Yesuusa Timirttee Neeni Woosan Laamiyaa Oottanaadan Maaddii?
“Yesuusi ba haasayiyoogaa wurssido wode, asai i tamaarissiyoogan garamettiis.”—MAATIYOOSA 7:28.
1, 2. Yesuusi tamaarissido ogiyan asay garamettidoy aybissee?
XOOSSAU mexi issi Naꞌaa Yesuus Kiristtoosi tamaarissidobaa nuuni siyanaunne nu deꞌuwan oosuwan peeshshanau koshshees. Aagaadan tamaarissida asi baynnaagee tuma. I Deriyaa Bollan Tamaarissido Timirttiyan asay garamettidoy hegaassa!—Maatiyoosa 7:28, 29 nabbaba.
2 Yihoowa Naꞌay, bantta shoociina haasayau polo gidenna asaa naatu qofaa baaso oottida higgiyaa tamaarissiyaageetuugaadan tamaarissibeenna. Kiristtoosa timirttiyau pulttoy Xoossaa gidiyo gishshau, i “alaafetettai de7iyo asadan” tamaarissiis. (Yohaannisa 12:50) Yesuusi Deriyaa Bollan Tamaarissido Timirttiyaappe attidaagee nuuni woosan laamiyaa oottana danddayiyoogaanne oottana koshshiyoogaa xeelliyaagan waatidi maaddiyaakko ane beꞌoos.
Loꞌꞌo Milatiya Iitatuugaadan Mule Woossoppa
3. Yesuusi Maatiyoosa 6:5n yootidobaa qanttan qonccissa.
3 Woosay tumu goynuwan keehi koshshiyaabatuppe issuwaa; qassi nuuni ubbatoo Yihoowakko woossana koshshees. Gidikkokka, Yesuusi Deriyaa Bollan Tamaarissidobay nuuni woosan laamiyaa oottanaadan maaddana koshshees. I: “Xoossaa woossiiddi, lo77o milatiya iitatudan hanoppite; aissi giikko, banttana asi be7ana mala; Aihuda woosa keettatuuninne ogetu doonan eqqidi, Xoossaa woossiyoogaa dosoosona; taani intteyyo tumaa odais; eti bantta woituwaa muleera ekkiichchidosona” yaagiis.—Maatiyoosa 6:5.
4-6. (a) Parisaaweti “Aihuda woosa keettatuuninne ogetu doonan eqqidi” woossiyoogaa dosiyoy aybissee? (b) Hegaa mala loꞌꞌo milatiya iitati ‘bantta woytuwaa muleera ekkiichidoy’ ayba ogiyaanee?
4 Yesuusi erissiyo ashkkarati woossiyo wode, xillo milatidi asaa cimmiya, banttana banttarkka xillo oottiya Parisaawetu mala ‘loꞌꞌo milatiya iitata’ milatanau bessenna. (Maatiyoosa 23:13-32) He loꞌꞌo milatiya iitati “Aihuda woosa keettatuuninne ogetu doonan eqqidi” woossiyoogaa dosoosona. Aybissi? “Asi be7ana mala” hegaadan oottoosona. Koyro xeetu layttan Ayhudati beeta maqidasiyan xuuggiyo yarshshuwaa shiishshiyo wode (maallado heezzu saate heeraaninne gallassi uddufun saate heeran) woossiyo meezee deꞌees. Yerusalaamen deꞌiya daroti goynuwau beeta maqidasiyan shiiqida asaara issippe woossoosona. Katamaappe gaxan deꞌiya wogaa mintti naagiya Ayhudati darotoo ‘Ayhuda woosa keettatun eqqidi’ issi gallassan naaꞌꞌutoo woossoosona.—Luqaasa 18:11, 13ra gatta xeella.
5 Qommoora qonccida woosa saatiyan daro asay beeta maqidasiyaa woykko Ayhuda woosa keettaa matan deꞌenna gishshau, ba deꞌiyoosan woossana danddayees. Issoti issoti he woosaa saatiyan “ogetu doonan” eqqana koyoosona. Eti he ogiyaara aadhiya “asi be7ana mala” koyoosona. Beꞌiyaageeti nashshanaadan loꞌꞌo milatiya iitati “banttau lo77o milatanau Xoossaa woosaa adussoosona.” (Luqaasa 20:47) Nuuyyo deꞌana koshshiya xeelay hegaa gidenna.
