Ishatoo, Ayyaanaaban Zeriyoogan Dichaa Bessite!

“Ayyaanan zeriyaabaa gidikko, Ayyaanaappe merinaa de7⁠uwaa cakkana.”—GALAATIYAA 6:8.

1, 2. Maatiyoosa 9:37, 38y polettiiddi deꞌiyoy ayba ogiyaanee, hegee gubaaꞌiyan aybay koshshanaadan oottidee?

MERINAU hassayettiyaabay oosettishin beꞌiiddi deꞌeeta! Yesuus Kiristtoosi yootido oosoy aahuwaaninne eesuwan oosettiiddi deꞌees. Yesuusi: “Kattai daro; shin cakkiya asai guutta. Simmi kattaa Godai kattaa cakkanau oosanchcha yeddana mala, a woossite” yaagiis. (Maatiyoosa 9:37, 38) Xoossaa Yihooway ha woosaa awudeegaappenne aaruwan zaariiddi deꞌees. Haggaazo laytta 2009n, alame yuushuwan Yihoowa Markkatu gubaaꞌiyaa qooday 2,031 gujjidi, 105,298 gidiis. Xammaqettidaageetu qooday amakaayiyan galla galla 757!

² He dichay, gubaaꞌiyan tamaarissiyoogaaninne heemmiyoogan sintta xeera gididi oottiya, giday deꞌiyo ishati koshshanaadan oottiis. (Efisoona 4:11) Daro layttau, ba dorssata heemmanaadan Yihooway giday deꞌiyo attuma asata denttiis; ubbatookka i hegaadan oottiyoogaa ammanettoos. Mikiyaasa 5:5n deꞌiya hiraagay, wurssetta gallassatun “asaa heemmanaunne kaalettanau gidiyaanne gididi palahiya asaa” Yihooway denttanaagaa akeekissees.

3. ‘Ayyaanan zeriyoogaa’ giyoogee woygiyoogaakko qonccissa.

³ Intte xammaqettida Yihoowa Markka gidida attumaasa gidikko, gubaaꞌiyan oottiyo maataa demmanau baaxetanaadan aybi maaddana danddayii? Hegau koshshiya waannabay ‘ayyaanan zeriyoogaa.’ (Galaatiyaa 6:8) Hegaadan oottiyoogee Xoossaa ayyaanay inttena denttettanaadan oottiya ogiyan deꞌiyoogaa gujjees. ‘Asatettaa amuwan zerenna’ mala murttite. Ishaluwaa, allaxxiyoobaanne wodiyaa aattiyoobaa malabati Xoossaa oosuwan darobaa oottennaadan intte koshshaa xayssenna mala naagettite. Ubba Kiristtaaneti ‘ayyaanan zerana’ koshshees; qassi hegaadan oottiya attuma asati takkidi, gubaaꞌiyan oottiyo maatau gidaa kunttoosona. Ha wodiyan, gubaaꞌiyan oottiyaageetinne gubaaꞌe cimati keehippe koshshiyo gishshau, ha huuphe yohoy giigidoy Kiristtaane gidida attuma asaassa. Yaatiyo gishshau, ishatoo, ha huuphe yohuwaa woosan qoppanaadan inttena minttettoos.

Loꞌꞌobaa Oottanau Baaxetite

4, 5. (a) Xammaqettida attuma asay gubaaꞌiyan ayba maatau baaxetanaadan zoree imettidee? (b) Issi uri baaxetiyoy ayba ogiyaanee?

⁴ Kiristtaane gidida attuma asi baaxetennan gubaaꞌe cima gidana danddayenna. I ha ‘loꞌꞌobau’ baaxetana bessees. (1 Ximootiyoosa 3:1) Hegee ba mala Kiristtaanetussi koshshiyaabau wozanappe qoppidi oottiyoogaa gujjees. (Isiyaasa 32:1, 2 nabbaba.) Issi uri suure qofan hegau baaxetiyoogee asa haaranau amottiyoogaa bessenna. Hegaappe dumma ogiyan, i ba huuphiyaa siiqennan haratu goꞌꞌau qoppees.

