Siiqo Xoossaa Imota Gidida Ekkiyoogaanne Geliyoogaa

1, 2. (a) Biron ekkiyaanne geliya asata xeelliyaagan, issi issitoo woygidi qoppana danddayiyoo? Aybissi? (b) Ha shemppuwan nuuni tobbana oyshati awugeetee?

BULLACHAA biyoogee nena ufayssii? Hegaa mala hanotay keehi ufayssana danddayiyo gishshau, daroti he sohuwaa biyoogan ufayttoosona. Bullachiyaageenne bullashettiyaara loytti maayidi puulattidaageeta beꞌaasa. Hegaa xalla gidennan, eti keehippe ufayttiyoogaa eta hanotaappe beꞌaasa. He gallassi eti keehippe ufayttoosona; qassi sinttanaa wodee etayyo loꞌꞌo hidootay kumidoogaa milatees.

² Gidikkokka, ha wodiyan asay ekkiyoogaanne geliyoogaa xeelliyo hanotay moorettidoogee erettidaba. Biron ekkiyaanne geliya asatu sinttanaa hanotay injjetidaagaa gidana giidi nuuni qoppikkonne, issi issitoo: ‘Eta aqo deꞌoy ufayssiyaagaa gidanee? I adussa wodiyau gamꞌꞌanee?’ giidi qoppana danddayoos. He oyshatu zaaroy, azinaynne machiyaa naaꞌꞌykka aqo deꞌuwau imettida Xoossaa zoriyaa ammanettidi, oosuwan peeshshiyoogan woykko aggiyoogan baasettees. (Leemiso 3:5, 6) Eti Xoossaa siiquwan deꞌanau hegaadan oottana koshshees. Ane haꞌꞌi kaallidi deꞌiya oyddu oyshatuyyo Geeshsha Maxaafay immiyo zaaruwan nu qofaa wottoos: Issi uri ekkanaadan woy gelanaadan oottiya gaasoy aybee? Ekkiyaaba woy geliyaaba gidikko, aqo lagge gidanaadan neeni oona doorana koshshii? Aqo deꞌuwau waana giigettana danddayay? Aqo laggeti aqo deꞌuwan ufayttidi deꞌanaadan maaddana danddayiyay aybee?

EKKANAU WOY GELANAU BESSIYA GAASOTI AWUGEETEE?

3. Bessenna gaasotun ekkiyoogee woy geliyoogee eratetta gidennay aybissee?

³ Issoti issoti ufayttanau, ekkana woy gelana koshshees giidi qoppoosona. Aqo lagge demmana xayikko, ne deꞌuwan injjiyaa woykko ufayssaa demmakka giidi qoppoosona. Hegee mule tuma gidenna! Yesuusi ekkibeenna. Ekkennan woy gelennan deꞌiyoogee imota gidiyoogaa i yootiis. Qassi danddayiyaageeti hegaadan deꞌanaadankka zoriis. (Maatiyoosa 19:11, 12) Kiitettida PHauloosikka, ekkennan woy gelennan deꞌiyoogaa goꞌꞌaa yootiis. (1 Qoronttoosa 7:32-38) Hegaa xeelliyaagan, Yesuusikka gidin PHauloosikka gidin higge kessibookkona. ‘Ekkiyoogaanne geliyoogaa diggiyoogee’ ubba ‘xalahetu timirttiyaappe’ issuwaa. (1 Ximootiyoosa 4:1-3) Gidikkokka, ekkennan woy gelennan deꞌiyoogee, qofay shaahettennan Yihoowayyo oottana koyiyaageetussi daro injjiyaa medhees. Yaatiyo gishshau, laggetu sugetta milatiya bessenna gaasotun ekkiyoogee woy geliyoogee eratetta gidenna.

