‘A Kottiyaa Loytta Kaalla’

1-2. Nuuni Yesuusa kottiyaa waati kaallana danddayiyoo? Leemisuwan qonccissa.

KEEHI yashshiyaanne shafee kumido bazzuwan daro asaara hemettiyaabadan qoppa. Ogiyaa loytti eriya uri nena kaalettees. I hemettiyo wode, I yedhdhidosay shafiyan beettees. Issi issitoo, kaalettiyaagee neeyyo beettennan aggana danddayees. SHin neeni hirggakka. Qassi, neeninne nenaara deꞌiya harati kaalettiyaagaa kottiyaa intteyyo danddayettida ubban loytti kaalleeta!

² Nuuni deꞌiyo ha iita alamee yashshiyaa bazzo mala; qassi tumu Kiristtaaneti nunaara hemettiya citan deꞌiyaageetu mala. Nuuni A kottiyaa kaallana danddayiyo nuna ooppenne aaruwan kaalettiya ba Naꞌaa Yesuus Kiristtoosa nuussi Yihooway immido gishshawu galatoos. (1 PHe. 2:21, NW) Geeshsha Maxaafaabaa yootiya issi xuufee qonccissiyoogaadan, ha xiqisiyan PHeexiroosi kaalettiya uraara Yesuusa geeddarssiis. Kaalettiya uraa kottiyaa kaalliyoogaadan, nuunikka Yesuusa kottiyaa kaallana danddayoos. A kottiyaa kaalliyoogaa xeelliyaagan heezzu oyshata ane beꞌoos: Yesuusa kottiyaa kaalliyoogaa giyoogee woygiyoogee? Nuuni yaatana koshshiyoy aybissee? Nuuni waatidi hegaadan oottana danddayiyoo?

YESUUSA KOTTIYAA KAALLIYOOGAA GIYOOGEE WOYGIYOOGEE?

3. Issi uraa kottiyaa kaalliyoogaa giyoogee woygiyoogee?

³ Yesuusa kottiyaa kaalliyoogaa giyoogee woygiyoogee? Geeshsha Maxaafan, “hemetaa,” qassi “gediyaa” giya qaalati issi issitoo issi uraa deꞌuwaa qonccissoosona. (Doo. 6:9; Lee. 4:26) Issi uri deꞌiyo deꞌuwaa A kottiyaara geeddarssana danddayoos; hegee I hemetti biidosa. Yaatiyo gishshawu, issi uraa kottiyaa kaalliyoogaa giyoogee A milatanawu A leemisuwaa kaalliyoogaa giyoogaa.

4. Yesuusa kottiyaa kaalliyoogaa giyoogee woygiyoogee?

⁴ Yaatin, Yesuusa kottiyaa kaalliyoogaa giyoogee woygiyoogee? Hegaa giyoogee A leemisuwaa kaalliyoogaa giyoogaa. Ha huuphe yohuwaa xiqisiyan, kiitettida PHeexiroosi Yesuusi waayiyaa gencciyoogan loꞌꞌo leemiso gidiyoogaa yootiis; shin, nuuni A milatana danddayiyo hara daro ogeti deꞌoosona. (1 PHe. 2:18-25) Yesuusi ba deꞌo ubban, hegeekka I haasayidobaaninne oottidoban nuuni kaallana bessiya leemiso gidiis.

5. Nagaranchcha asay wottiyoobi baynna Yesuusa leemisuwaa kaallana danddayii? Qonccissa.

⁵ SHin, nuuni nagaranchcha gidikkokka, Yesuusa leemisuwaa kaallana danddayiyoo? Ee, kaallana danddayoos. PHeexiroosi nuuni Yesuusa wottiyoobi baynna ogiyan kaallanaadan yootibeenna. SHin, nuuni Yesuusa “kottiyaa loytti kaallanaadan” yootiis. Nuuni nagaranchcha gidiyoogaadan, A kottiyaa loytti kaallanawu nuussi danddayettida ubbaa oottikko, kiitettida Yohaannisi yootido kaallidi deꞌiyaabaa azazettoos: “Kiristtoosi de7idoogaadan de7anau bessees.”—1 Yoh. 2:6.