⁵ Issi uri gubaaꞌiyau oottiyaagaa gidanau gidaa kunttanau amottiyoynne gubaaꞌe cima gidanau baaxetiyoy, Geeshsha Maxaafan deꞌiya gidaa kunttanau baaxetiyoogaana. (1 Ximootiyoosa 3:1-10, 12, 13; Tiitu 1:5-9) Neeni ne huuphiyaa geppida attumaagaa gidikko, nena hagaadan oycha: ‘Sabbakiyo oosuwan kumetta hanotan shaahettiyaanaa, qassi harati hegaa oottanaadan maaddiyaanaa? Tanaara goynniyaageetubaa wozanappe qoppada eta minttettiyaanaa? Taani Xoossaa Qaalaa loyttada xannaꞌiyo meezee deꞌiyo asee? Gubaaꞌiyan kaseegaappe loꞌꞌo qofaa immiyaanaa? Gubaaꞌiyaa cimati taayyo immido oosuwaa minnada oottiyaanaa?’ (2 Ximootiyoosa 4:5) Hageeti wozanappe qoppana koshshiyo oyshata.

6. Gubaaꞌiyaa aawatettau gidaa kunttanau keehippe koshshiyaabay aybee?

⁶ Gubaaꞌiyaa aawatettau gidaa kunttanaadan maaddiya harabay, Xoossay “ba Geeshsha Ayyaanan, intteyyo intte garssa asatettan intte minniyo wolqqaa” immiyoogaa. (Efisoona 3:16) Kiristtaane gubaaꞌiyan, gubaaꞌiyau oottiyaagaa woykko gubaaꞌe cima gidiyoogee issi aawatettau doorettiyoogaa giyoogaa gidenna. Ha maatay beettiyoy ayyaanaaban dicciyoogaa xallaana. Ayyaanaaban dicciyoy ayba ogiyaanee? Issi ogee, intte ubbatoo ‘ayyaanaa kaaletuwaa kaalliyoogaananne’ a ayfiyaa ayfiyoogaana. (Galaatiyaa 5:16, 22, 23) Gujo aawatettaa polanau koshshiya, ayyaanaa eeshshaa bessiyoonne dichaa bessanaadan imettida zoriyaa oosuwan peeshshiyo wode, intte “dichchai asa ubbau qonccana.”—1 Ximootiyoosa 4:15.

Nu Goꞌꞌaa Yarshshiyo Eeshshaa Koshshees

7. Haratuyyo oottiyoogee ay gujjii?

⁷ Haratussi oottiyoogee minnidi oottiyoogaa gujjees; qassi hegaadan oottanau ba goꞌꞌaa yarshshana koshshees. Gubaaꞌiyaa cimati ayyaanaaban henttancha gididi oottiyo gishshau, wudiyaa bolli gakkiya metoy eta keehippe qofissees. Henttancha gididi oottiyo aawatettay kiitettida PHauloosa ay keena qofissidaakko akeekite. I Qoronttoosan deꞌiya ba mala Kiristtaanetuyyo: “Taani intteyyo daro waayiyaaninne tuggan qassi daro afuttaara xaafidoogee, inttena azzanissanaassa gidenna; shin taani inttena ubbata ai keenaa siiqiyaakkonne intte eranaassa” yaagiis. (2 Qoronttoosa 2:4) PHauloosi ba oosuwaa wozanappe oottidoogee qoncce.

8, 9. Attuma asay haratuyyo koshshiyaabau oottidoogaa bessiya Geeshsha Maxaafaa leemisuwaa yoota.

⁸ Yihoowa ashkkaratuyyo minnidi oottiya attuma asati ubbatoo bantta goꞌꞌaa yarshshiyoogan erettoosona. Leemisuwau, Nohee ba soo asau: ‘Intte markkabiyaa ootti wurssiyo wodiyaa tau yootin, inttenaara gelana’ giis giidi qoppiyoogee bessennaba. Muusee Gibxxen deꞌiya Israaꞌeeletuyyo: ‘Taani inttenaara Zoꞌo Abbaa matan gayttana. Intte loꞌꞌo giyo ogiyaa dooridi yaa baana danddayeeta’ gibeenna. Yaasu: ‘Yarkko dirssa gimbbee kunddiyo wode tau yootite’ mule gibeenna. Isiyaasikka hara ura bessidi: ‘Hageeho! A kiitta’ gibeenna.—Isiyaasa 6:8.

