“Haiqqidikka, Ba Ammanuwan Ha77i Gakkanaassi Haasayees”

AABEELI deriyaa doonan dorssaa heemmees. I dorssaa heemmiiddi he sohuwaappe haahosan deꞌiya issibaakka beꞌiyaaba milatees. Edene gannatiyaa asi gelennaadan aadhi aadhi wodhiya tama laco bisoy hegan deꞌiyoogaa i erees. A yelidaageeti kase yan deꞌoosona; shin haꞌꞌi eta gidin eta naati yaa gelana danddayokkona. Omarssa heeran Aabeeli yaakko xeelliiddi bana Medhidaagaabaa yereriyoogaa qoppite. Asay Xoossaappe haakkanaadan oottidabay zaarettidi giiganee? Aabeela hegaabay daro qofissees.

Aabeeli haꞌꞌikka haasayees. Neeni hegee hanana danddayennaba gaana danddayaasa. Ayssi giikko, Addaameyyo kaalo naꞌa gidida i hayqqoosappe daro wodee aadhiis. Qassi i hayqqidi biitta gidoosappe usuppun shaꞌu laytta heera. Geeshsha Maxaafaykka, “haiqqidaageeti aibanne erokkona” yaagees. (Eranchchaa 9:5, 10) Hegaa bolli qassi, Aabeeli haasayido issibinne Geeshsha Maxaafan xaafettibeenna. Yaatin, i nuussi ayba ogiyan haasayana danddayii?

Kiitettida PHauloosi geeshsha ayyaanay denttettin, “Aabeeli harai atto haiqqidikka, ba ammanuwan ha77i gakkanaassi haasayees” yaagiis. (Ibraawe 11:4) Ee, Aabeeli nuussi ba ammanuwan haasayees. Ammanuwaa oosuwan bessida koyro asi Aabeela. I mino ammanoy deꞌiyoogaa gidiyo gishshau, ha wodiyan nuuni kaallana bessiyo loꞌꞌo leemiso. Nuuni Aabeela ammanuwaabaa tamaaridi, a leemisuwaa kaalliyaaba gidikko, a xeelliyaagan xaafettidabay i nuussi haasayiiddi deꞌiyoogaa mala.

SHin, Aabeelanne a ammanuwaa xeelliyaagan Geeshsha Maxaafan xaafettidabi keehi guutta gidikko, abaa ay tamaarana danddayiyoo? Ane beꞌoos.

ALAMIYAN GUUTTA ASAY DEꞌIYO WODE DEꞌIIS

Aabeeli asaa taarikiyaa doomettaa heeran yelettiis. Yesuusi guyyeppe, alamee woy ‘saꞌay merettido’ wodiyaa Aabeeli deꞌido wodiyaara gatti yootiis. (Luqaasa 11:50, 51) Yesuusi yootido saꞌay woy alamee, nagaraappe wozettiya asaa naata gidiyoogee qoncce. Aabeeli alamiyan deꞌida oyddantta asa gidiyo gishshau, wozettana mala Xoossay koyido koyro asi a gidennan aggenna.a Aabeeli loꞌꞌo asa gidanaadan minttettiya asi baynna hanotan dicciis.

He wode alamiyan deꞌiya asay guutta gidikkokka, keehi azzanttiyaabay eta bolli gakkees. Aabeela aawaynne aayyiyaa, Addaameenne Hewaana keehi malanchanne tunttaara deꞌiya asa gidennan aggokkona. SHin eti eriiddi wolqqaama balaa balidosona. Eti kase merinaa deꞌuwaa hidootay deꞌiyo polo asa. SHin Xoossaa Yihoowa bolli makkalido gishshau, bantta deꞌiyo Edene Gannatiyaappe yedetettidosona. Bantta naatussi koshshiyaabaa gujjin, hara ubbabaappe bantta koshshaa kaseyiyoogan, polo deꞌuwaappenne merinaa deꞌuwaappe mela attidosona.—Doomettaabaa 2:15–3:24.

Addaameenne Hewaana gannatiyaappe yedetettidi barche duussaa deꞌidosona. SHin, bayra naꞌaa yelido wode, a sunttaa Qaayeela giidi sunttidosona; hegau birshshettay “Ayfiis” giyoogaa. He wode Hewaana, “GODAI tana maaddin, attuma na7a demmaas” yaagaasu. Issi maccaasiyaa ayfiyo ‘zerettay’ Addaamanne Hewaano balettida, iita uraa issi wode xayssanaagaa Yihooway gannattiyan kasetidi yootiis; Hewaana hegaa hassayada ba naꞌaa sunttennan aggukku. (Doomettaabaa 3:15; 4:1) Hewaana bana he hiraagan odettida maccaasiyo, Qaayeela qassi “zerettaa” gaada qoppadeeshsha?

