XINAATE 10

Cenggurssaa Laamerettiyoogaa

Maatiyoosa 10:27

TAMAARANABAA: Cenggurssaa xoqqu ziqqi, ordde leeꞌe oottiyoogan, qassi eesuwaaninne leddan haasayiyoogan qofaa qoncce oottada denttettiya ogiyan yoota.

WAATANA DANDDAYAY?

Cenggurssaa xoqqu ziqqi ootta. Ayfe qofaa qonccissanawunne ezggiyaageeta denttettanawu ne cengurssaa xoqqu ootta. Geeshsha Maxaafan qonccida pirddaa kiitaa nabbabiyo wodekka hegaadan ootta. Ezggiyaageeti yeemuwan naaganaadan oottanawu woy yashshiyaabaa woy hirggissiyaabaa yootanawu cenggurssaa ziqqa ootta.

Ezggiyaageeti eta seeriyoobadan xeellenna mala ne cenggurssaa sohuwaara sohuwaara xoqqu oottoppa. Asay diraamaa oottiya asadan nena xeellanaadan oottoppa.
Cenggurssaa orddenne leeꞌe ootta. Ne qaalan haniyaaba gidikko, ayyaanan mishettiyo wode, qassi yesuwaa, haahuwan woy matan deꞌiyaabaa qonccissanawu leeꞌe cenggurssan haasaya. Azzanuwaa woy hirggaa qonccissanawu ordde cenggurssan haasaya.
Ellellada woy leddi gaada haasaya. Ufayssiyaabaa ellellada haasaya. Keehi koshshiyaabaa leddi gaada yoota.

Ezggiya asay dagammenna mala, eti akeekennan ellellada woy leddan haasayoppa. Asay akeekanawu metootennaadan keehi eesotada haasayoppa.