Pattennabaa Xeellenna Mala Intte Ayfiyaa Teqqite!
“Pattennabaa xeellenna mala, ta aifeta teqqa; ne ogiyan ta de7uwaa ooraxissa.”—MAZAMURE 119:37.
1. Xeellana danddayiyo imotay ay keena koshshiyaabee?
AYFEE keehippe alꞌꞌoba! Nu yuushuwan deꞌiyaabaa meraanne hanotaa ayfiyan issi kutti xeellidi akeekana danddayoos. Nu ayfee nu siiqiyo laggeta woykko qohana danddayiya daafaa beꞌanaadan maaddees. An puulaa beꞌoos; maalaalissiya meretaa akeekoos; qassi Xoossaa bonchuwaanne i deꞌiyoogaa qonccissiya naqaashaa akeekoos. (Mazamure 8:3, 4; 19:1, 2; 104:24; Roome 1:20) Ayfee guuggiyau kiitaa gattiyo waanna oge gidiyo gishshau, Yihoowa eranaadaaninne a ammananaadan keehippe maaddees.—Yaasa 1:8; Mazamure 1:2, 3.
2. Xeelliyoobay nuna qofissana bessiyoy aybissee, qassi mazamuraawee wozanappe woossido woosaappe ay tamaarana danddayiyoo?
2 Gidikkokka, nuuni beꞌiyoobay nuna qohanakka danddayees. Nu ayfee nu guuggiyaara keehippe gayttidaba gidiyo gishshau, nuuni ayfiyan beꞌiyoobay amottanaadan oottana woy amuwaa denttettana danddayees. Nuuni deꞌiyo alamee Seexaanaa Dabloosi haariyo iitanne ba ufayssa xallaa koyiyaagaa gidiyo gishshau, lemꞌꞌi ootti xeellikkonne nuna sohuwaara wora zaarana danddayiya misiletuuninne woriya gattiyo darobatun kumiis. (1 Yohaannisa 5:19) Yaatiyo gishshau, Mazamuraawee: “Pattennabaa xeellenna mala, ta aifeta teqqa; ne ogiyan ta de7uwaa ooraxissa” yaagidi Xoossaakko woossidoogee garamissiyaaba gidenna.—Mazamure 119:37.
Nu Ayfee Nuna Balettana Danddayiyo Ogiyaa
3-5. Nu xeelliyoobay nuna cimmidi daafan yeggana danddayiyoogaa bessiya Geeshsha Maxaafaa taariketi awugeetee?
3 Koyro maccaasiyo Hewaano gakkidabaa qoppa. Seexaanay a “lo77uwaanne iitaa erissiya mittaa teeraappe” miikko, i ‘ayfee dooyettanaagaa’ yootiis. Hewaana ba ayfee ‘dooyettanaadan’ amottidaba milatees. “He mittaa teerai maanau mal77iyaagaa, xeellanau lo77iyaagaa, qassi asi aadhdhida eratettaa demmanau amoyiyaagaa gidiyoogaa be7aasu;” yaatada, he digettida mittaa teeraappe maanau keehi amottaasu. Hewaana he mittaa teeraa amottada xeellidoogee, Xoossaa azazuwaa a kanttanaadan oottiis. I azinay Addaameekka azazettennan ixxin, hegee asaa naatu ubbaa bolli bashshaa kaalettiis.—Doomettaabaa 2:17; 3:2-6; Roome 5:12; Yaaqooba 1:14, 15.
4 Nohe wode, issi issi kiitanchatikka xeellidoban qohettidosona. Eta xeelliyaagan, Doomettaabaa 6:2y: “‘Xoossaa naata’ geetettiya meretati ha asaa macca naati puulanchcha gidiyoogaa be7idosona; be7idi etappe bantta dooridoogeeta machchidosona” yaagees. Makkalancha kiitanchati asaa macca naata amuwan xeellidoogee etau meretan baynna asho gaytotettaa koshshaa denttettiis; yaatin he kiitanchati makkalancha naata yelidosona. He wode asaa iitatettay Noheenne a soo asay attin, ubba asaa bolli bashshay gakkanaadan oottiis.—Doomettaabaa 6:4-7, 11, 12.
