Haattan Muukettiyogee Aybee?

Geeshsha Maxaafay yootiyobaa

Haattan muukettiyogeea issi uri muleera haatta giddo gelidi kiyiyogaa qonccissees. Haattan muukettida daro asatubaa Geeshsha Maxaafay yootees. (Oosuwa 2:41) Hegeetuppe issoy Yorddaanoosa Shaafan haatta giddo muleera gelidi muukettida Yesuusabaa yootiya taarikiya. (Maatiyosa 3:13, 16) Hegaappe amarida layttay aadhdhi simmin, Toophphiya bitanee manddariiddi deꞌiyo ogiya matan deꞌiya ‘haattan’ gelidi muukettiis.—Oosuwa 8:36-40.

Yesuusi A kaalliyageeti haattan muukettana koshshiyogaa tamaarissiis. (Maatiyosa 28:19, 20) Kiitettida Pheexiroosikka hegaabaa loytti qonccissiis.—1 Pheexiroosa 3:21.

Ha huuphe yohuwan

• Haattan muukettiyogaa giyogee woygiyogee?

• Gacino naata haattan muukkiyogaabaa woy kiristtinnaa denttiyogaabaa Geeshsha Maxaafay woygii?

• Aawaa, Naꞌaanne geeshsha ayyaanaa sunttan haattan muukettiyogaa giyogee woygiyogee?

• Zaarettidi haattan muukettiyogee nagaree?

• Geeshsha Maxaafan odettida hara muuhata

• Kiristtaanetu muuhaa xeelliyagan asay qoppiyo bala qofata

Haattan muukettiyogaa giyogee woygiyogee?

Haattan muukettiyogee, issi uri ba nagaran zilꞌꞌettidi laamettidoogaanne Xoossay koyiyobay ayba gidikkokka oottanawu qaalaa gelidoogaa hara asaa bessiyoba. Yaatanawu, he uri Xoossaayyonne Yesuusayyo azazettidi deꞌana koshshees. Haattan muukettidaageeti, hegaappe simmin merinaa deꞌuwawu efiya ogiyan hemettiyogaa doommoosona.

Haatta giddo gelidi muukettiyogee, issi uri ba deꞌuwan laamettidoogaa qonccissiyo loꞌꞌo malaata. Aybissi? Muukettiyogaa Geeshsha Maxaafay moogettiyogaara geeddarssees. (Roome 6:4; Qolasiyasa 2:12) Haatta giddo gelidi muukettiyogee, issi uri ba kase deꞌuwawu hayqqidoogaa bessiyaba. He uri haattaappe kiyiyogee, I bana Xoossawu sheedhdhida Kiristtaane gididi, ooratta deꞌuwa doommiyogaa bessiyaba.

Gacino naata haattan muukkiyogaabaa woy kiristtinnaa denttiyogaabaa Geeshsha Maxaafay woygii?

Geeshsha Maxaafay “kiristtinnaa denddiyogaabaa” woy “kiristtinnaa denttiyogaabaa”b yootenna. Gacino naati haattan muukettana bessiyogaa qonccissiya qofaykka Geeshsha Maxaafan baawa.

Gacino naata haattan muukkiyogee Geeshsha Maxaafaara maayettennaba. Issi uri haattan muukettanaappe kase oottana bessiyobati deꞌiyogaa Geeshsha Maxaafay yootees. Leemisuwawu, he izaawu guuxxiis giishin, Xoossaa Qaalan deꞌiya waanna timirtteta akeekananne hegaara maayettiya ogiyan deꞌana bessees. I ba nagaran zilꞌꞌettidi laamettana bessees. Qassi, I ba deꞌuwa Xoossawu sheedhdhidoogaa woosan qonccissana bessees. (Oosuwa 2:38, 41; 8:12) Hegeeti gacino naati oottana danddayennabata.

Aawaa, Naꞌaanne geeshsha ayyaanaa sunttan haattan muukettiyogaa giyogee woygiyogee?

Yesuusi bana kaalliyageetussi hagaadan giis: “Asaa tana kaallanaadan tamaarissidi, Aawaa sunttan, Naꞌaa sunttaaninne geeshsha ayyaanaa sunttan eta haattan muukkitenne taani inttena azazido ubbabaa naaganaadan eta tamaarissite.” (Maatiyosa 28:19, 20) “Sunttan” giyogee, haattan muukettiya uri Aawawunne Naꞌawu deꞌiya maataanne sohuwa, qassi Xoossaa geeshshaa ayyaanay ay oottanawu maaddiyakko akeekana koshshiyogaa qonccissiyaba. Leemisuwawu, Pheexiroosi wobbe gididi yelettida issi bitaniya, “Naazireete Yesuus Kiristtoosa sunttan hemetta!” yaagiis. (Oosuwa 3:6) Pheexiroosi gaanawu koyidobay qoncce; I Kiristtoosawu deꞌiya maataa akeekiisinne he bitaniya pattiyo wolqqaa appe demmidoogaa qonccissiis.

