Ubba Wode ‘Saluwan Deꞌiyaagaa Qoppite’

1, 2. (a) Qolasiyaasa gubaaꞌiyaa issippetettay moorettana hanidoy aybissee? (b) Qolasiyaasa gubaaꞌee issippetettaa naagidi deꞌanaadan maaddida zoree awugee?

KOYRO xeetu layttan deꞌiya Qolasiyaasa gubaaꞌiyaa issippetettay moorettana haniis! He gubaaꞌiyan deꞌiya issoti issoti Muuse Higgiyaa kaallana koshshees giidi tamaarissiyoogan shaahotettaa medhidosona. Harati qassi deꞌuwan ufayttana koshshenna yaagidi tamaarissidosona. PHawuloosi hegee bessenna iita qofaa gidiyoogaa akeekissanawu, “Kiristtoosappe gidenna timirttiyan, ha sa7aa haariya ayyaanatu timirttiyaaninne asappe yiida eratettan, qassi mela cimuwan inttena ooninne omooddenna mala naagettite” yaagiis.—Qol. 2:8.

² He wode deꞌiya ayyaanan tiyettida Kiristtaaneti ‘ha saꞌaa woga’ gididabata qoppiyaaba gidikko, Xoossaa naata gidiyo maataa koyibookkona giyoogaa. (Qol. 2:20-23) Eti Xoossaara deꞌiya boncho dabbotaa mintti naagana mala maaddanawu PHawuloosi, “Saluwan de7iyaagaa intte qoppanaappe attin, sa7an de7iyaagaa qoppoppite” yaagidi zoriis. (Qol. 3:2) Ee, Kiristtoosa ishati eta “saluwan giigidi naagiya” moorettenna laata gidida bantta hidootaa demmanawu ubba wode qoppana koshshees.—Qol. 1:4, 5.

3. (a) Ayyaanan tiyettida Kiristtaaneti ubba wode qoppiyo hidootay awugee? (b) Ha huuphe yohuwan beꞌana oyshati awugeetee?

³ Ha wodiyan deꞌiya ayyaanan tiyettida Kiristtaanetikka ubba wode saluwan deꞌiya Xoossaa Kawotettaanne Kiristtoosaara issippe “laattana” hidootaa qoppoosona. (Roo. 8:14-17) Saꞌaa laattanawu hidootiyaageeti shin? PHawuloosa zoree eta waati maaddana danddayii? ‘Hara dorssati’ “Saluwan de7iyaagaa” qoppiyoogaa ayba ogiyan bessana danddayiyoonaa? (Yoh. 10:16) Abrahaaminne Muusee meto wodiyankka saluwan deꞌiyaagaa ubba wode qoppidosona. Nuuni eta leemisuwaa waati kaallana danddayiyoo?

SALUWAN DEꞌIYAAGAA QOPPIYOOGAA GIYOOGEE WOYGIYOOGEE?

4. Hara dorssati saluwan deꞌiyaagaa waati qoppana danddayiyoonaa?

⁴ Hara dorssati saluwan deꞌanawu hidootennaba gidikkokka, etikka ubba wode saluwan deꞌiyaagaa qoppoosona. Waatidi? Bantta deꞌuwan Xoossaa Yihoowanne a Kawotettaara gayttidabaa kaseyiyoogaana. (Luq. 10:25-27) Nuuni hegaadan oottanawu Kiristtoosa leemisuwaa kaalloos. (1 PHe. 2:21) Koyro xeetu layttan deꞌiya Kiristtaaneti worddo timirttee, asaappe yiida eraynne duretanawu koyiyo qofay aakkido wodiyan deꞌidosona. Ha alamiyankka hegaa malabay kumiis. (2 Qoronttoosa 10:5 nabbaba.) Nuuni Yesuusa leemisuwaa kaallidi, Yihoowaara deꞌiya dabbotaa moorana danddayiyaabaappe naagettana koshshees.

5. Miishshaara gayttidaagan nu qofaa waati qorana danddayiyoo?

⁵ Ha alamiyan deꞌiya asay duretanawu koyiyoogaadan nuunikka qoppana koshshii? Nuuni dosiyoobay darotoo nu qofaaninne nu oottiyooban qonccees. Yesuusi, “Ne wozanai ne miishshai de7iyoosan de7ana” yaagiis. (Maa. 6:21) Nu wozanan deꞌiyaabaa akeekanawu, issi issitoo nuna qoriyoogee loꞌꞌo. Nena hagaadan oycha: ‘Miishshaara gayttidabaa qoppiyoogan ay keena wodiyaa wurssiyaanaa? Loꞌꞌo oosuwaa oyqqanawu woy injje deꞌuwaa deꞌanawu qoppiyoogan daro wodiyaa wurssiyaanaayye woy ubba wode ayyaanaabaa qoppanawu baaxetiyaanaa?’ (Maa. 6:22) Nuuni ‘saꞌan miishsha dagayanawu’ qoppiyaaba gidikko, Yihoowaara deꞌiya dabbotaa moorana danddayiyoogaa Yesuusi yootiis.—Maa. 6:19, 20, 24.

