“De7o Maxaafan” Ne Sunttay Xaafettidee?

1. Milkkiyaasa 3:16y yootiyoogaadan, Yihooway xaafido maxaafay aybee, qassi he maxaafan xaafettidabay aybee?

YIHOOWAY daro shaꞌu layttawu issi dumma maxaafaa xaafiiddi takkiis. Ammanettida markka gidida Aabeela sunttaappe doommidi daro sunttay he maxaafan deꞌees.b (Luq. 11:50, 51) He wodeppe doommidi Yihooway he maxaafan daro asaa sunttaa xaafiis; qassi ha wodiyan miilooniyan qoodettiya asaa sunttay he maxaafan deꞌees. (Milkkiyaasa 3:16 nabbaba.) Geeshsha Maxaafan he maxaafay ‘deꞌo maxaafaa’ geetettees.—Ajj. 3:5; 17:8.

2. Deꞌo maxaafan eta sunttay xaafettidoogeeti oonee, qassi nu sunttay he maxaafan xaafettanaadan nuuni waatana koshshii?

² Yihoowa wozanappe bonchchiyaageetunne A sunttaa siiqiyaageetu sunttay ha dumma maxaafan deꞌees. Eti merinaa deꞌuwaa demmana danddayoosona. He maxaafan nu sunttay xaafettanaadan koyikko, A Naꞌaa Yesuus Kiristtoosa wozuwaa yarshshuwaa baggaara nuuni Yihoowaara dabbotaa minttana koshshees. (Yoh. 3:16, 36) Nu hidootay saluwan gidin woy saꞌan, nuuni ubbay nu sunttay he maxaafan xaafettanaadan koyoos.

3-4. (a) Deꞌo maxaafan nu sunttay haꞌꞌi xaafettikko, nuuni merinawu deꞌana danddayiyoo? Qonccissa. (b) Ha huuphe yohuwaaninne kaalliyaagan nuuni ay beꞌanee?

³ Eta sunttay ha maxaafan xaafettido ubbay merinaa deꞌuwaa demmoosona giyoogee? Kessaabaa 32:33n Yihooway Muusessi yootidobaappe ha oyshaa zaaruwaa demmana danddayoos. Yihooway hagaadan giis: “Taani ta mazggabaappe quccanaagee ta bolli nagaraa oottida asatu sunttaa.” Hegaa gishshawu, haꞌꞌi he maxaafan xaafettida sunttay qucettana danddayees. Hegee Yihooway koyro eta sunttaa qucettana danddayiya irssaasiyan xaafidoogaa mala. (Ajj 3:5) Nu sunttay qucettana danddayenna biiriyan he maxaafan xaafettidi ubbatoo deꞌanaakkonne nuuni shaakki erana koshshees.

⁴ Hagee issi issi oyshata nuuni oychchanaadan oottana danddayees. Leemisuwawu, eta sunttay he maxaafan xaafetidoogeeta xeelliyaagan Geeshsha Maxaafay woygii, qassi eta sunttay xaafettibeennaageetubaa shin woygii? He maxaafan eta sunttay xaafettido asati merinaa deꞌuwaa demmiyoy awudee? Yihoowa eranaappe kase hayqqida asatubay shin? He maxaafan eta sunttay xaafettana danddayii? Ha oyshatu zaaruwaa ha huuphe yohuwaaninne kaalliyaagan beꞌana.

HE MAXAAFAN ETA SUNTTAY XAAFETTIDOOGEETI OONEE?

5-6. (a) Piliphphisiyuusa 4:3y yootiyoogaadan, deꞌo maxaafan eta sunttay xaafetti uttidoogeeti oonee? (b) Deꞌo maxaafan xayenna hanotan eta sunttay xaafettanay awudee?

⁵ Deꞌo maxaafan eta sunttay xaafettidoogeeti oonee? Ha oyshaa zaaranawu ichchashu dumma dumma citan deꞌiya asatubaa beꞌana. Hegeetuppe amaridaageetu sunttay deꞌo maxaafan xaafettiis, qassi haratuugee xaafettibeenna.

⁶ Koyro citan deꞌiyaageeti Yesuusaara saluwan haaranawu doorettidaageeta. Deꞌo maxaafan eta sunttay haꞌꞌi xaafetti uttidee? Ee. Kiitettida PHawuloosi Piliphphisiyuusan deꞌiya, ‘banaara issippe oottiyaageetussi’ yootidoogaadan, Yesuusaara haaranawu doorettida, tiyettidaageetu sunttay deꞌo maxaafan xaafetti uttiis. (Piliphphisiyuusa 4:3 nabbaba.) SHin eta sunttay he maxaafaappe qucettenna mala eti ubbatoo ammanettidi deꞌana koshshees. Eta bolli wurssetta maatafay wodhdhi simmin, he maxaafan eta sunttay xayenna hanotan xaafettana; hagee eti hayqqanaappe kase woy gita waayee doommanaappe kase haniyaabaa.—Ajj. 7:3.

