Ashkketettaa—Ashkketettay Nuussi Loꞌꞌo Gidiyoy Aybissee?

Saaroa giyo michchiyaa hagaadan gaasu: “Taani dungguuxa asa, qassi tanan loyttada ammanettikke. Yaatiyo gishshawu, banan ammanettiyoonne wolqqanttiyo eeshshay deꞌiyo asaara taani gayttiyo wode ufayttikke. SHin ashkkenne bana ziqqi oottiya uraara gayttiyo wode taani ufayttays. Hegaa mala urawu taayyo siyettiyaabaa yootananne ta metuwaabaa haasayana danddayays. Taassi mata laggeti ashkkenne banttana ziqqi oottiyaageeta.”

Nuuni ashkke gidikko, hara asay nuuyyo lagge gidanawu koyiyoogaa Saara yootidobay bessees. Ashkke gidiyoogee Yihoowakka ufayssees. A Qaalay nuna hagaadan zorees: ‘Ashkketettaa maayite.’ (Qol. 3:12) Ashkketettay aybee? Ashkketettaa Yesuusi waati bessidee? Qassi nuuni nu deꞌuwan ufayttanaadan ha eeshshay waati maaddana danddayii?

ASHKKETETTAY AYBEE?

Ashkketettay woppu gaanaadan oottiya eeshsha. Ashkke uri haratussi qarettidi eta kehatettan oyqqees, qassi hanqqettanaadan oottiyaabay merettiyo wode woppu gees.

Ashkke asaa harati shugo gi qoppoosona, shin hegee tuma gidenna. “Ashkketettaa” geetettida Giriiketto qaalay loohida paraa qonccissanawu goꞌettiyo qaala. Paray mino gidikkonne, A wolqqaa maara goꞌettanawu loohana koshshees. Hegaadan, nuuni ashkke gidiyo wode, iitabaa oottennaadan naagettoos, qassi haratuura sarotettan deꞌoos.

‘Taani ashkke gidikke’ giidi nuuni qoppennan waayi aggana. Daro asay hanqqettiyo gishshawunne danddayanchcha gidenna gishshawu, ashkke gidiyoogee nuussi keehi metiyaaba gidana danddayees. (Roo. 7:19) Hegaa gishshawu, ashkke gididi deꞌanawu baaxetana koshshees; yaanikko nuuni ashkke gidanawu ubbatoo baaxetanaadan Yihoowa geeshsha ayyaanay nuna maaddana. (Gal. 5:22, 23) Nuuni ashkke gididi deꞌanawu baaxetana koshshiyoy aybissee?

Ashkketettay asay nuukko shiiqanaadan oottiya eeshsha. Qommoora ibaa denttido Saara, nuuni ashkke uraara laggetiyoogan ufayttiyoogaa akeekaasu. Ashkkenne keha asa gidiyoogan Yesuusi loꞌꞌo leemiso. (2 Qor. 10:1) A mule erenna naatikka akko shiiqanawu koyidosona.—Mar. 10:13-16.

Nuuni ashkke gidiyoogee nuuyyookka nunaara deꞌiya haratuyyookka loꞌꞌo. Nuuni ashkke gidikko, elle yiillotokko woy hanqqettokko. (Lee. 16:32) Nuuni siiqiyo asaa gujjin, harata qohokko, yaatiyo gishshawu nuna mooranchchadan xeellokko. Nu oottiyoobaynne nu eeshshay harata qohennaadan nuuni naagettiyo gishshawu eti goꞌettoosona.

ASHKKE GIDIYOOGAN WOTTIYOOBI BAYNNA LEEMISUWAA

Yesuusawu gita aawatettaynne daro oosoy deꞌikkonne, I ubba asawu ashkke. A wode deꞌiya daroti toohoy deexxin baaxetiyo gishshawu, etawu shemppuwaa koshshiis. Yesuusi eta ‘taakko haa yiite; taani ashkkenne wozanappe kawuyyiyaagaa’ yaagidoogee eta keehi minttettennan waayi aggana!—Maa. 11:28, 29.

