Xoossaa Imota Gidida Ekkiyoogaanne Geliyoogaa Bonchite
“Hegaa gishshau asi ba aawaanne ba aayyiyo aggi bayidi, ba machcheera issippe de7ees; eti naa77ai issi asho gidoosona.”—DOO. 2:24.
1. Nuuni Yihoowa bonchiyoogee bessiyaaba gididoy aybissee?
EKKIYOOGAANNE geliyoogaa Doomissidaagaa, Xoossaa Yihoowa nuuni bonchana bessiyoogee tuma. I nuna Medhidaagaa, nuna Haariyaagaanne saluwan deꞌiya nu Aawaa gidiyoogaadan, “lo77o imo ubbainne kumetta woito ubbai” appe yees giyoogee bessiyaaba. (Yaaq. 1:17; Ajj. 4:11) Hagee a gita siiquwaa qonccissiyaaba. (1 Yoh. 4:8) I nuna tamaarissido ubbabay, nuuppe koyiyo ubbabaynne nuussi immido ubbabay nu sarotettaassanne nu goꞌꞌaassa.—Isi. 48:17.
2. Yihooway koyro azinaunne a macheeyyo ayba azazuwaa immidee?
2 Geeshsha Maxaafay ekkiyoogeenne geliyoogee, he “lo77o” imotaappe issuwaa gidiyoogaa yootees. (Uru. 1:9; 2:12) Koyro bitanee machanaadan oottido wode, Yihooway Addaamessinne Hewaanissi eta aqoy giiga gidanaadan maaddiya qoncce azazuwaa immiis. (Maatiyoosa 19:4-6 nabbaba.) Eti Xoossaa azazuwaa kaallidaba gidiyaakko, merinau ufayttana shin. Gidoppe attin, eti eeyyatettan Xoossaa azazuwaa kaallibeenna gishshau, eta iita waayee gakkiis.—Doo. 3:6-13, 16-19, 23.
3, 4. (a) Ha wodiyan deꞌiya daroti ekkiyoogaanne geliyoogaa bonchibeennaynne Xoossaa Yihoowa bonchibeennay ayba ogiyaanee? (b) Ha huuphe yohuwan ayba leemisota beꞌanee?
3 He koyro macheenne azinaagaadan, ha wodiyan daro asay aqo deꞌuwaara gayttidaagan Yihoowa kaaletuwaa kaallenna. Issoti issoti issippe deꞌiyaaba gidikkokka, aqo deꞌoy kaalettiyo aawatettaa koyokkona; harati qassi aqo deꞌuwaa banttau milatiya ogiyan qonccissoosona. (Roo. 1:24-32; 2 Xim. 3:1-5) Eti ekkiyoogeenne geliyoogee Xoossaa imota gidiyoogaa xaasayi xeelloosonanne he imotaa bonchenna gishshau hegaa Immidaagaa, Xoossaa Yihoowakka bonchokkona.
4 Issi issitoo, Xoossau oottiyaageetuppekka issoti issoti ekkiyoogaanne geliyoogaa Yihooway xeelliyo ogiyan xeellibookkona. Ekkidanne gelida issi issi Kiristtaaneti Geeshsha Maxaafaa maaraappe kareera, shaahettanau woykko yeddanau qofaa qachoosona. Hegaa malabaappe waanidi haakkana danddayiyoo? Doomettaabaa 2:24n deꞌiya Xoossaa kaaletoy aqo oyqqida Kiristtaaneti bantta aqo deꞌuwaa minttanaadan waatidi maaddana danddayii? Ekkanau woy gelanau qoppiyaageeti aqo deꞌuwau waanidi giigettana danddayiyoonaa? Yihoowa bonchiyoogee, azinaynne machiyaa deꞌido keena ubban issippe deꞌanau keehippe koshshiyaaba gidiyoogaa bessiya, beni wode deꞌida heezzu giiga aqo deꞌuwaa hanotaa ane beꞌoos.