A hegaadan qoppidaba gidikko, keehi balaasu. Qassi Addaameenne Hewaana ayyo hegaa yooti dichidaba gidikko, polo gidennaagaa bolli i ubba otorettanaadan oottidosona. Guyyeppe, Hewaana naaꞌꞌantto naꞌaa yelaasu; shin koyroogaadan qoppidaba milatenna. Eti a Aabeela giidi sunttidosona; hegau birshshettay “shemppiyo carkko” woy “hada” giyoogaa. (Doomettaabaa 4:2) Eti bantta naꞌaa hegaadan sunttidoy Qaayeela Aabeelappe xoqqu ootti xeelliyoogaa bessiyaabeeshsha? Geella hegaassa gidana danddayees.

Ha wodiyan deꞌiya yelidaageeti koyroogeetuppe darobaa tamaarana danddayoosona. Intte haasayiyoobaaninne oottiyooban intte naati otorettanaadan, gitabaa amottanaadan, qassi bantta xalla siiqanaadan ootteetiiyye? Woy eti Yihoowa siiqanaadaaninne aara dabbotanau koyanaadan tamaarisseetii? Koyro aawaynne aayyiyaa banttappe koyettiyaabaa oottibeennaagee azzanttiyaaba. Gidikkokka, eta zerettau loꞌꞌo hidootay deꞌees.

AABEELA AMMANUWAU MAADDIDABAA

Addaamee ba naaꞌꞌu naati so asau koshshiyaabaa oottanaadan loohissidi dichidaba milatees. Qaayeeli biittaa oottees; qassi Aabeeli dorssaa heemmees.

SHin Aabeeli keehi koshshiyaabaakka oottiis. Aabeela ammanoy wodiyaappe wodiyan minniis, guyyeppe PHauloosi he loꞌꞌo eeshsha xeelliyaagan xaafiis. Ane qoppa. Aabeelau loꞌꞌo leemiso gidiya asi he wode baawa. Yaatin, i Xoossaa Yihoowa ammaniyaagaa gidana danddayidoy ayba ogiyaanee? Ayyo mino ammanoy deꞌanaadan geella maaddida heezzubata beꞌa.

Yihooway medhidobata.

Yihooway biittaa qanggin, gadiyaa oottiyoogee metanaadan oottiya agunttaynne kinddiichoy mokkidoogee tuma. Gidikkokka, Aabeelantta soo asau gididi palahiya kattay he wode biittaappe mokkiyoogaa aggibeenna. Qassi kafuwaanne moliyaa gujjin meheenne doꞌay, dereti, abbati, shaafatinne ano abbati, saloy, shaaray, awa ayfee, aginaynne xoolintteti qanggettibookkona. Aabeeli xeelliyo ubbabay, ubbabaa medhida Xoossaa Yihoowa gita siiquwaa, aadhida eratettaanne loꞌꞌotettaa i akeekanaadan oottiyaaba. (Roome 1:20) I hegaa nashshiiddi wotti denttidi qoppiyoogee a ammanoy minnanaadan oottiis.

Aabeeli wodiyaa bazzidi ayyaanaabaa wotti denttidi qoppiyoogee sirissenna. Ane Aabeeli wudiyaa heemmiiddi oottiyoobaa qoppa. Dorssaa heemmiya uri daro ogiyaa bees. I he ashkke gidida meretata laaggiiddi, loꞌꞌo maatay, pulttoynne shemppi ekkiyo loꞌꞌo sohoy deꞌiyoosaa koyiiddi, deriyaa, zanggaaraanne shaafaa kanttidi bees. Xoossay medhido ubbabaappe, dorssay asi maaddanaadaaninne heemmanaadan merettidaba milatees. Aabeelikka ay asappenne aaruwan keehi aadhida eranchanne wolqqaama gidida Xoossay bana naagananne heemmana koshshiyoogaa akeekideeshsha? I ba woosan hegaa mala qofaa darotoo yootidoogeenne hegaappe denddidaagan a ammanoy minnidoogee sirissenna.

Yihooway yootidobaa.

Addaameenne Hewaana Edene gannatiyaappe eti ayssi kiyidaakko bantta naatussi yootidaba milatees. Hegaa gishshau, Aabeeli hegaara gayttida darobaa wotti denttidi qoppana danddayees.

