Saluwaa Biyaageeti Oonee?
Geeshsha Maxaafay yootiyoobaa
Hayquwaappe denddiyo wode saluwan deꞌanawu baana, qoodan amarida ammanettida Kiristtaaneta Xoossay doorees. (1 PHeexiroosa 1:3, 4) Eti he woytuwaa demmanawu ubbatoo Xoossawu azazettananne ammanuwan minni deꞌana koshshees.—Efisoona 5:5; Piliphphisiyuusa 3:12-14.
Saluwaa biyaageeti yan ay oottanee?
Eti kawonne qeese gididi Yesuusaara issippe 1,000 layttawu haarana. (Ajjuutaa 5:9, 10; 20:6) Eti “ooratta sa7aa” woykko saꞌan deꞌiya asaa haariya ‘ooratta salo’ woykko saluwaa kawotettan ayssiyaageeta gidana. Eti saluwan uttidi haarana; qassi asay koyro Xoossay halchchidoogaadan deꞌana mala maaddana.—Isiyaasa 65:17; 2 PHeexiroosa 3:13.
Saluwan deꞌanawu denddiyaageeti aappunee?
Geeshsha Maxaafay, 144,000u asati saluwan deꞌanawu denddanaagaa yootees. (Ajjuutaa 7:4) Ajjuutaa 14:1-3y, “Dorssai Xiyoone Deriyaa bolli” eqqidoogaanne, “issi xeetanne oitamanne oiddu sha7u asati aara issippe” deꞌiyoogaa Yohaannisi ajjuutan beꞌidoogaa yootees. Ha ajjuutan, ‘Dorssaa’ geetettiday hayquwaappe denddida Yesuusa. (Yohaannisa 1:29; 1 PHeexiroosa 1:19) ‘Xiyoone Deree,’ Yesuusawunne aara haarana 144,000 asatuyyo deꞌiya gita maataa bessiyaaba.—Mazamure 2:6; Ibraawe 12:22.
Yesuusaara A Kawotettan haarana, “i xeegidoogeetinne dooridoogeeti” ‘amarida dorssa wudekka’ geetettidosona. (Ajjuutaa 17:14; Luqaasa 12:32) Hegee, Yesuusa dorssatu ubbaagaara gatti xeelliyo wode, eta qooday keehi guutta gidiyoogaa bessees.—Yohaannisa 10:16.
Saluwaa biya asatuura gayttidaagan odettiya bala qofata
Bala qofaa: Loꞌꞌo asa ubbay saluwaa bees.
Tumaa: Loꞌꞌo asaappe dariya baggay saꞌan merinawu deꞌanaagaa Xoossay qaalaa geliis.—Mazamure 37:11, 29, 34.
Yesuusi, “Saluwaa kiyidabi ooninne baawa” yaagiis. (Yohaannisa 3:13) Yaagiyoogan, I saꞌaa yaanaappe kase hayqqida Abrahaama, Muusa, Iyyoobanne Daawita mala loꞌꞌo asati saluwaa bibeennagaa qonccissiis. (Oosuwaa 2:29, 34) SHin, eti saꞌan merinawu deꞌanawu duufuwaappe denddana.—Iyyooba 14:13-15.
Saluwan deꞌanawu denddiyoogee ‘koyro dendduwaa’ geetettees. (Ajjuutaa 20:6) Hegee hara denddoykka deꞌiyoogaa bessiyaaba. He denddoy saꞌan deꞌanawu denddiyoogaa.
Xoossaa Kawotettaa haaruwan ‘hayqoy deꞌennaagaa’ Geeshsha Maxaafay yootees. (Ajjuutaa 21:3, 4) Saluwan hayqoy mule deꞌi erenna gishshawu, ha hidootay polettanay saꞌaana gidiyoogee qoncce.
Bala qofaa: Saluwan woy saꞌan deꞌanawu, issi izaawu bawu doorees.
Tumaa: “Bolla de7uwau xeesiyo woituwaa” woykko saluwaa deꞌuwaa ekkana ammanettida Kiristtaaneta Xoossay doorees. (Piliphphisiyuusa 3:14) Nuuni Xoossaayyo haggaazanay saluwaanakko woy saꞌanaakko kuuyana danddayokko.—Maatiyoosa 20:20-23.
Bala qofaa: Saluwaa deꞌoy saꞌaa deꞌuwaappe keha. Saꞌan deꞌana asay saluwaa biyaageetu keena loꞌꞌo asa gidokkona.
Tumaa: Saꞌan merinawu deꞌanaageeta Xoossay “ta asaa,” ‘taani dooridoogeeta,’ qassi Yihoowan “anjjettida” asata yaagees. (Isiyaasa 65:21-23) Eti merinawu deꞌana, qassi saꞌaa gannate oottiyoogan ufayttana. Xoossay asawu halchchidobay hegaa.—Doomettaabaa 1:28; Mazamure 115:16; Isiyaasa 45:18.
Bala qofaa: Ajjuutaa maxaafan qonccida 144,000 paydoy leemisoppe attin coo qooda gidenna.
Tumaa: Ajjuutaa maxaafan leemiso paydoti deꞌikkonne, amarida paydoti coo qooda. Leemisuwawu, “Dorssai kiittido tammanne naa77atu” sunttaabaa yootees. (Ajjuutaa 21:14) Hegaadankka, 144,000 paydoy coo qooda gaanaadan oottiya naqaashaa akeeka.
Ajjuutaa 7:4y yootiyoogaadan, “issi xeetanne oitamanne oiddu sha7aa som77uwan maatafai wodhdhiis [woykko, saluwan deꞌiyo maataa ekkidosona].” He xiqisiyaappe kaallidi deꞌiya qofay hegeetuppe dummatiya hara citaabaa, “Ooninne qoodanau danddayenna zawai bainna daro asaa” yaagees. “Zawai bainna daro” asaykka Xoossaappe atotettaa demmiis. (Ajjuutaa 7:9, 10) Issi xeetanne oytamanne oyddu shaꞌay coo qooda gidennan, attana ubbaa bessiyaaba gidiyaakko, “ooninne qoodanau danddayenna” hara asaabaa yootana koshshenna.a
Hegaa bollikka, 144,000ti “sa7aa asa giddoppe wozettidaageeta” geetettidosona. (Ajjuutaa 14:4) “Baira” giya qaalay gita citawu guutta shaahuwaa qonccissiyaaba. Hegee saluwan uttidi saꞌan deꞌiya asaa haariyaageeta bessiyaaba.— Ajjuutaa 5:10.
a Hegaadankka, Robert L. Toomas giyo Profeseree Ajjuutaa 7:4n deꞌiya 144,000 qoodaabaa hagaadan giis: “Hegee 7:9n deꞌiya kuuyettida payduwaappe dummatiya kuuyettibeenna paydo. He payduwa leemiso giikko, maxaafaa giddon coo paydoy baawa.”—Ajjuutaa 1-7: An Eksejetikal Kommenteri, sinttaa 474.