5 Daro wodee aadhi simmin, Israaꞌeela biitta asa gidida Akkaani xeellidoban cimettidi, olan xoonido Yarkko katamaappe omooddidobaappe amaridaagaa wuuqqiis. Buquraa minjjiyo Yihoowa keettau immiyooba xallay attin, he kataman deꞌiya ubbabaa xayssanaadan Xoossay azaziis. He kataman deꞌiya “baqa gididabaappe aibanne ekkennaadan intte huuphiyau naagettite” geetettidi Israaꞌeela asau odettiis. Akkaani azazettennan ixxin, Israaꞌeela asay Aaya katamaa asan xoonettiis; qassi daroti hayqqidosona. He hanotay qoncciyaa kiyana gakkanaashin Akkaani wuuqqidoogaa ammanibeenna. Akkaani, ‘omooddido miishshaa beꞌidi, ekkanau amottido gishshau ekkidoogaa’ yootiis. I ba ayfiyan xeellidi amottidobay anne “ayyo de7iyaabaa ubbaa” xayssiis. (Yaasa 6:18, 19; 7:1-26) Akkaani ekkanau baassi paqqadettibeennabaa ba wozanan amottiis.
Nu Huuphiyaa Seerana Koshshees
6, 7. Seexaanay nuna piriyan oyqqanau darotoo goꞌettiyo ‘qofay’ awugee, zalꞌꞌiyaara gayttidabaa erissiyaageeti hegaa goꞌettiiyoy ayba ogiyaanee?
6 Ha wodiyan deꞌiya asay Hewaaniigaa, azazettibeenna kiitanchatuugaanne Akkaanaagaa mala hanotan paacettees. ‘Ayfen xeellidi qaaqqatiyoogee’ Seexaanay asaa naata cimmanau goꞌettiyo “qofaa” woykko hiillaa ubbaappe keehi wolqqaama. (2 Qoronttoosa 2:11; 1 Yohaannisa 2:16) Asay ayfiyan xeelliyooban ubbatoo cimettiyoogaa, ha wodiyan zalꞌꞌiyaara gayttidabaa erissiyaageeti loyttidi eroosona. Awurooppan erettida, zalꞌꞌiyaabaa eranchay: “Ayfee hara bessi bollatu ubbaappe keehi cimmiyaagaa. I hara bessi bollatu bolli darotoo xalttaamees; nuuni likke gididabaa oottennaadan diggiyo wolqqay au deꞌees” yaagiis.
7 Zalꞌꞌiyaara gayttidabaa erissiyaageeti, bayzziyoobaa nuuni beꞌidi qaaqqatanaadan oottiya hanotan giigida misileta nu yuushuwan kunttidoogee garamissenna! Erissoy asaa ay keena denttettiyaakko xannaꞌida, Amarkkan deꞌiya issi dottoree, “erissoy giigiyoy asaa erissana xallaassa gidennan, hegaa beꞌiyaageetu koshshaa denttettidi issibaa oottanaadan suganaassa” gidiyoogaa yootiis. Darotoo asho gaytotettaa denttettiya misileta goꞌettoosona. Yaatiyo gishshau, nuuni xeelliyoobaanne nu wozanan qoppiyoobaa xeelliyaagan naagettanau murttiyoogee keehippe koshshiyaaba!
8. Nu ayfiyaa naagana bessiyoogaa Geeshsha Maxaafay waati qonccissii?
8 Ayfiyan xeellidi qaaqqatiyoobaynne ashuwaa amoy tumu Kiristtaanetakka qohana danddayees. Hegaa gishshau, nuuni xeellidi amottiyoobaara gayttidaagan nu huuphiyaa seeranaadan Xoossaa Qaalay minttettees. (1 Qoronttoosa 9:25, 27; 1 Yohaannisa 2:15-17 nabbaba.) Xillo asa gidida Iyyoobi xeelliyoogeenne amottiyoogee keehippe gayttidaba gidiyoogaa akeekiis. “Maccaasa xeellada amottennaadan, taani ta aifiyaara maachchaa maacettaas” yaagiis. (Iyyooba 31:1) Iyyoobi maccaasaa bessenna ogiyan kushiyan bochiyoogaappe haakkiyoogaa xalla gidennan, hegaa malabaa qoppanaukka koyibeenna. Yesuusi: “Maccaaro xeellidi amottiya ubbai, ba wozana giddon he wode iira shaaramuxiis” giido wode, kandduwaara gayttidaban qofay geeshsha gidana bessiyoogaa qonccissiis.—Maatiyoosa 5:28.