Ubbatoo Ammanettiyaageeta Gidite
5, 6. Zakkaariyaasanne Elssaabeexo gakkida paacee ayba gidana danddayii, eti ammanettido gishshau ayba ogiyan anjjettidonaa?
5 Zakkaariyaasinne Elssaabeexa naaꞌꞌaykka suurebaa oottidosona. Eti naaꞌꞌaykka Yihoowan ammanettidi au oottiya aqo lagge dooridosona. Zakkaariyaasi qeese gididi oottiyo oosuwaa ammanettidi poliis; qassi eti naaꞌꞌaykka banttau danddayettida keena ubban Xoossaa Higgiyaa naagidosona. Eti galatana koshshiyo darobay deꞌiyoogee qoncce. SHin Yihudaa biittan deꞌiya eta soo intte biidaba gidiyaakko, etau issibay baynnaagaa sohuwaara akeekeeta. Etau naꞌi baawa. Elssaabeexa mayne; qassi eti naaꞌꞌaykka cimidosona.—Luq. 1:5-7.
6 Beni Israaꞌeelan, naꞌa yeliyoogee xoqqu oottidi xeelliyooba; qassi darotoo son deꞌiya asaa qooday cora. (1 Sam. 1:2, 6, 10; Maz. 128:3, 4) He wode, issi Israaꞌeela biittaa asi, machiyaa naꞌa yelennaba gidikko, hegaa gaaso oottidi yeddana danddayees. SHin Zakkaariyaasi ammanettidi Elssaabeexiira deꞌiis. I aqo deꞌuwaa laaliyo woy ba macheeppe shaahettiyo ogiyaa koyibeenna. Naꞌa yelibeennaagee eta azzanttiyaaba gidikkokka, ammanettidi Yihoowayyo issippe oottiyoogaa aggibookkona. Yihooway maalaalissiyaabaa oottidi, eti cimido wodiyan naꞌa yelanaadan oottiyoogan guyyeppe eta keehi anjjiis.—Luq. 1:8-14.
7. Elssaabeexa ba azinaayyo ammanettiyoogaa hara ayba ogiyan bessadee?
7 Elssaabeexa hara wodekka loꞌꞌo ogiyan ammanettiyoogaa bessaasu. Zakkaariyaasi Xoossaa kiitanchaa ammanibeennaagaappe denddidaagan duudido gishshau, eta naꞌay Yohaannisi yelettiyo wode haasayanau danddayenna. SHin Yihoowa kiitanchay naꞌaa sunttaa “Yohaannisa” gaanaadan ayyo yootidoogaa ba maccaaseessi issi ogiyan qonccissennan aggenna. SHooro asaynne dabboy naꞌaa a aawaa sunttaadan Zakkaariyaasa giidi sunttanau koyidosona. SHin Elssaabeexa ba azinay yootidobaa ammanettada azazettaasu. A, “CHii! Yohaannisa giidi sunttana” yaagaasu.—Luq. 1:59-63.
8, 9. (a) Ammanettiyoogee aqo deꞌuwaa waati minttii? (b) Azinaynne machiyaa ammanettiyoogaa bessana danddayiyo issi issi ogeti awugeetee?
8 Zakkaariyaasanne Elssaabeexiigaadan, ha wodiyan deꞌiya aqo laggeta hidootaa qanxxanaadan oottiyaabaynne hara metoy gakkees. Aqo laggeti issoy issuwau ammanettennaageeta gidikko, aqo deꞌoy giiga xayees. Lambbeechiyoogee, pornograafiyaa beꞌiyoogee, wodiraa laammiyoogeenne hegaa mala harabay ufayssiya aqo deꞌuwan issoy issuwaa mule ammanennaadan oottana danddayees. Aqo deꞌuwan issoy issuwaa ammanennan aggiyo wode, siiqoy irxxi irxxi bees. Issi issi hanotan, ammanettiyoogee koyettibeenna uraynne qohiyaabay so asaakko gelennaadan teqqiya dirssa mala; qassi amarida ogiyan, so giddon deꞌiya asay sarotettan deꞌanaadan oottees. Hegaa gishshau, azinaynne machiyaa issoy issuwau ammanettiyo wode, issippe saruwan deꞌanaunne bantta wozanaabaa issoy issuwau yootanau danddayoosona; yaatiyoogan bantta siiqoy minnanaadan oottoosona. Ee, ammanettiyoogee keehi koshshiyaaba.
