Ne Woosay Nebaa Ay Qonccissii?

“Abeet woosaa siyiyaagoo, asai ubbai neekko yaana.”—MAZAMURE 65:2.

1, 2. Yihoowa ashkkarati ammanettidi akko woossana danddayiyoy aybissee?

YHOOWAY ammanettida ba ashkkarati woossiyo woosaa ubbatoo siyees. I nu woosaa siyiyoogaa ammanettana danddayoos. Miilooniyan qoodettiya Yihoowa Markkati issi kutti woossiyaaba gidikkokka, eta ubbaa woosaakka i siyana danddayees.

² Xoossay a woosaa siyiyoogaa ammanettidi, mazamuraawee Daawiti: “Abeet woosaa siyiyaagoo, asai ubbai neekko yaana” yaagidi yexxiis. (Mazamure 65:2) Daawiti ammanettidi goynniya asa gidiyo gishshau, Yihooway a woosaa siyiis. Nuuni nu huuphiyaa: ‘Ta woosay taani Yihoowan ammanettiyoogaanne tumu goynuwaa ta deꞌuwan xoqqu oottada xeelliyoogaa qonccissii? Ta woosay tabaa ay qonccissii?’ giidi oychana koshshees.

Ne Huuphiyaa Kawushshada Yihoowa Woossa

3, 4. (a) Ayba xeelaa oyqqidi Xoossaa woossana koshshii? (b) Deexo nagaraara gayttidabay nuna daroppe ‘qofissiyaaba’ gidikko ay oottana koshshii?

³ Nu woosay siyettanaadan koyiyaaba gidikko, nu huuphiyaa kawushshidi Xoossaa woossana bessees. (Mazamure 138:6) Daawiti: “Abeet Xoossau, tana qorada, ta wozanaa era; tana paaccada, ta qofaa era. Ane tanan iitabai de7ikko xeella; xeellada, merinaa ogiyan tana kaaletta” yaagidi oychidoogaadan, nuunikka Yihooway nuna qoranaadan oychana koshshees. (Mazamure 139:23, 24) Nuuni woossiyoogaa xalla gidennan, Xoossay qoranaadan eeno gaanaunne a Qaalan deꞌiya zoriyaa siyanau koshshees. Yihooway nuuni merinaa deꞌuwaa ogiyaa kaallanaadan maaddiyoogan, “merinaa ogiyan” kaalettana danddayees.

⁴ Deexo nagaraara gayttidabay nuna daroppe ‘qofissiyaaba’ gidikkoshin? (Mazamure 32:1-5 nabbaba.) Nu nagaraa genttiyoogee away suulliyo boniyan mittay shulliyoogaadan, nu wolqqaa wurssana danddayees. Ba nagaraappe denddidaagan, Daawiti ufayssaa xayiis; harggennankka aggenna. SHin ba nagaraa Xoossau paaxidi keehippe woppu giis! ‘A mooroy atto geetettido’ wodenne Yihooway a maarido wode Daawiti ay keena ufayttidaakko qoppa. Nagaraa Xoossau paaxiyoogee woppissana danddayees; qassi gubaaꞌiyaa cimatu maadoykka nagaraa oottida uray ayyaanaaban zaarettidi payya gidanaadan maaddana danddayees.—Leemiso 28:13; Yaaqooba 5:13-16.

Xoossaa Minttada Woossanne Galata

5. Yihoowa minttidi woossiyoogaa giyoogee woygiyoogee?

⁵ Aybiininne nuuni unꞌꞌettiyaaba gidikko, PHauloosi: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite” yaagido zoriyaa oosuwan peeshshana koshshees. (Piliphphisiyuusa 4:6) “Mintti woossiyoogaa” giyoogee, “ba huuphiyaa kawushshidi woossiyoogaa” giyoogaa. Daafabay woykko yedettay gakkiyo wode, nuna maaddanaadaaninne kaalettanaadan Yihoowa minttidi woossana koshshees.

6, 7. Nu woossiyo wode galatanaadan oottiya gaasoti aybee aybee?

