TIMIRTTE 22
Mishiraachchuwaa Asawu Waata Yootana Danddayay?
Neeni Geeshsha Maxaafaa tumaa tamaariyo wode, ‘Hagee asi ubbi erana bessiyaaba!’ gaada qoppana danddayaassa. Ee tuma; hegee asi ubbi erana bessiyaaba! SHin neeni tamaaridobaa haratussi yootanawu yayyennan aggakka. Neeni he yashshaa aggada mishiraachchuwaa ufayssan yootiyoogaa waata doommana danddayiyaakko ane beꞌoos.
1. Neeni tamaaridobaa ne eriyo asatussi waata yootana danddayay?
Yesuusa kaalliyaageeti, “Nuuni be7idobaanne siyidobaa yootennan agganau danddayokko” yaagidosona. (Oosuwaa 4:20) Eti Yesuusi banttana tamaarissidobaa keehi dosido gishshawu, hegaa asa ubbawu yootanawu koyidosona. Neenikka hegaadan qoppay? Yaatikko, neeni eridobaa ne dabbotussinne ne laggetussi bonchchuwan yootanawu injjetiya wodiyaa koya.—Qolasiyaasa 4:6 nabbaba.
Doommanawu maaddiya amaridabata
Neeni ne dabbuwaara haasayiyo wode, “Ha saaminttan keehi ufayssiyaabaa tamaaraas” giyoogan Geeshsha Maxaafaa qofaa dentta.
Sahettiya woy hirggiya ne laggiyawu minttettiya xiqisiyaa yoota.
Nenaara oottiya uri, “Deꞌoy ay malee?” giidi oychchiyo wode ne xinaatiyan woy galchchaa shiiquwan tamaaridobaa yoota.
Ne laggetussi jw.org giyo nu websaytiyaa bessa.
Geeshsha Maxaafaa neeni xannaꞌiyo wode haratikka yiidi beꞌanaadan oychcha woy xannaꞌanawu waati oychchanaakko jw.org giyo websaytiyan bessa.
2. Galchchaara hashetidi markkattanawu halchchiyoogee goꞌꞌiyaaba gidiyoy aybissee?
Yesuusa kaalliyaageeti eti eriyo asa xallawu mishiraachchuwaa yootidi aggiigibookkona. Yesuusi eti markkattanaadan ‘naaꞌꞌaa naaꞌꞌaa katama ubban baappe sinttawu kiittiis.’ (Luqaasa 10:1) Hegaadan issippetettan markkattidoogee hara daro asay mishiraachchuwaa siyanaadan oottiis. Issippe markkattiyoogee Yesuusa kaalliyaageeti ufayttanaadankka oottiis. (Luqaasa 10:17) Etaagaadan neenikka galchchaara hashetada markkattanawu halchchana danddayay?
LOYTTA AKEEKA
Neeni yayyiyoogaa aggada mishiraachchuwaa yootiyoogan waana ufayttana danddayiyaakko akeeka.
3. Yihoowi nenaara gidana
Markkattanawu koyiya amaridaageeti harati waananaakko woy woyganaakko giidi yayyana danddayoosona.
Neeni eridobaa haratussi yootanawu yayyay? Aybissi?
BIIDUWAA beꞌite; yaatidi kaallidi deꞌiya oyshaa tobbite.
He yelaga Yihoowa Markkati yayyiyoogaa waati aggidonaa?
Isiyaasa 41:10 nabbabite; yaatidi ha oyshaa tobbite:
Neeni markkattanawu yayyiyo wode, woossay nena waati maaddanee?
Hagaa eray?
Yihoowa Markkatuppe daroti haratussi mishiraachchuwaa mule yootana danddayokko giidi issi wode qoppidosona. Leemisuwawu, Sergee bana pattenna asadan xeelliyo gishshawu asaara haasayanawu metootees. SHin hegaappe simmin Geeshsha Maxaafaa xannaꞌiis. I hagaadan giis: “Taani yayyayddakka, eridobaa asawu yootiyoogaa doommaas. Geeshsha Maxaafaabaa asawu yootiyoogee tana xalissidoogaa beꞌada keehi maalaalettaas. Taani ammaniyoobaa asawu yootiyoogee ta ammanuwaa minttiis.”