9 Yihooway Addaameyyo, “Asi ba aawaanne ba aayyiyo aggi bayidi, ba machcheera issippe de7ees” yaagiis. (Doo. 2:24) Hegee woygiyoogee? Laggetuuranne dabbotuura deꞌiya gaytotettay kaseegaa mala gidana koshshenna. Aqo laggeti kasetidi, issoy issuwau qoppiyoogaa bessanaunne wodiyaa immanau koshshees. Eti bantta aqo laggiyaa shenehoo giidi, laggetussi woy dabbotussi koshshiyaabaa kaseyanau danddayokkona. Eti bantta soossi koshshiyaabau kuuyiyo wode woy issoy issuwaara maayettennan aggiyo wode, banttana yelidaageeti kuuyanaadan woy giigissanaadan oottana koshshenna. Azinaynne machiyaa issoy issuwaara duuxxennan deꞌana bessees. Hegee Xoossaa azazo.
10. Aqo laggeti ammanettiyaageeta gidanaadan aybi maaddanee?
10 Ammanettiyoogee, dumma dumma haymaanootiyaa kaalliya so asaukka anjjuwaa demissees. Ammanenna azinay deꞌiyo issi michiyaa hagaadan gaasu: “Ta azinaassi haarettiyoonne a wozanappe bonchiyo ogiyaa tamaarissido gishshau, Yihoowa keehippe galatays. Taani ammanettada deꞌidoogee 47 layttau issippe siiquwaaninne bonchuwan deꞌanaadan oottiis.” (1 Qor. 7:10, 11; 1 PHe. 3:1, 2) Yaatiyo gishshau, intte aqo laggee hirggennan deꞌanaadan oottanau minnite. Intte aqo laggee saꞌaa bolli deꞌiya ooppenne inttessi aadhiyoogaa, haasayiyoobaaninne oottiyooban qonccissanau injjiyaa koyite. Danddayiyo keenan hegaadan oottana bessiyay inttena; ooninne woy aybinne intte giddon gelanaadan paqqadoppite. (Leemiso 5:15-20 nabbaba.) Ufayssiya aqo deꞌuwan 35 layttaa deꞌida Rooninne Jaaneta, “Nuuni oottanaadan Xoossay koyiyoobaa ammanettidi oottiyo gishshau, ufayssiyaanne giiga aqo deꞌuwaa deꞌoos” yaagidosona.
Issippetettay Aqo Deꞌuwaa Minttees
11, 12. Aqiilinne PHirisqqila (a) so oosuwaa oottiyo wode, (b) hara oosuwaa oottiyo wode (c) haggaaziyo wode waanidi hashetidonaa?
11 Kiitettida PHauloosi ba mata lagge gidida Aqiilanne PHirisqqilibaa yootido wode, eta naaꞌꞌaa issippe xeegiis. Azinaynne machiyaa “issi asho” gidana koshshiyoogaa yootido wode Xoossay gaanau koyidobaa xeelliyaagan, issippetettay deꞌiyo ha azinaynne machiyaa loꞌꞌo leemiso gidoosona. (Doo. 2:24) Eti so giddo oosuwaa, hara oosuwaanne Kiristtaane haggaazuwaa ubbatoo issippe polidosona. Leemisuwau, PHauloosi Qoronttoosa koyro biido wode, Aqiilinne PHirisqqila bantta son i takkana mala kehatettan shoobbidosona; i hegaappe simmidi oottidobaa guutta wodiyau yan uttidi oottidaba milatees. Guyyeppe, Efisoonan eti bantta keettaa gubaaꞌe shiiquwau goꞌettidosona; qassi Aphiloosa mala oorattati ayyaanaaban diccanaadan maaddanau issippe oottidosona. (Oos. 18:2, 18-26) Hegaappe simmidi, ha mishettidi oottiya azinaynne machiyaa Roome biidi, yankka bantta keettan gubaaꞌee shiiqanaadan oottidosona. Guyyeppe, Efisoona simmidi, ishata minttettidosona.—Roo. 16:3-5.
