Yesuusi Ay Milatii?
Geeshsha Maxaafaa zaaruwaa
Yesuusa meray he wode ay malakko Geeshsha Maxaafay yootenna gishshawu, I hagaa mala giidi ooninne suure yootana danddayenna. Yesuusa meraa eriyoogee keehi koshshiyaaba gidennaagaa hegee bessees. SHin Geeshsha Maxaafay Yesuusa bollaa xeelliyaagan amaridabaa yootees.
SHaakki erissiyaabaa: Yesuusi Ayhuda asa gidiyo gishshawu, ba aayeeppe Seema zaretu hanotaa laattiis. (Ibraawe 7:14) A shaakki erissiyaabay etaagaappe dummatiyaaba milatenna. Issi wode, I Galiilappe Yerusalaame gakkanawu ooninne erennan geeman biis. (Yohaannisa 7:10, 11) I haray atto ba mata laggetu erissiyo ashkkaratuppekka dummatiyaaba milatenna. Yesuusa oyqqanawu ola miishshaa gixxidi yiida asawu Yihudaa Asqqorootu A dummayidi bessana koshshidoogaa hassaya.—Maatiyoosa 26:47-49.
Huuphiyaa binnaanaa geesaa: Geeshsha Maxaafay “attumaagee ba huuphiyaa dichchikko, ayyo pokko” gidiyoogaa yootiyo gishshawu, Yesuusa huuphee adussa gidennaagee qoncce.—1 Qoronttoosa 11:14.
Buuchchaa: Yesuusi buuchchaa dichchiis. Ayhudatu higgee attuma asay ‘buuchchaa yuushshi aattidi qanxxennaadan’ diggiyo gishshawu, I hegaa kaalliis. (Wogaabaa 19:27; Galaatiyaa 4:4) Yesuusi waayettanaagaa Geeshsha Maxaafay yootiyo hiraagankka A buuchchaabay odettiis.—Isiyaasa 50:6.
Bollaa: Ubba naqaashaykka Yesuusa bollay mino gidiyoogaa bessees. I haggaaziyo wode, keehi darosaa hemettiis. (Maatiyoosa 9:35) I naaꞌꞌutoo Ayhuda beeta maqidasiyaa geeshshiyo wode, miishshaa laammiyaageetu xaraphpheezaa aatti yeggiis; qassi issitoo mehiyaa xurqqayyiyan yedettiis. (Luqaasa 19:45, 46; Yohaannisa 2:14, 15) Makilintokinne Istrongi giigissido Saykilopidiya giyo xuufee, “Wonggeliyan qonccida ubbabay [Yesuusa] bollay minonne payya gidiyoogaa bessees” yaagees.—SHaaho 4, sinttaa 884.
Somꞌꞌuwan beettiyaabaa: Yesuusi asaa siiqiyaagaanne qarettiyaagaa gidiyo gishshawu, I hegaa ba somꞌꞌuwan qonccissidoogeekka erettidaagaa. (Maatiyoosa 11:28, 29) Ubba qommo asay minttettuwaanne maaduwaa demmanawu akko boosona. (Luqaasa 5:12, 13; 7:37, 38) Naatikka aara gayttiyo wode ufayttoosona.—Maatiyoosa 19:13-15; Marqqoosa 9:35-37.
Yesuusa meraa xeelliyaagan asay qoppiyo balabaa
Bala qofaa: Ajjuutaa maxaafay Yesuusa huuphiyaa binnaanay bootta dorssaa ikise mala, qassi A tohoykka “taman seeridi phooliya naase” mala giyo gishshawu, issi issi asay Yesuusi Afrika asa gidana yaagees.—Ajjuutaa 1:14, 15.
Tumaa: Ajjuutaa maxaafan odettidabay malaatan qoncciis. (Ajjuutaa 1:1) Yesuusi saꞌan deꞌido wode A meray ay malakko qonccissanaassa gidennan, hayquwaappe denddi simmin awu deꞌiya eeshshaa qonccissanawu, A huupheenne tohoy leemisuwan odettiis. Ajjuutaa 1:14y geeddarssuwawu huuphiyaa qommuwaa gidennan meraa goꞌettidi, Yesuusa “huuphiyaa binnaanai bootta dorssaa ikisenne shachchaa milatees” yaagees. Hegee I daro layttaa deꞌidoogan demmido aadhdhida eratettaa bessiyaaba. (Ajjuutaa 3:14) Ha xiqisee dorssaa ikisiyaarakka shachchaarakka geeddarssiyoobay Yesuusa huuphiyaa qommuwaa gidenna.
Yesuusa tohoy “coociyaa taman seeridi phooliya nahaase giyo birataa milatees.” (Ajjuutaa 1:15) Qassi A somꞌꞌoy “wolqqappe phooliya awa aifiyaa milatees.” (Ajjuutaa 1:16) Asa zariyan hagaa mala meri baynna gishshawu, ha ajjuutay “ooninne akko shiiqanawu danddayenna pooꞌuwan deꞌiya,” hayquwaappe denddida Yesuusa bessiya leemiso gidiyoogee qonccess.—1 Ximootiyoosa 6:16.
Bala qofaa: Yesuusi wolqqi baynna laafa asa.
Tumaa: Yesuusa hanotay I mino asa gidiyoogaa bessees. Leemisuwawu, A oyqqanawu ola miishshaa gixxi yiida asawu Yesuusi bana erissiis. (Yohaannisa 18:4-8) Yesuusi anaaxe gididi oottido gishshawu, A bollaykka mino gidiyoogee qoncce.—Marqqoosa 6:3.
Yaatin, Yesuusi kaqettana mittaa hara asi tookkidi A maaddidoy aybissee? Qassi aara kaqettidaageetuppe I kasetidi hayqqidoy aybissee? (Luqaasa 23:26; Yohaannisa 19:31-33) Yesuusi kaqettanaappe kase, keehi daafuriis. I kumetta qammaa xiskkibeenna; hegawu issi gaasoy I keehi unꞌꞌettidoogaa. (Luqaasa 22:42-44) Qammi Ayhudati A keehi qohidosona; qassi wonttetta galla maallado Roomati barchcheyidosona. (Maatiyoosa 26:67, 68; Yohaannisa 19:1-3) Hageeti I eesuwan hayqqanaadan oottennan aggokkona.
Bala qofaa: Yesuusi ubbatoo azzaniyanne kayyottiya asa.
Tumaa: Yesuusi Geeshsha Maxaafay “ufayttiya Xoossaa” giyo, saluwan deꞌiya ba Aawaa, Yihoowa eeshshaa muleera qonccissiis. (1 Ximootiyoosa 1:11, NW; Yohaannisa 14:9) Yesuusi asay waani ufayttanaakkokka tamaarissiis. (Maatiyoosa 5:3-9; Luqaasa 11:28) Hageeti ubbay, Yesuusi ufayttiyoogaa darotoo ba somꞌꞌuwan qonccissiyoogaa bessoosona.