Nu Metuwaa Gaasuwaa Eriyoogaa

Nuuni saruwan woppu giidi deꞌennaadan diggiyaabaanne sinttanaabaa hirgganaadan oottiya daro metuwaa asay qaarana danddayees gaada qoppay? Nu metuwaa qaaranawu, nuuni hegaa gaasuwaa erana koshshees.

Leemisuwawu, Toma giyo issi bitanee sahettidi guyyeppe hayqqiis. I waani hayqqidee? Tomi hayqqanaappe guuttaa kasetidi hosppitaaliyaa biido wode yan oottiya dottoree hagaadan giis: “A sahuwaa malaatay koyro beettido wode, hegaa gaasuwaa eranawu koyida asi baa.” Toma kase akkamida dottoreti awu kehissiya xaliyaa immidaba milatoosona.

Asay alamiyaa metuwaa qaaranawu hegaa mala ogiyan baaxetiiddi deꞌees. Leemisuwawu, kawotettati danobaa teqqanawu higgiyaa kessoosona, biiduwaa kaameeran kaalloosonanne poliseta gujjidi loohissoosona. SHin hegaadan oottiyoogee amarida ogiyan maaddiyaaba gidikkonne, gaaso gididabaa xayssenna. Asay oottiyoobay eti qoppiyoobaa, etawu siyettiyaabaanne eti koyiyoobaa bessees.

Tohossa Amarkka biittan deꞌiya Daaneeli asay keehi hiyyeesi hiyyeesi biyoogaa xeelliyaagan hagaadan giis: “Nuuni kase loꞌꞌo deꞌo deꞌoos. Massaariyaa oyqqidi bonqqiyaageeta nuuni yayyi erokko. SHin, haꞌꞌi saruwan deꞌiya katami woy heeri baawa. Nu biittan deꞌiya hanotay iita gidiyoogaa gaasuwan daro asay yaarettiyoogaanne hara asaa deꞌuwaa woy eta aquwaa bonchchennaagaa nuuni haꞌꞌi akeekana danddayoos.”

Eelaasa giyo issi bitanee Giddo Arshshon denddida olaa gaasuwan baqatiis; qassi guyyeppe Geeshsha Maxaafaa xannaꞌiis. I hagaadan giis: “Taani diccido kataman deꞌiya daro yelaga naata eta soo asay, polotikaa asaynne haymaanootiyaa kaalliyaageeti eti olaa biidi gooba geetettanaadan minttettidosona. Etaara olettiyaageetussikka hegaadan odettiis! Hagee ubbay haariya asan ammanettiyoogee keehi azanttiyaaba gidiyoogaa taani akeekanaadan oottiis.”

Aadhdhida eratettaa demmiyo issi beni maxaafay hagaadan gees:

• “Naatettaasappe doommin, asi wozanan qoppiyoobai ubbai iita.”—Doomettaabaa 8:21.

• “Asa wozani ubbabaappe aadhdhi cimmiyaabaanne keehi daro iita. A ooni eranau danddayii?”—Ermmaasa 17:9.

• “Wozana giddoppe iita qofai, woriyoogee, . . . shaaramuxanau qaaqqatiyoogee ubbai, wuuqqiyoogee, wordduwaa markkattiyoogee, . . . kiyees.”—Maatiyoosa 15:19.

Asay nu giddon deꞌiya iita amuwaa xayssana danddayibeenna. Hagaappe kasetiya huuphe yohuwan qonccidaagaadan he amoy yaa iiti iiti biis. (2 Ximootiyoosa 3:1-5) Qassi asawu awudeegaappenne keehi aaro eray deꞌiyaabanne eti awudeegaappenne keehi daro ogiyan hara asaara gayttana danddayiyaaba gidikkonne, hegee yaa iitiis! Yaatikko, alamiyaa saruwan woppu giidi deꞌiyo soho nuuni oottana danddayennay aybissee? Nu oottana danddayiyoobaappe aarobaa nuuppe koyiyoo? Nuuni danddayettennabaa oottanawu baaxetiiddi deꞌiyoo?