4. Giiga aqo deꞌoy ayba ogiyan naata dichanau baaso gidii?

⁴ SHin ekkiyoogau woy geliyoogau bessiya gaasoy deꞌii? Ee, deꞌees. Ekkiyoogeenne geliyoogeekka nuna siiqiya Xoossaa imota. (Doomettaabaa 2:18) Hegaa gishshau, ayyo amarida goꞌꞌaynne ufayssaa demissiyo hanotay deꞌees. Leemisuwau, injjetida aqo deꞌoy so asaa duussau loꞌꞌo baaso. Yelidaageeti naata dichanau, siiqanau, seeranaunne kaalettanau aqo deꞌuwan woppu giidi deꞌana koshshees. (Mazamure 127:3; Efisoona 6:1-4) Gidikkonne, ekkanau woy gelanau gaasoy naata dichiyoogaa xalla gidenna.

5, 6. (a) Eranchchaa 4:9-12n deꞌiyaagaadan, mata laggetettay demissiyo issi issi goꞌꞌay aybee? (b) Aqo deꞌoy waanidi heezzu achan dooqettida wodoruwaa mala gidana danddayii?

⁵ Ha shemppuwau waanna qofa gidida xiqisiyaanne a heeran deꞌiya qofaa qoppa: “Issuwaa gidiyoogaappe naa77a gidiyoogee lo77o; aissi giikko, eta oosoi issuwaagaappe aadhdhidi, lo77o aifiyaa immanau danddayees. Qassi, naa77aappe issoi kunddikko issoi denttees; shin barkka de7iya urai kunddikkonne a denttiyaabi bainna gishshau, au aayye7ana! Meego wodiyan naa77ai issippe zin77ikko ho77ees; shin barkka zin77iya uraa auppe ho77anau danddayii? Issi asi barkka teqqanau danddayenna metuwaa naa77u asati issippe eqettidi, teqqanau danddayoosona. Heezzu achchan dooqettida wodoroikka elle duuxxenna.”—Eranchchaa 4: 9-12.

⁶ Ha xiqisee koyro xekkan, laggetettau deꞌiya goꞌꞌaabaa yootees. Aqo deꞌoy ayba laggetettappenne aaruwan matattiyoogaa gidiyoogee qoncce. Ha xiqisee qonccissiyoogaadan, hegaa mala issippetettay aqo laggeti issoy issuwaa maaddanaadan, minttettanaadaaninne naaganaadan oottees. Aqo deꞌoy eta naaꞌꞌaa issippetettan harabay gujettiyaaba gidikko, keehippe minnees. Ha xiqisee qonccissiyoogaadan, naaꞌꞌu achan dooqettida wodoroy duuxxana danddayees. SHin heezzu achan dooqettidaagee elle duuxxenna. Azinaanne machiyoo qofissiya waannabay Yihoowa ufayssiyoogaa gidiyo wode, eta aqo deꞌoy heezzu achan dooqettida wodoruwaa mala. Eti bantta aqo deꞌuwan Yihoowa gujjiyaaba gidikko, eta issippetettay tumuppe keehi mino.

7, 8. (a) Asho gaytotettaa koshshay waayissiyo, ekkibeenna woy gelibeenna Kiristtaanetussi PHauloosi woygiya zoriyaa xaafidee? (b) Ekkiyoogaanne geliyoogaa ay mala bessiya ogiyan xeellanaadan Geeshsha Maxaafay yootii?

⁷ Asho gaytotettaa koshshaa bessiya ogiyan polana danddayiyoy aqo deꞌo xalaalaana. Aqo deꞌuwan, asho gaytotettaa ufayssa demissiyaabadan xeelliyoogee bessiyaaba. (Leemiso 5:18) Geeshsha Maxaafay “panttatettaa wode” giyo wodiyan, ekkibeenna woy gelibeenna urau asho gaytotettaa koshshay keehi wolqqaamees. He wodiyan, o woy a asho gaytotettaa koshshay waayissana danddayees. Hegaa mala koshshay teqqettana xayikko, tuna woykko bessenna eeshshau kaalettana danddayees. PHauloosi geeshsha ayyaanay denttettin, ekkibeenna woy gelibeenna asata zoriiddi: “Amuwan xuugettiyoogaappe ekkiyoogeenne geliyoogee lo77o gidiyo gishshau, eti banttana naaganau danddayana xayikko, ekkonanne gelona” yaagidi xaafiis.—1 Qoronttoosa 7:9, 36, NW; Yaaqooba 1: 15.