7. Hara dorssa gidida zawi baynna daro asaa sunttay deꞌo maxaafan xayenna hanotan xaafettiyo wodiyaa xeelliyaagan Ajjuutaa 7:16, 17​ppe ay akeekiyoo?

⁷ Naaꞌꞌantto citan deꞌiyaageeti hara dorssaa gidida zawi baynna daro asata. Eta sunttay deꞌo maxaafan haꞌꞌi xaafetti uttidee? Ee. Eti Armmageedoona olaappe aadhdhi simminkka deꞌo maxaafan eta sunttay xaafetti uttanee? Ee. (Ajj. 7:14) Dorssa mala gididaageeti “merinaa de7uwau” baanaagaa Yesuusi yootiis. (Maa. 25:46) Gidikkonne, Armmageedoonappe attiyaageeti sohuwaara merinaa deꞌuwaa demmokkona. Eta sunttay deꞌo maxaafan irssaasiyan xaafetti uttidoogaadan takkees. SHaꞌu Layttaa Haaruwaa wode, Yesuusi ‘eta heemmananne deꞌo haattaa pulttuwaakko kaalettana.’ Kiristtoosa kaaletuwawu azazettiyaageetunne wurssetta pirddaa wode Yihoowawu ammanettidaageeta geetettidaageetu sunttay deꞌo maxaafan xayenna hanotan xaafettana.—Ajjuutaa 7:16, 17 nabbaba.

8. Deꞌo maxaafan eta sunttay xaafettibeennaageeti oonee, qassi eta bolli aybi gakkanee?

⁸ Heezzantto citan deꞌiyaageeti Armmageedoona olan xayana deeshsha geetettidaageeta. Eta sunttay deꞌo maxaafan xaafettibeenna. Eti “merinaa qaxxayuwau” baanaagaa Yesuusi yootiis. (Maa. 25:46) PHawuloosi ayyaanay kaalettin eti “merinaa bashshan” qaxxayettanaagaa yootiis. (2 Tas. 1:9; 2 PHe. 2:9) Qassi asi deꞌido wode ubban geeshsha ayyaanaa bolli nagaraa oottidaageeti merinawu xayanappe attin merinawu deꞌokkona. Eti hayquwaappe denddennaagee qoncce. (Maa. 12:32; Mar. 3:28, 29; Ibr. 6:4-6) Haꞌꞌi qassi, saꞌan hayquwaappe denddana naaꞌꞌu citata ane beꞌoos.

HAYQUWAAPPE DENDDANAAGEETA

9. Oosuwaa 24:15y yootiyoogaadan, saꞌan hayquwaappe denddana naaꞌꞌu citati awugeetee, qassi he naaꞌꞌu citatu giddon deꞌiya dummatettay aybee?

⁹ Saꞌan merinawu deꞌanawu hidootay deꞌiyo hayquwaappe denddiya naaꞌꞌu citatubaa, hegeetikka ‘xillotubaanne’ ‘worddotubaa’ Geeshsha Maxaafay yootees. (Oosuwaa 24:15 nabbaba.) ‘Xillota’ geetettidaageeti paxa deꞌiyo wode ammanettidi Yihoowawu haggaazidaageeta. Qassi ‘worddota’ geetettidaageeti hayqqanaappe kase Yihoowawu haggaazibeennaageeta. Dariya bagga asay oottiyoobay xilloba gidenna. Naaꞌꞌu citatikka hayquwaappe denddiyo gishshawu, eta sunttay deꞌo maxaafan xaafetti uttiis gaana danddayiyoo? Ha oyshaa zaaranawu naaꞌꞌu citata ane kayan kayan beꞌoos.

10. Xilloti hayquwaappe denddanay aybissee, qassi etappe amaridaageeti demmana maatay aybee? (Saꞌan hayquwaappe denddiyaageetuura gayttidaagan ha maxeetiyan “Nabbabiyaageetu Oyshaa” giyaagaakka xeella.)

¹⁰ Oyddantta citan deꞌiyaageeti ‘xillota.’ Eti hayqqanaappe kase, deꞌo maxaafan eta sunttay xaafetti uttiis. Eti hayqqiyo wode he maxaafaappe eta sunttay qucettii? CHii, Yihooway eta haꞌꞌikka paxa deꞌiya asadan xeellees. Yihooway “merinau de7iyaageetu Xoossaa gidiyoogaappe attin, haiqqidaageetu Xoossaa gidenna.” (Luq. 20:38) Hegaa giyoogee, xilloti saꞌan hayquwaappe denddiyo wode eta sunttay xayenna hanotan xaafettibeennaba gidikkonne, deꞌo maxaafan eta sunttay xaafetti uttiis giyoogaa. (Luq. 14:14) Hayquwaappe denddiya amaridaageeti, daanna gididi “biitta ubbaa bollan” oottiyo maataa demmana.—Maz. 45:16.