⁶ SHin nuuyyo issibay koshshiyo wode xallan woossiyaaba gidikko, hegee nuuyyo Yihoowaara deꞌiya dabbotaabaa ay qonccissii? Nuuni “galatiiddi” Xoossaa woossana koshshiyoogaa PHauloosi yootiis. Nuuni: “Abeet GODAU, saluwaaninne sa7an de7iya ubbabai nebaa! Gitatettai, wolqqai, bonchchoi, xoonoinne anggai nebaa! Abeet GODAU, maatai nebaa; neeni ubbaappe bollanne huuphe. Duretainne bonchchoi neeppe yees; neeni ubbabaa haaraasa. Wolqqainne minotai ne kushiyaana; neeni asaa ubbaa gitayanaunne minttanau danddayaasa. . . . Nu Xoossau, nuuni nena galatoos; ne bonchcho sunttaakka sabboos” yaagida Daawitadan galatana koshshiyo gaasoy deꞌees.—1 Odiya 29:11-13.

⁷ Yesuusi qumau, qassi Godaa Kahuwaa wode goꞌettido oyttaunne woyne eessau Xoossaa galatiis. (Maatiyoosa 15:36; Marqqoosa 14:22, 23) Hegaadan galatiyoogaappekka haray, “i asaassi oottido maalaalissiyaabaayyo,” a “xillo pirddaa gishshau,” qassi Geeshsha Maxaafan deꞌiya a qaalaa gishshau, nuuni ‘Yihoowa galatana’ koshshees.—Mazamure 107:15; 119:62, 105.

Haratuyyo Woossa

8, 9. Nuuni hara Kiristtaanetuyyo woossana koshshiyoy aybissee?

⁸ Nuuni nu huuphessi woossiyoogee erettidaagaa; nu woosan haratakka qoppana koshshees. Hegee ubba nuuni eta sunttaa erenna Kiristtaanetakka gujjees. Kiitettida PHauloosi Qolasiyaasan deꞌiya ubba Kiristtaaneta erennan aggana danddayikkonne, i: “Nuuni intteyyo Xoossaa woossiyo wode, Xoossaa nu Godaa Yesuus Kiristtoosa Aawaa, ubba wode galatoos. Aissi giikko, nuuni Kiristtoos Yesuusa intte ammaniyoogaanne geeshshata ubbaa siiqiyoogaa siyida” yaagidi xaafiis. (Qolasiyaasa 1:3, 4) PHauloosi Tasalonqqen deꞌiya Kiristtaanetuyyookka woossiis. (2 Tasalonqqe 1:11, 12) Hegaadan woossiyoogee, nubaa darobaa qonccissees; nuuni Kiristtaane ishatanne michota waati xeelliyaakkokka darobaa qonccissees.

⁹ Tiyettida Kiristtaanetuyyoonne eta lagge gidida ‘hara dorssatuyyo’ nuuni woossiyoogee, Xoossaa dirijjitiyaabay nuna qofissiyoogaa bessees. (Yohaannisa 10:16) PHauloosi ‘wonggeliyaa xuuraa yootanau, Xoossay a doonaa dooyidi, au haasayiyoobaa immanaadan’ Kiristtaane laggeti woossana mala yootiis. (Efisoona 6:17-20) Nuuni hara Kiristtaanetuyyo hegaadan woossiyoo?

10. Haratuyyo woossiyoogee nuna waati maaddana danddayii?

¹⁰ Haratuyyo woossiyoogee, nuuni eta xeelliyo hanotaa laammana danddayees. Nuuni dosenna issi urau woossiyaaba gidikko, hegee nuuni a xeelliyo hanotaa laammana danddayees. (1 Yohaannisa 4:20, 21) Hegaa mala woosay minttetteesinne nu ishanttuura deꞌiya issippetettaa minttees. Hegaa bollankka, hegaa mala woosay nuuyyo Kiristtoosaagaa mala siiqoy deꞌiyoogaa bessees. (Yohaannisa 13:34, 35) He eeshshay Xoossaa ayyaanaa ayfiyaa macara. Geeshsha ayyaanaa ayfiyaa, giishin siiquwaa, ufayssaa, sarotettaa, danddayaa, kehatettaa, loꞌꞌotettaa, ammanuwaa, ashkketettaanne ba huuphiyaa naagiyoogaa bessanau Yihooway geeshsha ayyaanaa immanaadan woossiyoo? (Luqaasa 11:13; Galaatiyaa 5:22, 23) Hegaadaana gidikko, nuuni haasayiyoobaynne oottiyoobay nuuni geeshsha ayyaanan simerettiyoogaa qonccissees.—Galaatiyaa 5:16, 25 nabbaba.  

