Ubbatoo Loꞌꞌobaa Waata Qoppana Danddayay?

1. Yihooway nuuni ufayttanaadan oottiya ayba anjjo immidee?

YIHOOWAY nuuni ufayttanaadan koyees; qassi i nuna ufayssiya daro anjjuwaa immiis. Hegeetuppe issoy, i nuussi deꞌuwaa immidoogaa. Hegaappe denddidaagan, i nuna tumu goynuwau ehiido gishshau, nu deꞌuwan a sabbana danddayoos. (Maz. 144:15; Yoh. 6:44) Yihooway nuna siiqiyoogaa yootiis; qassi nuuni ayyo haggaaziiddi genccanaadan maaddees. (Erm. 31:3; 2 Qor. 4:16) Ayyaanaabaa qumay kumi palahidonne nu ishanttuura siiqettidi deꞌiyo ayyaana gannatiyan deꞌoos. Qassi, nuuyyo ufayssiya hidootay deꞌees.

2. Xoossau ammanettidi haggaaziya issoti issoti aybiira baaxetiyoonaa?

² Ha ufayssiya anjjoy deꞌishinkka, Xoossau ammanettidi haggaaziyaageetuppe issoti issoti banttabaa ufayssennabaa qoppoosona. Eti Yihooway banttananne bantta haggaazuwaa goꞌꞌiyaabadan xeellenna giidi qoppana danddayoosona. Ubbatoo ufayssennabaa qoppiyaageetussi “keehi adussa laittaa” ufayttidi deꞌana giyo qofay aymo mala gidana danddayees. Deꞌoy ubbatoo leela milatana danddayees.—Era. 11:8.

3. Ufayssennabaa qoppanaadan oottana danddayiyaabay aybee?

³ Eti azzaniyo wode, sahettiyo wode woy cimiyo wode hegaadan ufayssennabaa qoppana danddayoosona. (Maz. 71:9; Lee. 13:12; Era. 7:7) Hegaa bollikka, Kiristtaaneti ubbay wozanay cimmiyaagaa gidiyoogaanne Xoossay nunan ufayttishinkka nu wozanay nu bolli pirddana danddayiyoogaa akeekana koshshees. (Erm. 17:9; 1 Yoh. 3:20) Dabloosi Xoossaa ashkkarata wordduwan mootees. Qassi Seexaanaadan qoppiyaageeti ammanoy baynna Elifaazi giidoogaadan, nuuni Xoossau aynne goꞌꞌokko giidi qoppanaadan oottanau malana danddayoosona. Hegee Iyyooba wodeegaadan ha wodiyankka worddo.—Iyy. 4:18, 19.

4. Ha huuphe yohuwan ay beꞌanee?

⁴ Yihooway “haiquwaa milatiya xumaa giddoora” biyaageetuura deꞌiyoogaa Geeshsha Maxaafan qonccissiis. (Maz. 23:4) A Qaalay i nunaara deꞌiyoogaa bessiyaabaappe issuwaa. Geeshsha Maxaafay ufayssennabaanne balabaa qoppiyoogaa gujjin, “qatuwaa laalanau wolqqaara de7iya Xoossaa tooraa.” (2 Qor. 10:4, 5) Yaatiyo gishshau, ubbatoo loꞌꞌobaa qoppanau Geeshsha Maxaafaa waati goꞌettana danddayiyaakko ane beꞌoos. Yaatiyoogee nenakka goꞌꞌana danddayees; qassi harata minttettiyaabaa demmanau maaddana danddayees.

