Yihoowa Halchoy Polettana!

1, 2. (a) Yihooway nuuyyo ay qonccissidee? (b) Isiyaasa 46:10, 11⁠nne 55:11 nuuni ay ammanettanaadan oottii?

GEESHSHA MAXAAFAA doometta qofay, “Xoossai salotanne sa7aa koiro medhdhiis” yaagidi, akeekanawu metenna gitabaa qonccissees. (Doo. 1:1) Nuuni saluwaa, pooꞌuwaanne dafuwaa mala Xoossay medhido darobaa akeekennaagee tuma; qassi saluwan saꞌan Xoossay medhidobaappe nuuni beꞌiyoobay keehi guutta. (Era. 3:11) SHin Yihooway saꞌawunne asawu halchidobaa nuussi qonccissiis. Xoossay ba leemisuwan merettida asati deꞌanawu saꞌay keehi loꞌꞌo soho gidanaadan qoppidi medhiis. (Doo. 1:26) Eti Yihoowayyo naꞌa gidana; qassi i etawu Aawa gidana.

² Doomettaabaa shemppo 3y yootiyoogaadan, Seexaanay Yihoowa halchuwaa eqettiis. (Doo. 3:1-7) SHin hegee giigana danddayennaba gidenna. Ooninne Yihoowa teqqana danddayenna. (Isi. 46:10, 11; 55:11) Yaatiyo gishshawu, Yihooway koyro halchidobay i keerido wodiyan polettanaagaa ammanettana danddayoos.

3. (a) Geeshsha Maxaafaa qofaa nuuni akeekanawu keehi koshshiya timirtteti awugeetee? (b) Nuuni hegaa zaarettidi xannaꞌiyoy aybissee? (c) Nuuni pilggana oyshati awugeetee?

³ Xoossay saꞌawunne asawu halchidobaa, qassi Xoossaa halchoy polettanaadan Yesuusi oottiyo gitabaa xeelliyaagan Geeshsha Maxaafay yootiyoobaa nuuni eriyoogee tuma. Hegeeti keehi koshshiyaabata; qassi nuuni Xoossaa Qaalaa xannaꞌiyoogaa doommiyo wode erido koyroogeeta gidennan aggokkona. Nuunikka wozanaa suure asati ha keehi koshshiya timirttiyaa eranaadan maaddanawu koyoos. Nuuni ha huuphe yohuwaa gubaaꞌiyan xannaꞌiyo saaminttan, Kiristtoosa hayquwaa Hassayiyo Baalaa nunaara bonchanaadan danddayettida keenan daro asaa shoobbanawu baaxetoos. (Luq. 22:19, 20) He baalaa nunaara bonchiyaageeti Xoossaa halchuwaabaa darobaa tamaarana. Yaatiyo gishshawu, Godaa Kahuwaappe kasetiya amarida gallassatun, nuuni Geeshsha Maxaafaa xannaꞌissiyoogeetinne hara ashkke asati he baalawu yaanaadan denttettanawu oychana oyshaa qoppiyoogee loꞌꞌo. Nuuni ha heezzu oyshata pilggana: Xoossay saꞌaassinne asaassi koyro halchidobay aybee? Merettida metoy aybee? Qassi Yesuusa wozuwaa yarshshoy Xoossaa halchoy polettanaadan keehi koshshiyaaba gidiyoy aybissee?

MEDHIDAAGEE KOYRO HALCHIDOBAY AYBEE?

4. Meretay Yihoowa bonchuwaa waati yootii?

⁴ Yihooway medhiyoogan maalaaliya Xoossa. I medhido ubbabay keehi muruta. (Doo. 1:31; Erm. 10:12) Meretay keehi loꞌꞌiyoogaappeenne an qonccida maaraappe ay tamaarana danddayiyoo? Yihooway medhido ubbabay, guuttaykka gitaykka maaddiyaaba gidiyoogaa tamaaroos. Asaa bollaa giddon deꞌiya seeleta, biron yelettiya naatu bollaa woy wulliya away keehi loꞌꞌiyoogaa beꞌidi nuuni ubbay daro maalaalettoos. Nuuni hegan keehi maalaalettiyoy tumuppe loꞌꞌiyaabaa akeekanaadan oottidi Yihooway nuna medhido gishshataassa.—Mazamure 19:1; 104:24 nabbaba.

