Haggaazuwan Kaseegaappe Qara Gidiyoogaa—Geeshsha Maxaafay Tamaarissiyoy giyo maxaafaa goꞌettidi waati xannaꞌissiyaakko bessiyoogaa

Hegee Keehi Koshshiyoy Aybissee? Nuuni asaa naxan Geeshsha Maxaafaa xannaꞌissana koyiyoogaa yootiyo wode daro asay nuuni gaana koyidobaa akeekenna. Eti amarida asaara citan Geeshsha Maxaafaa xannaꞌana koshshiyaabadan woy dabddaabbiyan tamaarana koshshiyaabadan qoppana danddayoosona. Yaatiyo gishshawu, eti nunaara Geeshsha Maxaafaa xannaꞌanaadan shoobbiyoogaappe waati xannaꞌissiyaakko bessiyoogee loꞌꞌo. Amarida daqiiqan, ubba karen eqqosan, Geeshsha Maxaafaa xannaꞌiyoogee metennaba, qassi darobaa eranawu maaddiyaaba gidiyoogaa bessana danddayaasa.

Waatana Danddayiyoo?

• Sarota simmada, sinttappe hananabay a qofissiyaakkonne oycha.

• Hegee daro asaa qofissiyaaba gidiyoogaa yootada, Geeshsha Maxaafay Tamaarissiyoy giyo maxaafaa kesuwaa bessa. Geeshsha Maxaafay sinttanaabaanne harabaa xeelliyaagan yootiyo, akeekanawu metenna qofay ha maxaafan deꞌiyoogaa qonccissada, i hegan deꞌiya qofaappe erana koyiyoy awugaakkonne oycha.

• Ayyo he maxaafaa immada, i doorido huuphe yohuwaa bessa. He huuphe yohuwaa doomettan deꞌiya oyshatu zaaroy menttotun deꞌiyoogaa yoota.

• Keettaaway nabbabanawu dosiyaaba gidikko, koyro menttuwaa nabbabanaadan yoota. Yootada he menttuwaa oyshaa oycha; yaatidi zaaruwaa issippe tobbite. Zaaruwawu maaddiya, menttuwan qonccida xiqiseta nabbabidi tobbite. Zaaruwaa ne maxaafan waata malaatidaakko a bessa.

• Kaallidi deꞌiya menttuwaakka hegaadan tobbite; shin ha menttuwaa oyshaa keettaaway zaaranaadan ootta.

• A galata, qassi he huuphe yohuwan deꞌiya harabaa tobbanawu awude zaarettidi gayttana wodiyaa keera.

• Hanotay injjetiyaaba gidikko, jw.org sayttiyan deꞌiya Geeshsha Maxaafaa Waati Xannaꞌiyoo? giyo biiduwaa bessa.

Ha Aginan Hagaa Oottanawu Mala:

• Geeshsha Maxaafaa xinaatiyaa doomissanawu neeni baaxetiyo baaxiyaa Yihooway anjjanaadan woossa.—Pili. 2:13.

• Haggaaziyo wode, Geeshsha Maxaafay Tamaarissiyoy giyo maxaafaa woy Geeshsha Maxaafaa Waati Xannaꞌiyoo? giyo biiduwaa goꞌettada baa giishin issi uraa xinaatiyaa doomissanawu mala.