4. Asaa bonchcha
Neeni mishiraachchuwaa yootiyo wode, ay yootanaakko qoppiyoogaa xalla gidennan, waata yootanaakkokka qoppa. Naaꞌꞌantto Ximootiyoosa 2:24nne 1 PHeexiroosa 3:15 nabbabite; yaatidi ha oyshata tobbite:
Asaara Geeshsha Maxaafaabaa haasayiyo wode ha xiqisetu qofaa waata oosuwan peeshshana danddayay?
So asaappe woy laggetuppe amaridaageeti ne yootiyoobaa maayennan aggiyo wode, neeni ay oottana danddayay? Qassi ay oottana koshshennee?
Asay ammanana koshshiyaabaa kasetidi yootiyoogaappe, hiillan eta oychchiyoogee loꞌꞌo gidana danddayiyoy aybissee?
5. Mishiraachchuwaa yootiyoogee ufayttanaadan oottees
Yihoowi mishiraachchuwaa yootanaadan Yesuusa kiittiis. Yesuusi he oosuwaa waati xeellidee? Yohaannisa 4:34 nabbabite; yaatidi ha oyshata tobbite:
Loꞌꞌo qumaa miyoogee deꞌuwan deꞌanawu maaddees, qassi ufayttanaadan oottees. Markkattiyoogaanne Xoossay koyiyo hegaa malabaa oottiyoogaa Yesuusi qumaa miyoogan leemisidoy aybissee?
Mishiraachchuwaa yootiyoogee ufayttanaadan waati oottana danddayees gaada qoppay?
Maaddiyaabata
Saaminttawu gidduwan shiiqiyo shiiquwaa wode, asaa haasayissiyoogaa doommana danddayiyo ogeta akeeka.
Saaminttawu gidduwan shiiqiyo shiiquwan waanada loohanaakko nena xannaꞌissiyaagaara haasaya. Neeni loohanaadan imettiyaabati ne eridobaa asawu yootanawu loytta giigettanaadan maaddana danddayoosona.
Ha xinaatiyan “Issi Issi Asay Hagaadan Gees” woy “Issi Uri Hagaadan Oychchana Danddayees” giyo shaahotun deꞌiya qofan daro asay oychchiyoonne eqettanawu denttiyo qofaa woyga zaaranaakko meezeta.
ISSI URI HAGAADAN OYCHCHANA DANDDAYEES: “Oorattabi deꞌii?”
Neeni Geeshsha Maxaafaa xannaꞌiyo wode eridobaa he saatiyan izaawussi waata yootana danddayay?
AY AKEEKADII?
Mishiraachchuwaa asawu yootiyoogee ufayttanaadan oottees. Hegee geella neeni metana danddayees gaada qoppiyoogaa mala gidenna.
Zaaretuwaa
Asawu mishiraachchuwaa yootana koshshiyoy aybissee?
Hegaa bonchchuwan waata yootana danddayay?
Neeni markkattanawu geella yayyikko, yashshaa waata aggana danddayay?
PILGGA
Neeni jw.org erissiyo karddiyaa goꞌettada metootennan mishiraachchuwaa yootana danddayiyo oyddu ogeta akeeka.
Mishiraachchuwaa yootanawu nena maaddana danddayiya oyddu eeshshata akeeka.
“Asa Oyqqiyaagaa Gidanawu Giigettadii?” (Wochchiyo Keelaa, Masqqala 2020)
Neeni guutta naꞌa gidikkonne, Geeshsha Maxaafay yootiyo uraa taarikee mishiraachchuwaa yayyennan yootanaadan nena waati maaddiyaakko beꞌa.
Yihoowabaa tamaaribeenna ne dabbotussi Geeshsha Maxaafaabaa waata yootana danddayiyaakko akeeka.
“Ammanenna Dabbotu Wozanaa Ufayssiyaabaa Yootiyoogaa” (Wochchiyo Keelaa, Laappune 15, 2014)