5. Yihooway mereta ubbawu maari mankki deꞌanaadan waati oottidee?

⁵ Yihooway siiquwan zawaa wottidoogaa i medhidobaappe akeekoos. Ubbabawu maari mankki deꞌanaadan i meretaa higgiyaanne kandduwaa maaraa kessiis. (Maz. 19:7-9) Yaatiyo gishshawu, saluwan saꞌan deꞌiya ubbabawu Xoossaa halchuwaara maayettiyaabaa oottanaadan imettida sohoy deꞌees. Yihooway ba meretati waani issippe oottanaakko maaraa kessiis. Hegaa gishshawu, dafuwaa higgee carkkoy saꞌaa yuushuwan deꞌanaadaaninne beetaynne abbay woppu gaanaadan oottees; dafuwaa higgee baynnaakko saꞌan deꞌoy deꞌenna. Asaa gujjin, ubba meretay Xoossay kessido maaran qaaxxeesinne oottees. Meretan qonccida maaray Xoossay saꞌawunne asawu halchidobay deꞌiyoogaa bessiyoogee tuma. Haggaazuwan, asay ha maalaalissiya maaraa ooni kessidaakko akeekanaadan maaddana danddayoos.—Ajj. 4:11.

6, 7. Yihooway Addaameyyoonne Hewaaniyyo immido issi issi imotay aybee?

⁶ Yihooway koyro halchidoy asay ha saꞌan merinawu deꞌanaadaana. (Doo. 1:28; Maz. 37:29) I Addaameenne Hewaana bantta deꞌuwan ufayttanaadan oottiya dumma dumma loꞌꞌo imotaa immiis. (Yaaqooba 1:17 nabbaba.) Yuushshi qoppana, siiqananne haratuura laggetana danddayiyo, koyidobaa dooriyo maataa Yihooway etawu immiis. Medhidaagee Addaama haasayissiis, qassi azazettiyoogaa waati bessanaakko ayyo yootiis. Addaamee baayyo koshshiyaabaa waati demmanaakko, qassi mehiyaa doꞌaanne biittaa waati naaganaakko tamaariis. (Doo. 2:15-17, 19, 20) Yihooway Addaameyyoonne Hewaaniyyo laacciyo, bochiyo, beꞌiyo, siyiyoonne singgiyo imotaakka immidi medhiis. Yaatiyo gishshawu, eti loꞌꞌiya Gannatiyan ufayttidi deꞌana danddayoosona. He koyro azinaynne machiyaa ufayssiya darobaa oottana, ubbatoo tamaarananne merinawu oorattabaa erana danddayoosona.

⁷ Xoossay halchido harabay aybee? Yihooway Addaameenne Hewaana wottiyoobi baynna naata yelanaadan oottidi medhiis. Xoossay saꞌay asan kumana gakkanaashin eta naatikka naata yelanaadan halchiis. Yihooway i ba naata gidida, wottiyoobi baynna koyro asata siiqidoogaadan Addaameenne Hewaana, qassi aawatinne aayeti ubbay bantta naata siiqanaadan koyiis. I keehi loꞌꞌiya darobay a giddon deꞌiyo saꞌaa asaayyo immiis. Hegee eti merinawu deꞌiyoosa gidana.—Maz. 115:16.

MERETTIDA METOY AYBEE?

8. Doomettaabaa 2:16, 17n deꞌiya higgee imettidoy aybissee?

⁸ Ubbabay Xoossay halchidoogaadan sohuwaara polettibeenna. Aybissi? Addaameenne Hewaana bantta laꞌatettawu zaway deꞌiyoogaa akeekidaakkonne eta paaccanawu maaddiya higgiyaa Yihooway immiis. I, “Gannatiyaa mittaa teeraa ubbaappe neeni maana giikko ma; shin lo77uwaanne iitaa erissiya mittaa teeraappe mooppa; aissi giikko, neeni appe miido gallassi tumu haiqqana” yaagiis. (Doo. 2:16, 17) He higgee Addaameenne Hewaana akeekanawukka azazettanawukka metiyaaba gidenna. Qassi eti maana danddayiyo keehi darobay deꞌees.

9, 10. (a) Seexaanay Yihoowa woygi mootidee? (b) Addaameenne Hewaana ay kuuyidonaa? (Doomettan deꞌiya misiliyaa xeella.)

⁹ Seexaanaa Dabloosi shooshshan eqqidi Hewaana ba Aawaa Yihoowawu azazettennaadan cimmiis. (Doomettaabaa 3:1-5 nabbaba; Ajj. 12:9) Seexaanay saꞌan deꞌiya Xoossaa naati ‘Gannatiyan deꞌiya mitta teeraappe’ meennaadan digettidoogaa xeelliyaagan oyshaa denttiis. I giidobay, “Intte koyiyoobaa oottana danddayekketii?” giyoogaa mala. Kaallidi i, “Intte ainnekka haiqqekketa” yaagidi worddotiis. Yaatidi, Hewaana Xoossay yootiyoobaa siyennaadan ammanttanawu, ‘He mittaa teeraa intte miikko, intte ayfee dooyettanaagaa Xoossay erees’ yaagiis. Seexaanay eti he mittaa teeraappe miikko dummabaa eranaagaa Yihooway eriyo gishshawu meennaadan diggidoogaa yootiis. Qassi Seexaanay, ‘Loꞌꞌuwaanne iitaa Xoossaadan intte erana’ giidi wordduwaa yootiis.

