Wozanappe Siiqettiyoogaa Ubbatoo Yaa Gujjite

1. Ha wodiyan daro keettan siiqoy baynnaagaa bessiyaabay aybee?

WURSSETTAA gallassan, daroti bantta soo asaa siiqennaagaa Geeshsha Maxaafay kasetidi yootiis. (2 Xim. 3:1, 3) Ha hiraagay ha wodiyan polettiiddi deꞌiyoogaa nuuni akeekoos. Leemisuwawu, yelida daroti paraman shaahettidosona; hegee qassi eti issoy issuwaa ixxanaadaaninne eta naati banttana bantta aawaynne aayyiyaa siiqennabadan qoppanaadan oottiis. Issi keettan deꞌiya so asaykka issoy issuwaayyo mata lagge gidennan aggana danddayees. Leemisuwawu, so asaa zoriya issi uri hagaadan giis: “Aayyiyaa, aawaynne naati issoy issuwaara haasayokkona, eti bantta komppiyuteriyaa, taabileetiyaa woy moobayliyaa bosherettiiddi, woy biiduwaa kaassaa kaaꞌiiddi daro wodiyaa aattoosona. He so asati issi keettan deꞌikkonne, issoy issuwaa loytti erokkona.”

2-3. (a) Roome 12:10y yootiyoogaadan, nuuni oona wozanappe siiqana koshshii? (b) Ha huuphe yohuwan nuuni ay beꞌanee?

² Ha alamiyan deꞌiya daro asaadan siiqennaageeta gidanawu, nuuni koyokko. (Roo. 12:2) Nuuni nu so asaa, qassi gubaaꞌiyan deꞌiya nu ishanttanne michchontta kaseppe aaruwan siiqiyoogaa meezetana koshshees. (Roome 12:10 nabbaba.) ‘Wozanappe siiqettiyoogaa’ geetetti birshshettida Giriiketto qaalay keehi siiqettiya so asaa giddon deꞌiya laggetettaa qonccissiyaaba. Gubaaꞌiyan deꞌiya nu ishanttanne michchontta nuuni hegaadan siiqana koshshees. Nuuni wozanappe siiqiyoogaa bessiyo wode, ubba asay ufayssan Yihoowawu issippe haggaazanaadan maaddoos.—Mik. 2:12.

³ Geeshsha Maxaafay yootiyoobaappe, nuuni hegaa mala siiquwaa siiqanaadan maaddiyaabaa ay tamaarana danddayiyaakko ane beꞌoos.

YIHOOWAY WOZANAPPE SIIQEES

4. Yaaqooba 5:11 Yihoowa siiquwaabaa ay yootii?

⁴ Geeshsha Maxaafay ufayssiya Yihoowa eeshshatubaa yootees. Leemisuwawu, “Xoossai siiqo” gidiyoogaa yootees. (1 Yoh. 4:8) Nuuni Yihoowabaa tamaariyo wode, A dabbo gidanawu koyoos. Gidoppe attin, Geeshsha Maxaafay Yihooway “qaretai kumidoogaa” woy wozanappe siiqiyaagaa gidiyoogaakka yootees. (Yaaqooba 5:11 nabbaba.) Hegee Yihooway nuna ay keena siiqiyaakko loytti qonccissees!

5. Yihooway maariyoogaa waati bessidee, qassi nuuni waani A milatana danddayiyoo?

⁵ Yaaqooba 5:11 Yihooway wozanappe siiqiyoogaa akko shiiqanaadan oottiya hara eeshshaara, hegeekka A maarotaara gattidi qonccissiyoogaa akeeka. (Kes. 34:6) Yihooway nuuni balidobaa gishshawu nuussi atto giyoogee I nuna maariyo issi oge. (Maz. 51:1) Maarotay moorida urawu atto giyoogaa xalla gidennaagaa Geeshsha Maxaafay yootees. Hegee issi asi waayettiyoogaa beꞌida uri hegan mishettidi izaawa maaddanawu baaxetiyoogaa bessiyaaba. Yihooway issi aayyiyaa ba naꞌaa maaddanawu koyiyoogaappekka aaruwan, nuna maaddanawu keehi koyiyoogaa yootiis. (Isi. 49:15) Yihooway maariyoogee nuuni waayettiyo wode nuna maaddanaadan A denttettees. (Maz. 37:39; 1 Qor. 10:13) Nu ishanttinne michchontti nuna yiilloyiyo wode, nuuni lancciyaa uluwan oyqqennan etawu atto giyoogan eta maariyoogaa bessana danddayoos. (Efi. 4:32) SHin, nuuni nu ishanttanne michchontta metoy gakkiyo wode maaddiyoogee maariyoogaa bessiya keehi koshshiyaaba. Harata maaranaadan siiqoy nuna denttettiyo wode, ooppenne aaruwan wozanappe siiqiya Yihoowa milatoos.—Efi. 5:1.

