‘Geeshsha Ammanuwan Ne Huuphiyaa Keexxa’

1, 2. Neeni keexxaydda deꞌiyoobay aybee? Ne oosoy loꞌꞌo gidiyoogee keehippe koshshiyaaba gididoy aybissee?

NEENI minnada keexxaydda deꞌaasa. Neeni keexxiyoobay, doomettoosappe takkidaba gidikkonne, sinttanaukka keexxaydda deꞌanaba. Hanno gakkanau, he oosoy deexxiyaaba gidikkonne ufayssiyaaba. Ay gidikkokka, neeni hidootaa qanxxennaadan woykko azallennaadan murttadasa. Ayssi giikko, ne oosoy loꞌꞌo gidiyoogee woy aggiyoogee, ne deꞌuwaa, ubba ne sinttanaabaakka bochiyaaba gidiyo gishshataassa. Aybissi? Keexettaydda deꞌiyay nena gidiyo gishshataassa!

² Erissiyo ashkkaraa Yihuday, nuuni nu huuphiyaa keexxana bessiyoogaa minttidi yootiis. I Kiristtaaneta ‘Xoossaa siiquwan deꞌanaadan’ minttettido wode: “Ubbaappe aadhdhiya geeshsha ammanuwan intte huuphiyaa keexxite” yaagidi hegaa oottanaadan maaddiya waannabaakka qonccissiis. (Yihudaa 20, 21) Neeni ne ammanuwaa minttada Xoossaa siiquwan deꞌanaadan, ne huuphiyaa keexxana danddayiyo issi issi ogeti awugeetee? Neeni ubbaappe aadhiya geeshsha ammanuwan ne huuphiyaa keexxiyo heezzu ginata ane beꞌoos.

YIHOOWA GEESHSHATETTA MAARATUN AMMANUWAA MINTTIYOOGAA AGGOPPA

3-5. (a) Yihooway kessido geeshshatetta maarata nuuni ayba bala ogiyan xeellanaadan Seexaanay koyii? (b) Xoossaa geeshshatetta maarata nuuni aybidan xeellana koshshii? Hegee nuuyyo siyettiyaabaa waati bochana danddayii? Leemisuwan yoota.

³ Ubbaappe kasetidi, nu ammanuwaa Xoossaa higgiyan minttana koshshees. Neeni ha maxaafaa xannaꞌaydda, eeshshaa xeelliyaagan Yihooway kessido daro geeshshatetta maarata akeekadasa. He maarata xeelliyaagan ne qofay aybee? Yihoowa higgeta, baaso siraatatanne maarata loꞌꞌobaa diggiyaabadan, ubba huqqunniyaabadan oottada qoppanaadan Seexaanay nena balettana koyees. I beni Edenen ba halchuwaa polido wodiyaappe doommidi, balettanau he ogiyaa goꞌettiiddi takkiis. (Doomettaabaa 3:1-6) He hiillan neeni baletettuutee? Hegee daro baggi ne xeelan baasettidaba.

⁴ Leemisuwan yootanau: Issi keehi loꞌꞌiya parkkiyan neeni hemettaydda, parkkiyau issi baggaa gelennaadan teqqiya minonne adussa dirssaa beꞌadasa. Dirssaa giddon deꞌiya sohoy xeellanau keehi loꞌꞌiyaagaa. Koyro, dirssaa neeni koyidosaa beennaadan diggiya, koshshennabadan xeellana danddayaasa. Gidikkonne, neeni dirssaa giddo xeelliyo wode, yashshiya gaammoy miyoobaa koyidi neekko yiyaagaa beꞌadasa! He wode neeni he dirssay iitabaappe teqqiyaaba gidiyoogaa akeekadasa. Haꞌꞌi ne geeduwaa kaalliiddi deꞌiya, miya iita doꞌi deꞌii? Xoossaa Qaalay: “Xalahe halaqai, intte morkkee, mittiyo uraa koyidi, gudiya gaammuwaadan gudiiddi, intte lanqqiyan yuuyiyo gishshau naagettitenne beegottite” yaaidi seerees.—1 PHeexiroosa 5:8.