6 Hegaa mala loꞌꞌo milatiya iitati “bantta woituwaa muleera” ekkiichidoogaa Yesuusi qonccissiis. Eti keehippe koyidoy asan erettiyoogaanne asaappe galataa demmiyoogaa; qassi eti demmanabay hegaa xalla. Eti milatissanau woossiyo woosau Yihooway zaaro immenna gishshau, hegee eti demmana kumetta woyto. Hara baggaara, Yesuusi ha timirttiyan gujjidi yootidoogaadan, tumuppe Kiristtoosa kaalliyaageeti woossiyo woosau Xoossay zaaruwaa immees.
7. Nu ‘soo gelidi’ woossanaadan imettida zoriyaa birshshettay aybee?
7 “SHin intte Xoossaa woossiyo wode, intte soo gelite; kariyaa gorddidi, geeman de7iya intte Aawaa woossite; geeman be7iya intte Aawai intteyyo qoncciyan immana.” (Maatiyoosa 6:6) Yesuusi soo gelidi kariyaa gorddidi woossanaadan yootidoogee, issi uri gubaaꞌiyaa kalꞌꞌatidi woossana danddayenna giyoogaa gidenna. Ha zoree issi asi woossiyo wode hara asay beꞌanaadaaninne nashshanaadan giidi qoncciyan woossana bessenna giyoogaa. Xoossaa asaa kalꞌꞌatidi woossiyo maatay nuuyyo imettiyo wode hagaa akeekana koshshees. Qassi woosaa xeelliyaagan Yesuusi yootido kaallidi deꞌiya zoriyaa oosuwan peeshshoos.
8 Maatiyoosa 6:7n deꞌiyaagaadan nuuni haakkana koshshiya woossiyo ogee awugee?
8 “Xoossaa intte woossiyo wode, Xoossaa ammanenna asaagaadan, mela [zaaretti zaaretti issibaa] biddoppite; aissi giikko, Xoossaa ammanenna asai adussidi Xoossaa woossin siyees giidi qoppees.” (Maatiyoosa 6:7) Yaatiyo gishshau, Yesuusi hara likke gidenna woossiyo ogiyaa qonccissiis; hegeekka zaaretti zaaretti issibaa biddiyoogaa. Nuuni wozanappe koyiyoobaanne galataa woosan qonccissiyo wode mule zaarettana koshshenna gibeenna. Yesuusi hayqqanaappe kase qammi Geetesemaane giyo sohuwan ‘zaaretti zaarettidi issibaa’ woosan oychiis.—Marqqoosa 14:32-39.
9, 10. Nuuni zaaretti zaarettidi woossana koshshennay ayba ogiyaanee?
9 “Xoossaa ammanenna” asaagaadan nuuni issibaa zaaretti zaaretti woossiyoogee bala. Eti koshshenna darobaa gujjiya bantta wozanan oyqqido qaalata ‘zaaretti zaarettidi’ goosona. Worddo xoossaa Baꞌaalayyo goynniyaageeti “maalladoppe seeta gallassi gakkanaashin,” “Hai Ba7aalaa, nu woosaa siya” yaagidi woossidoogee eta aybanne goꞌꞌibeenna. (1 Kawotu 18:26) Ha wodiyan miilooniyan qoodettiya asay Xoossay “siyees giidi” mela zaaretti zaaretti woossees. Gidikkokka, zaaretti zaarettidi “adussidi” woossiyoogau Yihoowa xeelan waagi baynnaagaa nuuni akeekanau maaddiyaaba Yesuusi yootiis. Yesuusi gujjidikka hagaadan giis:
10 “Hegaa gishshau, he asaagaadan hanoppite; aissi giikko, intte Aawai inttena koshshiyaagaa intte woossanaappe kasetidi erees.” (Maatiyoosa 6:8) Ayhuda haymaanootiyaa kaalettiya daroti woossiyo wode Ayhuda gidenna asatuugaadan daro qaalaa goꞌettoosona. Sabaa, galataanne koshshiyaabaa minttidi oychiyoogaa gujjiya wozanappe woossiyo woosay tumu goynuwan keehi koshshiyaaba. (Piliphphisiyuusa 4:6) Gidoppe attin, Xoossay dogiyoobadan nuuni issibaa zaaretti zaarettidi oychiyoogee bala. Nuuni woossiyo wode, nuussi ‘koshshiyaagaa nu woossanaappe kasetidi eriyaagaakko’ woossiyoogaa akeekana koshshees.