‘KEEHI MATA DABBO’ GIDIDA YONAATAANANNE DAAWITA

6. Yonaataaninne Daawiti issoy issuwaa wozanappe siiqiyoogaa waati bessidonaa?

⁶ Issoy issuwaa mata dabbodan siiqida nagaranchcha asatubaa Geeshsha Maxaafay yootees. Yonaataananne Daawita hanotaa qoppa. Geeshsha Maxaafay hagaadan gees: “Yonaataani Daawitaara daro mata dabbotettaa medhdhiis; Yonaataani Daawita ba huuphedan siiqiis.” (1 Sam. 18:1) Saaꞌoola kaallidi kawotanaadan Yihooway Daawita dooriis. Hegaappe simmin, Saaꞌooli Daawita keehi qanaatidi, woranawu maliis. SHin, Saaꞌooli Daawita woranawu maliyo wode, Saaꞌoola naꞌay Yonaataani ba aawaa maaddibeenna. Yonaataaninne Daawiti lagge gididi deꞌanawunne issoy issuwaa awudekka maaddanawu qaalaa gelidosona.—1 Sam. 20:42.

7. Yonaataaninne Daawiti lagge gidennaadan diggana danddayiyaabay aybee?

⁷ Yonaataaninne Daawiti laggetennaadan darobay diggana danddayiyo gishshawu, eti hegaa mala mata lagge gididoogee keehi maalaaliyaaba. Leemisuwawu, Yonaataani Daawitappe 30 laytta gidiyaagaa bayratees. Yonaataani keehi yeleganne lammachcha uri tawu mata lagge gidana danddayenna giidi qoppana danddayees. SHin, I hegaadan qoppibeenna. I Daawita keehi bonchchiis.

8. Yonaataana Daawitawu keehi loꞌꞌo lagge oottidabay aybee?

⁸ Yonaataani Daawita qanaatana danddayees. Yonaataani Kawuwaa Saaꞌoola naꞌaa gidiyo gishshawu, kaalliya kawo gidana bessiyay tana gaana danddayees. (1 Sam. 20:31) Gidoppe attin, Yonaataani bana ziqqi oottiya asa gidiyo gishshawu, Yihoowawu ammanettidi deꞌiis. Yaatiyo gishshawu, Saaꞌoolappe kaallidi kawotanaadan Yihooway Daawita doorido wode I keehi maaddiis. Saaꞌooli hegan keehi hanqqettikkokka, Yoonaataani Daawitawu ammanettidi deꞌiis.—1 Sam. 20:32-34.

9. Yonaataani Daawita qanaatibeennaagaa nuuni aybin eriyoo?

⁹ Yonaataani Daawita wozanappe siiqiyo gishshawu, A qanaatibeenna. Yonaataani wonddafiyaa dukkiyoogan keehi gooba; qassi xala olanchcha. Asay anne A aawaa, “argganttaappekkka aadhdhida eeso,” qassi “gaammuwaappekka aadhdhida mino” yaagees. (2 Sam. 1:22, 23) Hegaa gishshawu, Yonaataani ba minotettan oottidoban ceeqettana danddayees. SHin, I Daawitappe leqqanawu malibeenna; qassi Daawiti oottido loꞌꞌoban A qanaatibeenna. Ubba qassi, Daawiti xalanne Yihoowan ammanettiya asa gidido gishshawu Yonaataani A nashshiis. Leemisuwawu Daawiti Gooliyaada wori simmin, Yonaataani Daawita keehi siiqiyoogaa doommiis. Nuuni nu ishanttannne michchontta Yonaataani Daawita siiqidoogaadan waati siiqana danddayiyoo?

WOZANAPPE SIIQIYOOGAA HA WODIYAN WAATI BESSANA DANDDAYIYOO?