Nuuni Yesuusaagaadan ashkke gidiyoogaa waati tamaarana danddayiyoo? Yesuusi asaa oyqqido ogiyaanne metiya hanotati gayttiyo wode I ay oottidaakko eranawu Xoossaa Qaalaa xannaꞌiyoogaana. Yaatikko, nu ashkketettay paacettanaadan oottiya hanotati nuna gakkiyo wode, Yesuusaagaadan oottanawu baaxetoos. (1 PHe. 2:21) Yesuusi ashkke gidanaadan maaddida heezzubata beꞌa.

Yesuusi bana wozanappe ziqqi oottiya asa. Yesuusi I “ashkkenne wozanappe kauyyiyaagaa” gidiyoogaa yootiis. (Maa. 11:29) Ashkketettay bana ziqqi oottiyoogaara gayttida eeshsha gidiyo gishshawu, he naaꞌꞌu eeshshata Geeshsha Maxaafay issippe qonccissees.—Efi. 4:1-3.

Nu huuphiyaa ziqqi oottiyoogee nuuni elle yiillotennaadan woy hara asi nubaa haasayidoban elle qohettennaadan naagettana mala maaddees. Yesuusi asay A “yoraanne woine eessaa uyiyaagaa” giidi borido wode waatidee? Hegee tuma gidennaagaa I ba deꞌuwan bessiis. I bana ziqqi oottiyaagaa gidiyo gishshawu, “aadhdhida eratettai ba oosuwan tuma gididi beettees” giidi ashkketettan yootiis.—Maa. 11:19.

Issi uri ne zariyaa, ne mattumaa, woy ne kase hanotaa xeelliyaagan yuushshi qoppennan haasayikko, ashkketettan zaaranawu ne baaxetiyoogee bessiyaaba. Tohossa Afirkkan deꞌiya gubaaꞌe cima gidida Piteri hagaadan giis: “Taani issi uri haasayidoban yiillotiyo wode, ‘Yesuusa gidiyaakko waatanee?’ gaada tana oychchays. Qassi taani tabaa bessiyaagaappe aattada qoppana bessennaagaa akeekaas.”

Asay nagaranchcha gidiyoogaa Yesuusi erees. Yesuusi erissiyo ashkkarati likkebaa oottanawu koyikkonne, eti nagaranchcha gidiyo gishshawu, hegaadan ubbatoo oottibookkona. Leemisuwawu, Yesuusi hayqqanaappe kase qammi, PHeexiroosi, Yaaqoobinne Yohaannisi xiskkennan takkanaadan I yootidoogaa eti naagibookkona. Eti xiskkido wode Yesuusi “ayyaanai giigi uttiis; shin ashoi daafuranchcha” giidoogee eti xiskkido gaasuwaa I akeekidoogaa bessees. (Maa. 26:40, 41) Eti nagaranchcha gidiyoogaa Yesuusi eriyo gishshawu, I ba kiittidoogeeta hanqqettibeenna.

Mandi giyo issi michchiyaa harata kase keehi borawusu, shin A ashkke gidiyoogan Yesuusa leemisuwaa kaallanawu haꞌꞌi keehi baaxetawusu. A hagaadan gaasu: “Taani ubba asay nagaranchcha gidiyoogaa hassayanawunne Yihoowagaadan asaa loꞌꞌo eeshshan xeelaa wottanawu baaxetays.” Yesuusi asay daafuranchcha gidiyoogaa akeekidi etawu qarettidoogee neeni harata ashkketettan oyqqanaadan maaddana danddayiyoogee tuma.

Yesuusi Xoossan ammanettiis. Yesuusi saꞌan deꞌiyo wode, naaquwaa gencciis. Harati abaa bala ogiyan akeekidosona, A karidosona, qassi barchchiya bessidosona. Gidikkonne, I “xillo pirddiya Xoossaayyo bana aattidi” immido gishshawu ashkke gididi deꞌiis. (1 PHe. 2:23) Yesuusi saluwan deꞌiya ba Aaway genccanaadan bana maaddanaagaanne iita ogiyan A oyqqidaageeta bessiya wodiyan qaxxayanaagaa erees.

Nuna asi bessenna ogiyan oyqqin nuuni hanqqettidi zaarikko, nu hanotay yaa iitanaadan oottana danddayoos. Hegaa gishshawu, Geeshsha Maxaafay hagaadan gees: “Asa hanqqoi Xoossai koyiyo xillotettaa eheenna.” (Yaaq. 1:20) Nuna hanqqetissidabay deꞌikkonne, nuuni nagaranchcha gidiyo gishshawu bessenna ogiyan hanqqettana danddayoos.