YESUUSA KOTTIYAA KAALLIYOY AYBISSEE?

6-7. Nuuni Yesuusa kottiyaa kaalliyoogee Yihoowakko loytti shiiqanaadan oottana danddayees giyoy aybissee?

⁶ Yesuusa kottiyaa kaalliyoogee nuuni Yihoowakko shiiqanaadan oottana. Nuuni hegaadan gaana danddayiyoy aybissee? Koyruwan, Xoossaa ufayssiya ogiyan deꞌiyoogaa xeelliyaagan Yesuusi keehi loꞌꞌo leemiso. (Yoh. 8:29) Hegaa gishshawu, nuuni Yesuusa kottiyaa kaalliyoogan Yihoowa ufayssana. Qassi saluwan deꞌiya nu Aaway ba dabbo gidanawu baaxetiyaageetukko shiiqanaagaa ammanettana danddayoos.—Yaaq. 4:8.

⁷ Naaꞌꞌanttuwan, Yesuusi wottiyoobi baynna ogiyan ba Aawaa milatiis. Yesuusi, “Tana be7ida urai Aawaakka be7iis” giidoy hegaassa. (Yoh. 14:9) Yesuusa eeshshatanne I harata oyqqido ogiyaa kaallana danddayoos. Leemisuwawu, inchchirichchay oyqqido bitaniyawu, wolqqaama harggiyaa harggida maccaaseessinne siiqiyo uri hayqqidoogeetussi I qarettiis. Nuuni Yesuusa milatiyo wode, Yihoowakka milatoos. (Mar. 1:40, 41; 5:25-34; Yoh. 11:33-35) Nuuni kaseegaappe aaruwan Yihoowa milatiyo wode, akko loytti shiiqoos.

8. Yesuusa kottiyaa kaalliyoogee nuuni alamiyaa ‘xoonanaadan’ maaddana giyoy aybissakko qonccissa.

⁸ Yesuusa kottiyaa kaalliyoogee ha iita alamee nu qofaa shaakkennaadan maaddees. Yesuusi saꞌan deꞌido wurssetta qammi hagaadan giis: “Taani sa7aa xoonaas.” (Yoh. 16:33) Ha iita alamiyaa qofay, halchchoynne oosoy bana shaallanaadan koyennaagaa yootiis. Yesuusi ha saꞌaa kiitettidoy Yihoowaassi exatanaassa gidiyoogaa mule dogibeenna. Nuuni shin? Nu qofay shaahettanaadan oottana danddayiya darobay ha alamiyan deꞌees. SHin, nuuni Yesuusaagaadan Yihoowa sheniyaa oottiyoogan ubbatoo xeelaa wottikko, ha alamiyaa nuunikka “xoonana.”—1 Yoh. 5:5.

9. Merinaa deꞌuwawu efiya ogiyan baanawu nuuni ay oottana koshshii?

⁹ Nuuni Yesuusa kottiyaa kaalliyoogan merinawu deꞌana danddayoos. Issi dure yelagay merinaa deꞌuwaa demmanawu ay oottana bessiyaakko oychchido wode, Yesuusi hagaadan giis: “Yaada tana kaalla.” (Maa. 19:16-21) I Kiristtoosa gidiyoogaa ammanenna amarida Ayhudatussi Yesuusi hagaadan giis: “Ta dorssati . . . tana kaalloosona. Taani etayyo merinaa de7uwaa immais.” (Yoh. 10:24-29) Yesuusi tamaarissiyoobaa loyttidi eranawu koyiya Sanhedirine shilootaa yame gidida Niqoodimoosawu Yesuusi ‘Xoossaa Naꞌaa ammaniya ubbay merinaa deꞌuwaa ekkanaagaa’ yootiis. (Yoh. 3:16) Nuuni Yesuusi tamaarissidobaa oosuwan peeshshiyoogaaninne I oottidobaa kaalliyoogan an ammaniyoogaa bessoos. Hegaadan oottikko, nuuni merinawu deꞌana.—Maa. 7:14.