Biittay qanggettanaagaa Yihooway yootiis. Agunttaynne kinddiichoy mokkido gishshau, Aabeeli he qaalay polettidoogaa akeekana danddayees. Hewaana abbe ixeta gidiyo wodenne yeliyo wode keehi tuggatanaagaakka Yihooway yootiis. Aabeeli ba ishatinne michoti yelettiyo wode, he qaalay polettidoogaa akeekidoogeekka qoncce. Hewaana ba azinaara deꞌanau amottanaagaanne qassi, Addaamee o haaranaagaa Yihooway kasetidi yootiis. Aabeeli hegeekka hanettishin beꞌiis. Aabeeli Yihoowa qaalay polettiyoogaa ubbaban akeekiis. Hegaa gishshau, Edenen moorettidabaa issi galla giigissiya ‘zerettay’ yaanaagaa Yihooway yootidobay polettanaagaa Aabeeli wozanappe ammaniis.—Doomettaabaa 3:15-19.

Yihoowa ashkkarata.

Aabeelau loꞌꞌo leemiso gidiya asi baawa; shin au loꞌꞌo leemiso gidiya kiitanchati he wode saꞌan deꞌoosona. Addaameenne Hewaana gannatiyaappe yedetettido wode, eta gidin eta naata gidin, he Gannatiyaa gelennaadan Yihooway diggiis. Gannatiyau efiya ogiyaa naagana mala, Yihooway kiruubeta giyo wolqqaama kiitanchatanne aadhi aadhi wodhiya tama laco bisuwaa yan wottiis.—Doomettaabaa 3:24.

Aabeeli naatettan he kiruubeta beꞌiiddi deꞌiyoogaadan qoppa. Asaagaadan ashuwaa maayida he kiitanchata Aabeeli beꞌidi, eti keehi wolqqaama gidiyoogaa akeekana danddayees. Qassi aadhi aadhi wodhiya ‘bisoykka’ keehi yashshiyaaba. Aabeeli naatettan deꞌiyo wode, he kiruubeti salettidi bantta oosuwaa aggin beꞌidee? CHiikka. He daro eranchanne wolqqaama meretati, keehi daro wodiyau qamminne gallassi bantta sohuwaappe qaaxxennan deꞌidosona. Yaatiyo gishshau, Aabeeli Yihoowayyo xillonne ammanettida ashkkarati deꞌiyoogaa akeekiis. Aabeeli bantta soo asaappe dumma hanotan he kiruubeti Yihoowayyo ammanettiyoogaanne au azazettiyoogaa akeekiis. He kiitanchati leemiso gidiyo hanotay a ammanuwaa minttidoogee erettidaagaa.

Yihooway ba medhidobaa baggaara babaa qonccissido ubbabaa, i gelido qaalaanne a ashkkaratu leemisuwaa wotti denttidi qoppido gishshau, Aabeela ammanoy keehi minniis. Nuunikka a leemisuwaappe darobaa tamaaroos. Ubba qassi yelagati, so asaa hanotay ayba gidikkokka, Xoossaa Yihoowa wozanappe ammanana danddayiyoogaa eriyoogan minettana danddayoosona. Nu yuushuwan maalaalissiya meretay, kumetta Geeshsha Maxaafaynne ammanuwan leemiso gidiya daro asay deꞌiyo gishshau, nu ammanoykka minnanaadan oottiya darobay ha wodiyan deꞌees.

AABEELA YARSHSHOY LOꞌꞌO GIDIDOY AYBISSEE?

Aabeeli Yihoowan keehi ammanido gishshau, ba ammanuwaa oosuwan bessana koyiis. SHin, issi asi saluwaa saꞌaa Medhidaagau ay immana danddayii? Xoossay asappe imota woy maado koyennaagee qoncce. Guyyeppe, Aabeeli bau deꞌiyaabaappe keehi loꞌꞌo gididabaa Yihoowayyo wozanappe koyidi immiyaaba gidikko, saluwan deꞌiya siiqiya Aaway ufayttanaagaa akeekiis.

Hegaa gishshau, Aabeeli ba wudiyaappe amarida dorssaa yarshshanau giigettiis. I ba wudiyaa giddon bayra yelettida maratuppe keehi anqqaraa dooridi, he ashuwaappe qassi keehi loꞌꞌo giidi qoppidoogaa yarshshiis. Qaayeelikka, Xoossaa ufayssanaunne a anjjuwaa demmanau koyidi, ba kattaappe yarshshuwaa shiishshiis. SHin a wozanaa koshshay Aabeelaagaa mala gidenna. Eta qofaa dummatettay eti bantta yarshshuwaa shiishshido wode erettiis.

Ha naaꞌꞌu naati yarshshiyoosaanne tamaa goꞌettidi, he wode saꞌan Yihoowayyo ammanettida ashkkara gidida kiruubeti beꞌiyoosan yarshshennan aggokkona. Yihooway hagaa beꞌiis! Geeshsha Maxaafay, “GODAI Aabeelanne a yarshshuwaa ekkiis” yaagees. (Doomettaabaa 4:4) Xoossay hegan ufayttidoogaa ayba ogiyan bessidaakko, Geeshsha Maxaafay qonccissenna. SHin i Aabeelan ufayttidoy aybissee?