LOꞌꞌOBAA QOPPANAU GEESHSHA MAXAAFAA GOꞌETTA

5. Nubaa ay qoriyoogee nuuni loꞌꞌobaa qoppanau maaddana danddayii?

⁵ Kiitettida PHauloosi loꞌꞌobaa qoppanau nuna maaddana danddayiya amaridabaa qonccissiis. I Qoronttoosa gubaaꞌiyan deꞌiyaageeta, “Ammanuwan intte de7iyaakkonne ane inttena [qorite]” yaagidi zoriis. (2 Qor. 13:5) ‘Ammanoy’ Geeshsha Maxaafay qonccissiyo, Kiristtaaneti ammaniyo ubbabaa bessees. Nuuni haasayiyoobaynne oottiyoobay he ammanuwaara maayettikko, nuna qori geeshshidi ‘ammanuwan deꞌiyoogaa’ bessoos. Nuuni ay ammananaakko nu koyidoogaadan doorana danddayennaagee qoncce. Nuuni Geeshsha Maxaafay Kiristtaanetussi yootiyo ubbabaa azazettana koshshees.—Yaaq. 2:10, 11.

6. ‘Nuuni ammanuwan deꞌiyaakkonne’ nuna qorana koshshiyoy aybissee? (Ha huuphe yohuwaa doomettan deꞌiya misiliyaa xeella.)

⁶ Neeni nebaa qorada geeshshikke gaada qoppikko, qoranau mammottana danddayaasa. SHin waannabay nuuni nubaa qoppiyoobaa gidennan, Yihooway nubaa qoppiyoobaa; qassi a qofay nu qofaappe keehi xoqqees. (Isi. 55:8, 9) I baassi goynniyaageeta qoriyoy eta pirddanaassa gidennan, eta loꞌꞌo eeshsha eranaassanne eta maaddanaassa. Neeni ‘ammanuwan deꞌiyaakkonne’ qoranau Xoossaa Qaalaa goꞌettiyo wode, kaseegaappe aaruwan nebaa Xoossay qoppiyoogaadan qoppaasa. Yaatiyoogee neeni goꞌꞌennabadan qoppiyoogaa aggada Xoossaa qofaa hassayanaadan maaddees. Xoossaa sinttan neeni alꞌꞌo. Hegaa hassayiyoogee xuma kifiliyan away pooꞌanaadan magalashuwaa qaariyoogaa mala gidana danddayees.

7. Geeshsha Maxaafay etabaa yootiyo ammanettida asati oottidobaappe waani goꞌettana danddayiyoo?

⁷ Geeshsha Maxaafay etabaa yootiyo ammanettida asati oottidobaa wotti dentti qoppiyoogee nu huuphiyaa qoranau keehi maaddees. Eta hanotaa woykko eta qofaa neegaara geeddarssada hegaa malaban neeni waatana danddayiyaakko qoppa. ‘Neeni ammanuwan deꞌiyaakkonne’ erada nebaa loꞌꞌobaa qoppanau Geeshsha Maxaafaa waata goꞌettana danddayiyaakko qonccissiya heezzu leemisota ane beꞌoos.

HIYYEESA AMꞌIYO

8, 9. (a) Hiyyeesa amꞌꞌee hanotay ay malee? (b) He amꞌꞌiyaa qoppana danddayiyo ufayssennabay aybee?

⁸ Yesuusi Yerusalaamen beeta maqidasiyan issi hiyyeesa amꞌꞌiyo beꞌiis. A oottidobay nuuyyo abbee pacciyo wodekka, ubbatoo loꞌꞌobaa qoppanaadan nuna maaddana danddayees. (Luqaasa 21:1-4 nabbaba.) He amꞌꞌee hanotaa qoppa.A ba azinay hayqqido gishshau azzanuwaa danddayana koshshees; qassi i mala qohettidaageeta maaddiyoogaappe ‘amꞌꞌetu keettaa bonqqiya’ haymaanootiyaa kaalettiyaageetu naaquwaakka danddayana koshshees. (Luq. 20:47) A keehi hiyyeesa gidiyo gishshau, keraa oottiya uri amarida daqiiqan demmana danddayiyoogaa keena santtimiyaa beeta maqidasiyau immaasu.