⁵ Seexaanay miya iita doꞌa mala. Nuuni Seexaanan oyqettanaadan Yihooway koyenna gishshau, he iitay goꞌettiyo daro ‘iita cimuwaappe’ nuna teqqanau higgiyaa immiis. (Efisoona 6:11) Hegaa gishshau, Xoossaa higgiyan wotti dentti qoppiyo wode ubban, he higgeti saluwan deꞌiya nu Aaway siiqoy denttettin immidobata gidiyoogaa akeekana koshshees. Nuuni Xoossaa higgeta hegaadan ootti xeelliyo wode, eti sarotettaunne ufayssau pultto gidoosona. Erissiyo ashkkaraa Yaaqoobi: “Ooninne ailletettaappe kessiya bali bainna higgiyaa xeellidi, aani aqiyaagee . . . ba oottiyo oosuwan anjjettana” yaagidi xaafiis.—Yaaqooba 1:25.

6. Xoossaa geeshshatetta maaratuuninne baaso siraatatun ammnuwaa minttanau aybippenne aadhiya ogee awugee? Leemisuwaa yoota.

⁶ Xoossaa azazuwaa naagiiddi deꞌiyoogee, Higgiyaa Immiyaagaa bollaaninne a higgiyaa aadhida eratettan deꞌiya ammanuwaa minttiyo aybippenne aadhida oge. Leemisuwau, ‘Kiristtoosa higgee’ i “azazidobaa ubbaa” harata tamaarissanaadan azazidoogaakka gujjees. (Galaatiyaa 6:2; Maatiyoosa 28:19, 20) Kiristtaaneti, goynuwaunne issoy issuwaa minttettanau shiiqanaadan imettida azazuwaakka wozanappe azazettoosona. (Ibraawe 10:24, 25) Xoossaa azazoy, Yihoowakko ubbatoo aggennan wozanappe woossanaadan imettida zoriyaakka gujjees. (Maatiyoosa 6:5-8; 1 Tasalonqqe 5:17) Nuuni hegaa mala azazota naagidi deꞌiyo wode, eti tumuppe siiquwan imettida kaaleto gidiyoogaa akeeki akeeki boos. He higgeta azazettiyoogee, metoy kumido ha alamiyan ay ogiyaaninne demmana danddayenna ufayssaanne woppaa demmanaadan oottees. Xoossaa higgiyau azazettiyoogan neeni ne huuphe waanada goꞌettidaakko wotta dentta qoppiyo wode, ha higgetu bolli deꞌiya ne ammanoy minnennee?

7, 8. Wodiyaappe wodiyan Xoossaa geeshshatetta maarata naagidi deꞌanau danddayennabadan hirggiyaageeta, Xoossaa Qaalay waatidi minttettii?

⁷ Issitoo issitoo, Yihoowa higgiyaa naagidi deꞌiyoogee wodiyaappe wodiyan keehippe deexxana danddayees giidi issoti issoti hirggoosona. Eti issiban he higgiyaa naagennan aggana danddayoos giidi yayyoosona. Neeyyo hegaadan siyettiyo wode ubban: “GODAI, nena Woziyaagee, Israa7eela Geeshshai hagaadan yaagees; ‘Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana. Neeni ta azazuwaa siyidabaa gidiyaakko, ne sarotettai shaafaa haattaadan goggana shin; ne xillotettaikka abbaa beetaadan hanana shin’” yaagiya qaalaa ne qofan wotta. (Isiyaasa 48:17, 18) Eqqa ekkada, ha qaalati ay keena minttettiyaakko qoppa eray?

⁸ Yihooway ha xiqisiyan, a azazettiyoogan nu huuphiyau goꞌettiyoogaa akeekissees. Nuuni hegaadan oottikko, naaꞌꞌu goꞌꞌaa demmanaagaa qaalaa geliis. Koyroy, nu sarotettay shaafaa haattaadan woppu giidaagaa, daronne qanxxennan goggiyaagaa gidees. Naaꞌꞌanttoy, nu xillotettay abbaa beetaadan hanana. Neeni abbaa doonan eqqada beetay haattaa shociyoogaa beꞌiyaaba gidikko, ubbatoo hegaadan haniiddi deꞌees gaada qoppiyoogau siree baawa. Abbaa beetay abbaa gaxaa gakkanaashin yiyo hanotay daro wodiyau deꞌiyoogaa eraasa. Ne xillotettay, giishin neeni suurebaa oottiyoogee hegaa mala gidanaagaa Yihooway yootiis. Neeni ayyo ammanettada deꞌanau baaxetido peeshsha ubban, neeni kunddanaadan i mule aggibayenna! (Mazamure 55:22) Hegaa mala keehi ufayssiya hidootay, Yihoowa bollinne a geeshshatetta maaratu bolli deꞌiya ne ammanuwaa minttennee?

