“Ne Kawotettai Yo”

Yihoowi hagaadan giis: ‘Hagaappe sinttan waasoy, tuggay, sahoy woy hayqoy deꞌenna. Taani eta ayfiyaappe afutta ubbaa quccana. Iitaba ubbay dogettana.’

Yihoowi Addaameenne Hewaana saruwaaninne ufayssan deꞌanaadan Edene ataakiltte sohuwan eta wottiis. Eti saluwan deꞌiya bantta Aawaayyo goynnananne naata yelidi saꞌaa kunttana koshshees. Addaameenne Hewaana Yihoowayyo azazettennan ixxikkonne, a halchoy mule laamettibeenna. Xoossay qaalaa gelido ubbabay polettiyoogaa nuuni ha maxaafan beꞌida. Abrahaamayyo i qaalaa gelidoogaadan, a Kawotettay saꞌawu ufayssiya anjjuwaa ehaana.

Mata wode Seexaanay, daydanttatinne iita asa ubbay xayana. Paxa deꞌiya ubbay Yihoowawu goynnana. Nuuni sahettokko woy hayqqokko. Deꞌoy nuna ufayssishin, nuuni ubba galla guuran kumetta wolqqaara xiskkuwaappe denddana. Saꞌay gannate gidana. Ubba asawu loꞌꞌo qumaynne giiga keettay deꞌana. Asay meqettaa iita woy makkalancha gidennan, keha gidana. Doꞌati nuna yayyokkona; qassi nuuni eta yayyokko.

Yihoowi hayquwaappe asaa denttiyoogaa doommiyoogee keehi ufayssiyaaba gidana. Nuuni Aabeela, Noha, Abrahaama, Saari, Muuse, Uruti, Asttiri, qassi Daawita mala asati hayquwaappe denddiyo wode mokkana. Eti nunaara saꞌaa gannate oottana. Ufayssiya daro oosoy he wode ubbatoo deꞌana.

Neeni yan deꞌanaadan Yihoowi koyees. Neeni mule qoppa erenna ogiyan a erana. Simi yaakko, haꞌꞌikka merinawukka ubba gallassi kaseegaappe aaruwan Yihoowakko shiiqoos!