⁹ He amꞌꞌiyaa naaꞌꞌu bakkannaa ekkada beeta maqidasiyaa geliyo wode iyyo aybi siyettidaakko ane qoppa. A ba azinay hayqqanaappe kase immana danddayiyoogaara geeddarssada haꞌꞌi immiyoobay ay keena guuttakko qoppanddeeshsha? A baappe sinttaara deꞌiyaageeti darobaa immiyoogaa beꞌada, ‘Taani immiyoobay tumuppe goꞌꞌiyaabeeshsha?’ ga qoppada yeellatanee? A hegaadan qoppidaba gidiyaakkonne, tumu goynuwau oottana danddayiyoobaa oottaasu.

10. Yesuusi he amꞌꞌiyaa Xoossau alꞌꞌo gidiyoogaa waati qonccissidee?

¹⁰ Yesuusi he amꞌꞌiyookka a immido miishshaakka Yihooway goꞌꞌiyaabadan xeellidoogaa yootiis. I he amꞌꞌiyaa duretu “ubbaappe darissada” yeggidoogaa yootiis. A immidobay haratuugaara walahettiis; shin Yesuusi o nashshiis. Beeta maqidasiyau immido miishshaa qoodiyaageeti he naaꞌꞌu bakkannati woy qassi he amꞌꞌe maccaasiyaa Yihoowau ay keena alꞌꞌokko mule erana danddayokkona. SHin waannabay, haratu qofaa woy he amꞌꞌiyaa babaa qoppiyoobaa gidennan, Xoossaa qofaa. Neeni ammanuwan deꞌiyaakkonne qoranau ha taarikee nena maaddana danddayii?

11. Amꞌꞌeebaa yootiya taarikiyaappe ay tamaarana danddayay?

¹¹ Ne hanotay neeni koyiyoogaa keenaa Yihoowau immennaadan oottana danddayees. Ceegatettay woy sahoy issoti issoti mishiraachuwaa guutta saate xallau sabbakanaadan oottana danddayees. Eti bantta haggaazuwaa irpporttiyaa immana koshshennabadan qoppana bessii? Neeyyo abbee keehi paca gidana xayikkonne, layttan layttan Xoossaa asay au haggaaziiddi aattiyo daro saatiyaappe taagee keehi guutta gaada qoppana danddayaasa. SHin, Yihooway nuuni assi oottiyo ubbabaa, ubba qassi metoy gakkishin oottiyoobaa akeekiyoogaanne nashshiyoogaa hiyyeesa amꞌꞌee taarikiyaappe tamaaroos. Zillaytti neeni Yihoowau haggaazido hanotaa ane qoppa. Neeni au haggaazido wodiyaappe issi saate gidikkonne, hegee ne goꞌꞌaa aggabayanaadan oottidee? Yaatikko, neeni he saatiyan au oottidobaa Yihooway xoqqu oottidi xeelliyoogaa ammanettana danddayaasa. Hiyyeesa amꞌꞌeedan, Yihoowa haggaazuwan neeyyo danddayettida ubbabaa oottikko, neeni ‘ammanuwan deꞌiyoogaa’ akeekana danddayaasa.

“TA SHEMPPUWAA EKKA”

12-14. (a) Ufayssennabaa qoppiyoogee Eelaasa waati qohidee? (b) Eelaasi hegaadan qoppidoy aybissee?

¹² Hananabaa yootiya Eelaasi mino ammanoy deꞌiyo, Yihoowayyo ammanettida asa. Gidikkonne, issi wode i hidootaa qanxxidi, “Abeet GODAU, taayyo gidana. . . . Ta shemppuwaa ekka” yaagidi, Yihooway bana woranaadan woossiis. (1 Kaw. 19:4) Hegaadan unꞌꞌetti erenna uri, Eelaasi ‘xala qaalan’ woossiis gaana danddayees. (Iyy. 6:3) SHin i ba wozanaabaa woossiis. Eelaasi hayqqanau koyido gishshau, Yihooway a seeriyoogaappe maaddidoogaa hassaya.