⁹ Xoossaa ayyaanaa kaaletuwaa kaallida, ubbaappe aadhiya leemisoy Yesuus Kiristtoosa. Asaa naata Ashshiyaagaa gidanaadan Xoossay immido oosuwaa i ufayttidi ekkiis. (Yohaannisa 3:16) Yesuusi ba goꞌꞌaa yarshshiyoogan bessido siiqoy nuunikka hegaadan oottanaadan denttettennee? Daro wodiyau gubaaꞌe cima gididi oottida issi ishay, wudiyaa xeelliyaagan bau siyettiyaabaa hagaadan giis: “Yesuusi PHeexiroosayyo, ta dorssata heemma yaagido qaalay tana keehippe denttettiis. Siiquwan haasayiyo woykko kehatettan oottiyo guuttabay harata minttettana danddayiyoogaa daro layttau akeekaas. Wudiyaa heemmiyoogan taani keehippe ufayttays.”—Yohaannisa 21:16.

10. Kiristtaane gidida attuma asay haratuyyo oottiyoogan Yesuusa leemisuwaa kaallanaadan aybi denttettana danddayii?

¹⁰ Xoossaa wudiyaa xeelliyaagan, gubaaꞌiyan deꞌiya, bantta huuphiyaa geppida attuma asati: “Taani inttena shemppissana” yaagida Yesuusaagaadan qoppiyoogee qoncce. (Maatiyoosa 11:28) Ha loꞌꞌobaa oottanau baaxetanaadan Kiristtaane attuma asaa denttettiyay, Xoossan ammaniyoogaanne gubaaꞌiyaa siiqiyoogaa; hegee gita yarshshuwaa yarshshanaadan oottiyaaba giidi, woykko bantta abbiyaappe aadhiyaabaa hegau koshshees giidi qoppokkona. SHin issi uri hegau baaxetana koyennaba gidikko shin? Issi ishay gubaaꞌiyan oottanau koshshaa dichana danddayii?

Oottanau Koshshaa Dichite

11. Haratuyyo oottanau issi uri koshshaa waatidi dichana danddayii?

¹¹ Koyettiya gidaynne eeshshay baynnabadan qoppiyoogee neeni baaxetennaadan oottidaba gidikko, geeshsha ayyaanaa demmanau woossiyoogee bessiyaaba. (Luqaasa 11:13) Ha allaalliyaa xeelliyaagan nena qofissiya aybanne xoona kiyanaadan Yihoowa ayyaanay maaddana. Issi ishay baaxetanaadan denttettiyay, qassi boncho oosuwaa oottanau minttettiyay Yihoowa ayyaanaa gidiyo gishshau, he oosuwaa oottanau koyiyoogee Xoossaa imota. (Piliphphisiyuusa 2:13; 4:13) Yaatiyo gishshau, oottiyo maataa demmanau koshshay deꞌanaadan Yihooway maaddana mala woossiyoogee bessiyaaba.—Mazamure 25:4, 5 nabbaba.

12. Issi uri baayyo imettida aawatettaa kiyanau koshshiya aadhida eratettaa waatidi demmana danddayii?

¹² Wudiyau koshshiyaabay keehi daronne abbiyaappe aadhiyaaba giidi qoppiyoogan, issi Kiristtaanee baaxetennan agganau qofaa qachana danddayees. Woykko he aawatettaa kiyanau baassi eray paca giidi qoppana danddayees. Hegaadaana gidikko, Xoossaa Qaalaanne an baasettida xuufeta minnidi xannaꞌiyoogan aadhida eratettaa demmana danddayees. I bana, ‘Xoossaa Qaalaa xannaꞌanau wodiyaa immiyaanaa, qassi aadhida eratettaa demmanau woossiyaanaa?’ yaagidi oychana danddayees. Erissiyo ashkkaraa Yaaqoobi: “Intteppe ooninne baayyo aadhdhida eratettai xayikko, borennan ubbau kehatettan immiya Xoossaa woosso. I ayyo immana” yaagidi xaafiis. (Yaaqooba 1:5) Ayyaanaa kaaletuwan xaafettida ha qaalaa ammanay? Solomoni pirddiyo wode, loꞌꞌuwaanne iitaa shaakkidi erana mala “aadhdhida eratettaanne akeeka wozanaa” immiyoogan Xoossay i woossido woosaa zaariis. (1 Kawotu 3:7-14) Solomona hanotay dumma gidiyoogee tuma. Gidikkokka, Xoossaa dorssaa suure heemmanaadan, gubaaꞌiyan aawatettay imettido attuma asau Xoossay aadhida eratettaa immanaagaa ammanettana danddayoos.—Leemiso 2:6.

