Denddoy Aybee?

Geeshsha Maxaafay yootiyoobaa

Geeshsha Maxaafan “hayquwaappe denddiyoogaa” geetetti birshshettida qaalay, “denddiyoogaa” woy “zaarettidi eqqiyoogaa” giyo birshshettay deꞌiyo, Giriikettuwan anastasis giya qaalaappe yiis. Hayquwaappe denddiya uri, hayqqanaappe kase deꞌiya ba hanotaa laammennan zaarettidi paxa deꞌees.—1 Qoronttoosa 15:12, 13.

Galꞌꞌa Maachchaa giyo Ibraawetto Geeshsha Maxaafan “hayquwaappe denddiyoogaa” giya qaalay baawa, shin he timirttee deꞌees. Leemisuwawu, hananabaa yootiya Hooseꞌa baggaara Xoossay hagaadan giidi qaalaa geliis: “Eta taani duufuwaappe ashshana; haiquwaa wolqqaappekka wozana.”—Hoose7a 13:14; Iyyooba 14:13-15; Isiyaasa 26:19; Daaneela 12:2, 13.

Asay hayquwaappe denddanay awaanee? Amarida asati saluwan Kiristtoosaara kawo gididi haaranawu hayquwaappe denddana. (2 Qoronttoosa 5:1; Ajjuutaa 5:9, 10) Geeshsha Maxaafay hegaa ‘koyro dendduwaa’ yaagees; hegee appe kaallidi hara denddoy deꞌiyoogaa qonccissees. (Ajjuutaa 20:6) Hayquwaappe he naaꞌꞌantto dendduwaa denddiya keehi daro asay saꞌan ufayttidi deꞌana.—Mazamure 37:29.

Asay hayquwaappe waani denddanee? Yesuusi asaa hayquwaappe denttanaadan Xoossay ayyo wolqqaa immiis. (Yohaannisa 11:25) Duufuwan deꞌiya, Xoossay hassayiyo ubbata Yesuusi denttana; eti bantta eeshshaynne eti hassayiyoobay laamettennan hayquwaappe denddana. (Yohaannisa 5:28, 29) Amaridaageeti saluwan deꞌanawu denddana; qassi saꞌan deꞌanawu denddiya haratu bollay muleera payya gidana.—Isiyaasa 33:24; 35:5, 6; 1 Qoronttoosa 15:42-44, 50.

Hayquwaappe denddanaageeti oonee? “Asai ubbai, worddoikka xilloikka haiquwaappe denddana” giidi Geeshsha Maxaafay yootees. (Oosuwaa 24:15) Xillo geetettidaageeti Nohe, Saarinne Abrahaame mala Xoossawu ammanettida asata. (Doomettaabaa 6:9; Ibraawe 11:11; Yaaqooba 2:21) Qassi, worddo geetettidaageeti Xoossaabaa tamaaridi eribeenna gishshawu ayyo azazettibeenna asata.

SHin, laamettanawu koyennan ixxidi hayqqida makkalanchcha asati hayquwaappe denddokkona. Hegaa mala asati hayqqiyo wode merinawu xayiyo gishshawu, etawu zaarettidi denddiyo hidooti baawa.—Maatiyoosa 23:33; Ibraawe 10:26, 27.

Asay hayquwaappe awude denddanee? Saluwan deꞌanaageeti, Kiristtoosi qoncciyo wode denddanaaga Geeshsha Maxaafay yootees. He wodee 1914n doommiis. (1 Qoronttoosa 15:21-23) Saꞌan deꞌanaageeti, Yesuus Kiristtoosa SHaꞌu Layttaa Haaruwan saꞌay gannate gidiyo wode deꞌanawu denddana.—Luqaasa 23:43; Ajjuutaa 20:6, 12, 13.

Neeni dendduwan ammanana danddayiyoy aybissee? Issuwaa issuwaa asay ba ayfiyan beꞌido uddufun dendduwaabaa Geeshsha Maxaafay yootees. (1 Kawotu Maxaafaa 17:17-24; 2 Kawotu Maxaafaa 4:32-37; 13:20, 21; Luqaasa 7:11-17; 8:40-56; Yohaannisa 11:38-44; Oosuwaa 9:36-42; 20:7-12; 1 Qoronttoosa 15:3-6) Leemisuwawu, Alꞌꞌaazari hayqqoosappe oyddu gallassay aadhdhi simmin, Yesuusi maalaaliya hanotan daro asay beꞌishin hayquwaappe A denttiis. (Yohaannisa 11:39, 42) Yesuusa eqettiyaageeti hegaa kashi gaana danddayibeenna gishshawu, anne Alꞌꞌaazara woranawu halchchidosona.—Yohaannisa 11:47, 53; 12:9-11.

Hayqqidaageeta denttanawu Xoossawu wolqqaykka koshshaykka deꞌiyoogaa Geeshsha Maxaafay yootees. I ubba asaa hanotaa hassayiyo gishshawu, I ubbabaa oottana danddayiyo ba wolqqan eta hayquwaappe denttana. (Iyyooba 37:23; Maatiyoosa 10:30; Luqaasa 20:37, 38) Xoossawu hayqqidaageeta denttanawu wolqqay deꞌees; qassi I yaatanawu keehi koyees! Sinttappe Xoossay hayqqidaageeta denttanaagaa xeelliyaagan, I ba ‘medhdhidoogeeta beꞌanawu laamotiyoogaa’ Geeshsha Maxaafay yootees.—Iyyooba 14:15.

Dendduwaa xeelliyaagan odettiya bala qofata

Bala qofaa: Dendduwaa giyoogee ashoynne shemppoy zaarettidi issippe gayttiyoogaa giyoogaa.

Tumaa: Geeshsha Maxaafay asi shemppo gidiyoogaa yootees; yaatiyo gishshawu shemppo giyoogee asi hayqqiyo wode appe kiyidi harasan paxa deꞌiyaaba gidenna. (Doomettaabaa 2:7; Hizqqeela 18:4) Issi asi hayquwaappe denddiyo wode, Xoossay A zaarettidi medhdhees.

Bala qofaa: Issi issi asay denddi simmidi sohuwaara xayi aggees.

Tumaa: Geeshsha Maxaafay, “Iitabaa oottidaageeti pirddettanau denddana” yaagees. (Yohaannisa 5:29) SHin, eti kase oottoban gidennan, hayquwaappe denddidi oottiyooban he pirdday imettana. Yesuusi hagaadan giis: “Haiqqida asai Xoossaa Na7aa cenggurssaa siyiyo wodee yaana; . . . He cenggurssaa siyiyaageeti paxa de7ana.” (Yohaannisa 5:25) Hayquwaappe denddidi tamaaridobaa ‘siyiyaageetu’ woykko azazettiyaageetu sunttay ‘deꞌo maxaafan’ xaafettana.—Ajjuutaa 20:12, 13.

Bala qofaa: Issi uri ba kase bollaara hayquwaappe denddees.

Tumaa: Issi uri hayqqi simmin A bollay musees.—Eranchchaa 3:19, 20.