“WOZANNAAMA ASA” GIDANAU SINTTAU SUGA

9, 10. (a) Wozannaamatettay Kiristtaaneti gakkana bessiyo gita hoolle gididoy aybissee? (b) Ayyaanaabaa qoppiyoogee nuuni ufayssaa demmanaadan waati maaddii?

⁹ Neeni keexxiyo oosuwau naaꞌꞌantto ginay: “Wozannaama asa timirttiyau sinttau boos” yaagiya geeshsha ayyaanay kaalettin xaafettida qaalan qoncciis. (Ibraawe 6:1) Wozannaamatettay issi Kiristtaanee gakkana bessiyo gita hoolle. Asa naꞌi gakkana danddayenna polotettaappe dumma hanotan, wozannaamatettay gakkana danddayiyo hoolle. Hegaa bollikka, Kiristtaaneti wozannaama gidi gidi biyo wode, Yihoowayyo haggaaziyoogan daro ufayssaa demmoosona. Hegaadan hanidoy aybissee?

¹⁰ Wozannaama Kiristtaanee ayyaanaaban kaymida asa. He uri issibaa Yihooway xeelliyo ogiyan xeellees. (Yohaannisa 4:23) PHauloosi: “Bantta asatettai koyiyoogaadan de7iyaageeti bantta asatettaabaa qoppoosona; shin Geeshsha Ayyaanai koyiyoogaadan de7iyaageeti Geeshsha Ayyaanaabaa qoppoosona” yaagidi xaafiis. (Roome 8:5) Asatettaabaa qoppiyoogee ba xallaa siiqanaadan, aassi qoppennaadaaninne aqobaa xallan xeelaa wottanaadan oottiyo gishshau, demissiyo ufayssi guutta. Ayyaanaabaa qoppiyoogee “ufayttiya Xoossaa” Yihoowa bolli xeelaa wottanaadan oottiyo gishshau ufayssiyaaba. (1 Ximootiyoosa 1:11, NW) Ayyaanaaban kaymida uri paacee gakkishinkka Yihoowa ufayssanau koyeesinne ufayttees. Aybissi? Paacee, Seexaanay worddancha gidiyoogaa bessanau, ammanettidaageeta gidiyoogan dichaa bessanaunne saluwan deꞌiya nu Aawaa ufayssanau injjiyaa medhees.—Leemiso 27:11; Yaaqooba 1:2, 3.

11, 12. (a) Kiristtaanetu “akeekaa abbiyaa” xeelliyaagan PHauloosi woygidee? ‘Loohissiyoogaa’ geetettida qaalaa birshshettay aybee? (b) Bollay minonne qarattidi koyidoogaadan oottiyaagaa gidanaadan ayba loohisso demmana koshshsii?

¹¹ Ayyaanaaban kaymidanne wozannaama asa gidiyoogee loohiyoogan gujji gujji biyaaba. “Mino qumay, iitaa kehaa shaakkanau bantta akeekaa abbiyaa goꞌettiyoogan loohissida wozannaama asaassa” yaagiya xiqisiyaa akeeka. (Ibraawe 5:14, NW) PHauloosi nu akeekaa abbiyaa ‘loohissiyoogaa’ yootido wode goꞌettido Giriike qaalay koyro xeetu layttan Giriike biittan bollaa minttiyo sohuwan asay darotoo goꞌettiyo qaalaa; he qaalay ‘jimnasttikiyaa oottiya uradan loohiyoogaa’ geetettanakka danddayees. Hegaa mala loohissoy ay gujjiyaakko ane haꞌꞌi qoppa.