6. Asatettaa amuwaa waatidi xoonana danddayiyoo?

⁶ Nuuni nagarancha gidiyo gishshawu, darotoo balabaa qoppoos. (Roome 7:21-25 nabbaba.) Nuna Xoossaa ayyaanay maaddennaba gidiyaakko, “xumaa oosuwaa” oottana danddayoos. He oosotuppe amaridaageeti ‘yettaanne mattuwaa, shaaramuxiyoogaanne shaaramuxanawu qaaqqatiyoogaa.’ (Roo. 13:12, 13) “Sa7an de7iyaagaa” woykko nu asatettaa ufayssiyaabaa eqettanawu nuuni ubba wode saluwan deꞌiyaagaa qoppana bessees. Hegaadan oottanawu baaxetana koshshees. Kiitettida PHawuloosi “Ta bollaa yimppada haarissais” yaagidoy hegaassa. (1 Qor. 9:27) Nuunikka keehi baaxetana koshshees. Kallidi ‘Xoossaa ufayssida’ ammanettida naaꞌꞌu asatu leemisuwaa ane beꞌoos.—Ibr. 11:6.

“ABRAAMI GODAA AMMANIIS”

7, 8. (a) Abrahaaminne Saara genccido metoy aybee? (b) Abrahaami ubba wode ay qoppidee?

⁷ Abrahaami ba so asaara Kanaane biitti baana mala Yihooway azazido wode, i eeno giis. Abrahaami ammanettidi azazettido gishshawu, “Taani nena gita kawotetta oottana; qassi taani nena anjjana” yaagidi Yihooway aara maacettiis. (Doo. 12:2) SHin daro layttay aadhi simminkka, Abrahaaminne Saara naꞌa yelibookkona. Yihooway Abrahaamayyo gelido qaalaa dogidee? Hegaa bolli qassi Kanaanen duussay injjetenna. Abrahaaminne a keettaa asay Masphexoomiyan deꞌiya dure kataman, Uuran deꞌiya bantta soonne bantta dabbota aggidi biidosona. Eti Kanaane gakkanawu 1,600 kilo meetiriyaa biidi, yan dunkkaaniyan deꞌidosona, issi issitoo koshatidosonanne bonqqettidosona. (Doo. 12:5, 10; 13:18; 14:10-16) SHin eti Uuran deꞌiya injje duussaa amottidi guyye simmanawu koyibookkona!—Ibraawe 11:8-12, 15 nabbaba.

⁸ Abrahaami “sa7an de7iyaagaa” qoppiyoogaappe “GODAA ammaniis.” (Doo. 15:6) Ee, i saluwan deꞌiyaagaa qoppido gishshawu, Xoossay gelido qaalay polettanaagaa naagiis. Hegaa gishshawu, Ubbaappe Xoqqiya Xoossay Abrahaamayyo qonccidi, “Saluwaa pude xeella; neeni xoolintteta qoodanau danddayikko qooda; ne zerettaikka hagaa keena gidana” yaagidi yootido wode i ba ammanuwan anjjettiis. (Doo. 15:5) Hegee a ay keena minttettideeshsha! Abrahaami xoolinttiyan kumida saluwaa xeellido wode ubban, Yihooway a zerettaa corayanawu gelido qaalaa hassayidoogee qoncce. Xoossay keerido wodee gakkin, i giidoogaadan Abrahaami naꞌaa yeliis.—Doo. 21:1, 2.

9. Nuuni Abrahaama leemisuwaa kaalliyoogee Xoossaa oosuwaa mishshettidi oottanaadan waati minttettii?

⁹ Nuunikka Abrahaamaagaadan, Xoossay gelido qaalay polettanaagaa naagoos. (2 PHe. 3:13) Nuuni ubba wode saluwan deꞌiyaagaa qoppennaba gidikko, Xoossay gelido qaalay polettennan takkidabadan qoppidi ayyaanaabaa oosuwaa mishshettidi oottennan aggana danddayoos. Leemisuwawu, neeni hagaappe kase aqinye gidada haggaazanawu woy Yihoowayyo loyttada oottanawu ne goꞌꞌaa aggadii? Neeni hegaadan haggaazidoogee ufayssiyaaba. Haꞌꞌi shin? “Abrahaami Xoossai lo77o baasuwan hayyottidi keexxido katamaa” naagidoogaa hassaya. (Ibr. 11:10) I “Xoossaa ammaniis; Xoossai hegaa ayyo xillotettan qoodiis.”—Roo. 4:3.