I shiishshido yarshshoy ufayssideeshsha? Aabeeli paxa deꞌiyaabaa suuttaa gussiyoogan yarshshiis. Aabeeli hegaa mala yarshshoy keehi koshshiyoogaa erennan waayi aggana. Aabeeli deꞌido wodiyaappe daro xeetu layttay aadhi simmin, Xoossay ayba pacinne baynna dorssaa woy deeshshaa asay yarshshanaadan azaziis; hegee, ‘Xoossaa dorssaa’ geetettida polo Naꞌay ayba nagarinne baynna ba suuttaa gussanaagau leemiso. (Yohaannisa 1:29; Kessaabaa 12:5-7) Gidikkokka, Aabeeli ha ubbabaa kasetidi erees gaana danddayettenna.

SHin, Aabeeli bau deꞌiyaabaappe keehi loꞌꞌo gididabaa yarshshidoogaa eroos. Yihooway yarshsho xallan gidennan, Aabeelaanikka ufayttiis. Aabeeli Yihoowa siiqiyo gishshaunne a wozanappe ammaniyo gishshau yarshshiis.

Qaayeela hanotay hegaappe dumma. Yihooway, “Qaayeelanne a yarshshuwaa ekkibeenna.” (Doomettaabaa 4:5) Hegee, Qaayeela yarshshoy likke gidenna gishshataassa gidenna; guyyeppe asay kattaa yarshshuwaakka yarshshanaadan Xoossaa Higgiyan odettiis. (Wogaabaa 6:14, 15) SHin Geeshsha Maxaafay Qaayeeli “oottido oosoi iita” gidiyoogaa yootees. (1 Yohaannisa 3:12) Ha wodiyan deꞌiya daro asaagaadan, Qaayeeli coo Xoossaayyo aqidaba milatiyoogaa xallay gidees giidi qoppidoogee qoncce. I Yihoowa wozanappe ammanennaageenne siiqennaagee i oottidoban sohuwaara qoncciis.

Qaayeeli Yihooway banan ufayttibeennaagaa akeekidi, Aabeela leemisuwaappe tamaaranau koyidee? Koyibeenna. I keehi yiillotidi ba ishaa morkkiis. Yihooway Qaayeeli ba wozanan qoppiyoobaa beꞌidi, danddayan a oyqqiis. Qaayeela hanotay gita nagaran a yegganaagaa Yihooway akeekissiis; qassi ba iita qofaa i aggiyaaba gidikko Qaayeela ‘somꞌꞌoy pashkkanaagaakka’ yootiis.—Doomettaabaa 4:6, 7.

Qaayeeli Xoossay yootidobaa siyibeenna. Yaatidi, siribeenna ba kaalo ishaa banaara dembbaa ekkidi biis. Qaayeeli he dembban Aabeela shocidi wori aggiis. (Doomettaabaa 4:8) Hegaappe denddidaagan, Aabeeli ba haymaanootiyaa gaasuwan tuggatidanne hayqqida koyro asa gidiis. I hayqqidaba gidikkokka, a taarikee hanno gakkanau odettees.

Leemiso hanotan, Aabeela suuttay Xoossaa Yihooway haluwaa kiyanaadan akko waassees. Hegaa gishshau, Xoossay hanttaarabaa oottida iita Qaayeela qaxxayiyoogan bessiya pirddaa pirddiis. (Doomettaabaa 4:9-12) Qassi, Aabeela ammanuwaa xeelliyaagan xaafettidabay ha wodiyan nuussi haasayees. Aabeeli deꞌidoy issi xeeta gidiya layttau gidennan aggenna; hegee he wode deꞌida asaa layttaappe keehi guutta gidikkokka, Aabeeli ba deꞌido layttaa suure goꞌettiis. Aabeeli saluwan deꞌiya Aaway, Yihooway a siiqiyoogaanne an ufayttiyoogaa eridi hayqqiis. (Ibraawe 11:4) Yaatiyo gishshau, Yihooway a loytti hassayiyoogaanne saꞌan gannatiyan deꞌanaadan hayquwaappe a denttanaagaa ammanettana danddayoos. (Yohaannisa 5:28, 29) Neeni aara yan gayttaneeshsha? Aabeeli haasayiyoobaa siyanaunne a loꞌꞌo ammanuwaa leemisuwaa kaallanau wozanappe koyiyaaba gidikko, neeni aara gayttana danddayaasa.