¹² Nuuni yelettiyo wode, nu bollay loohidaagaa gidenna. Leemisuwau, issi gacino naꞌi ba qiiba tohotinne kusheti deꞌiyo ginaa shaakkenna. Yaatiyo gishshau, issi gacino naꞌay ba kushiyaa coo qaattees; ubba ba somꞌꞌuwaakka baqqees; yaatidi bizhggameesinne dagammees. Wodiyaappe wodiyan ba bollaa qoppidi qaattiyoogaa meezeyidi loohissees. Yiiray zuummees; hegaappe heemettees; hegaappe woxxees.a Jiminasttikiyaa oottiya uraabaa shin woygana danddayettii? Guppidi saꞌaa bochennan ba bollaa koyidoogan oottidi ba sohuwaappe deshennan loꞌꞌo ispporttiyaa oottiya hegaa mala asa beꞌiyo wode, a dibbay adussa wodiyau loohidoogaa neeni akeekiyoogau siree baawa. Jiminasttikiyaa oottiya uri he qaratettaa demmidoy coo gidennan, daro wodiyau loohiyoogaana. Hegaadan bollaa minttiyoogee “guuttaa go77ees” giidi Geeshsha Maxaafay yootees. Nuuni ayyaanaabaa akeekiyo abbiyaa loohissiyoogee hegaappekka aadhidi keehi goꞌꞌiyaaba!—1 Ximootiyoosa 4:8.

13. Nu akeekaa abbiyaa waatidi loohissana danddayiyoo?

¹³ Neeni ayyaanaaban kaymada, Yihoowayyo amanettidaagaa gidada deꞌanaadan ne akeekaa abbiyaa loohissanau maaddiya darobata ha maxaafan tobbida. Galla galla deꞌuwan neeni kuushshaa kuuyiyo wode, Xoossaa baaso siraatatanne higgeta woosan qoppa. Kuuyana bessiyaabay merettiyo wode ubban kaallidi deꞌiyaagaadan ne huuphiyaa oycha: ‘Ha allaalliyaara gayttida Geeshsha Maxaafaa baaso siraatati woy higgeti awugeetee? Hegeeta waatada oosuwan peeshshana danddayiyaanaa? Saluwan deꞌiya ta Aawaa ufayssana kuushshay awugee?’ (Leemiso 3:5, 6; Yaaqooba 1:5) Neeni Geeshsha Maxaafaa baaso siraataanne higgiyaa goꞌettada kuuyiyo kuushsha ubbay ne akeekaa abbiyaa gujja gujja loohissanaadan oottees. Hegaa mala loohissoy neeni tumuppe ayyaanaaban kaymida asa gidanaadaaninne hegaadan deꞌanaadan maaddees.

14. Ayyaanaaban diccanau nuussi ay mala koshshay deꞌana bessii? Nuuni naagettanau ay akeekan qoppana bessii?

¹⁴ Wozannaamatettay gakkana danddayiyooba gidishin, ayyaanaabaa dichay ubbatoo gujjiyaaba. Dichau qumi koshshees. Hegaa gishshau, PHauloosi: “Mino qumai . . . wozannaama asaassa” yaagiis. Ne ammanuwaa minttiyo waanna ogee ayyaanaaban mino qumaa ubbatoo miyoogaa. Neeni tamaaridobaa bessiyaagaadan oosuwan peeshshiyoogee aadhida eratetta. Geeshsha Maxaafay: ‘Aadhida eratettay ubbaappe aadhees’ yaagees. Yaatiyo gishshau, nu Aaway immiyo alꞌꞌo tumaassi wozanappe koshshaa dichana bessees. (Leemiso 4:5-7; 1 PHeexiroosa 2:2, 3) Eraanne Xoossaa aadhida eratettaa loyttidi eriyo gishshau, nuuni darobaa eriyoobadan siyettin haratuppe aadhiyaabaadan qoppanau hegee gaaso gidenna. Otoroy woykko hara qommo pacay nu wozanan xaphuwaa yeddidi diccenna mala nu huuphiyaa ubbatoo pilggana koshshees. PHauloosi: “Ammanuwan intte de7iyaakkonne ane inttena qoridi pirddite” yaagidi xaafiis.—2 Qoronttoosa 13:5.

