UBBABAY TAALLETTIYOGAA WAATI GENCCANEE?
Haratuyyo Keha
Deꞌoy taallettiyogaa gaasuwan neeyyo koshshiyabaa kunttanawu metootikko, haratuyyo kehiyogee metiyabadan qoppana danddayaasa. Gidikkonne, haratuyyo kehiyogee ikkonoomiya metuwa genccanawu nena maaddana danddayees. Miishshaa qoraphphayddakka haratuyyo kehana danddayaasa.
YAATIYOGEE KEEHI KOSHSHIYOY AYBISSEE?
Guuttabankka gidin kehiyogee nuuni keehi ufayttanaadan oottees. Immiyogee guuggiyanne bollaa payyatettawu loꞌꞌo gidiyogaa xinaatee bessees. Leemisuwawu, hirggiyogaanne unꞌꞌettiyogaa agganaadan, suuttaa sugettay darennaadaaninne ubba, sahoy decanaadan oottana danddayees. Qassi, loytti xiskkanaadankka maaddana danddayees.
Nuuni miishshaa woy koshshiya harabaa immiyogan harata maaddiyaba gidikko, nuuyyo maadoy koshshiyo wode ekkanawu metootokko. Inggilizen deꞌiya Howarddi, “Taaninne ta keettaayyiya haratuyyo kehiyonne eta maaddiyo gishshawu, nuuyyo maadoy koshshiyo wode ekkanawu metootokko” yaagiis. Wozanappe kehiyageeti asay etawu kushiya zaaranaadan naagokkona. Shin hegaadan oottiyageeti, maadoy koshshiyo wode bantta dosan maaddiya, tumu laggeta demmoosona.
WAATANA DANDDAYAY?
Deꞌiyabaa haratuyyo shaakka. Neeyyo deꞌiyabay guuttaba, ubba issitoo miyo quma gidikkokka, haratuyyo shaakkana danddayaasa. Uuganddan deꞌiya Dankaninne A soo asay hiyyeesa gidikkonne, haratuyyo kehoosona. Dankani hagaadan giis: “Ubbatoo woggaa gallassi nunaara qumaa maanaadan issi ura shoobboos. Haratuura wodiya aattiyogee nuna ufayssees.”
Shin neeni haratuyyo immiyo wode bessiyagaadan oottiyagaa gidana koshshees. Ne soo asawu koshshiyabaa kunttennan, haratuyyo darobaa immana koshshenna.—Iyyooba 17:5.
Hagaa mala: Miyo guuttabaa woy uyiyobaa issi ura shoobba. Neeni goꞌettennabay deꞌikko, hegaa nashshidi goꞌettana danddayiya laggetuyyo woy shoorotuyyo immana danddayay?
Immiyo hara ogeta. Ubbaappe loꞌꞌo gidida issi issi imotati miishsha qanxxissokkona. Leemisuwawu, harata maaddiyabaa oottiyogan nu wodiya immananne etawu qoppiyogaa bessana danddayoos. Kehabaa haasayiyogeekka imota gidana danddayees! Yaatiyo gishshawu, harata nashshiyogaanne eta siiqiyogaa yoota.
Hagaa mala: So giddon oottiyoban, keettan moorettidabaa giigissiyogan, woy koshshiyabaa shamma ehiyogan harata maadda. Neeni he urawu qoppiyogaa yootana xallaassa gidikkonne, karddiya xaafada imma woy kiitaa xaafada kiitta.
Neeni haratuyyo kehiyo wode, daro anjjuwa demmana.