12 Amarida wodiyau, Aqiili, PHirisqqilanne PHauloosi issi mala oosuwaa issippe oottidosona; hegeekka dunkkaaniyaa sikkiyoogaa. Qassi eti annaacettennan woy ooyettennan issippe oottiyoogaa akeekoos. (Oos. 18:3) Gidikkokka, eta aqo deꞌoy minonne ufayssiyaagaa gidanaadan oottidaagee, eti Kiristtaane haggaazuwaa issippe oottidoogaa gidiyoogee qoncce. Eti Qoronttoosan, Efisoonaaninne Roomen ‘Kiristtoos Yesuusa oosuwaa issippe oottiyaageeta’ gidiyoogan erettoosona. (Roo. 16:3) Eti haggaazido ubbasan, Kawotettaabaa aahuwan sabbakanau hashetidi oottidosona.
13, 14. (a) Aqo deꞌuwaa issippetettaa moorana danddayiya hanotati awugeetee? (b) Aqo laggeti ‘issi ashodan’ bantta issippetettaa minttanau oottana danddayiyo issi issibati aybee?
13 Issi mala hoolliyaa kessiyoogeenne issi mala oosuwaa oottiyoogee aqo deꞌuwaa minttees. (Era. 4:9, 10) Ha wodiyan daro azinatinne machoti wodiyaa issippe aattennaagee azzanttiyaaba. Eti issoy issuwaappe haakkidi bantta oosuwaa daro saatiyau oottoosona. Harati oosuwaa oottanau haakkidi boosona woykko so asau miishshaa yeddanau oosuwau kare biitti boosona. Son deꞌiyaaba gidikkokka, issi issi aqo laggeti televizhiiniyan, banttana ufayssiyaabaa oottiyoogan, ispporttiyan, biiduwaa kaassan, woykko Intternneetiyan wodiyaa aattiyo gishshau, issoy issuwaara gayttokkona. Intte soo hanotaykka hegaa malee? Hegaadaana gidikko, kaseegaappe aaruwan wodiyaa issippe aattanau intte hanotaa giigissana danddayeetii? Qumaa kattiyoogaa, kattaa miido miishshaa meecciyoogaa woykko gaden oottiyoogaa malabaa issippe oottiyoogaa shin? Naata naagiyo wode woykko cimida so asaa maaddiyo wode issippe oottana danddayeetii?
14 Yihoowau goynniyoogaara gayttida oosuwaa oottiyoogan ubbatoo issippe wodiyaa aattiyoogee keehippe koshshiyaaba. Gallassa xiqisiyaa issippe tobbiyoogeenne so asaa goynuwan issippe shaahettiyoogee, intte soo asaa qofaynne hoollee issi mala gidanaadan loꞌꞌo injjiyaa medhees. Haggaazuwankka issippe shaahettite. Danddayettiyaaba gidikko, inttessi injjetiyoy issi agina woy issi laytta xallaassa gidikkokka, aqinye gididi issippe oottanau malite. (1 Qoronttoosa 15:58 nabbaba.) Ba azinaara aqinye gidada oottida issi michiyaa hagaadan gaasu: “Nuuni issippe wodiyaa aattidonne loytti haasayido ogetuppe issoy haggaazuwaa. Nuuni harata ayyaanaaban maaddiyo issi mala hoollee deꞌiyoogeeta gidiyo gishshau, tumuppe issippetettay deꞌiyoogeeta gidiyoogaa akeekaas. Taani a ta azina xalladan gidennan, taassi loꞌꞌo laggedan xeellada aara matattaas.” Goꞌꞌiyaabaa intte issippe oottiyo wode, Aqiilaagaadaaninne PHirisqqiliigaadan intte koshshay, intte kaseyiyoobaynne intte eeshshay loddan loddan intte aqo laggiyaagaara issi mala gidees; intte qoppiyoobaaninne oottiyooban, intteyyo siyettiyaaban kaseegaappe aaruwan “issi asho” gidana.
