Ne Laggeta Akeekan Doora

Nu mata laggeti nuuni loꞌꞌo wodiyan keehi ufayttanaadan, qassi iita wodiyan minettanaadan oottoosona. SHin Geeshsha Maxaafay ubba asay loꞌꞌo lagge gidana danddayennaagaa yootees. Yaatin loꞌꞌo laggiyaa waata doorana danddayay? Kaallidi deꞌiya oyshata qoppa.

1. Ne laggeti nena waatana danddayiyoonaa?

Nuuni intternneetiyan gidin woy etaara issisan gayttidi amarida asatuura daro wodiyaa aattikko, etaagaadan qoppoosinne etadan hanoos. Geeshsha Maxaafay, “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees” yaagees. (Leemiso 13:20) Yihoowa siiqiyaanne awu goynniya laggeti neeni awu dabbo gidada deꞌanaadaaninne loꞌꞌobaa kuuyanaadan maaddana danddayoosona. SHin nu mata laggeti A siiqana xayikko, nuna Yihoowappe haassana danddayoosona. Geeshsha Maxaafay nu laggeta akeekan dooranaadan nuna zoriyoy hegaassa! Nu laggeti Xoossaa siiqiyaageeta gidikko, issoy issuwaa kaafoos. Qassi, ‘issoy issuwaa minttettananne maaddana’ danddayoos.—1 Tasalonqqe 5:11.

2. Neeni laggiyaa dooriyo dooroy Yihoowa ufayssanee?

Yihoowi ba dabbota akeekan doorees. “Suuretuyyo i ulottees.” (Leemiso 3:32) Nuuni Yihoowa siiqenna laggeta doorikko, awu aybi siyettanee? I keehi azzanana! (Yaaqooba 4:4 nabbaba.) SHin nuuni iita asatuura laggetiyoogaa aggidi, Yihoowaaranne A siiqiyaageetuura dabbotikko, I ufayttananne nuna ba dabbo oottana.—Mazamure 15:1-4.

LOYTTA AKEEKA

3. Iita laggeta doorennaadan naagetta

Xoossaanne I kessido maaraa siiqennaageeti iita lagge. BIIDUWAA beꞌite; yaatidi kaallidi deꞌiya oyshaa tobbite.

BIIDUWAA: Iita Laggetuppe Haakkiyoogaa Tamaara (6:17)

• Nuuni akeekennan iita asatuura waani laggetana danddayiyoo?

Koyro Qoronttoosa 15:33 nabbabite; yaatidi ha oyshata tobbite:

• Neessi iita lagge gidana danddayiyay ay mala asatee? Aybissi?

Mazamure 119:63 nabbabite; yaatidi ha oyshaa tobbite:

• Neeyyo issi uri loꞌꞌo lagge gidanaakkonne aybin eruutee?

4. Nuuppe dummatiya asati nuuyyo loꞌꞌo lagge gidana danddayoosona

Geeshsha Maxaafay beni Israaꞌeelan deꞌida, Daawitanne Yonaataana giyo naaꞌꞌu asatubaa yootees. Yonaataani Daawitappe keehi gastta, qassi kawuwaa naꞌa; gidoppe attin, eti keehi loꞌꞌo lagge. Koyro Sameela 18:1 nabbabite; yaatidi ha oyshaa tobbite:

• Nuuni layttan woy haraban nunaara issi mala asatu xallaara laggetana koshshennay aybissee?

Roome 1:11, 12 nabbabite; yaatidi ha oyshaa tobbite:

• Yihoowa siiqiya laggeti issoy issuwaa waati minttettana danddayiyoonaa?

Issi yelaga ishay I qoppibeenna sohuwan laggeta waati demmidaakko ha biiduwan beꞌa. BIIDUWAA beꞌite; yaatidi kaallidi deꞌiya oyshata tobbite.

BIIDUWAA: Qoppabeennasaappe Laggeta Demma (5:06)

• Neeni ha biiduwan beꞌidoogaadan, Akili timirtte keettan laggetidoogeetubay A aawaanne aayyiyo qofissidoy aybissee?

• He laggetettaa I koyro ayssi dosidee?

• I boorasiyoogaa waati aggidee?

5. Loꞌꞌo laggeta waata demmana danddayay?

BIIDUWAA: Tumu Lagge Giyoogee Ay Mala Laggee? (4:14)

Leemiso 18:24nne 27:17 nabbabite; yaatidi ha oyshata tobbite:

• Tumu laggeti issoy issuwaa waati maaddiyoonaa?

• Neeyyo hegaa mala loꞌꞌo laggee deꞌii? Deꞌana xayikko, waata demmana danddayay?

Piliphphisiyuusa 2:4 nabbabite; yaatidi ha oyshaa tobbite:

• Loꞌꞌo lagge demmanawu, neenikka haratussi loꞌꞌo lagge gidana koshshees. Hegawu ay oottana danddayay?

AY AKEEKADII?

Nu laggeta akeekan dooriyoogee Yihoowa ufayssees, qassi nunakka maaddees.

Zaaretuwaa

• Yihoowi nuuni loꞌꞌo laggeta dooranaadan koyiyoy aybissee?

• Nuuni ay mala asatuura laggetana koshshennee?

• Neeni loꞌꞌo laggeta demmanawu ay oottana danddayay?

PILGGA

Loꞌꞌo laggeti meto wodiyan nuna waati maaddana danddayiyaakko beꞌa.

“Wurssettay Yaanaappe Kase Mino Laggetettaa Medhdha” (Wochchiyo Keelaa, Hidaare 2019)

Neeni loꞌꞌo laggeta demmanawu ay oottana danddayiyaakko qoppa.

“Loꞌꞌo Laggeta Waata Demmana Danddayiyaanaa?” (Yelagati Oychchiyo Oyshaa—Oosuwan Peꞌiya Zaaruwaa, Paydo 1, shemppo 8)

Intternneetiyan laggetiyoogaa xeelliyaagan neeni ay erana koshshii?

Soshiyal Networkiyaa Goꞌettiyo Ogiyan Akeekancha Gida (4:12)

“Aawaa siiqoy Tana Keehi Yeemoyiis” giyaagan, issi asi hara laggeta dooridoy aybissakko akeeka.

“Geeshsha Maxaafay Asay Laamettanaadan Oottees” (Wochchiyo Keelaa huuphe yohuwaa)