13, 14. (a) “Kiristtoosa siiqoi” PHauloosa waatidi denttettidaakko qonccissa. (b) “Kiristtoosa siiqoi” nuna waatidi denttettana koshshii?

¹³ Haratuyyo oottanau koshshaa dichanaadan maaddiya harabay, Yihoowaynne a Naꞌay nuuyyo oottido ubbabaa minttidi qoppiyoogaa. Leemisuwau, 2 Qoronttoosa 5:14, 15 (Nabbaba) qoppa. ‘Kiristtoosa siiqoy nuna godatiyoy’ ayba ogiyaanee? Xoossaa sheniyaadan Kiristtoosi nu gishshau ba shemppuwaa aatti immiyoogan bessido siiqoy keehi wolqqaama gidiyo gishshau, hegaa akeekidi nashshiyo wode, hegee nu wozanaa keehippe denttettees. Kiristtoosa siiqoy PHauloosa denttettiis. Hegee i ba huuphiyaa siiqennaadan oottiis; qassi Xoossaayyo, gubbaaꞌiyan deꞌiyaageetuyyoonne haratuyyo oottiyoogaa waanna ooso oottanaadan a maaddiis.

¹⁴ Kiristtoosi asaayyo bessido siiquwaa nuuni wotti dentti qoppiyoogee galatiyaageeta gidanaadan maaddees. Yaatiyo gishshau, deꞌuwan nu halchuwaa kaseyiyoogaaninne nu huuphiyaa ufayssanau bichaariyoogan ‘asatettaa amuwan zeriyoogee’ bessiyaaba gidennaagaa loyttidi akeekoos. Hegaappe dumma ogiyan, nuuni oottanaadan Xoossay immido oosuwaa oottanau nu hanotaa giigissoos. Nu ishatuyyo ‘haarettanaadan’ siiqoy nuna denttettees. (Galaatiyaa 5:13 nabbaba.) Bantta huuphiyaa Yihoowayyo geppida ashkkaratuyyo ashkketettan oottiya aylledan nuna xeellikko, eta bonchuwan oyqqoos. Mootiyaanne haratu bolli pirddiya Seexaanaa leemisuwaa kaallokko.—Ajjuutaa 12:10.

So Asaa Maaduwaa

15, 16. Issi attumaagee gubaaꞌiyau oottiyaagaa woykko gubaaꞌiyaa cima gidanau gidaa kunttanaadan so asay ay oottana danddayii?

¹⁵ Issi ishay machidi yelidaagaa gidikko, i gubaaꞌiyau oottiyaagaa woykko gubaaꞌiyaa cima gidanau gidaa kunttiyaakkonne kuuyanau, a soo asaara gayttida hanotaa akeekana koshshees. A soo asaa ayyaana hanotaynne eeshshay i sunttettanaadan woy sunttettennaadan oottees. Azinay woykko aaway gubaaꞌiyau oottiyaagaa woy gubaaꞌiyaa cima gidanau koyiyo wode, so asay kaafiyoogee keehi koshshiyoogaa hegee qonccissees.—1 Ximootiyoosa 3:4, 5, 12 nabbaba.

¹⁶ Kiristtaane so asay issoy issuwaara hashetiyo wode, Yihooway ufayttees. (Efisoona 3:14, 15) So asau huuphe gidiyaagee gubaaꞌiyaa aawatettaa kiyanaunne ba keettaa loytti ayssanau hanotaa yuushshi qoppiyoogaa koshshees. Hegaa gishshau, gubaaꞌiyaa cimay woykko gubaaꞌiyau oottiyaagee saaminttan saaminttan So Asaa Goynuwaa wode, ubbay goꞌettanaadan ba macheeranne ba naatuura Geeshsha Maxaafaa xannaꞌiyoogee keehippe koshshees. I ubbatoo etaara issippe haggaazuwan shaahettana koshshees. Hegaadankka, so asay so asau huuphe gidiyaagaara hashetiyoogee keehippe koshshees.

Zaarettidi Oottanau Danddayeetii?

17, 18. (a) Issi ishay guaaꞌiyan oottiyo maataappe wodhidaba gidikko, ay oottana koshshii? (b) Kase gubaaꞌe cima woykko gubaaꞌiyau oottiyaagaa gidida ishay ay mala qofaa oyqqana koshshii?

