Xoqqa Maatay Deꞌiyo Payyatettaa Oosanchchay Sooshaal Miidee Yelagata Qohana Danddayiyogaa Yootiis—Geeshsha Maxaafay Woygii?

Uddufune 23, 2023n, Amarkkan xoqqa maatay deꞌiyo payyatettaa oosanchchay sooshaal miidee daro yelagata qohiiddi deꞌiyogaa asawu yootiis.

• “Sooshaal miidee issi issi naatanne yelagata maaddana danddayikkonne, guuggiyanne bollaa payyatettan eta keehi qohana danddayiyogaa bessiya daro naqaashay deꞌees.”—Soshaal Miidiyanne Yelagatu Guuggiya Payyatettaa: Amarkkaa Asaa Payyatettaa Halaafiya Qofaa, 2023.

He qofaynne pilggidoy nuuni hirgganadan oottiya gaasota qonccissiis.

• Layttay 12ppe 15 gakkanawu deꞌiyo, “gallassaa giddon 3 saatiyappe daruwa sooshaal miidiya goꞌettiya [yelagati] unꞌꞌettiyogaa mala guuggiya sahuwa sahettana danddayiyo injjee dakko daro.”

• Layttay 14 gidido, “sooshaal miidiya darotoo goꞌettiyaageeti maara xiskkokkona, inttenneetiyan qohettoosona, bantta meraa ixxoosona, banttana pattennabadan xeelloosonanne unꞌꞌettoosona. Hegaa malay attumaageetuppe aaruwan maccaageeta gakkees.”

Hagaa mala qohotuppe yelidaageeti bantta naata waati naagana danddayiyonaa? Geeshsha Maxaafay maaddiyabaa zorees.

Yelidaageeti ay oottana danddayiyonaa?

Naatubaa akeekite. Intte yelidaageeta gidiyo gishshawu, gakkana danddayiya qohuwa akeekidi intte naꞌay sooshaal miidiya goꞌettana bessiyakko bessennaakko kuuyite.

• Geeshsha Maxaafaa maaraa: “Na7i waanidi de7ana bessiyaakko tamaarissa.”—Leemiso 22:6.

• Gujjada eranawu, “Ta Naꞌay Sooshaal Miidiya Goꞌettanaadan Paqqadoo?” giya huuphe yohuwa nabbaba.

Intte naꞌay sooshaal miidiya goꞌettanaadan paqqadikko, qohana danddayiya hanotata akeekite, qassi intte naꞌay intternneetiya waati goꞌettiyakko ubbatoo kaallite. Waatidi?

Intternneetiyan qohiyabatuppe intte naata naagite. Qohiyabata akeekidi hegeetuppe naagettanaadan intte naata loohissite.

• Geeshsha Maxaafaa maaraa: “Intte giddon shaaramuxiyoogeenne tunatetta ubbai, woi miishsha amottiyoogee mulekka siyettoppo. Yeellayiyaabainne eeyya haasayai woi pattenna qiree . . . intte matan mulekka de7oppo.”—Efisoona 5:3, 4.

• Maaddiya qofaa demmanawu, “Intte Yelaga Naꞌay Sooshaal Miidiya qohenna Ogiyan Goꞌettanaadan Loohissiyogaa” giya huuphe yohuwa nabbaba.

Zawaa wottite. Leemisuwawu, intte naꞌay awude, qassi ay keena wodiyawu shooshaal miidiya goꞌettana bessiyakko higgiya kessite.

• Geeshsha Maxaafaa maaraa: “Intte waani de7iyaakko akeekite; aadhdhida eratettaara de7iya asadan [deꞌite]. . . . intte lo77o wodiyaa coo xaissoppite.”—Efisoona 5:15, 16.

• Sooshaal miidiya goꞌettiyo ogiyan zawaa wottiyoogee koshshiyo gaasuwa intte naꞌay akeekanaadan maaddanawu, Soshiyal Networkiyaa Goꞌettiyo Ogiyan Akeekancha Gida giya bootta saleedaa biiduwa beꞌa.