11. Harati nuuyyo woossanaadan yootiyoogee bessiyaabadan neeni qoppiyoy aybissee?

¹¹ Nu naati timirtte keettan paatanaa wuuqqanau paacettiyoogaa akeekikko, nuuni etau woossanaunne eti ammanettiyaageetanne iitabaa oottennaageeta gidanaadan maaddanau Geeshsha Maxaafaa goꞌettana koshshees. PHauloosi Qoronttoosan deꞌiya Kiristtaanetuyyo: “Intte iitabaa mulekka oottenna mala, nuuni Xoossaa woossoos” yaagiis. (2 Qoronttoosa 13:7) Hegaadan ba huuphiyaa kawushshidi woossiyo woosay Yihoowa ufaysseesinne nubaa loꞌꞌo ogiyan qonccissees. (Leemiso 15:8 nabbaba.) Kiitettida PHauloosaagaadan, harati nuussi woossanaadan yootanaukka danddayoos. I: “Nuuyyo Xoossaa woossite. Nuuni ubba wode lo77obaa oottanau koyiyo gishshau, nuna zoriya lo77o wozanai nuuyyo de7ees” yaagidi xaafiis.—Ibraawe 13:18.

Nu Woosay Harabaakka Qonccissees

12. Nu woosan waannayidi qonccissana koshshiyo allaalleti awugeetee?

¹² Nuuni ufayttiyaanne mishettiya Yihoowa Markkata gidiyoogaa nu woosay qonccissii? Nuuni nu woosan, Xoossaa sheniyaara moggiyoogau, Kawotettaabaa sabbakiyoogau, Yihooway ubbabaa haariyaagaa gidiyo maatay qoncciyoogaunne a sunttay bonchettiyoogau xoqqa sohuwaa immiyoo? “Saluwan de7iya nu Aawau, ne geeshsha sunttai anjjetto. Ne kawotettai yo; ne shenee saluwan hanidoogaadan, sa7ankka hano” yaagidi doommiya, leemiso gidiya woosan Yesuusi akeekissidoogaadan, he allaalleti nuuni woosan waannayidi qonccissana koshshiyoobata.—Maatiyoosa 6:9, 10.

13, 14. Nu woosay nubaa ay qonccissii?

¹³ Nuuni Xoossaa woossiyoobay nu halchuwaa, nu koshshaanne nu amuwaa qonccissees. Nuuni ay mala asakko Yihooway erees. Leemiso 17:3y: “Worqqainne birai taman paacettiyoogaadan, GODAI asaa wozanaa paaccees” yaagees. Xoossay nu wozanan deꞌiyaabaa xeellees. (1 Sameela 16:7) Nuuni shiiquwaa, haggaazuwaanne Kiristtaane ishatanne michota waati xeelliyaakko i erees. Nuuni Kiristtoosa ‘ishata’ waati xeelliyaakko Yihooway erees. (Maatiyoosa 25:40) Nuuni woossiyoobaa wozanappe koyiyaakkonne woy mela biddiyaakkonne i erees. Yesuusi: “Xoossaa intte woossiyo wode, Xoossaa ammanenna asaagaadan, mela biddoppite; aissi giikko, Xoossaa ammanenna asai adussidi Xoossaa woossin siyees giidi qoppees” yaagiis.—Maatiyoosa 6:7.

¹⁴ Nuuni woossiyoobay Xoossan ay keenaa ammanettiyaakko qonccissees. Daawiti: “Neeni [Yihooway] taayyo qatonne taani ta morkketuppe naagettiyo mino miixaa. Taani ne dunkkaaniyan merinaayyo de7arkkinaa! Taani ne qefiyaa haphaa giddon saro attarkkinaa!” yaagiis. (Mazamure 61:3, 4) Xoossay leemiso hanotan ‘nu gidduwan deꞌiyo’ wode, a naaguwan woppu giidi deꞌoos. (Ajjuutaa 7:15) Nu ammanuwaara gayttidaagan ay paaceekka gakkiyo wode, i ‘nunaara deꞌiyoogaa’ ammanettidi, woosan Yihoowakko shiiqiyoogee ay keena minttettiyaabee!— Mazamure 118:5-9 nabbaba.