MUUSEE “BEETTENNA XOOSSAA” BEꞌIIS

10. Muusee ayba ogiyan diccidee?

¹⁰ Ubba wode saluwan deꞌiyaagaa qoppida haray Muusa. I yelagatettan “Gibxxetu aadhdhida eratettaa ubbaa” tamaariis. Hegee hara asati tamaariyo timirtte mala gidenna. He wode Gibxxee alamiyan wolqqaama kawotetta; qassi Muusee kawo keettan deꞌees. Muusee he xoqqa timirttiyaa tamaarido gishshawu, i “qaalaaninne oosuwan wolqqaama asa” gididoogee garamissenna. (Oos. 7:22) Hegee i ubbabay injjetido asa gidanaadan oottana danddayiyoogaa qoppa! SHin Muusee keehi gitabaa, hegeekka Xoossay koyiyoobaa oottanawu qoppiis.

11, 12. Muusee xoqqu oottidi xeellido timirttee awugee, hegaa waati eriyoo?

¹¹ Muuse ayyiyaa Yokebeeda i naatettan deꞌishin Ibraawetu Xoossaabaa tamaarissaasu. Muusee Yihoowabaa eridobaa hara ay duretettaappekka xoqqu oottidi xeelliis. Hegaa gishshawu, i kawo keettan demmana danddayiyo duretettaanne maataa aggibayiis. (Ibraawe 11:24-27 nabbaba.) Muusee ayyaanaabaa tamaaridobaynne Yihoowa ammaniyoogee i saluwan deꞌiyaagaa qoppanaadan denttettiis.

¹² Muusee he wode keehi xoqqa timirttiyaa tamaariis; shin i hegaa Gibxxen gita giyo oosuwaa oottanawu, hayttatanawu woy duretanawu goꞌettidee? Goꞌettibeenna. I, “Gibxxe kawuwaa na7ee na7aa geetettanaagaa ixxidoogee ammanuwaana. Nagaran Muusee guutta wodiyaa ufaittanaagaappe, Xoossaa asaara waayettanaagaa dooriis.” Muusee ayyaanaabaa tamaaridobaa Yihoowa oosuwaa oottanawu goꞌettiis.

13, 14. (a) Yihooway immido oosuwawu giigettanaadan Muusa maaddidabay aybee? (b) Muuseegaadan nuuni ay oottana koshshii?

¹³ Muusee Yihoowanne A asaa keehi siiqees. Ayyo layttay 40 gidido wode, i Xoossaa asaa Gibxxe aylletettaappe kessanawu giigidabadan qoppiis. (Oos. 7:23-25) SHin Yihooway awu he aawatettaa immanaappe kase, Muuseyyo issibay paccidoogaa akeekiis. I ba huuphiyaa kawushshiyoogaa, danddayaa, ashkketettaanne ba huuphiyaa naagiyoogaa tamaarana koshshees. (Lee. 15:33) I sinttaappe bana gakkana wolqqaama metuwawu giigettanaadan maaddiyaabaa tamaarana koshshees. Muusee dorssaa heemmiiddi takkido 40 layttan ha eeshshata tamaariis.

¹⁴ Muusee tamaaridobay a maaddidee? Ee, Geeshsha Maxaafay “Muusee biittan sa7an ubban de7iya asaa ubbaappe aadhdhiya ashkke asa” gidiyoogaa yootees. (Qoo. 12:3) I ba huuphiyaa kawushshiyoogaa tamaaridoogee, dumma dumma asaanne eta wolqqaama metuwaa danddayan oyqqanaadan maaddiis. (Kes. 18:26) Nuunikka “daro waayiyaa” aadhidi Xoossay ehiyo xillotettay kumido ooratta alamiyan deꞌanawu loꞌꞌo eeshshay deꞌiyoogeeta gidana koshshees. (Ajj. 7:14) Sohuwaara yiillotoosona giyoogeeta gujjin, nuuni ubba asaara saruwan deꞌana danddayiyoo? Kiitettida PHeexiroosi ba mala Kiristtaaneta, “Asa ubbaa bonchchite. Intte ishantta siiqite” yaagido zoriyaa nuuni kaallana koshshees.—1 PHe. 2:17.