Nuuni Haakkana Koshshiyo Pattennabata
9. (a) Nuuni Intternneetiyaa goꞌettiyo wode, keehippe naagettana koshshiyoy aybissee? (b) Pornograafiyaa lemꞌꞌi ootti xeelliyoogeekka ay kaalettana danddayii?
9 Alamiyan ha wodiyan Intternneetiyan pornograafiyaa xeelliyoogee daroppe meeze gididaba. Nuuni hegaa mala misiliyaa beꞌanau koyennaanikka xeellana danddayoos. Ayba ogiyan? Asho gaytotettau denttettiya misilee deꞌiyo erissoy kompputeriyan akeekennan yaana danddayees. Woykko suure milatiya kiitaa dooyidi xeelliyo wode, pornograafee deꞌiyooba gidana danddayees; hegee xayssanau metiya ogiyan giigidaba gidana danddayees. Issi uri hegaa xayssanaappe kase lemꞌꞌi ootti xeellidaba gidikkonne, he misilee a qofan issibay siyettanaadan oottees. Pornograafiyaa issi kutti lemꞌꞌi ootti xeelliyoogeekka qohana danddayees. Hegee issi uri bana moorancha giidi qoppanaadaaninne he misiliyaa guuggiyaappe kessanau metootanaadan oottana danddayees. Hegaappekka iitabay, issi uri eriiddi hegaa ‘xeelliyaaba’ gidikko, ba wozanaa iita amuwaa woribeennaagaa qonccissees.—Efisoona 5:3, 4, 12 nabbaba; Qolasiyaasa 3:5, 6.
10. Naati pornograafiyaa beꞌanau paacettana danddayiyoy aybissee, eti hegaa beꞌiyoogee ay kaalettana danddayii?
10 Naati issibaa eranau keehi koyiyoogaappe denddidaagan pornograafiyaa beꞌana danddayoosona. Eti hegaa beꞌiyaaba gidikko, hegee asho gaytotettaa xeelliyaagan eta qofaa daro wodiyau moorana danddayees. Issi irpporttee qonccissidoogaadan, hegaa mala qohoy asho gaytotettaa bessenna ogiyan xeellanaadaaninne “asaara saruwaaninne siiquwan deꞌiyoogee metanaadan, maccaasaa bessenna ogiyan xeellanaadaaninne pornograafiyaa beꞌiyoogee amale gidanaadan oottana danddayees; hegee timirttiyan, qassi laggetuuranne so asaara deꞌiya gaytotettankka qohana danddayees.” Hegee guyyeppe aqo deꞌuwankka keehi qohana danddayees.
11. Pornograafiyaa xeelliyoogee gattiyo daafaa qonccissiya leemisuwaa yoota.
11 Issi Kiristtaane ishay: “Taani Yihoowa Markka gidanaappe kase, tau amale gidida ubbabaappe agganau keehippe metidaagee pornograafiyaa beꞌiyoogaa. Taani haꞌꞌikka issi issitoo akeekennan he misiletubaa qoppays; hegaadan siyettiyoy issi issibay sawiyo wode, issi issi muuziqaa siyiyo wode, issi issibaa beꞌiyo wode woykko ta qofay laalettiyo wode gidana danddayees. Hegee ubbatoo aggennan baaxeyiyaaba” yaagidi xaafiis. Hara ishay qassi, naatettan deꞌiyo wode, Yihoowa Markka gidenna ba aaway ehiido pornograafe maxeetiyaa son asi baynnasan beꞌiis. I: “He misilee naatettan ta guuggiyan qohuwaa kaalettiis. Haꞌꞌi 25 layttay aadhi simminkka, he misileta dogana danddayabeykke. Taani keehi baaxetiyaaba gidikkokka, ta guuggiyaappe xayibookkona. Taani he misiletubaa qoppennaba gidikkonne, ta huuphiyaa mooranchadan xeellays” yaagidi xaafiis. Hegaadan iitabay siyettennaadan, pattennabaa xeelliyoogaappe haakkiyoogee ay keena eratettee! Issi uri hegaadan waatidi oottana danddayii? Ba “qofa ubbai kiristtoosayyo azazettana mala” omooddanau baaxetana koshshees.—2 Qoronttoosa 10:5.
