UBBABAY TAALLETTIYOGAA WAATI GENCCANEE?

Loꞌꞌobaa Hidoota

Ne deꞌiyo biittan neeni demmiyo miishshaappe aaruwan ubbabaa gatee gujjiiddi deꞌii? Neeyyonne ne soo asawu koshshiyabaa kunttiyogee nena qofissii? Hegaadaana gidikko, sinttanaabawu hirggana danddayaasa. Hegaa mala wayssiya hanotankka loꞌꞌobaa hidootiyogee nuna maaddana danddayees.

YAATIYOGEE KEEHI KOSHSHIYOY AYBISSEE?

Hidootiyogee loꞌꞌobay hananaadan amottiyogaa xalla gidenna. Hidootay asay ba hanotaa giigissanawu bawu danddayettida ubbabaa oottanaadan denttettees. Leemisuwawu, xinaatee bessiyogaadan, loꞌꞌobaa hidootiya asati . . .

metiyabata darotoo genccoosona
hanotaa meezetanawu metootokkona
giiga deꞌuwa deꞌanawu maaddiya loꞌꞌobaa kuuyoosona

WAATANA DANDDAYAY?

Koyruwan, Geeshsha Maxaafay nena ha wodiyan waati maaddana danddayiyakko akeeka. Ubbabay alꞌꞌi alꞌꞌi biyo wode neeni genccanaadan maaddiya zoree Geeshsha Maxaafan deꞌees. Harabata gujjin, ha zoreti neeni ne hanotaa giigissanaadaaninne sinttappe gakkiya metuwa genccanawu giigettanaadan oottana danddayoosona.

“Nena adussi qoppiyoogee naagana; akeekaikka nena saro ashshana.”—Leemiso 2:11.

Naaꞌꞌanttuwan, Geeshsha Maxaafay sinttanaabaa woygiyakko akeeka. Geeshsha Maxaafan deꞌiya hayyoy ay keena maaddiyakko neeni akeekiyo wode, ha maxaafay sinttanaabaa xeelliyagan yootiyobaa eranawu keehi koyana danddayaasa. Leemisuwawu Xoossay neeyyo “sintta wodiyaanne ufaissaa” immanawu qaalaa gelidoogaa xalla gidennan, he hidootay polettanaagaa ammanettanaadan oottiyabaa giigissidoogaakka tamaarana. (Ermmaasa 29:11) Hegee Xoossaa Kawotettaa.

XOOSSAA KAWOTETTAY AYBEE, QASSI I AY POLANEE?

Xoossaa Kawotettay kumetta saꞌaa haarana aysuwa. (Daaneela 2:44; Maatiyosa 6:10) Kaallidi odettida xiqiseti qonccissiyogaadan, saluwan deꞌiya he aysoy tuggaanne hiyyeesatettaa xayssidi, sarotettay deꞌanaadaaninne ubbabay kumi palahanaadan oottana.

“Neeni ufaittananne neeyyo lo77o gidana.”—Mazamure 128:2.

“Eti [Kawotettawu haarettiyageeti] coo daafurokkona.”—Isiyaasa 65:23.

“Biittan daro kattai mokko.”—Mazamure 72:16.

He hidootaa ammaniya miilooniyan qoodettiyageeti, Xoossay ‘worddotennaagaa’ ammanettidosona. (Tiita 1:2) Yaatiyo gishshawu, Geeshsha Maxaafaa ayssi pilggikkii? Geeshsha Maxaafan deꞌiya hidootay neeni ikkonoomiya metuwa genccanaadaaninne sinttappe loꞌꞌo wodee yaanaagaa ammanettanaadan maaddana danddayees.