SALUWAN DEꞌIYAAGAA UBBA WODE QOPPIYOOGAA

15, 16. (a) Nuuni ubba wode suure gididabaa qoppana koshshiyoy aybissee? (b) Kiristtaaneti ubba wode loꞌꞌo eeshshay deꞌiyoogeeta gidana koshshiyoy aybissee?

¹⁵ Nuuni keehi ‘wayssiya wodiyan’ deꞌoos. (2 Xim. 3:1) Hegaa gishshawu, nuuni Xoossaara deꞌiya dabbotaa minttidi deꞌanawu suure gididdabata qoppana koshshees. (1 Tas. 5:6-9) Nu deꞌuwan heezzu ogetun hegaa waatidi bessana danddayiyaakko ane beꞌoos.

¹⁶ Nu eeshshaa: PHeexiroosi loꞌꞌo eeshshaa goꞌꞌaa yootiis. I, “Kiristtoosi yiyo gallassi intte lo77o oosuwaa eti akeekidi, Xoossaa galatana mala, intte de7uwaa eta giddon loitti naagite” yaagiis. (1 PHe. 2:12) Nuuni son, ooso sohuwan, timirtte keettan, allaxxiyoosan woy haggaazuwan gidin, ubbasan nu eeshshay Yihoowa bonchissiyaagaa gidanaadan baaxetana koshshees. Nuuni nagarancha gidiyo gishshawu balabaa oottiyoogee tuma. (Roo. 3:23) SHin nuuni ubba wode ‘ammanuwaa baaxiyaa loytti baaxetiyoogan’ nu asatettaa amuwaa xoonana danddayoos.—1 Xim. 6:12.

17. Nuuni Kiristtoos Yesuusaagaa mala qofaa waani kaallana danddayiyoo? (Ha huuphe yohuwaa doomettan deꞌiya misiliyaa xeella.)

¹⁷ Nu qofaa: Nuuni loꞌꞌo eeshshay deꞌiyoogeeta gidanaadan suure qofay deꞌiyoogeeta gidana koshshees. Kiitettida PHawuloosi, “Kiristtoos Yesuusan de7iya ha qofai qassi inttenankka de7anau bessees” yaagiis. (Pili. 2:5) Yesuusawu ay mala eeshshay deꞌii? I ba huuphiyaa kawushshiis. Ba huuphiyaa kawushshiyoogee i ba goꞌꞌaa aggidi haggaazanaadan maaddiis. I ubba wode Xoossaa Kawotettaa mishiraachuwaa asawu yootanawu qoppiis. (Mar. 1:38; 13:10) Yesuusi Xoossaa Qaalaa ba tamaarissiyoobawu waanna baaso oottidi goꞌettiis. (Yoh. 7:16; 8:28) I Geeshsha Maxaafaa mintti xannaꞌiyo gishshawu, appe tamaariis, ayyo exatiis, qassi appe qonccissiis. Nuuni nu huuphiyaa kawushshiyaageeta, mishshettidi haggaaziyaageetanne Geeshsha Maxaafaa minnidi xannaꞌiyaageeta gidiyoogan Kiristtoosaagaa mala qofay deꞌiyoogeeta gidana danddayoos.

18. Nuuni Yihoowa oosuwaa oottana danddayiyo gita ogee awugee?

¹⁸ Nuuni oottiyoobaa: Yihooway “saluwaaninne sa7an . . . de7iya ubbai Yesuusa sunttaa bonchchanau gulbbatana” mala halchiis. (Pili. 2:9-11) Yesuusi keehi bonchettidaba gidikkokka, ba Aawaa sheniyawu ba huuphiyaa kawushshidi haarettees; nuunikka hegaadan haarettana koshshees. (1 Qor. 15:28) Waanidi? ‘Asa ubbaa Yesuusa kaalliyaageeta oottanaadan’ nuuyyo imettida oosuwaa kumetta wozanaappe oottiyoogaana. (Maa. 28:19) Qassi nu shoorotanne nu ishata gujjin, “asa ubbau lo77obaa” oottanawu koyoos.—Gal. 6:10.

19. Nuuni ay oottanawu murttana koshshii?

¹⁹ Nuuni saluwan deꞌiyaagaa ubba wode qoppanaadan Yihooway hassayissiyo gishshawu a keehi galatoos! Hegaadan oottanawu “nu sinttan de7iya nuuni woxxana wottaa genccidi” woxxana bessees. (Ibr. 12:1) Nuuni ubbay nu oosuwaa “Godau oottiyoogaadan, wozanappe” oottiyaageeta gidoos; yaatikko, saluwan deꞌiya nu Aaway nuuni wozanappe oottiyoobaa anjjana.—Qol. 3:23, 24.