11. ‘Worddota’ geetettidaageeti deꞌo maxaafan eta sunttay xaafettanaadan waatana koshshii?

¹¹ Ichchashantta citan deꞌiyaageeti ‘worddota.’ Geella, eti Yihoowa higgiyaa eribeenna gishshawu hayqqanaappe kase xillotettaa deꞌuwaa deꞌibookkona. Hegaa gishshawu eta sunttay deꞌo maxaafan xaafettibeenna. Gidikkonne, eta sunttay he maxaafan xaafettana mala, Xoossay eta hayquwaappe denttana. ‘Worddota’ geetettidaageetussi daro maadoy koshshees. Etappe amaridaageeti hayqqanaappe kase keehi iitabaa oottidosona. Yaatiyo gishshawu, eti Yihooway kessido xillotettaa maaraadan waani deꞌanaakko tamaarana koshshees. Yaatanawu, saꞌan hanno gakkanawu oosettibeenna, awudeegaappenne aadhdhiya tamaarissiyo oosuwaa Xoossaa Kawotettay kaalettana.

12. (a) Worddota geetettidaageeta tamaarissanay oonee? (b) Tamaaridobaa oosuwan peeshshennaageetu bolli gakkanabay aybee?

¹² Worddota geetettidaageeta tamaarissanay oonee? Zaway baynna daro asatanne hayquwaappe denddida xillo asata. Worddota geetettidaageeti eta sunttay deꞌo maxaafan xaafettanaadan eti Yihoowaara dabbotaa minttananne banttana awu sheedhdhana koshshees. Yesuus Kiristtoosinne tiyettidaageeti worddoti tamaaridobaa waati oosuwan peeshshiyaakko saluwan uttidi loytti xeellana. (Ajj. 20:4) Azazettanawu koyennaageeti eta layttay 100 xalla gidikkonne xayana. (Isi. 65:20) Yihoowaynne Yesuusi asaa wozanan deꞌiyaabaa erana danddayiyo gishshawu, ooratta alamiyaa ooninne mooranaadan paqqadokkona.—Isi. 11:9; 60:18; 65:25; Yoh. 2:25.

DEꞌUWAWUNNE PIRDDAWU DENDDIYAAGEETA

13-14. (a) Yohaannisa 5:29n Yesuusi yootido qofaa kase nuuni waatidi akeekidoo? (b) Yesuusi yootidobaa xeelliyaagan nuuni akeekana koshshiyaabay aybee?

¹³ Ha saꞌan hayquwaappe denddiyaageetubaakka Yesuusi yootiis. Leemisuwawu I hagaadan giis: “Duufuwan de7iyaageeti a cenggurssaa siyiyo wodee yees. Siyidi eti duufuwaappe gaxi kiyana; lo77obaa oottidaageeti de7anau denddana; qassi iitabaa oottidaageeti pirddettanau denddana.” (Yoh. 5:28, 29) Yesuusi woyganawu koyidee?

¹⁴ Yesuusi yootidobaa, hayquwaappe denddiyaageeti denddi simmidi oottana oosuwaabaa qonccissiyaaba giidi nuuni kase akeekida; hegee amaridaageeti denddidi loꞌꞌobaa oottana, harati qassi iitabaa oottana giyoogaa. SHin duufuwaappe denddanaageeti loꞌꞌobaa oottana woy iitabaa oottana giidi Yesuusi yootibeennaagaa akeeka. Hegaa Yesuusi polettiichchidabadan yootiis. I ‘loꞌꞌobaa oottidaageetubaanne iitabaa oottidaageetubaa’ yootiis. Hagee eti hayqqanaappe kase oottidobaa bessiyaaba. Hegee likke milatees. Ayssi giikko, ooratta alamiyan iitabaa oottanaadan ooyyoonne paqqadettenna. Worddo geetettidaageeti hayqqanaappe kase iitabaa oottidaageeta. Yaatiyo gishshawu ‘deꞌanawu denddiyoogaanne pirddettanawu denddiyoogaa’ xeelliyaagan Yesuusi yootidobay woygiyoogee?

15. ‘Deꞌanawu denddiyaageeti’ oonee, qassi aybissi?