15. Ayyaanaaban dichaa bessanau siiqoy koshshiyoy aybissee?

¹⁵ Keettaa keexxiyoogee wurana danddayees; shin keettay loꞌꞌo gidanaadan oottiyo oosoy ubbatoo deꞌiyaaba. Keettaa bottokoniyoogeenne giigissiyoogee koshshiyaaba; qassi hanotay laamettiyo wode kifiliyaa gujjiyoogee koshshana danddayees. Wozannaamanne ayyaanaaban kayma gididi deꞌanau nuussi koshshiyaabi aybee? Ubbaappe koyruwan siiqoy koshshees. Yihoowanne nu mala Kiristtaaneta siiqiyoogan dichaa bessana koshshees. Nuussi siiqoy xayikko, nu eraynne nuuni oottiyoobay ubbay mela; giishin coo giiriya daala mala. (1 Qorottoosa 13:1-3) Siiquwan, wozannaama Kiristtaane gidanaunne ayyaanaaban ubbatoo dichaa bessanau danddayoos.

YIHOOWAY IMMIDO HIDOOTAA BOLLI NE QOFAA WOTTA

16. Seexaanay ay mala qofaa minttettii? Yihooway hegaappe naagana danddayiyaabaa ay immidee?

¹⁶ Ne Keexxiyo oosuwaa xeelliyaagan ane issibaa gujjidi beꞌoos. Tumuppe Kiristtoosa kaalliyaagaa gidada ne huuphiyaa keexxanau, neeni qoppiyo ogiyan naagettana koshshees. Seexaanay, ha alamiyaa haariyaagee, asay hidootaa qanxxanaadan, ubbaba hanenna giidi qoppanaadan, siranaadaaninne hidoota xayanaadan oottiyoogan erettidaagaa. (Efisoona 2:2) Hegaa mala qofay, xonttay mittan keexettida keettaa qohiyoogaadan issi Kiristtaaniyaa keehippe qohiyaaba. Yihooway nuna hegaappe naagana danddayiya keehippe koshshiyaabaa, giishin hidootaa immidoogee ufayssiyaaba.

17. Xoossaa Qaalay hidootay keehippe koshshiyoogaa waatidi leemisuwan yootii?

¹⁷ Geeshsha Maxaafay nuuni Seexaanaaranne ha alamiyaara olettiyo wode nuussi koshshiya, daro qommo gidida kumetta ayyaana ola miishshatubaa yootees. Keehi koshshiya ola miishshatuppe issoy birata qophiyaa; hegeekka “ufaissan naagi uttido atotettaa.” (1 Tasalonqqe 5:8) Beni wode issi wotaaddaray birata qophiyaa wottana xayikko, olan hayqqiyoogaa erees. Darotoo he qophee oosettiyoy birataappe gididi, so baggaara cala malabay deꞌiyoogaa. He qophee, huuphiyau zambbidobay daro qohuwaa gattennan solddidi wodhanaadan oottees. Birata qophee huuphiyaa qohuwaappe naagiyoogaadan, hidootay ne qofaa naagana danddayees.

18, 19. Hidootaa minttidi oyqqiyoogan Yesuusi ayba leemiso gidiyaabaa oottidee? A leemisuwaa waati kaallana danddayiyoo?

¹⁸ Hidootaa minttidi oyqqiyoogan Yesuusi waanna leemiso. Saꞌan deꞌido deꞌuwau wurssetta qammi i gencci aattidobaa hassaya. A mata laggee miishshaayyo giidi a aattidi immiis. Haray qassi a eriyoogaakka kaddiis. Harati a aggibayidi baqatidosona. A biittaa asay a ixxidi, Rooma wotaaddaratu kushiyan barchiyaa beꞌidi hayqqanaadan bantta qaalaa xoqqu oottidi yootidosona. Nuna gakkana danddayiya meto ubbaappe, Yesuusa bolli gakkidaagee keehi deexo gidiyoogaa ooninne kashi geenna. A maaddidabay aybee? Ibraawe 12:2y: “Yesuusi yeellaa karidi, wodeppe au de7iya ufaissaa gishshau, masqqaliyaa bolli misimaariyan xishettidi haiqqanaagaa genccidi, Xoossaa kawotaa araataappe ushachcha baggaara uttiis” yaagidi zaarees. Yesuusi “wodeppe [bau] de7iya ufaissaa” tishshi oottidi xeelliis.