• “Aawaa” giyogee Xoossaa Yihoowac qonccissees. Yihoowi Medhdhidaagaa, Deꞌuwa Immidaagaa, qassi Ubbaa Danddayiya Xoossaa gidiyo gishshawu, awu zawi baynna maatay deꞌees.—Doomettaabaa 17:1; Ajjuutaa 4:11.

• “Naꞌaa” giyogee nu gishshawu ba deꞌuwa immida Yesuus Kiristtoosa qonccissees. (Roome 6:23) Xoossay asawu halchchidobaara gayttidaagan Yesuusi oottiyo gitabaa nuuni akeekananne nashshana xayikko, attana danddayokko.—Yohaannisa 14:6; 20:31; Oosuwa 4:8-12.

• ‘Geeshsha ayyaanay’ Xoossay issibaa oottanawu goꞌettiyo A wolqqaa.d Xoossay ubbabaa medhdhanawu, deꞌuwa immanawu, I erissidobaa yootiyageetussinne haratussi ba kiitaa gattanawu, qassi A sheniya polanawu maaddiya wolqqaa etawu immanawu ba geeshsha ayyaanaa goꞌettiis. (Doomettaabaa 1:2; Iyyooba 33:4; Roome 15:18, 19) Xoossay, Geeshsha Maxaafaa xaafeti ba qofaa xaafanaadan eta denttettanawukka ba geeshsha ayyaanaa goꞌettiis.—2 Pheexiroosa 1:21.

Zaarettidi haattan muukettiyogee nagaree?

Bantta haymaanootiya laammiya daroti deꞌoosona. Shin eti bantta kase haymaanootiyan deꞌiiddi haattan muukettidaba gidikko shin? Eti zaarettidi haattan muukettikko, hegee nagaree? Issoti issoti ee giidi zaaroosona, eti hegaadan giyoy Efisoona 4:5n, “Goday issuwa, ammanoy issuwa, muuhettay issuwa” giya qofaa maaraana gidana danddayees. Shin, ha xiqisee issi uri zaarettidi haattan muukettana danddayenna giyogaa qonccissenna. Hegaadan giyoy aybissee?

Yuushuwan deꞌiya qofaa. Efisoona 4:5 yuushuwan deꞌiya qofay bessiyogaadan, Phawuloosi tumu Kiristtaaneti ammanuwan issuwa gidana koshshiyogaa qonccissiiddi deꞌees. (Efisoona 4:1-3, 16) Eti issi Godaa, Yesuus Kiristtoosa kaalliyo wode, ammanuwan issuwa gidiyo, woy Geeshsha Maxaafaa timirttiya akeekiyo wode, qassi haattan muukettiyageetuppe koyettiya Geeshsha Maxaafay yootiyo issi malabaa kaalliyo wode xallan hegaa mala issippetettay deꞌana danddayees.

Kiitettida Phawuloosi haattan kase muukettida issoti issoti zaarettidi muukettanaadan minttettiis. Hegawu gaasoy eti kase haattan muukettiyo wode Kiristtaanetu timirttiya wurssi akeekibeenna gishshataassa.—Oosuwa 19:1-5.

Haattan muukettiyo likke ogiya. Issi uri Xoossay ufayttiyo ogiyan haattan muukettanawu Geeshsha Maxaafaa tumaa geeshshidi erana bessees. (1 Ximootiyosa 2:3, 4) Geeshsha Maxaafaara maayettenna haymaanoote timirttetu maaran issi uri haattan muukettikko, Xoossay hegaa ekkenna. (Yohaannisa 4:23, 24) He uri loꞌꞌobaa qoppidi oottidaba gidikkokka, I ‘Xoossaa geeshshi eribeenna.’ (Roome 10:2) I Xoossan nashettanawu, Geeshsha Maxaafaa tumaa tamaarana, tamaaridobaa oosuwan peeshshana, ba deꞌuwa Xoossawu sheedhdhana, qassi zaarettidi haattan muukettana bessees. Hegaa mala hanotan issi uri zaarettidi haattan muukettikko, hegee nagara gidenna. Ubba I oottana bessiya likkebaa oottiis.

Geeshsha Maxaafan odettida hara muuhata

Kiristtoosa kaalliyageeti haattan muleera gelidi muukettiyogaappe dumma halchchuwan muukettiyo hara muuhatubaa Geeshsha Maxaafay yootees. Amarida leemisota beꞌa.