YESUUSA KOTTIYAA WAATI LOYTTI KAALLANA DANDDAYIYOO?

10. Yesuusa loytti ‘eranawu’ nuuni waatana bessii? (Yohaannisa 17:3)

¹⁰ Nuuni Yesuusa kottiyaa kaallanaappe kase, A erana bessees. (Yohaannisa 17:3 nabbaba.) Yesuusa ‘eriyoogee’ nuuni ubbatoo oottana bessiyaaba. Nuuni abaa, hegeekka A eeshshatubaa, A qofaanne I kessido maarata ubbatoo loyttidi tamaarana bessees. Nuuni tuman deꞌido wodee ay keena gidikkokka, Yihoowanne A Naꞌaa ‘eranawu’ ubbatoo baaxetana bessees.

11. Oyddu Wonggeletun deꞌiyaabay aybee?

¹¹ Yihooway nuuni ba Naꞌaa eranaadan maaddanawu ba Qaalan oyddu Wonggeleta siiquwan xaafissiis. He Wonggeleti Yesuusa deꞌuwaabaanne A haggaazuwaabaa yootoosona. He maxaafati Yesuusi yootidobaa, I oottidobaanne awu siyettidabaa qonccissoosona. Ha oyddu maxaafati Yesuusi leemiso gidiyoogaa loytti ‘qoppanaadan’ nuna maaddoosona. (Ibr. 12:3) He maxaafati nuuni kaallana bessiyo Yesuusa kottiyaabaa yootoosona. Yaatiyo gishshawu, he Wonggeleta xannaꞌiyoogan Yesuusa loytti erana danddayoos. Yaatikko, nuuni A kottiyaa loytti kaallana danddayoos.

12. Wonggeletuppe loytti goꞌettanawu waatana danddayiyoo?

¹² Nuuni Wonggeletuppe loytti goꞌettanawu eta nabbabiyoogaappe aarobaa oottana koshshees. Nuuni takki giidi eta loytti xannaꞌananne wotti dentti qoppana koshshees. (Yaasa 1:8⁠ra gatta xeella.) Wonggeleta nabbabidi wotti dentti qoppanawunne oosuwan peeshshanawu maaddana danddayiya naaꞌꞌubata ane beꞌoos.

13. Wonggelee yootiyo taarikee neessi loytti qonccanaadan waatana danddayay?

¹³ Koyruwan, Wonggelee yootiyo taarikee neessi loytti qonccanaadan ootta. Haniyaabaa beꞌanawu, siyanawunne akeekanawu qoppiyo ne imotaa goꞌetta. Neeni yaatanawu maaddiya, Yihoowa dirijjitee giigissido xuufetun amaridabaa pilgga. Neeni xannaꞌiyo taarikiyaappe kase woy appe kaallidi deꞌiya qofaa pilgga. He taarikiyan odettida asaabaanne sohotubaa gujjada era. Neeni xannaꞌiyo taarikiyaa hegaa mala hara taarikiyaara geeddarssa. Issi issitoo issi Wonggeliyaa xaafee qonccissibeenna keehi koshshiyaabaa haray qonccissees.

14-15. Yesuusa taarikiyaappe nuuni tamaaridobaa oosuwan peeshshanawu waatana bessii?

¹⁴ Naaꞌꞌanttuwan, Wonggelee yootiyoobaa ne deꞌuwan oosuwan peeshsha. (Yoh. 13:17) Hegaadan neeni waata oottana danddayay? Issi Wonggeliyaa taarikiyaa loytta xannaꞌa simmada nena hagaadan oychcha: ‘Taani ta deꞌuwan oosuwan peeshshana danddayiyoobay ha taarikiyan deꞌii? Taani hara uraa maaddanawu ha taarikiyaa waata goꞌettana danddayiyaanaa?’ Issi uraa hanotaa qoppanawu mala, yaatada neeni tamaaridobaa siiquwaaninne hiillan koshshiya wodiyan yoota.