Intte Aqo Deꞌuwan Xoossaa Kaseyite
15. Giiga aqo deꞌuwau keehippe koshshiyaabay aybee? Qonccissa.
15 Aqo deꞌuwan Xoossaa kaseyiyoogee keehi koshshiyoogaa Yesuusi erees. Yihooway koyro bitaniyau macho immishin i beꞌiis. Xoossaa kaaletuwaa kaallido wodetun Addaameenne Hewaana ay keena ufayttidaakko, qassi eti a kaaletuwaa ixxis giido wode gakkida metuwaa beꞌiis. Yesuusi harata tamaarissido wode, Doomettaabaa 2:24n deꞌiya ba Aawaa azazuwaa zaarettidi yootiis. I hegaa bolli gujjidi, “Xoossai issippe gattidoogaa asi shaakkoppo” yaagiis. (Maa. 19:6) Yaatiyo gishshau, Yihoowa wozanappe bonchiyoogee, ufayssiyaanne giiga aqo deꞌuwau ha wodiyankka keehippe koshshiyaaba. Yesuusa aawaynne aayyiyaa, Yooseefinne Mayraama hegaa xeelliyaagan loꞌꞌo leemiso gidoosona.
16. Yooseefinne Mayraama bantta soo deꞌuwan Xoossaa kaseyiyoogaa waatidi bessidonaa?
16 Yooseefi Mayraamo kehatettaaninne bonchuwan oyqqiis. Mayraamiira gayttidaagan hanidabaa Xoossaa kiitanchay ayyo yootanaappe kase, Yooseefi a shahaaridoogaa erido wodekka iyyo maarotaa bessanau koyiis. (Maa. 1:18-20) Eti azinanne macho gididi, Qeesaara awaajjuwau azazettidosona; qassi Muuse Higgiyaa mintti kaallidosona. (Luq. 2:1-5, 21, 22) Yerusalaamen bonchiyo waannatiya haymaanoote baalatun beettana koshshiyay attuma asaa xalla gidikkokka, Yooseefinne Mayraama bantta soo asaara layttan layttan yaa boosona. (Zaa. 16:16; Luq. 2:41) Xoossau aqida ha azinaynne machiyaa, ha ogetuuninne hara ogetun, Yihoowa ufayssanau baaxetidosona; qassi ayyaanaabaa wozanappe bonchiyoogaa bessidosona. Yesuusi haggaazuwaa doommanaappe kase etaara deꞌido wodiyan Yihooway ba Naꞌau koshshiyaabaa kunttanaadan eta dooridoogee garamissiyaaba gidenna.
17, 18. (a) Aqo laggeti bantta soo deꞌuwan ayyaanaabaa kaseyana danddayiyo ogeti awugeetee? (b) Hegee eta waatidi goꞌꞌii?
17 Inttekka hegaadan intte soo deꞌuwan Xoossaa kaseyeetii? Leemisuwau, keehi koshshiyaabaa kuuyanaappe kase, Geeshsha Maxaafaa baaso siraataa pilggeetii, he allaalliyaa xeelliyaagan woosseetii, qassi kayma Kiristtaaneta zoriyaa oycheetiiyye, woy inttena gakkida metuwaa giigissanau intte qofaa woy intte soo asaanne intte laggetu qofaa kaalleetii? Aqo deꞌuwaanne so asaa deꞌuwaa xeelliyaagan ammanettida wozannaama ashkkaray xuufiyan kessido goꞌꞌiya qofaa oosuwan peeshshanau baaxeteetiiyye, woy heeraa wogaa woy daro asay kaalliyo asa zoriyaa kaalleetii? Ubbatoo issippe woosseetinne xannaꞌeetii, ayyaanaabaa hoolliyaa kesseetii, qassi intte soo asay kaseyana bessiyaabaa haasayeetii?