12, 13. Kiristtaaneti haakkana bessiyo pattennabati aybee, aybissi?
12 Haakkana bessiyo “pokkobaa” woykko pattennabaa gidida harabay, miishshaa siiqanaadan oottiya woy iita ayyaana oosuwaa minttettiya woykko makkalabaa, suuttaa gussiyoogaanne asa woriyoogaa bessiya, wodiyaa aattiyoobaa. (Mazamure 101:3 nabbaba.) Yelida Kiristtaaneti bantta son beꞌanaadan paqqadiyoobaa dooriyo aawatettay deꞌees; hegaa xeelliyaagan Yihoowan oyshettoosona. Tumu Kiristtaane gidida ooninne eriiddi iita ayyaana oosuwaa oottenna. Gidikkokka, pilmiyaa, issi issi TV prograamiyaa, biiduwaa kaassaanne iitabaa minttettiya, miichiya misileti deꞌiyo xuufetanne naatu maxaafata xeelliyaagan yelidaageeti akeekancha gidana koshshees.—Leemiso 22:5.
13 Nuuni yelaga woy cima gidin, makkalabaanne hanttaara ogiyan asa woriyoogaa bessiya biiduwaa kaassan ufayttana koshshenna. (Mazamure 11:5 nabbaba.) Yihooway ixxiyo ay oosuwankka nu xeelaa wottana bessenna. Seexaanay nu qofaa mooranau halchiyoogaa hassaya. (2 Qoronttoosa 11:3) Wodiyaa aattiyo loꞌꞌo gididabaakka xeelliyoogan daro wodiyaa aattiyoogee, so asaa goynuwau, galla galla Geeshsha Maxaafaa nibaabiyaunne shiiquwau giigettiyo wodiyaa xayssana danddayees.—Piliphphisiyuusa 1:9, 10.
Yesuusa Leemisuwaa Kaallite
14, 15. Seexaanay heezzantto paaciyan Kiristtoosa paaccidoogaappe ay akeekiyoo, Yesuusi waatidi he paaciyaa xoonidee?
14 Ha iita alamiyan pattennabaa xeelliyoogaappe nuuni muleera haakkana danddayennaagee azzanttiyaaba. Yesuusa bollikka hegaa malabay gakkiis. Yesuusi Xoossaa sheniyaa polennaadan oottanau Seexaanay paaccido heezzantto paaciyaa wode, “xalahe halaqai Yesuusa issi daro gita deriyaa xeeraa kessidi, sa7an de7iya kawotetta ubbaanne eta bonchchuwaa bessiis.” (Maatiyoosa 4:8) Seexaanay hegaadan oottidoy aybissee? Ayfiyan xeelliyoobay keehippe balettiyoogaa eriyo gishshau, i hegaa goꞌettanau koyidoogee sirissenna. Alamiyaa kawotettatu ubbaa bonchuwaa xeelliyoogee, Yesuusi alamiyan erettidaagaa gidanau koyanaadan denttettana danddayees. Yesuusi hegau ayba zaaro immidee?
15 Yesuusi he paaciyan ba xeelaa wottibeenna. Ba wozanan iitabaa qoppanau koyibeenna. I Dabloosa shoobiyaa koyennaagaa yootanau qoppanaukka koshshibeenna. Yesuusi, “Laa ha Seexaanau haakka” yaagidi, sohuwaara zaaruwaa immiis. (Maatiyoosa 4:10) Yesuusi Yihoowaara deꞌiya dabbotan ba xeelaa wottiis; qassi ba deꞌuwaa halchuwaara, giishin Xoossaa sheniyaa poliyoogaara moggiya ogiyan zaariis. (Ibraawe 10:7) Yaatiyo gishshau, Seexaanay cimuwan paaccido paaciyaa Yesuusi muruta ogiyan xooniis.
16. Yesuusi Seexaanaa paaciyaa eqettidoogaappe nuuni ay timirtte demmana danddayiyoo?
16 Nuuni Yesuusa leemisuwaappe darobaa tamaarana danddayoos. Koyroy, Seexaanay nuna ubbaakka cimmanau malana danddayees. (Maatiyoosa 24:24) Naaꞌꞌanttoy, nuuni xeelliyoobay nu wozanay loꞌꞌobaa woy iitabaa amottanaadan oottana danddayees. Heezzanttoy, Seexaanay nuna balettidi wora efaanau “aifen xeellidi” amottiyoobaa bau danddayettida ubban goꞌettees. (1 PHeexiroosa 5:8) Oyddanttoy, nuunikka sohuwaara zaaruwaa immiyaaba gidikko, Seexaanaa eqettana danddayoos.—Yaaqooba 4:7; 1 PHeexiroosa 2:21.