NUUNI MALANA DANDDAYENNABEE?

Asay amottiyo iita amuwaa issi maalaaliya ogiyan xayssana danddayiyaakkonne, ha alamiyaa ubba asi woppu giidi deꞌiyo soho oottana danddayokko. Gaasoy aybee? Asaa wolqqay guutta gidiyo gishshataassa.

Tumubay hagaa: ‘Asa deꞌoy he aawussi buzo gidenna; qassi ba hemetaa suurissanaagee aawu shene gidenna.’ (Ermmaasa 10:23) Ee, nuuni nuna haaranaadan merettibookko. Nuuni haattaa giddon woy saluwan deꞌanawu merettibeennaagaadan, asaa haaranaadan merettibookko!

Ane hagaa qoppa: Asay waani deꞌanaakko woy ayba kandduwaa maaraa kaallanaakko hara asay yootiyoobaa dosii? SHahaara kesissiyoogaa woy hayqqanaadan kawoy pirddiyoogaa woykko bantta naata seerana koshshiyo ogiyaa xeelliyaagan hara uri yootiyo wode asay hegaa dosii? Asay shaahettanaadan oottiya allaalletuppe hageeti amaridaageeta. Yaatiyo gishshawu, ekkiyoogee deexxiyaaba gidikkonne, Geeshsha Maxaafay yootiyoobay likkeba. Asaa haaranawu nuussi eri woy maati baawa. Yaatin, nuuni maaduwaa awappe demmana danddayiyoo?

Nuna Medhdhidaagee nuussi he oyshaa bessiya ogiyan zaarees. Nuna I medhdhiis! Issoti issoti qoppiyoogaappe dumma ogiyan, I nuna dogibeenna. I nuussi qoppiyoogee Geeshsha Maxaafay yootiyo aadhdhida eratettan qoncciis. Nuuni he dumma maxaafaa akeekiyo wode, nunakka loytti akeekoos. Qassi asaa taarikee keehi azzanttiyaaba gidido gaasuwaa akeekana danddayoos. Jarmane biittaa eranchchay issi wode giidoogaadan, “asaynne kawotettati taarikiyaappe mule aybanne tamaaribeennay, woy hegaappe tamaaranawu aynne oottibeennay” aybissakko nuuni akeekana danddayoos.

GEESHSHA MAXAAFAY YOOTIYO AADHDHIDA ERATETTAY NUNA NAAGEES!

Eranchcha bitanee issi wode “Xoossaa aadhdhida eratettai ba oosuwan tuma gididi” beettiyoogaa yootiis. (Luqaasa 7:35) He aadhdhida eratettawu leemiso gidiyaabay Isiyaasa 2:22n deꞌees; xiqisee hagaadan gees: “Haiqqiya asan ammanettiyoogaa aggite!” He loꞌꞌo zoree nuuni mule hanennabaa hidootan naagennaadan maaddana danddayees. Kobay dariyo huuphessa Amarkkaa kataman deꞌiya Kenezi hagaadan giis: “Polotikan sunttettiya ubbay hanotaa loyttanawu qaalaa gelees; shin eti loyttana danddayokkona. Eti qaalaa gelidobaa awudenne polokkona; qassi hegee Geeshsha Maxaafay yootiyoobay tumanne aadhdhida eraa qonccissiyaaba gidiyoogaa bessees.”

Qommoora abaa denttido Daaneeli hagaadan giis: “Hanotay asay loytti haarennaagaa taani ubba galla ammananaadan oottees. . . . Neeyyo bankkiyan miishshay deꞌiyo gishshawu woy neeni miishshaa demmiyo amaridabay deꞌiyo gishshawu sinttappe woppu gaana danddayaasa giyoogaa gidenna. Hegaara gayttidaagan asay keehi metootiyoogaa taani beꞌaas.”

Geeshsha Maxaafay nuna maaddiyoobay nuuni hanennabaa hidootiyoogaappe naagettanaadan oottiyoogaa xalla gidenna. I nuuni hidootan naagiyoobaa yootees; qassi hegee polettin nuuni beꞌana.