⁸ Issi uri ekkanaadan woy gelanaadan denttettiyaabi ayba gidikkokka, tuma gididabaa qoppiyoogee bessiyaaba. PHauloosi yootidoogaadan, ekkiyaageeti woy geliyaageeti “bantta bolli waayiyaa ehaana.” (1 Qoronttoosa 7:28) Aqo deꞌuwan deꞌiya asati, ekkibeenna woy gelibeenna asatuugaappe dumma gidida waayiyaa waayettoosona. Neeni ekkanau woy gelanau dooriyaaba gidikko, gakkiya waayee darennaadaaninne ufayssay daranaadan ay oottana danddayay? Issi ogee aqo laggiyaa eratettan dooriyoogaa.

NEEYYO GIIGA AQO LAGGE GIDANA DANDDAYIYAY OONEE?

9, 10. (a) Ammanennaageetuura waaxettiyoogee gattiyo qohuwaa PHauloosi waati leemisuwan yootidee? (b) Xoossaa zoriyaa aggi bayidi ammanenna uraa ekkiyoogee woy geliyoogee darotoo ay gattii?

⁹ PHauloosi geeshsha ayyaanay denttettin, aqo laggiyaa dooriyo wode oosuwan peꞌana bessiya keehippe koshshiya baaso siraataa: “Ammanenna asatuura zuppetidi woykko waaxettidi, giigenna oosuwaa oottoppite” yaagidi xaafiis. (2 Qoronttoosa 6:14) I yootido leemisoy, goshshanchatu deꞌuwaara gayttida issi hanotan baasettidaagaa. Geesan woykko minotettan keehippe dummatiya naaꞌꞌu meheta waaxiyo wode, naaꞌꞌaykka waayettoosona. Hegaara issi mala hanotan, ammaniyaanne ammanenna asati aqo deꞌuwan issippe waaxettiyo wode, naaꞌꞌaykka waayettanaagee erettidaba. Aqo laggetuppe issoy Yihoowa siiquwan deꞌanau koyiyo wode, haray he hanotaa xaasayees. Hegaadaana gidikko, deꞌuwan kaseyiyoobay issuwaagee haraagaagaara moggottennanne wurssettan gita unꞌꞌoy gakkana danddayees. Yaatiyo gishshau, PHauloosi “Godaa ammaniya asaa wogan” ekkanaadaaninne gelanaadan Kiristtaaneta minttidi zoriis.—1 Qoronttoosa 7:39.

¹⁰ Issi issi hanotan, ekkibeennanne gelibeenna Kiristtaaneti banttarkka deꞌiyoogaappe bessenna ogiyan waaxettiyoogee loꞌꞌo giidi kuuyoosona. Issoti issoti Geeshsha Maxaafaa zoriyaa aggi bayidi, Yihoowau oottenna uraa ekkanau woy gelanau qofaa qachoosona. Darotoo hegee gattiyoobay azzanttiyaaba. Hegaa mala asati bantta deꞌuwan keehippe koshshiyaabata issippe shaahettenna uraa ekkoosona woy geloosona. Ekkanaappe woy gelanaappe kase siyettiyaagaappe aaruwan, etau banttarkka deꞌiyaabadan siyettana danddayees. Hegaa xeelliyaagan, Xoossaa zoriyan ammanettiyaanne a mintti kaalliya ekkibeennanne gelibeenna daro shaꞌan qoodettiya Kiristtaaneti deꞌiyoogee ufayssiyaaba. (Mazamure 32:8) Eti issi wode ekkanau woy gelanau hidootiyaaba gidikkonne, Xoossaa Yihoowau goynniyaageetuppe aqo lagge demmana gakkanaashin, ekkennan woy gelennan takkoosona.