¹⁰ Addaameenne Hewaana waatanaakko he wode kuuyana koshshees. Eti Yihoowayyo azazettaneeyye, shooshshay giyoobaa siyanee? Eti Xoossawu azazettennan agganawu kuuyidosona. Yaatiyoogan, eti Seexaanaara makkalidosona. Yihooway etawu Aawa gidanaadan eti koyibeenna gishshawu, a haaruwan woppu giidi deꞌiyoogee etappe haliis.—Doo. 3:6-13.

11. Yihooway makkalaa coꞌꞌu giidi xeellennay aybissee?

¹¹ Addaameenne Hewaana Yihoowa bolli makkalido gishshawu nagarancha gididosona. Hegaa bollikka, Xoossay iitabaa ixxiyo gishshawu, eti ayyo morkke gididosona. A “aifeti daro geeshsha gidiyo gishshau, iitabaa xeellanau dosokkona.” (Imb. 1:13) I iitatettaa coꞌꞌu giidi xeelliyaakko, hegee saluwankka saꞌankka deꞌiya meretata ubbaa qohiyaaba gidana. Ubbaappe aaruwan, Xoossay Edenen nagaraa oottidaageeta coꞌꞌu giidi xeelliyaakko, i ammanettiya Xoossa gidiyoogee sirissana. SHin Yihooway ba higgiyawu ammanettiyaagaa; i hegaara maayettennabaa mule oottenna. (Maz. 119:142) Addaameenne Hewaana koyidobaa doorana danddayiyoogee eti Xoossaa higgiyawu azazettennaadan oottiyaaba gidenna. Eti Yihoowa bolli makkalido gishshawu, hayqqidi bantta merettido baanawu simmidosona.—Doo. 3:19.

12. Addaame naatu bolli gakkidabay aybee?

¹² Addaameenne Hewaana he mittaa teeraa moosappe simmin Xoossaa keettaa asa gidana danddayokkona. Xoossay eta Edeneppe yedettiis; qassi eti yaa mule simmana danddayokkona. (Doo. 3:23, 24) Yihooway yaatiyoogan, eti kuuyidobay kaalettiyoobay eta bolli gakkanaadan oottiis. (Zaarettido Wogaa 32:4, 5 nabbaba.) Asi nagarancha gidiyo gishshawu, Xoossaa eeshshata muleera qonccissana danddayenna. Addaamee maalaaliya hidootay baappe attanaadan oottiyoogaa xalla gidennan, ba naatussikka nagaraanne hayquwaa laatissiis. (Roo. 5:12) I ba naati merinawu deꞌennaadan oottiis. Hegaa bollikka, Addaameenne Hewaana nagari baynna naata yelana danddayokkona; eta naatikka nagari baynna naꞌa yelana danddayokkona. Seexaanaa Dabloosi Addaamanne Hewaano Xoossaappe shaakki simmidi, hanno gakkanawu asaa balettees.—Yoh. 8:44.

WOZOY XOOSSAARA DABBOTANAADAN OOTTEES

13. Yihooway asay waananaadan koyii?

¹³ SHin Xoossay asaa siiqiyoogaa aggibeenna. Addaameenne Hewaana makkalikkokka, Yihooway asay banaara dabbotanaadan koyees. I ooninne hayqqanaadan koyenna. (2 PHe. 3:9) Yaatiyo gishshawu, Xoossay ba xillotettaa maaraa naagidi, asay banaara zaarettidi dabbotiyo ogiyaa he makkalaappe simmin sohuwaara giigissiis. Yihooway hegaa waati polidee?

14. (a) Yohaannisa 3:16n qonccidaagaadan Xoossay asaa nagaraappenne hayquwaappe ashshanawu giigissidobay aybee? (b) Eranawu koyiya asaara nuuni tobbana danddayiyo oyshay aybee?

¹⁴ Yohaannisa 3:16 nabbaba. Nuuni Godaa Kahuwawu shoobbiyo daroti ha xiqisiyaa loytti eroosona. SHin Yesuusa yarshshoy merinaa deꞌuwaa waati demissana danddayii? Godaa Kahuwaa zamachan, Godaa Kahuwaa Baalaaninne shoobbin yiida asata zaarettidi oychiyoogan tumaa wozanappe koyiyaageeti ha keehi koshshiya oyshaa zaaruwaa akeekanaadan maaddana danddayoos. He asati Yihoowa siiqoynne aadhida eratettay wozuwaa yarshshuwaa baggaara waani loytti qonccidaakko akeekidi keehi maalaalettana danddayoosona. Nuuni etawu wozuwaabaa yootana danddayiyoobay aybee?