¹⁷ Neeni hagaappe kase gubaaꞌe cima woykko gubaaꞌiyau oottiyaagaa gidana danddayaasa; shin haꞌꞌi hegaadan gidennan aggana danddayaasa. Yihoowa siiqaasa; qassi i haꞌꞌikka neeyyo qoppiyoogaa ammanettana danddayaasa. (1 PHeexiroosa 5:6, 7) Neeni issi issibaa giigissana koshshiyoogee odettidee? Yaatikko, mooruwaa ammanada ekkanaunne Xoossaa maaduwan hegaa loyttanau eeno giyaagaa gida. Lanccennaadan naagetta. Aadhida erancha gida; qassi bessiyaagaadan qoppiyaagaa gidiyoogaa qonccissa. Daro layttau gubaaꞌiyaa cima gididi oottidanne guyyeppe he maataappe wodhida issi ishay hagaadan giis: “Taani gubaaꞌiyaa cima gidada oottido wodeegaadan, ubbatoo gubaaꞌe shiiquwan beettiyo, haggaaziyoonne Geeshsha Maxaafaa nabbabiyo meeziyaa kaallanau qofaa qachaas; hegee taani gakkido hoolle. Taani issi woy naaꞌꞌu layttaa giddon he maataa zaaretta demmana gaada qoppaas; shin zaarettada gubaaꞌe cima gididoy laappun layttappe guyyiyaana; he hanotaappe danddayaa tamaaraas. Hidootaa qanxxennaadaaninne baaxetiyoogaa aggennaadan imettida minttettoy he wode tana keehippe maaddiis.”

¹⁸ Ne hanotay qommoora qonccidaagaa mala gidikko, hidootaa qanxxoppa. Ne haggaazuwaanne ne soo asaa Yihooway ay keena anjjiiddi deꞌiyaakko qoppa. Ne soo asaa ayyaanaaban mintta, sahettidaageeta oycha, daafuridaageeta minttetta. Ubbaappekka aaruwan, Xoossaa sabbiyoonne Yihoowa Markka gidada Kawotettaa mishiraachuwaa awaajjiyo maataa xoqqu oottada xeella.a—Mazamure 145:1, 2; Isiyaasa 43:10-12.

Intte Hanotaa Zaarettidi Qorite

19, 20. (a) Xammaqettida attumaageeti ubbay ay oottanaadan minttettoy imettii? (b) Kaalliya huuphe yohuwan tobbanabay aybee?

¹⁹ Ha wodiyan, awudeegaappenne aaruwan gubaaꞌiyaa cimatinne gubaaꞌiyau oottiyaageeti koshshoosona. Yaatiyo gishshau, xammaqettida attumaageeti ubbay bantta hanotaa zaarettidi qoranaadaaninne banttana: ‘Taani gubaꞌiyau oottiyaagaa woykko gubaaꞌe cima gidana xayikko, gidabeennay aybissakko ta hanotaa qorana koshshii?’ giidi oychanaadan minttettoos. Ha keehippe koshshiya allaalliyaara gayttidaagan bessiya qofaa oyqqana mala Xoossaa ayyaanay inttena maaddanaadan eeno giite.

²⁰ Gubaaꞌiyan deꞌiya ubbay, bantta mala Kiristtaaneti Xoossaa ufayssiya ogiyan bantta goꞌꞌaa yarshshidi oottiyooban goꞌettees. Kehatettaanne nu goꞌꞌaa yarshshiyoogaa bessiya oosuwaa oottiyo wode, haratuyyo oottiyoogaaninne ayyaanan zeriyoogan beettiya ufayssaa cakkoos. Gidikkokka, kaalliya huuphe yohoy qonccissiyoogaadan, nuuni Xoossaa geeshsha ayyaanaa azzanttana bessenna. Hegaadan oottennaadan waani naagettana danddayiyoo?

[Tohossa qofata]

Woygada Zaaruutii?

• Mikiyaasa 5:5n deꞌiya hiraagay nuna ay akeekissii?

• Ba goꞌꞌaa yarshshiyoogee ay gujjiyaakko qonccissa.

• Issi uri haratuyyo oottiyo koshshaa waatidi dichana danddayii?

• Issi attumaagee gubaaꞌiyau oottiyaagaa woykko gubaaꞌe cima gidanau gidaa kunttanaadan so asay hashetiyoogee ay keena koshshii?

[Sinttaa 23n deꞌiya misiliyaa]

Gubaaꞌiyan oottiyo maataa demmanau baaxetiyoogaa waata bessana danddayay?