Jarmanen deꞌiya Kaati giyo michchiyaa, ‘Issi uri bana naagana xayikko, hara asi A naagenna’ gaada kase qoppawusu. SHin A Yihoowan ammanettiyoogaa tamaarido wode, I qofay laamettiis. A hagaadan gaasu: “Haꞌꞌi taani tana naaganawu ubbatoo giiga uttana koshshenna. Yihooway saꞌan deꞌiya iitaba ubbaa giigissanaagaa taani eriyo gishshawu ashkketettan zaarays.” Neeni naaqettidaba gidikko, Xoossan ammanettiyoogan Yesuusa leemisuwaa kaalliyoogee neeni ashkke gidada deꞌanaadan maaddana.

‘ASHKKETI UFAYTTOOSONA’

Nuuni ufayttanawu koyikko, ashkke gidana bessiyoogaa Yesuusi yootiis. “Ashkketi anjjettidaageeta [woy ufayttiyaageeta]” gidiyoogaa I yootiis. (Maa. 5:5) Kaallidi deꞌiya hanotatun ashkketettay waati maaddiyaakko akeeka.

Aqo deꞌuwan unꞌꞌissiyaabay merettiyo wode, hegaa giigissanawu ashkketettay maaddees. Awusttiraaliyaa biittan deꞌiya Roberta giyo ishay hagaadan giis: “Taani haasayanawu koyabeenna qohiya darobaa ta maccaasee bolli haasayaas. SHin neeni hanqqettada haasaya simmada, aynne haasayabeennabadan asi qoppanaadan oottana danddayakka. Taani O keehi qohidoogaa akeekido wode azzanaas.”

Haasayiyooban “nuuni ubbaikka daroban baleettees,” qassi nu qoppennan haasayiyoobay nu aqo deꞌuwan metoy merettanaadan oottana danddayees. (Yaaq. 3:2) Hegaa mala hanotatun, nuuni woppu gaanaadaaninne nu inxxarssaa naaganaadan ashkketettay maaddees.—Lee. 17:27.

Roberti ashkke gidanawunne ba huuphiyaa naaganawu keehi baaxetiis. Hegee ay demissidee? I hagaadan giis: “Taaninne ta keettayiyaa maayettenna wode, loytta ezgganawu, ashkketettan haasayanawu, qassi yiillotennan agganawu haꞌꞌi baaxetays. Ta keettaayeera kaseegaappe aaruwan siiqettoos.”

Ashkketettay nuuni haratuura saruwan deꞌanaadan maaddees. Eesuwan yiillotiya daro asawu daro laggeti baawa. SHin ashkketettay ‘issippe gatti qachchiya sarotettaa’ naagidi deꞌanaadan nuna maaddees. (Efi. 4:2, 3) Qommoora ibaa denttido Kaata hagaadan gaasu: “Amarida asatuura saruwan deꞌiyoogee metiyaaba gidikkonne, taani ashkke gidiyo wode haratuura wodiyaa aattiyoogan ufayttana danddayays.”

Ashkketettay woppu gaanawu maaddees. Geeshsha Maxaafay “bollappe yiya aadhdhida eratettai” ashkketettaaranne sarotettaara gayttidaba gidiyoogaa yootees. (Yaaq. 3:13, 17) Ashkke urawu “woppu giida wozanai” deꞌees. (Lee. 14:30) Ashkke gidanawu keehi baaxetida Martiini hagaadan giis: “Issibay taani koyiyoogaadan oosettanaadan haꞌꞌi ubbatoo koyikke, qassi taani kaseegaappe aaruwan woppu gaysinne ufayttays.”

Ashkke gidanawu nuuni keehi baaxetana koshshiyoogee tuma. Issi ishay, “Haꞌikka taani issi issitoo hanqquwaa suullays” yaagiis. SHin ashkke gidanaadan nuna minttettiya Yihooway nu hegawu baaxetiyo wode maaddana. (Isi. 41:10; 1 Xim. 6:11) I nuna loohissidi polana danddayees, qassi “minttana” danddayees. (1 PHe. 5:10) Kiitettida PHawuloosadan, nuuni guyyeppe ‘Kiristtoosa doshotettaanne A ashkketettaa’ kaallana danddayoos.—2 Qor. 10:1.