TIMIRTTE 49
Intte Soo Asay Ufayttanaadan Ay Oottana Danddayeetii?—SHaaho 1
Ekkiyaageetinne geliyaageeti bullachchaa gallassaagaadan ubba wode ufayttana giidi qoppoosona. Qassi hegaadan hanana danddayees. Aqo oyqqidi takkidanne Geeshsha Maxaafay zoriyoobaa kaallanawu baaxetida Kiristtaaneti hegee danddayettiyoogaa eroosona.
1. Geeshsha Maxaafay azinata zoriyoobay aybee?
Yihoowi azinay ba keettaa ayssanaadan aawatettaa immiis. (Efisoona 5:23 nabbaba.) Yihoowi azinay ba so asaa maaddiyaabaa kuuyanaadan koyees. Geeshsha Maxaafay azinata, “Intte maccaasata siiqite” giidi zorees. (Efisoona 5:25) Hegee azinati waatana koshshiyoogaa bessii? Siiqiya azinay, eti banttarkka deꞌiyo sohuwan gidin woy haratu sinttankka ba machcheeyyo kehees. I qohiyaabaappe O naagees, qassi O ufayssanawunne iyyo koshshiyaabaa kunttanawu baaxetees. (1 Ximootiyoosa 5:8) I ubbaappe aaruwan, A Yihoowayyo mata dabbo gidanaadan maaddees. (Maatiyoosa 4:4) Leemisuwawu, I ba machcheera woossananne Geeshsha Maxaafaa nabbabana danddayees. Issi azinay ba machchiyo siiquwan maaddiyo wode, Yihoowaara dabbotaa minttidi deꞌees.—1 PHeexiroosa 3:7 nabbaba.
2. Geeshsha Maxaafay machchota zoriyoobay aybee?
Xoossaa Qaalay issi machchiyaa ‘ba azinaa bonchchana bessiyoogaa’ yootees. (Efisoona 5:33) A ba azinaa bonchchanawu ay oottana danddayay? A baayyoonne bantta naatussi koshshiyaabaa kunttanawu ba azinay baaxetiyoogaanne awu deꞌiya loꞌꞌo eeshshata qoppana danddayawusu. A ba azinay Yihoowa Markka gidana xayikkonne, I kuuyidobay polettanaadan maaddiyoogaaninne aara gidin, haratuyyo abaa denttayddakka ufayssiyaabaa haasayiyoogan, A bonchchiyoogaa bessawusu.
3. Aqo laggeti bantta aqo deꞌoy minnanaadan ay oottana danddayiyoonaa?
Geeshsha Maxaafay azinaynne machchiyaa “naa77ai issi asa gidoosona” yaagees. (Maatiyoosa 19:5) Hegaa giyoogee eti bantta siiqoy irxxanaadan oottiya aybanne eqettana bessees giyoogaa. Yaatanawu, eti ubbatoo issippe wodiyaa aattoosonanne bantta qofaanne bantta wozanaabaa genttennan issoy issuwawu siiquwan yootoosona. Eti Yihoowappe attin, harabaa aybanne woy hara oonanne bantta aqo laggiyaappe aatti xeellokkona. Eti bantta aqo laggiyaappe hara oossinne keehi mata lagge gidennaadan naagettoosona.
LOYTTA AKEEKA
Intte aqo deꞌoy minnanaadan maaddiya ayba maarata Geeshsha Maxaafay yootiyaakko akeeka.
4. Azinawu—ne machchiyo siiqanne O wozanappe maadda
Geeshsha Maxaafay “azinai ba maccaasiyo ba bollaadan siiqanau” bessiyoogaa yootees. (Efisoona 5:28, 29) Hegee waatana koshshiyoogaa bessii? BIIDUWAA beꞌite; yaatidi kaallidi deꞌiya oyshaa tobbite.
Azinay ba machchiyo siiqiyoogaanne maaddiyoogaa bessana danddayiyo ogetuppe amaridaageeta yoota.
Qolasiyaasa 3:12 nabbabite; yaatidi ha oyshaa tobbite:
Issi azinay ba aqo deꞌuwan he eeshshata waati bessana danddayii?
