Giddo Arshsho Olaa—Geeshsha Maxaafay Woygii?

Amarkkaynne Israaꞌeele Iraaneera olettiyo olay kumetta saꞌan deꞌiya asay aybi hananaakko giidi unꞌꞌettanaadan oottiis. Hanotay keehi iitidi, hara daro biittatakka qohanee? Kawotettati olaa teqqananne sarotettaa ehaana danddayiyonaa?

Geeshsha Maxaafaa hiraagaabaa nabbabiyageeti Giddo Arshshon denddida ha olay Ajjuutaa maxaafan odettida Armmageedoona olawu doometta gidanaakkonne giidi hirggoosona.

Geeshsha Maxaafay woygii?

Kawotettati Giddo Arshsho olay eqqanaadan oottanee?

Geeshsha Maxaafay hagaadan gees: “Asi ashshanau danddayenna gishshau, asaa halaqatun ammanettoppite.”—Mazamure 146:3.

Kawotettati Giddo Arshshon sarotettay deꞌanaadan oottana danddayiyakkonne nu erokko. Shin polotikan kaalettiya uri, asa kawotetti, woy issi citay olaa xayssidi awudenne xayenna sarotettay deꞌanaadan mule oottana danddayennaagaa Geeshsha Maxaafay qonccissees. ‘Saꞌaa gaxaa gakkanaassi deꞌiya olaa teqqana’ danddayiyay Xoossaa xalaala.—Mazamure 46:9.

• Gujjada eranawu, “Olay Xayana—Waanidi?” giya Wochchiyo Keelaa maxeetiya nabbabba.

Giddo Arshsho olay kasetidi odettidabay polettanaadan oottiiddi deꞌii?

Geeshsha Maxaafay hagaadan gees: “Intte matasankka haahosankka denddiya olaabaa siyana. . . . deree deriya bolli, qassi kawotettay kawotettaa bolli denddana.”—Maatiyosa 24:6, 7.

Ha wodiyan Giddo Arshshon denddida olay “wodiya wurssettawu” malaata gididabatuppe issuwa, qassi nuuni “wurssetta gallassatun” deꞌiyogaa mintti ammanettanaadan oottiya gujo naqaasha. (Maatiyosa 24:3; 2 Ximootiyosa 3:1) Ha wodiyan deꞌiya daro olay Xoossay olaanne asaa barchcheyiya hara meto ubbaa xayssanawu matan issibaa oottanaagaa bessees.

• Gujjada eranawu, “‘Wurssettaa Gallassaa,’ Woy ‘Wodiyaa Wurssettaa’ Malaatay Aybee?” giya huuphe yohuwa nabbaba.

Armmageedoona olay doommanay Giddo Arshshoonee?

Geeshsha Maxaafay hagaadan gees: “He iita ayyaanati kawota Ibraisxxe qaalan Armmageedoona giyo sohuwaa shiishshidosona.”—Ajjuutaa 16:16.

Armmageedooni Giddo Arshshon doommiya, asay olettiyo ola gidenna. Hegee kumetta saꞌan deꞌiya kawotettati ubbay Xoossaara olettiyo ola.

• Gujjada eranawu, “Armmageedoona Olay Aybee?” giya huuphe yohuwa nabbaba.

Unꞌꞌissiya wodiyan genccanawu nuna aybi maaddana danddayii?

Geeshsha Maxaafay hagaadan gees: “Intte aybissinne hirggoppite, shin ubbabaa Xoossaayyo woosan yootite; intte woossiyo wode watiwatitenne A galatite.”—Piliphphisiyusa 4:6.

Xoossaa Yihoowia nuuni akko woossanaadan shoobbees. Xoossay nuussi qoppiyo gishshawu, nu woosaa siyana, qassi unꞌꞌissiyabaa genccanaadan nuna maaddana. (1 Pheexiroosa 5:7) I hegaadan oottiyo issi ogee olay denddiyoy aybissakko qonccissiyogaa xalla gidennan, olay waani xayanaakko, qassi nu waayiyanne tuggaa xayssanawu I waatanaakkokka nuussi qonccissiyogaana.—Ajjuutaa 21:3, 4.

• Xoossay nuna waati maaddiyakko gujjada eranawu, “Geeshsha Maxaafaappe Minttettiya Qofaa Demmana Danddayaasa” giya huuphe yohuwa nabbaba.