11. Nuuni cora asaa kalꞌꞌatidi woossiyo maataa demmiyo wode ay akeekana koshshii?
11 Bessenna woosaa xeelliyaagan Yesuusi tamaarissidobay adussidinne malꞌꞌettidi woossiyoogan Xoossay ufayttennaagaa nuna akeekissana koshshees. Cora asaa kalꞌꞌatidi woossiyo woosay ezggiyaageeti maalaalettanaadan woykko awude wurssanddee gaanaadan oottana koshshennaagaakka akeekana bessees. Ezggiyaageetuyyo woosan erissuwaa woykko zoriyaa yootiyoogeekka, Yesuusi Deriyaa Bollan Tamaarissidoogaara moggottenna.
Nuuni Woygi Woossanaakko Yesuusi Tamaarissiis
12. “Ne geeshsha sunttai anjjetto” giyoogee koshshido gaasuwaa waatada qonccissuutii?
12 Woosaa shiishshiyo gita maataa bessenna ogiyan goꞌettennaadan Yesuusi akeekissidaba gidikkokka, ba erissiyo ashkkarati woygi woossanaakko tamaarissiis. (Maatiyoosa 6:9-13 nabbaba.) I eta tamaarissanau goꞌettido woosay wozanan oyqqidi zaaretti zaarettidi gaana koshshiyaaba gidenna. Hegaappe, nuuni shiishshiyo woosau hegee leemiso. Leemisuwau, Yesuusi “Saluwan de7iya nu Aawau, ne geeshsha sunttai anjjetto” yaagidi doommiyoogan Xoossau koyro sohuwaa immiis. (Maatiyoosa 6:9) Yihooway saꞌaappe haakkidi “saluwan” deꞌiyaagaa, nuna Medhidaagaa gidiyo gishshau, nuuni a “nu Aawau” giyoogee bessiyaaba. (Zaarettido Wogaa 32:6; 2 Odiya 6:21; Oosuwaa 17:24, 28) Cora qoodaa malaatiya “nu” giya qaalaa goꞌettiyoogee, nu mala Kiristtaanetussikka Xoossaara mata dabbotay deꞌiyoogaa nuna akeekissana koshshees. “Ne geeshsha sunttai anjjetto” giyaagee, Edenen makkalay denddoosappe doommidi kuurettida cashshaappe ba sunttaa geeshshanau Yihooway tangguwaa ekkanaadan shiishshiyo woosaa. Yihooway iitatettaa saꞌaappe xayssidi, ba sunttaa geeshshidi he woosau zaaruwaa immana.—Hizqqeela 36:23.
13. (a) “Ne kawotettai yo” yaagiya woosay waani polettanee? (b) Xoossaa shenee saꞌan haniyoogee ay gujjii?
13 “Ne kawotettai yo; ne shenee saluwan hanidoogaadan, sa7ankka hano.” (Maatiyoosa 6:10) Yesuusi tamaarissido leemiso woosan deꞌiya ha oyshaara gayttidaagan, “kawotettai” Kiristtoosinne hayquwaappe denddida “geeshshati” issippe ayssiyo saluwan deꞌiya Masiyaa Kawotettaa gidiyoogaa nuuni akeekana koshshees. (Daaneela 7:13, 14, 18; Isiyaasa 9:6, 7) I “yo” giyoogee Xoossaa Kawotettay yiidi Xoossaa haaruwaara eqettiya saꞌan deꞌiya ubbaa xayssanaadan oychiyo woosa. Hegee mata wode saꞌay geeshshatettay, sarotettaynne ubbabay kumido gannate gidanaadan ogiyaa dooyees. (Mazamure 72:1-15; Daaneela 2:44; 2 PHeexiroosa 3:13) Yihoowa shenee saluwan haniiddi deꞌees; qassi saꞌan hananaadan oychiyoogee Xoossay beni wode oottidoogaadan ha wodiyankka banaara eqettiya asata xayssiyoogaa gujjin ba sheniyaa saꞌan polanaadan woossiyoogaa.—Mazamure 83:1, 2, 13-18 nabbaba.
14. “Hachchi hachchi koshshiya” qumau woossiyoogee bessiyaaba gididoy aybissee?