10. ‘Issoy issuwaara minttidi wozanappe siiqettiyoogee’ woygiyoogee?

¹⁰ Geeshsha Maxaafay, “Issoy issuwaara minttidi wozanappe siiqettite” yaagees. (1 PHe. 1:22) Yaatanawu Yihooway nuuyyo loꞌꞌo leemiso gidees. A siiqoy keehi mino gidiyo gishshawu, nuuni ayyo ammanettidi deꞌikko, I nuna siiqiyoogaa mule aggenna. (Roo. 8:38, 39) “Minttidi” giya qaalay issi uri siiqanawu keehi baaxetiyoogaa qonccissees. Nu ishanttanne michchontta siiqiyoogee issi issitoo nuna metana danddayees. Harati nuna yiilloyiyo wode, nuuni ‘siiquwan issoy issuwaa danddayidi’ deꞌana koshshees; qassi ‘issippe gatti qachchiya sarotettan geeshsha ayyaanay immiyo issippetettaa naaganawu keehi baaxetana’ bessees. (Efi. 4:1-3) Nuuni nu ishanttuuranne michchonttuura sarotettan deꞌanawu baaxetikko, eta balan xeelaa wottokko. Nuuni Yihooway xeelliyoogaadan nu ishantta xeellanawu nuussi danddayettida ubbabaa oottoos.—1 Sam. 16:7; Maz. 130:3.

11. Gujji gujjidi wozanappe siiqiyoogee issi issitoo metana danddayiyoy aybissee?

¹¹ Nu ishanttanne michchontta wozanappe siiqiyoogee, ubba qassi eta balaa akeekiyo wode hegaadan oottiyoogee issi issitoo metiyaaba. Hegee koyro xeetu layttan deꞌida amarida Kiristtaanetakka metidaba milatees. Leemisuwawu, Ewodanne Sinxxiika ‘mishiraachchuwawu PHawuloosaara daafurido’ wode waayi metootana. Gidoppe attin, eti aybissakko issoy issuwaara maayettidi deꞌanawu metootidosona. Hegaa gishshawu, PHawuloosi eti “issi qofan . . . Godan de7anaadan” eta zoriis.—Pili. 4:2, 3.

12. Nu ishanttanne michchontta waatidi gujji gujjidi wozanappe siiqana danddayiyoo?

¹² Ha wodiyan nu ishanttanne michchontta waatidi gujji gujjidi wozanappe siiqana danddayiyoo? Nuuni nu mala Kiristtaaneta loytti eriyo wode, etabaa akeekanawunne wozanappe eta siiqanawu waayi metootana. Eti nuuppe cimin woy yelagin woy eta wogay nuugaappe dummatinkka etaara laggetana danddayoos. Yonaataani Daawitappe 30 gidiya layttaa bayratikkokka, eti mata lagge gididoogaa hassaya. Neeni aara laggetana danddayiyo neeppe bayratiya woy kaalotiya uri ne gubaaꞌiyan deꞌii? Neeni hegaadan oottiyo wode, ne ‘ishantta ubbaa siiqiyoogaa’ bessaasa.—1 PHe. 2:17.

13. Nuuni gubaaꞌiyan deꞌiyaageeta issuwaa haraappe aaruwan siiqana danddayiyoy aybissee?

¹³ Nu mala Kiristtaaneta wozanappe siiqiyoogee gubaaꞌiyan deꞌiya ubbawu mata lagge gidiyoogaa giyoogee? CHii, hegee danddayettennaba. Issi issi asay nu dosiyoobaa dosiyo gishshawu, nuuni haratuppe aaruwan eta siiqiyoogee wottin deꞌiyaaba. Yesuusi ba erissiyo ashkkarata ubbaa ba “laggeta,” giikkonne, I Yohaannisa keehi siiqees. (Yoh. 13:23; 15:15; 20:2) SHin, Yesuusi Yohaannisa haratuppe aattidi xeellibeenna. Leemisuwawu, Yohaannisinne A ishay Yaaqoobi Xoossaa Kawotettan banttawu dumma sohuwaa immanaadan Yesuusa oychchido wode, I etawu hagaadan giis: “Taappe ushachcha baggaaranne haddirssa baggaara uttanaageeta dooranau taayyo maati baawa.” (Mar. 10:35-40) Yesuusaagaadan, nuunikka nu mata laggeta haratuppe aattidi xeellana bessenna. (Yaaq. 2:3, 4) Nuuni hegaadan oottikko, gubaaꞌiyan sarotettay deꞌanaadan maaddokko.—Yih. 17-19.