¹⁹ Yesuusi demmanau naagido ufayssay aybee? I gencciyoogan geeshsha gidida Yihoowa sunttay bonchettanaadan oottiyoogaa eriis. Seexaanay worddancha gidiyoogau aybippenne aadhiya naqaashaa shiishshiis. Hegaappe aadhidi Yesuusa ufayssana danddayiya hara hidooti deꞌenna! I ammanettidi oottidobau Yihooway daroban a woytanaagaakka eriis. Matan simmidi ba Aawaara issippe deꞌiyo maalaalissiya wodee a naagiyoogaa erees. Yesuusi bana gakkida meto ubbaappe deexo metoy gakkido wode, hegaa mala ufayssiya hidootaa ba qofan wottiis. Nuunikka hegaadan oottana bessees. Nuunikka sinttappe demmana ufayssay deꞌees. Yihooway ba gita sunttaa bonchissiyoogan nuunikka shaahettiyo maataa immidi nuna ubbaa bonchiis. Ubbaa Haariya Yihoowa miyyiyan eqqiyoogan, Seexaanay worddancha gidiyoogaa qonccissana danddayoos. Qassi ay metoynne paacee gakkikkokka, ubbatoo nu Aawaa siiquwan woppu giidi deꞌiyoogan hegaa qonccissana danddayoos.

20. Ne qofay loꞌꞌonne hidooti deꞌiyoogaa gidanaadan aybi maaddana danddayii?

²⁰ Yihooway baassi ammanettidi oottiyaageeta woytanau koyiyoogaa xalla gidennan, hegaa oottanau yeemottees. (Isiyaasa 30:18; Milkkiyaasa 3:10) I baassi oottiyaageetu wozanay amottiyo bessiyaabaa immiyoogan ufayttees. (Mazamure 37:4) Yaatiyo gishshau, Xoossay qaalaa gelidobay polettiyo hidootaa demmanau, ubbatoo ne xeelaa he hidootan wotta. Seexaanaa alamiyan deꞌiya hidoota qanxxissiya, kawushshiyaanne geella qofaa mule maayoppa. Ha alamiyaa qofay loddan ne qofaa bochiiddinne ne wozanan geliiddi deꞌiyoogaa akeekikko, “Xoossaa sarotettai [ne] wozanaanne [ne] qofaa” naaganaadan ubba wode Yihoowakko woossa. Xoossay immiyo he sarotettay ne wozanaanne ne qofaa naagana.—Piliphphisiyuusa 4:6, 7.

21, 22. (a) ‘Zaway baynna daro asay’ demmana maalaalissiya hidootay aybee? (b) Kiristtaanetuyyo deꞌiya hidootaappe neeni xoqqu oottada xeelliyoy awugee? Ne murttee aybee?

²¹ Neeni wotta dentta qoppana bessiyo ayba ufayssiya hidooti deꞌii! Neeni “daro waayiyaa waayidi” yaanau deꞌiya “zawai bainna daro asaa” bagga gidikko, mata wode neeni demmana deꞌuwaa qoppa. (Ajjuutaa 7:9, 14) Seexaanaynne daydanttati xayiyo wode, ha wodiyan neeni qoppana danddayenna woppaa demmaasa. Qohiya Seexaanaa sugettay baynnasan demmana deꞌoy ay mala gidanaakko nuuppe qoppana danddayiyay oonee? Hegaa mala sugettay xayin, Yesuusinne saluwan aara issippe haariya 144,000tu kaaletuwan saꞌay gannate gidanaadan oottiyo oosoy ayba ufayssiyaaba gidanee! Nuuni ubba sahoynne harggee xayin beꞌiyo, nu siiqota hayquwaappe denddin mokki ekkiyoonne nuuni deꞌanaadan Xoossay halchido deꞌuwaa deꞌiyo hidootay ay keena ufayssiyaabee! Nuuni polo gidanau laamettiiddi biyo wode, ubba gita woytoy nuna naagees. Hegeekka, Roome 8:21n, NW— “Aylletettaappe boncho kessaa kiyidi Xoossaa naata gidana” yaagiya qaalay polettiyoogaa.

²² Yihooway neeni qoppana danddayiyoogaappekka aadhiya laꞌꞌatettaa demmanaadan koyees. He laꞌꞌatettaa demmana danddayiyoy azazettiyoogaana. Neeni hachippe doommada galla galla Yihoowayyo azazettanau danddayetta keena ubban baaxetiyoogee bessiyaaba gidennee? Yaatiyo gishshau, ubbaappe aadhiya geeshsha ammanuwan ne huuphiyaa keexxiyoogaa aggoppa; yaatikko merinau Xoossaa siiquwan deꞌana danddayaasa!