaxuwaa—Geeshsha Maxaafay Woygii?

Carkkuwa hanotaa laamiya bolli Yukireene olay gujettidi, kumetta saꞌan kattay iita qaxuwatanaadan oottiiddi deꞌees. Daro asay gidiyagaa keena qumaa demmanawu metootiyo dicciiddi deꞌiya biittatun hagee waanna meto.

• “Olay, carkkuwa hanotaa laamee, lambbaa alꞌꞌotettaynne harabay kattay qaxuwatanaadan oottiiddi deꞌees.”—Antoniyo Gutereeza, Kawotettatu Issippetettaa Waanna Xaafiya, Isiine 17, 2023.

• “Raashiya Yukireene biittaappe kattaa ayfiya hara biitti kiittanawu maacettido maachchaappe kiyaasu. Hegee kumetta saꞌan kattay yaa qaxuwatanaadan oottanaagaa, qassi Huuphessa Afirkkaanne Giddo Arshsho mala hiyyeesa biittatun kattaa alꞌꞌoy yaa suullanaagaa eranchchati yootoosona.”—Atalayar.com, Isiine 23, 2023.

Kattaa qaxuwaabaanne sinttanaabaa Geeshsha Maxaafay woygiyakko beꞌa.

Kattay qaxuwatanaagaa Geeshsha Maxaafay kasetidi yootiis

• Yesuusi hagaadan hiraagiis: “Deree deriya bolli, qassi kawotettay kawotettaa bolli denddana; dumma dumma heeran koshay denddana.”—Maatiyosa 24:7.

• Geeshsha Maxaafan Ajjuutaa maxaafay oyddu leemiso paraasatubaa qonccissees. He paraasatuppe issoy olaa leemiso. Appe kaallidi, namisaa leemiso paraaway deꞌees; hegee kattay qaxuwatanaagaanne iita alꞌꞌanaagaa bessees. “Amara parai kiyidaagaa be7aas; qassi he paraa toggidaagee ba kushiyan meezaanaa oiqqiis. Taani . . . cenggurssa milatiyaabaa siyaas, He cenggurssai, “Issi gallassa oosuwaayyo damoozai issi guruure gistte; qassi issi gallassa oosuwaayyo damoozai heezzu guruure bangga” . . . yaagishin siyaas.”—Ajjuutaa 6:5, 6.

Koshaabaa yootiya ha hiraagati Geeshsha Maxaafay ‘wurssetta gallassata’ giyo ha wodiyan polettiiddi deꞌoosona. (2 Ximootiyoosa 3:1) ‘Wurssetta gallassatubaanne’ Ajjuutaa maxaafan deꞌiya oyddu paraasatubaa gujjada eranawu, Alamee 1914ppe Doommidi Laamettiis giya biiduwa beꞌa, qassi “Oyddu Paraasata—Eti Oonee?” giya huuphe yohuwa nabbaba.

Geeshsha Maxaafay waati maaddana danddayii?

• Kattaa alꞌꞌuwa woy qaxuwaa mala waayissiya hanotaa eqettanawu maaddana danddayiya loꞌꞌo zoree Geeshsha Maxaafan deꞌees. “Guutta Aquwa Siitada Waata Goꞌettana Danddayay?” giya huuphe yohuwan amarida leemisota beꞌa.

• Geeshsha Maxaafay ubbabay giiganaagaa hidootaakka yootees. ‘Biittan daro kattay mokkana’ wodiyabaanne ubba asawu kumi palahiya qumay deꞌana wodiyabaa I yootees. (Mazamure 72:16) Ha sinttanaa hidootaabaanne neeni an ammanettana danddayiyoy aybissakko gujjada eranawu, “Sinttappe Loꞌꞌo Wodee Yaanaagaa Ammanettana Danddayiyoo?” giya huuphe yohuwa nabbaba.