Ubbatoo Intte Ayfee “Payya” Gido
17. Nuna paacee gakkiyo wode ay oottana koshshiyaakko kasetidi qoppiyoogee eratetta gididoy aybissee?
17 Nu huuphiyaa Yihoowayyo geppiyoogee pattennabaappe haakkanau qaalaa geliyoogaa gujjees. Nuuni Xoossaa sheniyaa oottanau geppiyo wode, “Taani ne qaalaayyo azazettanau koyiyo gishshau, ta tohuwaa iita oge ubbaappe naagaas” giida mazamuraawiyaara moggoos. (Mazamure 119:101) Nuna paacee gakkiyo wode ay oottana koshshiyaakko kasetidi qoppiyoogee eratetta. Nuuni oottennaadan Geeshsha Maxaafay diggiyoobati qoncce. Nuuni Seexaanaa hiillaa eroos. Yesuusi shuchaa oytta oottanaadan Seexaanay paaccidoy awudee? Oytamu gallassaanne oytamu qammaa xoomidi, ‘namisettido’ wode. (Maatiyoosa 4:1-4) Nuuni daafuriyoonne paaciyan xoonettanaba milatiyo wodiyaa Seexaanay akeekana danddayees. Hegaa gishshau, ha allaalleta xeelliyaagan akeekan qoppana koshshiyo wodee haꞌꞌa. Hegau haganaa sugana bessenna! Nuuni nu huuphiyaa Yihoowayyo geppidoogaa ubba galla hassayiyaaba gidikko, pattennabaappe haakkanau keehippe murttoos.—Leemiso 1:5; 19:20.
18, 19. (a) “Payya” ayfiyaanne “payya gidenna” ayfiyaa dummatettaa yoota. (b) Ubbatoo goꞌꞌiyaabaa qoppiyoogee koshshiyoy aybissee, hegaa xeelliyaagan Piliphphisiyuusa 4:8y woygi zorii?
18 Wodiyaappe wodiyan gujji gujji biya, ayfiyan xeellin balettiya darobay, nuna galla galla gakkees. Ubbatoo nu ayfee “payya” gidanaadan Yesuusi zorido zoriyaa ay wodeppenne aaruwan kaallana koshshees. (Maatiyoosa 6:22, 23) “Payya” ayfee issi halchuwan, giishin Xoossaa sheniyaa oottiyoogan xeelaa wottees. Hegaappe dumma ogiyan, “payya gidenna” ayfee cimmees, amottees, qassi pattennabaa xeellees.
19 Nu xeelliyoobay nu guuggiyaakko biyoogaa, qassi nu guuggiyan deꞌiyaabay nu wozanaa denttettiyoogaa hassayite. Yaatiyo gishshau, nuuni ubbatoo goꞌꞌiyaabaa qoppiyoogee keehippe koshshees. (Piliphphisiyuusa 4:8 nabbaba.) Mazamuraawee: “Pattennabaa xeellenna mala, ta aifeta teqqa” giidi woossidoogaadan nuunikka ubbatoo woossiyaageeta gidoos. Yaatidi, he woosaara moggiyaabaa nuuni oottanau baaxetiyo wode, Yihooway ‘ba ogiyan nu deꞌuwaa ooraxissanaagaa’ ammanettana danddayoos.—Mazamure 119:37; Ibraawe 10:36.
Kaallidi Deꞌiyaabata Xeelliyaagan Nuuni Ay Hassayana Koshshii?
• Nu ayfiyaa, nu guuggiyaanne nu wozanaa giddon deꞌiya gaytotettaa xeelliyaagan
• Pornograafiyaa xeelliyoogaa daafaa xeelliyaagan
• Nu ayfee ubbatoo “payya” gidiyoogee koshshiyoogaa xeelliyaagan
[Sinttaa 27n deꞌiya misiliyaa]
Kiristtaaneti xeellennaadan haakkana bessiyo pattennabati awugeetee?