11. Aqo laggiyaa eratettan dooranau nena maaddanay aybee? (Sinttaa 114n deꞌiya saaxiniyaakka xeella.)

¹¹ Yihoowayyo oottiya ooninne giiga aqo lagge gidees giiyoogaa gidenna. Neeni ekkanau woy gelanau qoppiyaaba gidikko, eeshshan, ayyaanaabaa hoolliyaaninne Xoossaa siiqiyoogan nenaara moggottiya aqo lagge koya. Ammanettida wozannaama ashkkaray ha allalliyaa xeelliyaagan daro xuufiyaa giigissiis. Ha keehippe koshshiya kuushshaa kuuyanau nena maaddanaadan, hegaa mala Geeshsha Maxaafaa zoriyaa demmanau woossiyoogee eratetta.a—Mazamure 119:105.

12. Daro biittatun machiyoogaara gayttidaagan ayba meezee deꞌii? Hegau kaaleto gidiya ayba leemisoy Geeshsha Maxaafan deꞌii?

¹² Daro biittatun yelidaageeti bantta naꞌaayyo aqo lagge dooriyoogee meeze gididaba. Hegaa mala wogay deꞌiyo heeran, hegaa mala gita dooruwaa dooranau, yelidaageeti deꞌuwan beꞌidobaaninne eratettan aadhiyaabadan xeelliyoogee qoncce gididaba. Beni wodeegaadan, yelidaageeti bantta naꞌaayyo macho oychidi immiyo wode, aqo deꞌoy darotoo giiga gidees. Ha wodiyan hegaa mala hanotan deꞌiya yelidaageetussi, Abrahaami Yisaaqassi macho oychanaadan ba ashkkaraa kiittidoogee loꞌꞌo timirtte gidees. Aqoynne deretettan deꞌiya sohoy Abrahaama qofissidaba gidenna. Hegaappe, a keehi qofissidabay, Yihoowayyo goynniyaageetuppe Yisaaqayyo macho demmanaagaa.b—Doomettaabaa 24:3, 67.

INJJE AQO DEꞌUWAU WAANA GIIGETTANA DANDDAYAY?

13-15. (a) Leemiso 24:27n deꞌiya baaso siraatay, machanau koyiya yelagaa waati maaddana danddayii? (b) Issi yelagiyaa gelanau waanada giigettana danddayay?

¹³ Neeni ekkanau woy gelanau wozanappe qoppiyaaba gidikko, ‘Taani tumuppe giigidanaa?’ yaagada nena oychana koshshees. Ha oyshaa zaaroy, siiquwan, asho gaytotettan, laggetettan, woy naata dichiyoogan neeyyo siyettiyaaba xallan baasettidaba gidenna. Hegaappe dumma gidida ogiyan, gelanau woy ekkanau koyiya uri wotti dentti qoppana koshshiya hoolleti deꞌoosona.

¹⁴ Macho ekkana koyiya yelagay: “Kasetada ne gadiyaa ootta; kattaakka zera; hegaappe guyyiyan, ne keettaa keexxa” yaagiya baaso siraataa akeekan qoppana koshshees. (Leemiso 24:27) Ha qofay ay qonccissii? He wodiyan issi asi ‘ba keettaa keexxanau,’ woykko macho ekkidi ba son deꞌanau koyikko, ‘Taani ta macheeyyoonne geella guyyeppe yelettiya naatuyyo koshshiyaabaa kunttanaunne eta kaafanau giigettidanaa?’ yaagidi bana oychana koshshees. I kasetidi ba gadiyaa oottanau woykko ba kattaa zeranau koshshees. He baaso siraatay ha wodiyankka oottees. Ekkanau koyiya uri, hegee kaalettiyo aawatettaa kiyanau giigettana koshshees. I bau danddayettidaagaa keenaa oottana koshshees. Asatettan, siyettiyaabaaninne ayyaanaaban koshshiyaabaa ba so asaassi kunttenna uri, ammanenna asappekka aadhida iita gidiyoogaa Geeshsha Maxaafay yootees.—1 Ximootiyoosa 5:8.