¹³ Eelaasi hegaadan qoppidoy aybissee? Hegaappe guuttaa kasetidi, Yihooway tumu Xoossaa gidiyoogaa erissiya, maalaalissiyaabaa oottiis. Hegaappe simmin, i Baꞌaala sunttan hananabaa yootiya 450 asati hayqqanaadan oottiis. (1 Kaw. 18:37-40) Eelaasi Xoossaa asay haꞌꞌi tumu goynuwau simmana giidi qoppennan aggenna; shin eti simmibookkona. Iita Kawiyaa Elzzaabeela Eelaasa woranau halchidoogaa yootiya asata akko kiittaasu. Eelaasi ba shemppuwau yayyidi, Israaꞌeela biittaappe tohossa baggi Yihudan deꞌiya bazzuwau baqatiis.—1 Kaw. 19:2-4.

¹⁴ Eelaasi bazzon barkka deꞌiyo wode, i hananabaa yootiyaagaa gididi oottiyo oosoy hada giidi qoppiyoogaa doommiis. I Yihoowau, “Taani ta maizza aawatuppe kehikke” yaagiis. Hayqqidi biitta gidida ba mayzza aawatudan, i aynne maaddennabadan qoppiis. I Yihoowayyo gidin hara ooyyookka gidin, aynne goꞌꞌennabadaaninne coo daafuriyaabadan qoppiis.

15. Eelaasi a sinttan alꞌꞌo gididoogaa Xoossay au waati qonccissidee?

¹⁵ SHin Ubbaappe Wolqqaama Xoossay Eelaasa keha ayfiyan xeelliis. Eelaasi Xoossaa sinttan alꞌꞌo; qassi Yihooway i hegaa eranaadan oottiis. Xoossay Eelaasa minttettanau kiitanchaa kiittiis. Qassi Eelaasi tohossa baggi Koreba Deriyaa gakkanau 40 gallassaa hemettidi biyo wode, Yihooway au miyoobaanne uyiyoobaa immiis. Hegaa bollikka, Eelaasi Israaꞌeelatuppe Yihoowau ammanettidi deꞌiya hara asi baynnabadan qoppidoogee bala gidiyoogaa Xoossay kehatettan au yootiis. Xoossay Eelaasau hara oosuwaa immidoogaakka hassaya; qassi i he oosuwaa oottanau eeno giis. Yihooway Eelaasa maaddiis; hegaa gishshau, Eelaasi minettidi hananabaa yootiyo ba oosuwau simmiis.—1 Kaw. 19:5-8, 15-19.

16. Xoossay nena waati maaddidee?

¹⁶ Eelaasa hanotay neeni ammanuwan deꞌiyoogaa akeekanaadaaninne loꞌꞌobaa qoppanaadan maaddana danddayees. Koyruwan, Yihooway nena waati maaddidaakko qoppa. Neeyyo maadoy koshshido wode gubaaꞌe cimay woy kayma gidida hara Kiristtaanee nena maaddidee? (Gal. 6:2) Geeshsha Maxaafay, nu xuufetinne gubaaꞌe shiiqoy ayyaanaaban nena maaddidee? Sinttappe he ogetun maadettiyo wode, nena hegaadan maaddiday Yihoowa gidiyoogaa qoppada woosan a galata.—Maz. 121:1, 2.

17. Yihooway ba ashkkaratu hanotaappe xoqqu oottidi xeelliyoy aybee?

¹⁷ Naaꞌꞌanttuwan, ufayssennabaa qoppiyoogee balettana danddayiyoogaa akeeka. Waannabay Xoossay nuna xeelliyo ogiyaa. (Roome 14:4 nabbaba.) Yihooway xoqqu oottidi xeelliyoy nuuni ayyo ammanettidi haggaaziyoogaappe attin, ayyo darobaa woy guuttabaa oottiyoogaa gidenna. Eelaasadan, geella neeni qoppiyoogaappe aaruwan Yihoowayyo oottennan aggakka. Neeni gubaaꞌiyan deꞌiyaageeta maaddennan aggakka; woy qassi ne moottan deꞌiya asay tumaa siyidoy neeni minnada oottido gishshataassa gidana danddayees.