¹⁵ Hayqqanaappe kase ‘loꞌꞌobaa oottida’ xilloti eta sunttay deꞌo maxaafan xaafetti uttido gishshawu, eti ‘deꞌanawu denddana.’ Hegaa giyoogee, Yohaannisa 5:29n ‘loꞌꞌobaa oottidaageeta’ geetettidaageetinne Oosuwaa 24:15n ‘xillota’ geetettidaageeti issi mala asata giyoogaa. Nuuni akeekidobay Roome 6:7n deꞌiya qofaara maayettiyaaba. Xiqisee hagaadan gees: “Issi urai haiqqiyo wode nagaraa wolqqai a haarenna.” Yaatiyo gishshawu, he xilloti hayqqiyo wode Yihooway eta nagaraa atto gees, shin eti hayqqanaappe kase ammanetti oottido ubbabaa I dogenna. (Ibr. 6:10) Hayquwaappe denddana he xilloti, eta sunttay deꞌo maxaafan xaafettidi deꞌanaadan eti ubbatoo ammanettidi deꞌana koshshiyoogee qoncce.

16. ‘Pirddettanawu denddiyoogaa’ giyoogee woygiyoogee?

¹⁶ Hayqqanaappe kase ‘iitabaa oottidaageetubaa’ shin? Eti hayqqiyo wode eta nagaray atto geetettikkonne, eti paxa deꞌiyo wode Yihoowawu haggaazibookkona. Eta sunttay deꞌo maxaafan xaafettibeenna. Yaatiyo gishshawu, iitabaa oottidaageeti Oosuwaa 24:15n ‘worddota’ geetettidaageetuura issi mala. Eti “pirddettanau denddana.”c Hegaa giyoogee, worddota geetettidaageetu hanotaa Yesuusi akeekan qorana giyoogaa. (Luq. 22:30) Amarida wodiyaappe guyyiyan eta sunttay deꞌo maxaafan xaafettana bessiyaakkonne Yesuusi erana. Worddo geetettidaageeti eti kase oottido iita oosuwaa aggidi banttana Yihoowawu sheedhdhiyo wode xallan eta sunttay deꞌo maxaafan xaafettana.

17-18. Saꞌan deꞌanawu denddanaageeti ubbay ay oottana koshshii, qassi Ajjuutaa 20:12, 13n “oosuwaadan” geetettidabay aybee?

¹⁷ Kase xillota woy worddota gidin, hayquwaappe denddanaageeti 1,000 layttaa wode dooyettana ooratta xaattaa maxaafan deꞌiya higgeta azazettana koshshees. Kiitettida Yohaannisi ajjuutan beꞌidobaa hagaadan giidi yootiis: “Haiqqidaageeti, gitatinne guuttati araataa sinttan eqqidaageeta taani be7aas. Maxaafati dooyettidosona; hara maxaafai, de7o maxaafaikka dooyettiis. Haiqqidaageeti bantta oosuwaadan, maxaafatun xaafetti uttidaagaadankka pirddettidosona.”—Ajj. 20:12, 13.

¹⁸ Hayquwaappe denddanaageeti pirddettiyoy awude oottidobaanee? Eti hayqqanaappe kase oottidobaanee? CHii! Eti hayqqiyo wode eti kase oottido nagaray atto geetettidoogaa hassaya. Ha sohuwan “bantta oosuwaadan” geetettidaagee eti kase oottidobaa gidana danddayenna. Hegee eti ooratta alamiyan tamaariyoobaa oosuwan peeshshiyoogaa bessiyaaba. Noha, Sameela, Daawitanne Daaneela mala ammanettida asatikka Yesuus Kiristtoosabaa tamaaridi wozuwan ammanana koshshees. Ha asati darobaa tamaarana koshshikko, worddo geetettidaageeti keehi darobaa tamaarana koshshiyoogee qoncce!

19. Ha keehi ufayssiyaabaa oosuwan peeshshennaageeta gakkanabay aybee?

¹⁹ Ha keehi ufayssiyaabaa oosuwan peeshshennaageeta gakkanabay aybee? Ajjuutaa 20:15y hagaadan gees: “De7o maxaafan ba sunttai xaafettibeenna asi ooninne tama abban yegettiis.” Ee, eti merinawu xayana. Yaatiyo gishshawu, nu sunttay deꞌo maxaafan xayenna hanotan xaafettidaakkonne shaakki eriyoogee keehi koshshiyaaba!

20. SHaꞌu Layttaa Haaruwaa wode oosettana keehi ufayssiya oosoy aybee? (Koyro sinttan deꞌiya misiliyaa xeella.)

²⁰ SHaꞌu Layttaa Haaruwaa wodee keehi ufayssiyaagaa gidana. He wode ha saꞌan Xoossaa asay mule ootti erenna awudeegaappenne aadhdhiya tamaarissiyo oosoy oosettana. SHin, he wodee xillotanne worddota geetettidaageetu oosuwaa qoriyo wodekka gidana. (Isi. 26:9; Oos. 17:31) He tamaarissiyo oosoy waani oosettanee? He keehi ufayssiya oosuwaabaa eranaadaaninne nashshanaadan kaalliya huuphe yohoy nuna maaddana.