14 “Hachchi hachchi koshshiya qumaa nuuyyo hachchi imma.” (Maatiyoosa 6:11; Luqaasa 11:3) Nuuni woosan ha oyshaa oychiyo wode, Xoossay ‘hachiyyo’ nuussi koshshiya qumaa immanaadan oychoos. Hegee, Yihooway nuuyyo koshshiyaabaa galla galla kunttana danddayiyoogaa ammanettiyoogaa bessees. Hegee koshshiyaabaappe darobau woossiyo woosa gidenna. Hachissi nuuyyo koshshiyaabau woossiyo ha woosay Xoossay Isiraaꞌeeleti ubbay mannaa “hachchi hachchissi gidiyaagaa xalaalaa” maxanaadan azazidoogaa hassayissees.—Kessaabaa 16:4.
15. “Nuuni nuna naaqqidaageetuyyo atto giyoogaadan, neenikka nu naaquwaa atto ga” yaagiyo woosay woygiyoogaakko qonccissa.
15 Yesuusi tamaarissido woosan kaalliya oyshay nuuni oottanau koshshiya issibaa nuna akeekissees. Yesuusi: “Nuuni nuna naaqqidaageetuyyo atto giyoogaadan, neenikka nu naaquwaa atto ga” yaagiis. (Maatiyoosa 6:12) Yihooway nuussi atto gaanaadan naagana danddayiyoy nuna ‘naaqqidaageetuyyo atto giyoogaa’ xalaalaana. (Maatiyoosa 6:14, 15 nabbaba.) Nuuni haratuyyo coo atto gaana koshshees.—Efisoona 4:32; Qolasiyaasa 3:13.
16. Paaciyaappenne iitaappe ashshanaadan woossiyo woosaa nuuni waatidi akeekana koshshii?
16 “Nuna iitabaappe [“iitaappe,” NW] ashshanaappe attin, paacen gelissoppa.” (Maatiyoosa 6:13) Yesuusi tamaarissido woosan issi mala milatiya ha naaꞌꞌubata nuuni waatidi akeekana koshshii? Nagaraa oottanaadan Yihooway nuna paaccennaagee erettidaagaa. (Yaaqooba 1:13 nabbaba.) Paacciyaagee ‘iitaa,’ Seexaanaa. (Maatiyoosa 4:3) Gidikkokka, Geeshsha Maxaafay Xoossay hananaadan paqqadiyoobaa i oottiyoobadan yootees. (Uruto 1:20, 21; Eranchchaa 11:5) Yaatiyo gishshau, “paacen gelissoppa” giyoogee nuuni Yihoowayyo azazettennaadan paacettiyo wode kunddanaadan i paqqadenna mala woossiyoogaa giyoogaa. Wurssettan, ‘iitaappe ashsha’ giyo woosay Seexaanay nuna xoonanaadan Yihooway paqqadenna mala oychiyoogaa. Qassi Xoossay nu “wolqqai danddayiyoogaappe aadhdhiya paaciyan “ nuuni paacettanaadan koyennaagaa ammanettana danddayoos.—1 Qoronttoosa 10:13 nabbaba.
Aggennan ‘Woossite, Koyitenne Kariyaa Qoxxite’
17, 18. Aggennan ‘woossiyoogee, koyiyoogeenne kariyaa qoxxiyoogee’ woygiyoogee?
17 Kiitettida PHauloosi ba mala Kiristtaaneti ‘ubba wode Xoossaa woossanaadan’ zoriis. (Roome 12:12) Yesuusi:“Woossite; intte ekkana. Koyite; intte demmana. Kare yiidi xeesite; intteyyo karee dooyettana. Aissi giikko, woossiya ubbai ekkana; koyiya urai demmana; qassi kare yiidi xeesiya urau karee dooyettana” yaagido wode hegaara issi mala azazuwaa azaziis. (Maatiyoosa 7:7, 8) Xoossaa sheniyaara moggottiya aybaunne aggennan ‘woossiyoogee’ bessiyaaba. Yesuusi yootidoogaara moggottiya ogiyan kiitettida Yohaannisi: “Xoossai koyiyoogaadan, ainne nuuni a woossikko, i siyiyoogaa nuuni eriyo gishshau, a sinttan yayyokko” yaagidi xaafiis.—1 Yohaannisa 5:14.