18. Yihooway neeyyo immiyo oosoy ay qonccissii?

¹⁸ Wurssettan, Yihooway immiyo ooso ubbaa i nenaara deꞌiyoogaa qonccissiyaabadan xeella. (Erm. 20:11) Eelaasadan, ne haggaazoy ayfennabadan woy neeni ayyaanaaban halchido issi issibay polettennabadan qoppada hidootaa qanxxana danddayaasa. Gidoppe attin, neeyyo nu ubbaagaadan, Yihoowa Markka gidada asau mishiraachuwaa yootiyo gita maatay deꞌees. Yaatiyo gishshau, Yihoowayyo ammanettada deꞌa. Yaatikko, Yesuusi yootidoogaadan neenikka ‘ne godaara ufayttana’ danddayaasa.—Maa. 25:23.

‘TUGGATIDA URA WOOSAA’

19. Mazamure 102 xaafidaagau aybi siyettidee?

¹⁹ Mazamure 102 xaafida uri issi wode hidootaa qanxxiis. I ‘tuggatiis’ woykko asatettaaninne qofan waayettiis; qassi metuwaa genccana danddayibeenna. (Maz. 102, huuphessa qofaa) I ubba wode qoppiyoy metootidoogaa, tuggatidoogaanne boorasidoogaa. (Maz. 102:3, 4, 6, 11) Yihooway bana wora olanau koyidabadan qoppiis.—Maz. 102:10.

20. Woosay ufayssennabaa qoppiyoogaa agganau baaxetiya uraa waati maaddana danddayii?

²⁰ Gidoppe attin, mazamuraawee ba deꞌo layttan Yihoowa galatiis. (Mazamure 102:19-21 nabbaba.) Mazamure 102y ammanuwan deꞌiyaageetikka tuggatidi, harabaa qoppanau metootana danddayiyoogaa bessees. Mazamuraawee bau metoy daridabadan qoppidi, i “keettaa huuphiyan barkka uttida kafo mala” gidiyoogaa yootiis. (Maz. 102:7) Neenikka hegaadan qoppiyaaba gidikko, mazamuraawiyaagaadan ne metuwaa Yihoowau yoota. Neeni tuggatiyo wode woossiyo woosay ufayssennabaa qoppiyoogaa agganaadan nena maaddana danddayees. Yihooway ‘hiyyeesatu woosaa siyanaagaanne eta watiwatuwaa karennaagaa’ yootiis. (Maz. 102:17) Hegan ammanetta.

21. Ufayssennabaa qoppiyoogaa agganau baaxetiya uri waanidi kaseegaappe aaruwan loꞌꞌobaa qoppana danddayii?

²¹ Mazamure 102y neeni kaseegaappe aaruwan loꞌꞌobaa qoppanaadan maaddiyaabaakka qonccissees. Mazamuraawee Yihoowaara deꞌiya dabbotaa qoppanau koyiis. (Maz. 102:12, 27) Yihooway ubba wode ba asay metuwaa genccanaadan maaddiyoogaa eriyoogan i minettiis. Guutta wodiyau, ufayssennabaa qoppiyoogee neeni koyiyoogaa keenaa Xoossau oottennaadan diggiyaaba gidikko, hegaa xeelliyaagan akko woossa. Neeni ne tuggaappe shemppana xallaassa gidennan, ‘Yihoowa sunttay odettanaadankka’ Xoossaakko woossa.—Maz. 102:20, 21.

22.  Nuuni ubbay Yihoowa waatidi ufayssana danddayiyoo?

²² Ee, nuuni ammanuwan deꞌiyoogaanne Yihooway nuna xoqqu oottidi xeelliyoogaa akeekanau Geeshsha Maxaafaa goꞌettana danddayoos. Ha alamiyan, nuuni ufayssennabaa qoppiyoogaanne hidootaa qanxxiyoogaa muleera aggana danddayennaagee qoncce. Gidikkokka, nuuni ubbay Yihoowa ufayssananne ammanettidi haggaazuwan gencciyoogan atotettaa demmana danddayoos.—Maa. 24:13.