¹⁵ Gelanau qofaa qachida maccaarakka hegaara issi mala hanotan, deexo gidida daro aawatettaa kiyanau maayawusu. Machiyaa ba azinaa kaafada ba soo asau koshshiyaabaa kunttiyo wode, iyyo deꞌiya qaratettaanne eeshshaa Geeshsha Maxaafay nashshees. (Leemiso 31:10-31) Aawatettaa kiyanau giigettennan deꞌiiddi ekkanau woy gelanau eesotiyaageeti, tumuppe bantta xallaa siiqiyaageeta. Eti hegaa oottiyoogan, sinttappe etassi aqo lagge gidiya urau oottiyoobaa qoppokkona. Gidikkonne, he ubbaappekka aadhidi koshshiyaabay, ekkanau woy gelanau qoppiyaageeti ayyaanaaban giigettiyoogaa.

16, 17. Ekkanau woy gelanau giigettiyaageeti wotti denttidi qoppana bessiyo Geeshsha Maxaafaa baaso siraatati awugeetee?

¹⁶ Ekkanau woy gelanau giigettiyoogee, azinaasinne macheessi Xoossay immido aawatettaa wotti dentti qoppiyoogaa gujjees. Kiristtaane keetta asau huuphe gidiyoogee woygiyoogaakko, issi aawu erana koshshees. Hegee huqqunni oyqqiyo maatadan xeelliyooba gidenna. Hegaappe, i Yesuusi ba huuphetetta maataa goꞌettido ogiyaa kaallana bessees. (Efisoona 5:23) Hegaadankka, macheessi deꞌiya boncho aawatettaa Kiristtaane machiyaa akeekana koshshees. A ba azinaa ‘higgiyau’ haarettanau eeno gaanee? (Roome 7:2) A kasekka gidin, Yihoowanne Yesuusa higgiyan deꞌausu. (Galaatiyaa 6:2) I azinaassi so giddon deꞌiya aawatettay hara higgiyaa malaatees. Polo gidenna azina aawatetta garssan deꞌiyo wode, kaafiyaaronne haarettiyaaro gidanau danddayay? He hanotay o ufayssennaba gidikko, gelennan aggana koshshees.

¹⁷ Hegaa bollikka, aqo laggeti huuphiyan huuphiyan, issoy issuwau koshshiyaabaa kunttanau giigettidaageeta gidana koshshees. (Piliphphisiyuusa 2:4) PHauloosi: “Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees” yaagidi xaafiis. PHauloosi Xoossaa ayyaanay denttettin, azinay ba machiyaa bana wozanappe bonchanaadan koyiyoogaa akeekiis. Qassi machiyaa ba azinay bana siiqanaadan koyausu.—Efisoona 5:21-33.

18. Ekkanau woy gelanau qoppidi, issoy issuwaa loytti eranau gayttiyaageeti bantta huuphiyaa naagana koshshiyoy aybissee?