Haattan Muukkiya Yohaannisi muukkidoogaa.e Ayhudatinne laamettidi Ayhuda gididaageeti Muuse Higgiya, hegeekka Xoossay Muuse baggaara Israaꞌeelatussi immido Higgiya kanttidi oottido nagaran zilꞌꞌettidi laamettidoogaa bessanawu Yohaannisan muukettidosona. Yohaannisi eta haattan muukkidoogee, asay Masiya, Naazireete Yesuusa, eranaadaaninne ammananaadan maaddiis.—Luqaasa 1:13-17; 3:2, 3; Oosuwa 19:4.

Yesuusi muukettidoogaa. Yesuusi Haattan Muukkiya Yohaannisan muuhettidoogee hara muuhaappe keehi dummatees. Yesuusi wottiyobi baynna asa, qassi ayba nagaranne oottibeenna. (1 Pheexiroosa 2:21, 22) Yaatiyo gishshawu, I haattan muukettidoogee nagaraappe simmiyogaara, woy ‘loꞌꞌo kahawu Xoossaa woossiyogaara’ gayttidaba gidenna. (1 Pheexiroosa 3:21) Hegaappe dumma hanotan, A muuhay I yaana geetettida Masiya, woykko Kiristtoosa gididi Xoossay koyiyobaa oottanawu bana immidoogaa bessees. Hegee I nu gishshawu ba deꞌuwa aatti immiyogaakka gujjees.—Ibraawe 10:7-10.

Geeshsha ayyaanan muukettiyogaa. Haattan Muukkiya Yohaannisikka Yesuusikka geeshsha ayyaanan muukettiyogaabaa qonccissidosona. (Maatiyosa 3:11; Luqaasa 3:16; Oosuwa 1:1-5) Hegee geeshsha ayyaanaa sunttan haattan muukettiyogaappe dummatees. (Maatiyosa 28:19) Hegaadan giyoy aybissee?

Yesuusa kaalliyageetuppe amaridaageetu xalaalay geeshsha ayyaanan muukettoosona. Eti saluwan Kiristtoosaara kawonne kahine gididi saꞌaa haaranawu xeegettido gishshawu geeshsha ayyaanan tiyettoosona.f (1 Pheexiroosa 1:3, 4; Ajjuutaa 5:9, 10) Gannate saꞌan merinawu deꞌanawu hidootiya, Yesuusa kaalliya daro miiloone asaa eti haarana.—Maatiyosa 5:5; Luqaasa 23:43.

Kiristtoos Yesuusa giddonne A hayquwa giddo muukettiyogaa. Geeshsha ayyaanan muukettiyageeti ‘Kiristtoos Yesuusa giddokka muukettoosona.’ (Roome 6:3) Yaatiyo gishshawu, hegaadan muukettiyageeti Yesuusaara saluwan haarana A kaalliya tiyettidaageeta. Eti Yesuusa giddo muukettiyogan, tiyettidaageeti deꞌiyo A galchchaa yame gidoosona. I galchchawu huuphe, qassi eti bolla.—1 Qoronttoosa 12:12, 13, 27; Qolasiyasa 1:18.

Tiyettida Kiristtaaneti ‘Yesuusa hayquwa giddokka muukettoosona.’ (Roome 6:3, 4) Eti Yesuusa leemisuwa kaallidi, Xoossawu azazettanawu bantta goꞌꞌaa aggi bayidoogaa bessiya deꞌuwa deꞌoosona, qassi ha saꞌan merinawu deꞌiyo hidootaakka aggi bayoosona. Eti hayqqidi, saluwan ayyaana mereta gididi hayquwappe denddiyo wode, ha leemiso muuhay polettees.—Roome 6:5; 1 Qoronttoosa 15:42-44.

Taman muukettiyogaa. Haattan Muukkiya Yohaannisi I yootiyobaa ezggiyageetussi hagaadan giis: “[Yesuusi] inttena geeshsha ayyaanaaninne taman hegaadan oottana. A kushiyan kattaa suraggiyobay deꞌees; I kattaa qoxxiyo ba awudiya muleera geeshshidi, gisttiya gootaran qolana, shin dalaa toꞌenna taman xuuggana.” (Maatiyosa 3:11, 12) Taman muukettiyogeenne geeshsha ayyaanan muukkiyogee dummatiyogaa akeeka. Yohaannisi ha leemisuwan yootanawu koyidobay aybee?

Gisttee Yesuusi yootiyobaa siyidi azazettiyageeta qonccissees. He asati geeshsha ayyaanan muukettana danddayoosona. Dalay Yesuusi yootiyobaa siyennaageeta qonccissees. Eti wurssettan taman muukettana, hegee eti merinawu xayanaagaa qonccissees.—Maatiyosa 3:7-12; Luqaasa 3:16, 17.