15, 16. Gubaaꞌiyan oottanau koyiyoogaa xeelliyaagan, woosay nuuni ay akeekanaadan maaddana danddayii?

¹⁵ Issibaa oottanaadan nuna denttettidabaa xeelliyaagan wozanappe Yihoowa woossiyoogee, hegaa loytti akeekanaadan maaddana danddayees. Leemisuwau, gubaaꞌe cima gidanau koyiyoogee goꞌꞌiyaabaa oottanaunne Kawotettaara gayttidaban nuuyyo danddayettidabaa ubbaa oottanau ashkketettan koyiyoogaa bessiyaabee? Woykko nuuni “halaqa gidanau” woy ‘godatanau’ koyiyoogaa bessiyaabee? Yihoowa asaa giddon hegaa malabay deꞌanau bessenna. (3 Yohaannisa 9, 10; Luqaasa 22:24-27 nabbaba.) Nuuyyo bala koshshay deꞌiyaaba gidikko, Xoossaa Yihoowakko wozanappe woossiyoogee he koshshaa akeekanaadaaninne hegee xaphuwaa yeddanaappe kase agganaadan maaddana danddayees.

¹⁶ Kiristtaane maccaasati bantta azinati gubaaꞌiyau oottiyaageetanne hegaappe simmidi gubaaꞌiyaa cimata gidanaadan wozanappe koyana danddayoosona. Ha michoti loꞌꞌo leemiso gididi deꞌanau baaxetiyoogan bantta buzo woosan qonccissiyoobaara moggiya ogiyan deꞌana danddayoosona. Issi ishaa so asay haasayiyoobaynne oottiyoobay gubaaꞌee a xeelliyo hanotaa bochiyo gishshau, hegee keehippe koshshiyaaba.

SHiiqida Asaa Kalꞌꞌatidi Woossiyoogaa

17. Nuuni buzo woosaa woossiyo wode, asi baynnasan woossiyoogee loꞌꞌo gididoy aybissee?

¹⁷ Yesuusi ba Aawaakko buzo woosaa woossanau darotoo asaappe shaahettidi asi baynnasaa bees. (Maatiyoosa 14:13; Luqaasa 5:16; 6:12) Nuussikka nurkka deꞌiyo wodiyaa koshshees. Woppu giidasan woossiyoogan, Yihoowa ufayssiyaanne ayyaanaaban nuna goꞌꞌiya kuushshaa kuuyana danddayoos. SHin Yesuusi shiiqida asaa kalꞌꞌatidikka woossiis; bessiya ogiyan hegaadan waati woossana danddayiyaakko qoppiyoogee maaddees.

18. Gubaaꞌiyan shiiqida asaa kalꞌꞌatidi woossiyo wode, woossiya ishati hassayana koshshiyo amaridabati aybee?

¹⁸ Nu shiiqotun geeshsha gidida attuma asay gubaaꞌiyau shiiqida asaa kalꞌꞌatidi woossees. (1 Xim. 2:8) Hara Kiristtaaneti hegaa mala woosaa wurssettan “aminꞌꞌi,” giishin “hegaadan hano” gaana koshshees. Hegaadan gaanau, geetettidabay eti maayiyoobaa gidana koshshees. Yesuusi tamaarissido leemiso woosan yeellayiyaabi woykko yiilloyiyaabi baawa. (Luqaasa 11:2-4) Qassi shiiqida asa ubbau koshshiya woy eta metiya ubbabaa qonccissidi woossibeenna. Issi asa qofissiyaabay buzo woosan qonccissiyoobappe attin, asaara woossiyo wode qonccissiyooba gidenna. SHiiqida asaa kalꞌꞌatidi woossiyo wode, xuura gididabaa qonccissana koshshenna.