18 Aqo deꞌuwan deꞌido ufayssiya 50u layttaa xeelliyaagan Ray hagaadan giis: “Yihoowa nu aqo deꞌuwan ‘wodoruwau heezzantto achadan’ xeelliyo gishshau, nuuni giigissana danddayenna metoy nuna mule gakkibeenna.” (Eranchchaa 4:12 nabbaba.) Daaninne Tirenakka hegaa maayoosona. Eti, “Nuuni issippe Xoossaayyo oottiyo wode nu aqo deꞌoy kaseegaappe minnees” yaagidosona. Eti aqo deꞌuwan 34 layttaappe dariya wodiyaa hanno gakkanau ufayssan deꞌidosona. Intte aqo deꞌuwan ubbatoo Yihoowa kaseyiyaaba gidikko, inttessi injjetanaadan i maaddana, qassi keehippe anjjana.—Maz. 127:1.
Xoossaa Imotaa Bonchiyoogaa Aggoppite
19. Xoossay aqo deꞌo imotaa immidoy aybissee?
19 Ha wodiyan darota qofissiyaabay banttana ufayssiyaaba xallaa koyiyoogaa. SHin Yihoowayyo oottiya uri hanotata xeelliyoy hegaappe dumma ogiyaana. Xoossay aqo deꞌuwaa Ba halchuwaa polanau imota oottidi giigissidoogaa he uri akeekees. (Doo. 1:26-28) Addaameenne Hewaana he imotaa bonchidaba gidiyaakko, kumetta saꞌay gannate gidin, Xoossaayyo oottiya, ufayttiya xillo asay an kumana shin.
20, 21. (a) Ekkiyoogaanne geliyoogaa nuuni geeshshabadan xeellana koshshiyoy aybissee? (b) Hachi galla xannaꞌanay ay imota xeelliyaagaanee?
20 Ubbaappe aaruwan, Xoossaa ashkkarati aqo deꞌuwaa Yihoowa bonchissiyo injjedan xeelloosona. (1 Qoronttoosa 10:31 nabbaba.) Nuuni beꞌidoogaadan aqo deꞌuwaa minttanau maaddiya, Xoossaa ufayssiya eeshshati, ammanettiyaageeta gidiyoogaa, issippetettaanne Xoossaa kaseyiyoogaa. Yaatiyo gishshau, nuuni ekkanau woy gelanau giigettiiddi deꞌiyaaba gidin, aqo deꞌuwaa minttanau woy aqo deꞌuwaa laalettiyoogaappe ashshanau koyiyaaba gidin, aqo deꞌoy Xoossay giigissido bonchoba gidiyoogaa kasetidi akeekana bessees. Hegaa akeekiyoogee, aqo deꞌuwan kuuyiyoobaa Xoossaa Qaalaadan kuuyanau nuuyyo danddayettidabaa oottanaadan denttettees. Hegaadan oottiyoogan aqo deꞌuwaa imotaa xalla gidennan, he imotaa Immidaagaa, Xoossaa Yihoowa bonchiyoogaa bessoos.
21 Yihooway nuussi immido imotay aqo deꞌo xalla gidennaagee qoncce. Deꞌuwan ufayssaa demmiyo ogee hegaa xalla gidenna. Kaalliya huuphe yohuwan Xoossay immido hara alꞌꞌo imotaa, giishin ekkennan woy gelennan deꞌiyo imotaa beꞌana.
Woygada Zaaruutii?
• Ammanettiyoogee ekkida woy gelida Kiristtaaneta aqo deꞌuwan waatidi maaddana koshshii?
• Issippetettan oottiyoogee aqo deꞌuwaa minttiyoy aybissee?
• Ekkidaageeti woy gelidaageeti bantta deꞌuwan Xoossaa kaseyana danddayiyo issi issi ogeti awugeetee?
• Aqo deꞌuwaa Doomissidaagaa, Yihoowa bonchiyoogaa waatidi bessana danddayiyoo?
[Sinttaa 17n deꞌiya misiliyaa qonccissuwaa]
Issippe oottiyoogee azinaanne machee giddon issippetettay deꞌanaadan maaddees