¹⁵ He naaꞌꞌubata oosuwan waati peeshshana danddayiyaakko issi leemisuwaa ane beꞌoos. Yesuusi beeta maqidasiyan beꞌido hiyyeesa amꞌꞌeebaa yootiya taarikiyaa nuuni pilggana.

BEETA MAQIDASIYAA BIIDA HIYYEESA AMꞌꞌIYO

16. Marqqoosa 12:41n odettidabaa qonccissa.

¹⁶ Taarikee neessi loytti qonccanaadan ootta. (Marqqoosa 12:41 nabbaba.) Hanidabaa qoppa. Wodee Niisaana 11, 33 M.L., Yesuusi amarida gallassaappe guyyiyan hayqqana. He gallassi Yesuusi beeta maqidasiyan tamaarissiiddi daro wodiyaa takkiis. SHin haymaanootiyaa kaalettiyaageeti A eqettidosona. Eti hegaappe kase, Yesuusi hegaa oottiyo maataa ooppe ekkidaakko A oychchidosona. Harati qassi A haasayaappe balaa demmidi A oyqqanawu malidosona. (Mar. 11:27-33; 12:13-34) Haꞌꞌi qassi Yesuusi beeta maqidesiyawu hara baggi biis. I dabaaban eqqida godatu matan deꞌiya muxuwaataa yeggiyo saaxineta beꞌana danddayiyo gishshawu, Maccaasaa Dababaa heeran deꞌennan waayi aggana. I uttiis; yaatidi saaxinetun miishshaa yeggiyaa asaa xeelliyoogaa doommiis. Daro dure asati daro santtimeta yeggishin beꞌiis. Eti santtimeta saaxinetun yeggiyo wode qilccicattiyoogaa I siyennan waayi aggana.

17. Marqqoosa 12:42n odettida hiyyeesa amꞌꞌiyaa ay oottadee?

¹⁷ Marqqoosa 12:42 nabbaba. Guuttaa takkidi Yesuusi issi maccaasiyo akeekiis. Maccaasiyaa ‘hiyyeesa amꞌꞌe.’ (Luq. 21:2) Deꞌoy O keehi metees; A deꞌuwawu koshshiyaabaa demmanawu baaxetennan waaya aggana. Gidikkonne, A saaxinetuppe issuwaakko baada naaꞌꞌu guutta santtimeta asi beꞌennan yeggaasu; saaxiniyan hegeeta A yeggiyo wode ayba cenggurssinne waayi siyettana. A saaxiniyan ay yeggidaakko Yesuusi erees. He wode goꞌettiyo lepta giyo keehi guutta santtimeta A yeggaasu. Maanawu asay shammiyo kafotuppe keehi hirayso gidida issi siine kafo shammanawukka he miishshay gidenna.

18. Marqqoosa 12:43, 44 maaran, amꞌꞌiyaa immidobaa xeelliyaagan Yesuusi ay yootidee?

¹⁸ Marqqoosa 12:43, 44 nabbaba. Yesuusi he amꞌꞌee hanotan keehi maalaalettiis. Hegaa gishshawu, I ba erissiyo ashkkarata xeesiis; xeesidi he amꞌꞌeekko malaatiiddi hagaadan giis: “Muxuwaataa saaxiniyan yeggida asa ubbaappe ha hiyyeesa am77iyaa darissada yeggaasu.” Hegaappe simmidi I hagaadan giis: “Harati [dure asati] ubbai banttau palahida miishshaappe yeggidosona; shin a ba pacaappe, bau de7iya aquwaa muleera imma aggaasu.” Ammanettida he amꞌꞌiyaa bawu deꞌiya wurssetta miishshaa he gallassi immiyo wode, baassi koshshiyaabaa Yihooway immanaagaa ammanettaasu.—Maz. 26:3.

