Kaalli Kaalli Kiyiya, Xinaatiyaa Doomissiyo Ooratta Huuphe Yohuwaa
1. Asau immiyo Wochiyo Keelan kaalli kaalli kiyiya ooratta huuphe yohoy woygiyaagee, hegee giigidoy aybissee?
1 Ichashiya aginaappe doommidi, asau immiyo Wochiyo Keelan xinaatiyaa doomissanau maaddiya ooratta huuphe yohoy kaalli kaalli kiyees. He huuphe yohoy “Xoossaa Qaalaappe Tamaara” yaagiyaagaa. Moottan deꞌiya issi issi asay ha huuphe yohuwaa ufayttidi nabbabanaagee erettidaba gidikkokka, ha huuphe yohoti asaara tobbanau giigidaageeta.
2. Ha huuphe yohuwan kiyiyaabatuppe amaridaageeti awugeetee?
2 Kiyanabay Aybee?: Huuphe yohoynne sima huuphe yohoti haasayissiyo uraara tobbiyo wode a oychanaadan oysha meran giigidosona. Haasayissiyo uri Xoossaa Qaalaappe tamaaranaadan maaddanau waanna qofaa oyqqida xiqisetu shemppoynne paydo xallay xaafettiis. Keettaawaa a penggen haasayissiyo wode goꞌettana mala menttoti qantta. Koshshiyo wodiyan Geeshsha Maxaafay Tamaarissiyoy giya maxaafaa intte xannaꞌissanaadan maaddanau, he maxaafaa xeellanaadan huuphe yohoti ubbay shoobboosona.
3. Sooppe soo biyo wode, issi uraa penggen xinaatiyaa doomissanau ha huuphe yohuwaa waatidi goꞌettana danddayiyoo?
3 Goꞌettiyo Ogiyaa: Maxeeteta asau immiyo wode, huuphe yohuwau waanna qofaara gayttida, koshshaa denttettiya oyshaa oychana danddayeeta. Leemisuwau, Ichashe 1 maxeetee Geeshsha Maxaafaa goꞌꞌaabaa yootees. Hagaadan oychana danddayeeta: “Geeshsha Maxaafaa Xoossaa Qaaladan xeelleetiiyye coo loꞌꞌo maxaafadan xeelleetii? [Zaaruwaa immanaashin takki ga.] Hegaa xeelliyaagan issi ufayssiya qofay hagan deꞌees. Koyro oyshaa bessite; koyro menttuwaa nabbabite; yaatidi hegan deꞌiya xiqisiyaa kessidi nabbabite. Oyshaa zaarettidikka nabbabite, yaatidi keettaaway ba qofaa yootanaadan oychite. Paydoy imettido oyshata tobbanau goꞌettiyoogan, koshshiyaagaa keena qofaa tobbite. Aggidi baanaappe kase, paydoy imettido, kaallidi deꞌiya oyshaa bessidi, hegaa tobbanau simmidi baana wodiyaa keerite. Kaallidi kiyiya maxeetiyaa ehaanaashin, saaminttan saaminttan he huuphe yohuwaappe gujjidi tobbanau simmidi biite. Hara ogee keettaaway Geeshsha Maxaafaa xannaꞌanaadan shoobbiyoogaa. Yaatidi, xannaꞌissiyo ogiyaa bessanau maxeetiyan kiyiya he huuphe yohuwaa goꞌettite.
4. Zaarettidi oychiyo wode, ha huuphe yohuwaa waatidi goꞌettana danddayiyoo?
4 Maxeetiyaa darotoo ekkiya uraanne zaarettidi oychiyo harata haasayissiyo wodekka ha ooratta huuphe yohuwaa goꞌettana danddayeeta. Hagaadan gaana danddayeeta: “Wochiyo Keelan kiyiya ooratta qofay deꞌees. Hegaa waatidi goꞌettanaakko ane inttena bessays.” Hara daroti ‘tumaa suure eraa’ demmanaadan ha ooratta huuphe yohoy maaddana mala woossoos.—1 Xim. 2:4.