Nabbabiyaageetu Oyshaa

Kiitettida PHawuloosi ‘wodee gakkennan yelettaas’ giido wode woyganawu koyidee? (1 Qoronttoosa 15:8)

Koyro Qoronttoosa 15:8y yootiyoogaadan, PHawuloosi hagaadan giis: “Ubbaappe wurssettan, wodee gakkennan yelettida taassikka qoncciis.” PHawuloosi saluwan deꞌiya Yesuusa ajjuutan beꞌido wodiyaabaa yootennan aggenna giidi nuuni kase qonccissida. Qassi, I tiyettidaageetu denddoy doommanaappe daro xeetu layttaa kasetidi ayyaana mereta gididi yelettiis woy denddiis giyoogaa mala giidi akeekida. SHin ha xiqisiyaa loytti xannaꞌi simmin, ha xiqisiyaa qonccissuwaa laammiyoogee bessiyaaba milatiis.

PHawuloosi ha sohuwan I laamettido wode hanidabaa yootiiddi deꞌiyoogee qoncce. SHin I ‘wodee gakkennan yelettaas’ giido wode woyganawu koyidee? Hegawu daro gaasoti deꞌana danddayoosona.

I qoppennan laamettidoogee awu keehi metiyaaba. Darotoo issi naꞌi wodee gakkennan yelettiyoogee maalaalissiyaaba. Saaꞌooli (guyyeppe PHawuloosa geetettidaagee) Damasqqon deꞌiya Kiristtaaneta yedettanawu yaa biyo wode, hayquwaappe denddida Yesuusa ajjuutan beꞌana giidi qoppibeenna. PHawuloosi qoppennan laamettidoogee A xallaa gidennan, I yedettanawu halchchido Damasqqon deꞌiya Kiristtaanetakka maalaalissiis. Hegaa bollikka, amarida wodiyawu A ayfee xeellennan ixxidoogee, hanotay keehi metanaadan oottiis.—Oos. 9:1-9, 17-19.

I “bessenna wodiyan” laamettiis. ‘Wodee gakkennan yelettiis’ geetettidi koyro birshshettida Giriiketto qaalay “bessenna wodiyan yelettiis” geetettidikka birshshettana danddayees. Ha qofaa issi Geeshsha Maxaafaa birshshettay hagaadan gees: “Taani ooninne yelettana giidi naagenna wodiyan yelettaas.” PHawuloosi laamettido wode Yesuusi saluwan deꞌees. Xiqisiyan kasetiya paydotun odettida asatuppe dummatiya hanotan, hayquwaappe denddida Yesuusi saluwaa baanaappe kase PHawuloosi A beꞌibeenna. (1 Qor. 15:4-8) Yesuusi PHawuloosawu qoppennan qonccidoogee “bessenna wodiyaana” milatikkonne, I hayquwaappe denddida Yesuusa beꞌana danddayiis.

I bana ziqqi oottiyoogaa bessiya hanotan haasayiis. Issi issi eranchchati yootidoogaadan, ha sohuwan PHawuloosi goꞌettido qaalay boriyoogaa bessiyaaba milatana danddayees. PHawuloosi qoppidobay hegaa gidikko, kiitettidaagaa gidiyoogee awu bessennaba gidiyoogaa I akeekiis. I hagaadan giis: “Yesuusi kiittido ubbaappe taani laafa; taani Xoossaa woosa keettaa waissido gishshau, Yesuusi kiittidoogaa geetettada xeesettanaukka bessikke. SHin Xoossaa aaro kehatettan taani tanakka.”—1 Qor. 15:9, 10.

Yaatiyo gishshawu, PHawuloosi Yesuusi awu qoppennan qonccidoogaabaa yootiyo wode, I qoppibeenna wodiyan laamettidoogaa woy he maalaalissiya ajjuutay bawu qonccana bessiyo asa giidi bana qoppibeennaagaa yootiiddi deꞌennan aggenna. Hanotay ayba gidikkonne, PHawuloosi hegaa loytti nashshiis. Hegee Yesuusi hayquwaappe denddidoogaa I sirennaadan oottiis. I Yesuusa dendduwaabaa haratussi sabbakiyo wode, ha qoppennan hanidabaa darotoo yootidoogee qoncce.—Oos. 22:6-11; 26:13-18.