¹⁸ Yaatiyo gishshau, ekkanau woy gelanau qoppidi, issoy issuwaa loytti eranau gayttiyo wodiyaa, coo kaassan aattana bessenna. He wodee, eti issoy issuwaa waati loytti oyqqana bessiyaakkonne, ekkiyoogee woy geliyoogee eratetta doorokkonne akeekiyo wode. He wodee, ba huuphiyaa naagiyoogaakka meezetiyo wode! Ekkiyo woy geliyo wode xallan bessiyo siiquwaa bessanaadan oottiya paacee keehippe wolqqamana danddayees. Hegaa mala hanotay meretan deꞌiyaaba. Gidikkonne, issoy issuwaara wozanappe siiqettiyaageeti, bantta siiqo laggiyaa ayyaanaaban qohiya aybanne oottennaadan naagettoosona. (1 Tasalonqqe 4:6) Hegaa gishshau, neeni ekkanau woy gelanau issi ura loytta eranau gayttaydda deꞌiyaaba gidikko, ne huuphiyaa naagiyoogaa meezeta. Neeni ekkin woy gelin woy aggin, he eeshshay nena ne deꞌo wode ubban goꞌꞌana danddayees.

NE AQO DEꞌOY ADUSSA WODIYAU GAMꞌꞌANAADN AY OOTTANA DANDDAYAY?

19, 20. Kiristtaaneti ekkiyoogaa woy geliyoogaa xeelliyo hanotay, ha alamiyan deꞌiya darotuugaappe ayba ogiyan dummatana koshshii? Leemisuwan yoota.

¹⁹ Ekkidaageetinne gelidaageeti bantta aqo deꞌoy adussa wodiyau gamꞌꞌanaadan koyikko, maacettido maachaa bessiya ogiyan xeellana koshshees. Tumu taarike gidenna maxaafatuuninne pilimetun, aqo deꞌoy asay amottiyoogaadan ufayssiya hanotan kuuyettees. Gidikkonne, ekkiyoogeenne geliyoogee asa deꞌuwan doomettappe attin wurssetta gidenna. Merinau deꞌnaadan Yihooway giigissidobau hegee doometta. (Doomettaabaa 2:24) Ha alamiyan asay hegaadan xeellennaagee azzanttiyaaba. Issi issi biittaa wogatun asay ekkiyoogaanne geliyoogaa “wodoruwaa yurddiyoogaadan” ootti xeellees. He leemisoy, ekkiyoogaa woy geliyoogaa asay xeelliyo erettida xeelaara moggiyaaba gidiyoogaa hegaadan xeelliya asati akeekennan aggana danddayoosona. Hegaadan hanidoy aybissee? Yurddoy minnana koshshiyaaba gidikkonne, harabay qassi, he yurddoy waayissennan qashettiyaagaanne birshshettiyaagaa gidiyo gishshataassa.

²⁰ Ha wodiyan daro asay aqo deꞌuwaa guutta wode xallau takkiyaabadan xeellees. Eti bantta koshshaa kunttiyoobadan qoppiyo gishshau, eesuwan ekkoosona woy geloosona. SHin waayissiyaabay merettiyo wode, sohuwaara shaahetti agganau danddayiyaabadan qoppoosona. Giddikkonne, Geeshsha Maxaafay ekkiyoogaanne geliyoogaa milatiya issippetettau goꞌettiyo leemisuwaa—wodoruwaa hassaya. Markkabiyan goꞌettiyo wodoroy adussa wodiyau goꞌꞌanaadan hanidi giigees. Wolqqaama beetay denddiyo wodiyankka duuxxennaagaa gididi giigees. Hegaadankka, aqo deꞌoy giigidoy adussa wodiyau gamꞌꞌanaadaana. Yesuusi: “Xoossai issippe gattidoogaa asi shaakkoppo” yaagidoogaa hassaya. (Maatiyoosa 19:6) Neeni ekkiyaaba woy geliyaaba gidikko, aqo deꞌuwau neessi hegaa mala xeelay deꞌana koshshees. Hegaa mala maachay ekkiyoogee woy geliyoogee deexxiyaaba gidanaadan oottii? CHii.