19. Gubaaꞌiyaa shiiquwaa woosaa wode nuuni ay oottana koshshii?

¹⁹ Issi uri gubaaꞌiyaa kalꞌꞌatidi woossiyo wode, nuuni keehippe ‘Xoossau yayyiyoogaa’ bessana koshshees. (1 PHeexiroosa 2:17) Issi issibati issi issi sohuwaaninne wodiyan bessiyaaba gidana danddayoosona; shin Kiristtaane shiiquwan bessennaba gidana danddayoosona. (Eranchchaa 3:1) Leemisuwau, hegaa mala woosaa woossiyo wode shiiquwan deꞌiyaageetuppe amaridaageeti issoy issuwaara oyqettanau koyana danddayoosona. Hegee Yihoowa Markka gidenna, shoobettida asaa gujjin, harata yiilloyana danddayees. Issi issi aqo laggeti asi beꞌennan kushiyaa oyqettana danddayoosona; shin gubaaꞌiyan woossiyo wode eti qoomettiyaaba gidikko, hegaa beꞌiyaageeti xubettana danddayoosona. Hegaappe denddidaagan, he aqo laggeti Yihoowa bonchiyoogaappe bantta siiquwaa xoqqu ootti xeelliyoobadan harati qoppana danddayoosona. Yaatiyo gishshau, Yihoowa keehippe bonchiyoogan, “ubbabaa Xoossaa bonchchuwaassi” oottoosinne haratu qofaa sherꞌꞌi oottiyaabaa, eta yeellayiya woykko xubbiyaabaa oottennaadan naagettoos.—1 Qoronttoosa 10:31, 32; 2 Qoronttoosa 6:3.

Aybaassi Woossiyoo?

20. Roome 8:26, 27 woygada qonccissuutii?

²⁰ Issi issitoo, nu buzo woosaa woossiyo wode, woygi woossanaakko erennan aggana danddayoos. PHauloosi: “Nuuni Xoossaa waati woossanau bessiyaakko erokko; shin Geeshsha Ayyaanai ba huuphen asau haasayanau danddayettenna ooliyan nuuyyo gaannatees. Qassi asa wozanaa qoriya Xoossai, . . . [ayyaanaa] qofai aibakko erees” yaagi xaafiis. (Roome 8:26, 27) Yihooway, daro woosay Geeshsha Maxaafan xaafettanaadan oottiis. Ayyaanan xaafettida ha woosata i nu woosadan xeellidi zaarees. Xoossay nunanne ba ayyaanay kaalettin Geeshsha Maxaafaa xaafidaageeti xaafidobay aybakko i erees. Ayyaanay nu gishshaa ‘gaannatiyo’ wode Yihooway nu woosaa zaarees. SHin nuuni Xoossaa Qaalaa loytti eriyo wode, woygi woossana koshshiyaakko sohuwaara hassayoos.

21. Kaalliya huuphe yohuwan ay pilgganee?

²¹ Nuuni beꞌidoogaadan, nu woosay nubaa darobaa qonccissees. Leemisuwau, woosay nuuni Yihoowakko ay keena shiiqidaakkonne a Qaalaa ay keena loyttidi eriyaakko qonccissana danddayees. (Yaaqooba 4:8) Kaalliya huuphe yohuwan, Geeshsha Maxaafan deꞌiya issi issi woosatanne woosa menttoy deꞌiyo qaalata pilggana. Geeshsha Maxaafaa hegaadan pilggiyoogee Xoossaakko woossiyo wode nuna waatidi goꞌꞌana danddayii?

Woygada Zaaruutii?

• Yihoowakko woossiyo wode nu xeelay ayba gidana koshshii?

• Nu mala Kiristtaanetuyyo woossana koshshiyoy aybissee?

• Nu woosay nubaanne nu halchuwaabaa ay qonccissana danddayii?

• SHiiquwaa woosaa wode nu hanotay ayba gidana koshshii?

[Sinttaa 11n deꞌiya misiliyaa]

Ubba wode Yihoowa sabbaynne galatay?

[Sinttaa 13n deꞌiya misiliyaa]

SHiiquwaa woosaa wode nu hanotay ubbatoo Yihoowa bonchissiyaagaa gidana koshshees