Nabbabiyaageetu Oyshaa

Kiitettida PHawuloosi 1 Qoronttoosa 15:29n giidobay he wode deꞌiya issi issi Kiristtaaneti hayqqidaageetussi xammaqettidoogaa bessii?

Akkay, hegaa malabay deꞌiyoogaa Geeshsha Maxaafaykka taarikeekka yootenna.

Daro Geeshsha Maxaafaa birshettatun ha xiqisee birishshettido ogee, PHawuloosa wode, hayqqidaageetussi xammaqettiyo xinqqatee deꞌees giidi issi issi asay qoppanaadan oottees. Leemisuwawu, Wolayttatto Geeshsha Maxaafay, “Haiqqidaageeti mulekka denddennabaa gidikko, asai haiqqidaageetussi aissi xammaqettii?” yaagees.

SHin Geeshsha Maxaafaa eranchcha gidida naaꞌꞌu asati giidobaa akeeka. Grigory Lokwud giyo Dottoree “hayqqida urawu” xammaqettiyooba giyoobi “taarikee woy geeshsha maxaafi yootiyo xinqqate qommoppe keehi dumma gididaba” gidiyoogaa yootiis. Hegaadankka, Gordon Donald Fi giyo profeseree hagaadan giis: “Hegaa mala xinqqatee deꞌiyoogaa bessiyaabi taarikiyan woy geeshsha maxaafan qonccibeenna. Ooratta Maachchan hegaabay odettibeenna; hegaappe simmin deꞌiya wodetun, hara ay woosa keettankka gidin, orttodokise Kiristtaanetunkka gidin he meezee deꞌenna.”

Geeshsha Maxaafay, Yesuusa ashkkarati ‘asa ubbaa Yesuusa kaalliyaagaa oottidi, xammaqananne I eta azazidobaa ubbaa naagana mala tamaarissana’ koshshiyoogaa yootees. (Maa. 28:19, 20) Issi uri xammaqettidi erissiyo ashkkara gidanaappe kase, Yihoowabaanne Yesuusabaa tamaarana, eta ammanana, qassi etawu azazettana bessees. Hayqqidi duufuwan deꞌiya asi hegaadan oottana danddayenna; paxa deꞌiya Kiristtaaneekka hegaa awu oottana danddayenna.—Era. 9:5, 10; Yoh. 4:1; 1 Qor. 1:14-16.

Yaatin, PHawuloosi gaana koyidobay aybee?

Issi issi Kiristtaaneti hayqqidaageeti denddanaagaa siridosona. (1 Qor. 15:12) Hegee bala gidiyoogaa PHawuloosi etawu qonccissiis. I ‘wonttin wonttin hayqqiyoogaa’ yootiis. He wode I paxa deꞌiyoogee qoncce. SHin I gita metoy gakkishinkka, hayquwaappe simmin, Yesuusaagaadan wolqqaama ayyaana mereta gididi denddanaagaa ammanettiis.—1 Qor. 15:30-32, 42-44.

Ayyaanan tiyettida Kiristtaaneti hayquwaappe denddanaappe kase, galla galla banttana gakkiya metuwaanne hayquwaa genccana bessiyoogaa Qoronttoosan deꞌiya Kiristtaaneti akeekana koshshiis. ‘Kiristtoos Yesuusaara gidanawu xammaqettiyoogee hayquwankka aara gidanawu xammaqettiyoogaa.’ (Roo. 6:3) Eti xammaqettiyo leemiso xinqqatee hayqquwaa kaalettiyaabanne eti saluwaa deꞌuwawu denddanaadan oottiyaaba.

Haattan xammaqettoosappe naaꞌꞌu layttappe dariya wodee aadhdhi simmin, Yesuusi ba kiittido naaꞌꞌata, “Taani xammaqettanau bessiyo xinqqatiyaakka intte xammaqettana” yaagiis. (Mar. 10:38, 39) He wode Yesuusi haattan xammaqettiyoogaabaa gidennan, I ammanettidi deꞌiyoogee hayquwaa kaalettanaagaa yootana koyiis. PHawuloosi ayyaanan tiyettida Kiristtaaneti “waayiyaa aara shaakkikko, a bonchchuwaakka aara [shaakkanaagaa]” yootiis. (Roo. 8:16, 17; 2 Qor. 4:17) Yaatiyo gishshawu, etikka saluwaa deꞌuwawu denddanawu hayqqana bessees.

Hegaappe denddidaagan, PHawuloosi giidobay kaallidi deꞌiyaagaadan suure birshshettana danddayees: “Hegaa gidana xaykko, hayquwawu xammaqettiyoogeeti ayba goꞌꞌa demmanee? Hayqqidaageeti mulekka denddennaba gidikko, etikka hayquwawu xammaqettiyo gaasoy aybee?”