18 Aggennan ‘woossanaadaaninne koyanaadan’ Yesuusi zoridoogee nuuni salettennan wozanappe woossana koshshiyoogaa bessees. Qassi nuuni Kawotettaa laattanaunne a anjjuwaa, a goꞌꞌaanne a woytuwaa demmanau aggennan ‘kariyaa qoxxana’ koshshees. SHin Xoossay nu woosaa zaariyoogaa ammanettana danddayiyoo? Kiristtoosi: “woossiya ubbai ekkana; koyiya urai demmana; qassi kare yiidi xeesiya urau karee dooyettana” yaagido gishshau, nuuni Yihoowayyo ammanettidaageeta gidikko, ee danddayoos. Yihoowa ashkkarati bantta deꞌuwan beꞌido darobay Xoossay tumuppe ‘woosaa siyiyaagaa’ gidiyoogaa bessees.—Mazamure 65:2.
19, 20. Maatiyoosa 7:9-11n Yesuusi giidoogaadan Yihooway siiqiya aawa mala gidiyoy ayba ogiyaanee?
19 Yesuusi Xoossaa ba naatussi loꞌꞌobaa immiya aawan leemisiis. Yesuusi Deriyaa Bolla Timirttiyaa tamaarissiyo wode neeni he sohuwan deꞌiyaabadaaninne Yesuusi hagaadan giishin siyidabadan qoppa: “Woi intte giddon ba na7i, ‘Oitta imma’ giikko, shuchcha immiya aawu de7ii? Qassi, ‘Mole imma’ giikko, ayyo shooshsha immanee? Intte iita gidiiddi, intte naatussi lo77obaa immiyoogaa erikko, yaatin, saluwan de7iya intte Aawai bana woossiyaageetussi lo77obaa waati darissidi immanddeeshsha!”—Maatiyoosa 7:9-11.
20 Issi aawi laattido nagaraappe denddidaagan “iita” gidikkokka, ba naꞌaassi qarettees. I ba naꞌaassi ‘loꞌꞌobaa immeesippe’ attin a cimmenna. Saluwan deꞌiya nu siiqo Aaway nuna ba naatudan xeelliyoogan ba geeshsha ayyaanaanne hegaa mala hara “lo77obaa” immees. (Luqaasa 11:13) “Lo77o imo ubbainne kumetta woito ubbai” appe yiyo Yihoowayyo i koyiyo ogiyan oottanaadan hegee nuna minttettana danddayees.—Yaaqooba 1:17.
Yesuusa Timirttiyaappe Ubbatoo Goꞌetta
21, 22. Deriyaa Bolla Timirttee garamissiyaaba gididoy aybissee? Yesuusi tamaarissido ha timirttiyan neeyyo aybi siyettii?
21 Deriyaa Bolla Timirttee hanno gakkanaashin ha saꞌan tamaarissido ayba timirtteppenne aadhiyoogee tuma. Ayyaanaaban oyqqido timirttiyaaninne qoncce gidiyoogan a mali baawa. Aadhida huuphe yohotun beꞌidoogaadan ha timirttee oyqqido zoriyaa nuuni oosuwan peeshshiyaaba gidikko, keehippe goꞌettana danddayoos. Yesuusi tamaarissido ha timirtteti ha wodiyan nu deꞌuwaa loyttanaunne sinttappe nuussi ufayssiya hidootay deꞌanaadan oottana danddayoosona.
22 Yesuusi Deriyaa Bollan Tamaarissido ayyaanaaban alꞌꞌo gididabatuppe ha huuphe yohotun nuuni beꞌidoy keehi guutta. A timirttiyaa ezggidaageeti i ‘tamaarissiyoogan garamettidoogee’ bessiyaaba. (Maatiyoosa 7:28) Gita Asttamaaree Yesuus Kiristtoosi tamaarissido hageetinne hara alꞌꞌobati nu wozanaaninne nu qofan kumiyo wode nuunikka hegaadan garamettanaagee sirissenna.
Ne Zaaroy Aybee?
• Milatissanau woossiyoogaa xeelliyaagan Yesuusi woygidee?
• Nuuni giidobaa zaari zaari woossana koshshennay aybissee?
• Yesuusi tamaarissido leemiso woosay ay ay oyqqidee?
• Nuuni aggennan ‘woossanau, koyanaunne kariyaa qoxxanau’ danddayiyoy ayba ogiyaanee?
[Sinttaa 19n deꞌiya misiliyaa]
Asa bessanaunne sissanau woossiya loꞌꞌo milatiya iitata Yesuusi pirddiis
[Sinttaa 21n deꞌiya misiliyaa]
Hachi hachi koshshiya qumau woossiyoogee bessiyaaba gididoy aybissakko eray?