15. Yesuusi Addaameppe dummatidoy aybiinee?

¹⁵ Wozo gidanaadan wottiyoobi baynna asa Yihooway giigissiis. He wottiyoobi baynna asi Yihoowassi ammanettananne asaa hayquwaappe ashshanawu ba shemppuwaa ba dosan immana koshshees. (Roo. 5:17-19) Yihooway koyro medhido ba naꞌaa deꞌuwaa saluwaappe saꞌaa yuushshiis. (Yoh. 1:14) Yaatin, Yesuusi Addaameegaadan wottiyoobi baynna asa gidiis. SHin Yesuusi wottiyoobi baynna urappe Yihooway koyiyoogaadan deꞌiyoogan, Addaameegaappe dummatiyaabaa oottiis. Keehi wolqqaama paacee gakkishinkka, Yesuusi nagaraa oottibeenna woy Xoossaa higgiyaa kanttibeenna.

16. Wozoy alꞌꞌo imota gidiyoy aybissee?

¹⁶ Yesuusi nagari baynna asa gidiyo gishshawu, asaa gishshawu hayqqidi nagaraappenne hayquwaappe eta ashshana danddayees. I Addaamee hanana bessishin attida, Xoossaayyo muleera ammanettiyaanne azazettiya, nagari baynna asa gidiis. (1 Xim. 2:6) ‘Daro asay,’ attumaasay, maccaasaynne naati merinaa deꞌuwaa demmanaadan Yesuusi wozo yarshsho gidiis. (Maa. 20:28) Yesuusa wozuwaa yarshshoy Xoossay koyro halchidobay polettanaadan keehi koshshiyaaba gidiyoogee tuma. (2 Qor. 1:19, 20) Wozoy ammanettida asay ubbay merinaa deꞌuwaa demmanaadan oottana.

YIHOOWAY NUUNI AKKO SIMMIYO OGIYAA GIIGISSIIS

17. Wozoy ay demissii?

¹⁷ Yihooway keehi qohettidi wozuwaa giigissiis. (1 PHe. 1:19) I asaa alꞌꞌobadan xeelliyo gishshawu, ba mexi issi Naꞌay nu gishshawu hayqqanaadan ba dosan immiis. (1 Yoh. 4:9, 10) Hegee Yesuusi Addaame gishshaa nuussi aawa gidiis giyoogaa mala. (1 Qor. 15:45) Hegaadan oottiyoogan, Yesuusi nuuni merinaa deꞌuwaa demmiyoogaa xalla gidennan, wurssettan Xoossaa keettaa asa gidanaadankka oottiis. Yesuusa yarshshuwaa baggaara, Yihooway ba xillotettaa maaraa kanttennan asaa ba so asa oottana danddayees. Ammanettida ubbay nagari baynna asa gidiyo wodiyaabaa qoppiyoogee keehi ufayssiyaaba! He wode, saluwankka saꞌankka deꞌiya Xoossaa keettaa asaa giddon polo issippetettay deꞌana. Nuuni ubbay Xoossaa naata gidana.—Roo. 8:21.

18. Yihooway “ubbawu ubbabaa” gidanay awudee?

¹⁸ Seexaanay makkalidoogee Yihooway asaa siiqennaadan diggibeenna; qassi nagarancha asati Yihoowawu ammanettennaadan digganakka danddayenna. Yihooway ba naati ubbay muleera xillo gidanaadan wozuwaa baggaara maaddana. Xoossaa Naꞌaa eridi ‘a ammaniya’ ubbay merinaa deꞌuwaa demmiyo wodee ay mala gidanaakko qoppa. (Yoh. 6:40) Yihooway ba gita siiquwaaninne aadhida eratettan, i koyro halchidoogaadan asa ubbaa bollappe nagaraa diggana. He wode nu Aaway Yihooway “ubbawu ubbabaa” gidana.—1 Qor. 15:28, NW.

19. (a) Wozuwaa nashshiyoogee nuuni waatanaadan denttettana bessii? (“Siyana Bessiyaageeta Koyiyoogaa Aggokko” giya saaxiniyaa xeella.) (b) Wozuwaara gayttidaagan kaallidi beꞌanabay aybee?

¹⁹ Nuuni wozuwaa nashshiyoogee, he alꞌꞌo imotay banttana goꞌꞌana danddayiyoogaa akeekanaadan harata maaddanawu nuuyyo danddayettida ubbabaa oottanaadan denttettana bessees. Wozoy asa ubbay merinaa deꞌuwaa demmanaadan Yihooway siiquwan giigissidoba gidiyoogaa asay erana bessees. SHin wozoy hegaappekka aadhiyaabay polettanaadan oottiis. Yesuusa yarshshoy Seexaanay Edenen denttido mootuwaa waati shatinttidaakko kaalliya huuphe yohuwan beꞌana.