19. Yesuusi hiyyeesa amꞌꞌiyo xeelliyaagan yootidobaappe keehi koshshiyaabaa ay tamaarana danddayiyoo?

¹⁹ He taarikiyaa ne deꞌuwan oosuwan peeshsha. Nena hagaadan oychcha, ‘Yesuusi amꞌꞌe maccaaseebaa yootidoogaappe taani ay tamaarana danddayiyaanaa?’ He amꞌꞌeebaa qoppa. A Yihoowayyo hegaappe darobaa immanawu koyennan waaya aggana. Gidikkonne, A immana danddayiyoobaa immaasu; Yihoowayyo baassi deꞌiya keehi alꞌꞌobaa immaasu. Qassi A immidobaa ba Aaway alꞌꞌobadan xeelliyoogaa Yesuusi erees. Hegaappe nuuni keehi koshshiyaabaa tamaaroos: Nuuni nuussi deꞌiya alꞌꞌoban hegeekka, nu kumetta wozanaappenne kumetta shemppuwaappe awu haggaaziyo wode Yihooway ufayttees. (Maa. 22:37; Qol. 3:23) Yihooway nuuni nuussi danddayettiya ubbabaa oottiyoogaa beꞌiyo wode ufayttees. Nuuni haggaaziyoogaaninne shiiqota shiiqiyoogan ayyo goynnanawu goꞌettiyo wodiyaanne wolqqaa malabawukka he maarati hanoosona.

20. Neeni amꞌꞌeebaa yootiya taarikiyaappe tamaariyoobaa waata oosuwan peeshshana danddayay? Leemisuwaa yoota.

²⁰ Neeni amꞌꞌeebaa yootiya taarikiyaappe tamaariyoobaa waata oosuwan peeshshana danddayay? Eti Yihoowawu oottidoban I ufayttiyoogaa neeni eta hassayissiyo wode, minettana danddayiya asaa qoppanawu mala. Leemisuwawu, payyatettaa pacaa gaasuwan woy kaseegaadan haggaazanawu wolqqay baynnaagaa gaasuwan bana mooranchchadan woy pattenna asadan xeellana danddayiya cima michchiyo neeni eray? Woy qassi caddi oyqqiya harggiyaa gaasuwan SHiiquwaa Addaraashan ubba shiiqota shiiqana danddayenna gishshawu hidootaa qanxxida ishaa qoppana danddayay? ‘Minttettiya loꞌꞌo qaalaa’ haasayiyoogan hegaa mala asata maadda. (Efi. 4:29) Hiyyeesa amꞌꞌee taarikiyaappe nuuni tamaarido minttettiyaabaa etayyo yoota. Neeni yootiyo minttettiya qaalay nuussi danddayettida ubbabaa Yihoowayyo immiyo wode I ufayttiyoogaa eti hassayanaadan oottana danddayees. (Lee. 15:23; 1 Tas. 5:11) Eti immiyoobay guutta malatikkonne harati banttawu danddayettida ubbabaa Yihoowawu immiyo gishshawu neeni eta galatiyo wode, Yesuusa kottiyaa loytta kaallaasa.

21. Neeni ay oottanawu murttadii?

²¹ Nuuni Yesuusa kottiyaa loytti kaalliyoogan A milatanaadan maaddiya daro taarikee Wonggeliyan deꞌiyo gishshawu keehi galatoos! Buzo xinaatiyan woy So Asaa Goynuwan Wonggeliyaabaa xannaꞌiyoogee loꞌꞌo. He xinaatiyaappe loytti goꞌettanawu, taarikee nuussi loytti qonccananne he taarikiyaa nu deꞌuwan oosuwan peeshshana koshshiyoogaa hassayoos. Yesuusi oottidobaa nuuni kaallana koshshees; qassi I yootidobaakka siyana koshshees. Yesuusi hayqqanaappe kase haasayido wurssetta qaalaappe nuuni ay tamaaranaakko kaalliya huuphe yohuwan beꞌana.