5. Machchee—ne azinaa siiqanne bonchcha
Geeshsha Maxaafay machchiyaa ba azinay Yihoowawu goynnin aggin, A bonchchanaadan zorees. Koyro PHeexiroosa 3:1, 2 nabbabite; yaatidi ha oyshata tobbite:
Ne azinay Yihoowa Markka gidana xayikko, I Yihoowawu goynnanaadan neeni koyiyoogee qoncce. A maaddana danddayiya keehi loꞌꞌobay aybee? Neeni ayyo ubbatoo sabbakana koshshiiyye, woy bonchchiya, loꞌꞌonne keha machcho gidiyaakko loꞌꞌoo? Aybissi?
Kuuyiyooban azinaynne machchiyaa maayettiyoogee loꞌꞌoba. SHin, azinay kuuyidoban machchiyaa maayennan aggana danddayawusu. Yaaniyo wode, A ba qoppidobaa liiqo qaalaaninne bonchchuwan yootawusu, shin so asawu loꞌꞌobaa kuuyanawu Yihoowi ayyo aawatettaa immidoogaa akeekana bessees. I kuuyidobay polettanaadan maaddanawu, A wozanappe baaxetana koshshees. A hegaadan oottiyoogan, so asay ubbay ufayttanaadan maaddawusu. Koyro PHeexiroosa 3:3-5 nabbabite; yaatidi ha oyshaa tobbite:
Issi machchiyaa ba azinaa bonchchiyo wode Yihoowawu aybi siyettii?
6. Ne aqo deꞌuwan metiyaabaa genccada aattana danddayaasa
Wotoy baynna aqo deꞌoy baawa. Yaatiyo gishshawu, metiyaabay merettiyo wode genccanawu aqo laggeti hashetidi oottana bessees. BIIDUWAA beꞌite; yaatidi kaallidi deꞌiya oyshata tobbite.
Neeni biiduwan beꞌido azinaanne machchee siiqoy irxxidoogaa bessiyaabay aybee?
Eti bantta aqo deꞌoy minnanaadan ay oottidonaa?
Koyro Qoronttoosa 10:24nne Qolasiyaasa 3:13 nabbabite. Xiqiseta huuphiyan huuphiyan nabbabidi ha oyshaa tobbite:
Ha zoriyaadan oottiyoogee aqo deꞌoy minnanaadan waati maaddii?
Geeshsha Maxaafay nuuni issoy issuwaa bonchchanaadan yootees. Issi ura saaphoyidi woy akeekan oyqqiyoogeenne awu kehiyoogee A bonchchiyoogaa bessiyaaba. Roome 12:10 nabbabite; yaatidi ha oyshata tobbite:
Azinay woy machchiyaa ‘Ta aqo laggee tana kasetidi bonchcho’ giidi A xeellana koshshii? Aybissi?
ISSI ISSI ASAY HAGAADAN GEES: “Ta aqo laggeenne taani kaseegaa keena siiqettokko.”
Geeshsha Maxaafay eta maaddanaagaa waata qonccissuutee?
AY AKEEKADII?
Azinaynne machchiyaa issoy issuwaa siiqiyo, bonchchiyoonne Geeshsha Maxaafay yootiyo maaraadan deꞌiyo wode, ufayttana danddayoosona.
Zaaretuwaa
Aqo deꞌuwan ufayttanawu azinay ay oottana danddayii?
Aqo deꞌuwan ufayttanawu machchiyaa ay oottana danddayay?
Neeni aqo oyqqidaba gidikko, intte aqo deꞌoy minnanaadan nena maaddana danddayiya Geeshsha Maxaafaa maaray awugee?
PILGGA
So deꞌuwan ufayttanaadan nena maaddana danddayiya zoriyaa akeeka.
Ne aqo deꞌuwan Xoossay zoriyoogaadan deꞌiyoogee demissiyo anjjuwaa qonccissiya, biiduwan giigida muuziqaa beꞌa.
So asaa ayssanawu azinaassi imettida aawatettaa bonchchiyoogaa waati bessanaakko akeeka.
“Maccaasatoo, Intte Haarettana Koshshidoy Aybissee?” (Wochchiyo Keelaa, Uddufune 1, 2010)
Issi azinaynne machchiya paraman shaahettiyogaa gujjin, wolqqaama metota waati xoonidona?