21. Azinaynne machiyaa issoy issuwaa ayba ogiyan xeellanau koshshii? Hegaadan oottanau eta maaddana danddayiyaabi aybee?

²¹ Azinaynne machiyaa issoy issuwaa bessiya ogiyan xeellanau koshshees. Issoy issuwau deꞌiya loꞌꞌo eeshshaaninne oottiyo baaxiyan xeelaa wottanau baaxetikko, aqo deꞌoy ufayssaunne woppau pultto gidees. Polo gidenna aqo laggiyaa, hegaa mala ogiyan xeelliyoogee hanana danddayennabee? Yihooway hanennabaa nuuppe mule naagenna. Yihooway nuussi deꞌiya loꞌꞌo eeshshaaninne nuuni oottiyo baaxiyan xeelaa wottiyoogee, nuussi keehippe koshshiyaaba. Yettanchay: “Abeet GODAU, neeni nu nagaraa mazggafan xaafidaakko, abeet Godau, woni ooni pirddaappe attanau danddayii?” yaagidi oychiis. (Mazamure 130:3) Azinaynne machiyaa issoy issuwaa hegaadan xeellanaunne atto gaanau koshshees.—Qolasiyaasa 3:13.

22, 23. Abrahaaminne Saara ha wodiyan deꞌiya aqo laggetuyyo waanidi loꞌꞌo leemiso gidiyoonaa?

²² Aqo deꞌoy daro wodiyau takkido peeshshan, daro ufayssaanne woppaa demissana danddayees. Geeshsha Maxaafay, Abrahaaminne Saara cimatettan deꞌido, eta aqo deꞌuwaabaa qonccissees. Eta deꞌoy metiyaabaynne paacciyaabay gakkibeennaagaa gidenna. Layttay iyyo 60 heera gidido Saara, gita katama gidida Uuran deꞌiya ba injje keettaa aggada, attida ba deꞌo layttan dunkkaaniyan deꞌiyoogee iyyo ay mala hanotakko ane qoppa. Gidikkonne, a ba azinaa huuphetetta maatau haarettaasu. A Abrahaamayyo tumuppe injjetiyaaronne maaddiyaaro gidada, i qofaa qachidobay polettanaadan bonchuwan kaafaasu. A haarettidoy qooreppe qommo gidida hanotaana gidenna. Ubba a “ba wozanan” ba azinaa ‘ta godau’ gaada xeesaasu. (Doomettaabaa 18:12; 1 PHeexiroosa 3:6) A Abrahaama wozanappe bonchaasu.

²³ Hegee, Abrahaaminne Saara hanotata ubbatoo issi mala ogiyan xeelloosona giyoogaa gidennaagee qoncce. Saara issi wode, Abrahaami ‘keehippe metootanaadan’ oottida qofaa immaasu. Gidikkonne, Abrahaami Yihoowa kaaletuwan ba machee qofaa ashkketettan siyiis. Hegee a soo asaayyo anjjuwaa kaalettiis. (Doomettaabaa 21:9-13) Ha wodiyan deꞌiya azinatinne machoti, ubba aqo deꞌuwan tamman qoodettiya layttaa takkidaageetikka, Xoossau yayyiya ha aqo laggetuppe darobaa tamaarana danddayoosona.

24. Xoossaa Yihoowa bonchissiyay ay mala aqo deꞌoo? Aybissi?

²⁴ Kiristtaane gubaaꞌiyan, daro shaꞌan qoodettiya ufayttiya aqo laggeti deꞌoosona. Eta aqo deꞌuwan, machiyaa ba azinaa wozanappe bonchausu; azinay ba machiyo siiqeesinne bonchees; qassi naaꞌꞌay issippe bantta deꞌuwan Yihoowa sheniyaa kaseyoosona. Neeni ekkanau woy gelanau qofaa qachiyaaba gidikko, ne aqo laggiyaa eratettan dooriyaagaa gida; aqo deꞌuwau loytta giigetta; qassi Xoossaa Yihoowa bonchissiya, sarotettaynne siiqoy deꞌiyo aqo deꞌuwau neeni danddayiyo ubbabaa ootta. Hegaadan oottikko, ne aqo deꞌoy neeni Xoossaa siiquwan deꞌanaadan maaddanaagee qoncce.