Alamiyaa Wanccay Tumuppe Asay Issippetettan Deꞌanaadan Oottana Danddayii?—Geeshsha Maxaafay Woygii?

Hidaare 20ppe Tisaase 18, 2022 gakkanawu deꞌiya FIFA Alamiyaa Wanccaa ichchashu biiloone gidiya asay beꞌana danddayiyoogee odettiis. Hegaa mala ispportte kaassati asay beꞌiyo wode issippetettay deꞌanaadan oottiyoogaappe aadhdhiyaabawu maaddana danddayees giidi daroti qoppoosona.

• “Ispporttiyawu alamiyaa laammiyo wolqqay deꞌees. Ispporttee asaa denttettana danddayees. Ispporttiyawu maalaaliya ogiyan asay issippetettan deꞌanaadan oottiyo wolqqay deꞌees.”—Nelssen Manddeela, kase Tohossa Afirkkaa pirezddanttiyaa.

• “Toho kuwaasiyaa kaassay . . . dummatettay deꞌishinkka asay issi malabaa hidootanaadan, issippe ufayttanaadan, issi malabaa qoppanaadan, qassi siiqettanaadan oottees.”—Jani Infantiina, FIFA pirezddanttiyaa.a

Alamiyaa Wanccay woy hara ispportte kaassay hegaa mala loꞌꞌobaa oottana danddayii? Sarotettaynne issippetettay yaana danddayii?

Asay issippetettan deꞌanaadan oottanee?

Ha laytta Alamiyaa Wanccay asay kuwaasiyaa kaassaa xalla gidennan hegaappe aadhdhiyaabaa qoppanaadan oottiis. Ispportte kaassati asaa maataa, zariyan zaggiyoogaanne ikkonoomiyaa dummatettaa gujjin, deretettaanne polotikaa allaalleta xeelliyaagan asay haasayanaadan oottidosona.

Alamiyaa Wanccaa mala kumetta saꞌan deꞌiya ispportte kaassata beꞌiyoogan daro asay haꞌꞌikka ufayttees. Gidikkonne, he kaassati asay koyiyoogaa keena issippetettay deꞌanaadan oottana danddayokkona. Ubba hegeeti, Geeshsha Maxaafay ‘wurssetta gallassaa’ malaata giidi yootiyo shaahettanaadan oottiya eeshshaanne oosuwaa bessoosona.—2 Ximootiyoosa 3:1-5.

Ha alamiyan issippetettay deꞌanaagaa bessiya tumu hidootaa

Kumetta saꞌan issippetettay deꞌanaagaa Geeshsha Maxaafay yootees. Saꞌan deꞌiya asa ubbay “Xoossaa kawotettaa” geetettiya saluwaa kawotettaa haaruwan issippetettan deꞌanaagaa Geeshsha Maxaafay yootees.—Luqaasa 4:43; Maatiyoosa 6:10.

He Kawotettaa Kawoy Yesuus Kiristtoosi kumetta saꞌan sarotettay deꞌanaadan oottana. Geeshsha Maxaafay hagaadan gees:

• “Xillotettai daayo; aginai xayana gakkanaassi sarotettai daro.”—Mazamure 72:7.

• “A xeesiya hiyyeesata . . . naaquwaappenne makkalaappe i wozees.”—Mazamure 72:12, 14.

Ha wodiyankka, Yesuusi tamaarissidobay 239 biittan deꞌiya daro miiloone asay issippetettan deꞌanaadan oottiis. Eti harata ixxiyoogaa aggana koshshiyoogaa tamaaridosona. Gujjada eranawu, “Ixuwaa Xoonana Danddayoos” giya huuphe yohuwaa xeella.