NABBABIYAAGEETU OYSHAA

Yohaannisa 11:35y yootiyoogaadan, Yesuusi Alꞌꞌaazara hayquwaappe denttanaappe kase afuxxidoy aybissee?

Nuuni siiqiyo uri hayqqiyo wode, i nuuppe shaahettido gishshau nuuni yeekkiyoogee wottin deꞌiyaaba. Yesuusi Alꞌꞌaazara siiqiyaaba gidikkonne, i afuxxidoy Alꞌꞌaazari hayqqido gishshataassa gidenna. Yohaannisi xaafido taarikee bessiyoogaadan, i Alꞌꞌaazara dabbotussinne laggetussi qarettido gishshau afuxxiis.—Yoh. 11:36.

Yesuusi Alꞌꞌaazari sahettidoogaa siyido wode, sohuwaara a pattanau a soo bibeenna. Geeshsha Maxaafay, “Al77aazari harggidoogaa Yesuusi siyido wode, ba de7iyoosan naa77u gallassaa pe7iis” yaagees. (Yoh. 11:6) Yesuusi yaa beennan takkidoy aybissee? I hegaadan oottido gaasoy deꞌees. I, “Taani Xoossaa Na7ai harggiyaa gaasuwan bonchchettana mala, Xoossaa bonchchuwaassi ha harggee Al77aazara oiqqidoogaappe attin, woriya hargge gidenna” yaagiis. (Yoh. 11:4) Yaatiyo gishshau, Yesuusi Alꞌꞌaazara hayquwan Xoossaa bonchissiyaabaa oottanau qoppiis. Waatidi? Yesuusi ba siiqiyo laggiyaa hayquwaappe denttidi keehi maalaalissiyaabaa oottana hanees.

Yesuusi he wode ba erissiyo ashkkaratuura haasayiiddi, hayquwaa xiskkuwan leemisiis. I he wode etau, ‘Alꞌꞌaazara xiskkuwaappe denttanau’ biyoogaa yootidoy hegaassa. (Yoh. 11:11) Yesuusau Alꞌꞌaazara hayquwaappe denttiyoogee aaway woy aayyiyaa guuttaa liphi giida naꞌaa xiskkuwaappe denttiyoogaa mala. Yaatiyo gishshau, Alꞌꞌaazari hayqqido gishshau Yesuusi azzanana koshshenna.

Yaatin, Yesuusi afuxxanaadan oottidabay aybee? Yuushuwan deꞌiya qofaappe zaaruwaa demmana danddayoos. Yesuusi Alꞌꞌaazara michee Mayraamiira gayttidi anne harati yeekkiyoogaa beꞌido wode, “ba wozanan daro mishettiis; qassi tookki shemppiis.” Yesuusi eti seelettiyoogaa beꞌidoogee, i ‘ba wozanan daro mishettanaadan’ oottiis. ‘Yesuusi afuxxidoy’ hegaassa. I siiqiyo laggeti daro kayyottiyoogaa beꞌidi, Yesuusi keehi azzaniis.—Yoh. 11:33, 35.

Matan yaana ooratta alamiyan nuuni siiqiyoogeeta hayquwaappe denttanaunne eti payya gididi deꞌanaadan oottanau Yesuusau wolqqay deꞌiyoogaa ha taarikee bessees. Siiqiyo mata dabboy hayqqidoogeetussi Yesuusi qarettiyoogaakka hegee bessees. Siiqiyo mata dabboy hayqqin kayyottiyaageetussi nuuni qarettana bessiyoogaakka ha taarikiyaappe tamaarana danddayoos.

Yesuusi Alꞌꞌaazara hayquwaappe denttana haniyoogaa erees. Gidikkokka, i ba laggeta keehi siiqiyoonne etau wozanappe qarettiyo gishshau afuxxiis. Hegaadankka, nuuni qarettiyoogee ‘yeekkiyaageetuura yeekkanaadan’ oottana danddayees. (Roo. 12:15) Hegaadan azzaniyoogee issi uri dendduwaa hidootan ammanennaagaa bessiyaaba gidenna. Yaatiyo gishshau, Yesuusi Alꞌꞌaazara hayquwaappe denttana haniyoogaa erikkokka mishetti yeekkidi, siiqiyoogeeti hayqqin azzanidaageetuyyo qarettiyoogan leemiso gidiyaabaa oottidoogee bessiyaaba.