“Azazo Ubbaappe Aadhdhiya Azazoi Augee?”

Xoossay nuuppe koyiyoy aybee? Nuuni naagana bessiyo higgee daroo? Hegaa keena daro gidennaagee ufayssiyaaba. Xoossaa Naꞌaa, Yesuus Kiristtoosi yootidoogaadan, Xoossay nuuppe koyiyoobaa issi qaalan qonccissana danddayoos.—Marqqoosa 12:28-31 nabbaba.

Koyro, Yesuusi hegaa awude yootidaakko akeeka. I hayqqanaappe guutta gallassaa kasetidi, Niisaana 11n beetamaqidasiyan tamaarissiiddi deꞌees. Yesuusa morkketi appe balaa demmanau wayssiya oyshaa oychidosona. Eta oysha ubbau bixe zaaruwaa zaaridi, eta coꞌꞌu oottiis. Yaatin Yesuusa, “Azazo ubbaappe aadhdhiya azazoi augee?” yaagidi oychidosona.—Paydo 28.

Hegee zaaranau metiya oysha. Issi issi Ayhudati, Muuse Higgiyan deꞌiya 600ppe dariya higgetuppe aadhiyaagee awugaakkonne palamettidosona. Harati qassi, ubba higgeekka issi lagge gidiyo gishshau, issoy issuwaappe aadhees giyoogee bessennaba giidi palamettennan aggokkona. Yesuusi he oyshaa woygidi zaaridee?

Yesuusi oyshaa zaariyo wode, issi azazuwaa gidennan naaꞌꞌu azazuwaa yootiis. Koyro, “Intte Godaa intte Xoossaa intte kumetta wozanaappe, intte kumetta shemppuwaappe, intte kumetta qofaappe, intte kumetta wolqqaappe siiqite” yaagiis. (Paydo 30; Zaarettido Wogaa 6:5) ‘Wozanaa, qofaa, shemppuwaanne wolqqaa’ giya qaalaa birshshettay issi mala gidiyo wodee deꞌees.a Hegee, issi uri ba kumetta asatettan, giishin ba eraanne bau deꞌiya ubbabaa goꞌettidi Yihoowa siiqana koshshees giyoogaa. Geeshsha Maxaafaa qofaa qonccissiya issi xuufee ha qofaa, “Xoossaa kumetta hanotan siiqana bessees” yaagees. Yaatiyo gishshau, neeni Xoossaa siiqiyaaba gidikko, ubba gallassi a ufayssanau ne danddayiyo ubbabaa oottaasa.—1 Yohaannisa 5:3.

Naaꞌꞌantto, Yesuusi, “Neeni ne shooruwaa ne huuphedan siiqa” yaagiis. (Paydo 31; Wogaabaa 19:18) Xoossaa siiqiyoogeenne shooruwaa siiqiyoogee issoy issuwaappe shaahettennaba. SHooruwaa siiqiyoogee Xoossaa siiqiyoogaara gayttidaba. (1 Yohaannisa 4:20, 21) Nu shoorota nu huuphedan siiqiyaaba gidikko, eti nuuyyo oottanaadan koyiyoobaa etaukka ootteettees. (Maatiyoosa 7:12) Yaatiyoogan, nunanne nu shoorota ba leemisuwan medhida Xoossaa siiqiyoogaa qonccissoos.—Doomettaabaa 1:26.

Xoossaanne shooruwaa siiqanaadan imettida azazoy ay keena koshshiyaabee? Yesuusi, “Hageetuppe aadhdhiya hara azazoi baawa” yaagiis. (Paydo 31) Qassi hara xiqisiyan, azazoti ubbay ha naaꞌꞌu azazotun qashettidoogaa yootiis.—Maatiyoosa 22:40.

Xoossaa ufayssiyaabaa oottiyoogee metiyaaba gidenna. I nuuppe koyiyoobaa ubbaa xaaxi waaxidi, “siiquwaa” giidi issi qaalan qonccissana danddayettees. Xoossay ba ashkkarati bana siiqanaadan koyees. SHin siiqoy coo haasayan woy qofan gidennan, oosuwan qoncciyaaba. (1 Yohaannisa 3:18) Neeni “siiqo” gidida Xoossaa Yihoowa waatada siiqana danddayiyaakko aybissi tamaarikkii?—1 Yohaannisa 4:8.