14. Nuuni haratuppe leqqanawu malennaadan Piliphphisiyuusa 2:3y nuna waati maaddana danddayii?

¹⁴ Nuuni issoy issuwaa wozanappe siiqiyo wode, gubaaꞌiyan deꞌiya haratuppe leqqanawu malokko. Yonaataani Daawita qanaatibeennaagaanne A sohuwan kawotanawu malibeennaagaa hassaya. Nuuni ubbaykka Yonaataana leemisuwaa kaallana danddayoos. Ne ishanttu eraa gaasuwan eta qanaatoppa; shin ‘nena ziqqi oottada harati neeppe aadhdhiyaabadan qoppa.’ (Piliphphisiyuusa 2:3 nabbaba.) Nuuppe ooninne gubaaꞌiyaa maaddiyaabaa oottana danddayiyoogaa hassaya. Nuuni nuna ziqqi oottikko, nu ishanttuyyoonne michchonttuyyo deꞌiya loꞌꞌo eeshshata akeekananne eti ammanettidi oottidobaappe goꞌettana danddayoos.—1 Qor. 12:21-25.

15. Taaniyonne I soo asaa gakkidabaappe neeni ay tamaaray?

¹⁵ Nu qoppibeenna metoy nuna gakkiyo wode, nu ishanttinne michchontti nuna wozanappe siiqanaadaaninne maaddanaadan oottiyoogan Yihooway nuna minttettees. Leemisuwawu, 2019n “Siiqoy Mule Xayenna!” giya Daro Biittaappe Yiidaageeti Amarkkan SHiiqido SHiiquwaa bantta heezzu naatuura shiiqida issi soo asaa bolli gakkidabaa beꞌa. Eti Qeeraa gallassi kaamiyaa laaggiiddi aqiyoosaa simmishin issi kaamee eta kaamiyaa domꞌꞌiis. Naatu aayyiyaa Taaniya hagaadan gaasu: “Nuuppe ooninne qohettibeennaba gidikkonne, keehi dagammidi kaamiyaappe wodhdhidi ogiyan eqqida. Issi uri nuuni A kaamiyan gelanaadan yootiis. I shiiquwaappe simmiya nu ishanttuppe issuwaa. Qassi kaamiyaa essidi nuna oychchiday A xalla gidenna. Siwidineppe he shiiquwawu yiida ichchashu Yihoowa Markkatikka eqqidi nuna oychchidosona. He michchontti ta macca naatanne tana qoommidosona; qassi hegee taani woppu gaanaadan oottiis! Nuuni aynne hanibeennaagaa taani etawu yootikkonne, eti nuna aggidi bibookkona. Aakimeti gakkidi nuna maaddi simminkka eti nuuppe shaahettibookkona; qassi eti nuuni koshshiya ubbabaa demmanaadan maaddidosona. He wayssiya wodiyan, Yihooway nuna siiqiyoogaa nuuni akeekida. Hegee nuuni nu ishanttanne michchontta mintti siiqanaadan, qassi Yihoowakka kaseppe aaruwan siiqanaadaaninne galatanaadan oottiis.” Neeyyo maadoy koshshin ne mala Kiristtaanee nena wozanappe siiqiyoogaa bessido wodiyaa hassayay?

16. Nuuni issoy issuwaa wozanappe siiqana koshshiyoy aybissee?

¹⁶ Nuuni issoy issuwaa wozanappe siiqiyo wode, haniya loꞌꞌobata qoppa. Nu ishanttanne michchontta metoy gakkiyo wode, nuuni minttettoos. Nu ishanttinne michchontti issippe Yihoowawu ufayssan haggaazanaadan maaddoos. Nuuni Yesuusa kaalliyaageeta gidiyoogaa bessoos; qassi hegee wozanaa suure asati Yihoowawu haggaazanaadan oottees. Qassi ubbaappe aaruwan, “maarotettaa Aawaanne minttetto ubbaa Xoossaa” Yihoowa bonchchoos. (2 Qor. 1:3) Simi ubbaykka ubbatoo wozanappe siiqettoosinne he siiquwaa gujji gujji boos!