Kiitanchchati Oonee, Qassi Eti Oottiyoobay Aybee?

Yihoowi saluwan deꞌiya ba so asaabaa nuuni eranaadan koyees. “Xoossaa naata” geetettida kiitanchchatikka A so asata. (Doomettaabaa 6:2; Iyyooba 38:7) Kiitanchchatubaa Geeshsha Maxaafay ay yootii? Eti asaa waatana danddayiyoonaa? Qassi kiitanchchati ubbay Xoossaa so asee?

1. Kiitanchchati oonee?

Yihoowi saꞌaa medhdhanaappe kase kiitanchchata medhdhiis. Yihoowa beꞌennaagaadan etakka beꞌokko; qassi eti saluwan deꞌoosona. (Ibraawe 1:14) Daro miiloone kiitanchchati deꞌoosona, qassi ubbaykka issoy issuwaappe dummatoosona. (Ajjuutaa 5:11) Eti ‘Yihoowa azazuwaa poloosona; qassi I giyoobaa ezggoosona.’ (Mazamure 103:20) Beni wode, Yihoowi kiitaa gattanawu, ba asaa maaddanawunne eta ashshanawu issi issitoo kiitanchchata kiittiis. Ha wodiyan, Kiristtaaneti Xoossaabaa eranawu koyiya asatuura gayttanaadan kiitanchchati eta kaalettoosona.

2. Seexaanaynne daydanttati oonee?

Issi issi kiitanchchati Yihoowawu ammanettidi deꞌibookkona. ‘Saꞌaa ubbaa balettiya xalahe halaqaa woy Seexaanaa geetettida’ kiitanchchay koyro makkalidaagaa. (Ajjuutaa 12:9) Seexaanay harata haaranawu koyido gishshawu, Addaameennne Hewaana, guyyeppe hara kiitanchchatikka Yihoowa bolli makkalanaadan denttettiis. He makkalida kiitanchchati daydanttata geetettoosona. Yihoowi eta saluwaappe saꞌaa yedettiis; qassi eti xayana.—Ajjuutaa 12:9, 12 nabbaba.

3. Seexaanaynne daydanttati nuna cimmanawu waatiyoonaa?

Iita ayyaanatuura haasayiyo iita oosuwan, kaayuwan woy shareechchiyoogan Seexaanaynne daydanttati daro asaa cimmoosona. Leemisuwawu, issi issi asay xoolinttiyaa paydiyaageeta, maracciyaa xeelliyaageetanne shareechchiyaageeta oychchanawu bees. Harati qassi sahettiyo wode iita ayyaanatuura gayttidaban xalettanawu koyoosona. Asay cimettidi hayqqida asaara haasayana danddayiyaabadankka qoppees. SHin Yihoowi nuuni “moitilliyaa haasayissiyaageetukkonne shareechchotukko” beennaadan yootiis. (Wogaabaa 19:31) I hegaa yootidoy nuna Seexaanaynne daydanttati qohennaadan naaganaassa. Eti Xoossaa morkketa; qassi nuna qohanawu koyoosona.

LOYTTA AKEEKA

4. Asay Yihoowabaa eranaadan kiitanchchati maaddoosona

Xoossaa kiitanchchati asawu mishiraachchuwaa yootokkona. Eti Xoossawu goynniyaageeta abaa eranawu koyiyaageetukko kaalettana danddayoosona. Ajjuutaa 14:6, 7 nabbabite; yaatidi ha oyshata tobbite:

• Mishiraachchuwaa yootanawu nuussi kiitanchchatu maadoy koshshiyoy aybissee?

• Geeshsha Maxaafaabaa siyana bessiya asatukko kiitanchchati nena kaalettiyoogaa erido gishshawu minettadii? Aybissi?

5. Iita ayyaana oosuwaa ixxa

Seexaanaynne daydanttati Yihoowawu morkke. Eti nuussikka morkke. Luqaasa 9:38-42 nabbabite; yaatidi ha oyshaa tobbite:

• Daydanttati asaa waatiyoonaa?

Daydanttati nuna qohanaadan eeno gookko. Zaarettido Wogaa 18:10-12 nabbabite; yaatidi ha oyshata tobbite:

• Daydanttati nuna qohanawunne haasayissanawu maliyo ogeti aybee? Hegaara gayttidaagan, intte heeran meeze gididabay aybee?

• Iita ayyaanatuura gattiyaaba oottennaadan Yihoowi diggiyoogee loꞌꞌobee? Aybissi?

BIIDUWAA beꞌite; yaatidi kaallidi deꞌiya oyshata tobbite.

BIIDUWAA: “Xalahe Halaqaa Teqqite” (5:02)

• Paleesa ba naꞌee kushiyan qachchidobay qohiyaabee? Aybissi?

• Paleesa daydanttatuppe naagettanawu ay oottana koshshidee?

Tumu Kiristtaaneti daydanttata ubbatoo eqettoosona. Oosuwaa 19:19​nne 1 Qoronttoosa 10:21 nabbabite; yaatidi ha oyshaa tobbite:

• Iita ayyaanatuura gayttida ubbabaa xayssana koshshiyoy aybissee?

6. Seexaanaaranne daydanttatuura olettiyo olan xoona

Daydanttata kaalettiyay Seexaanaa. Kiitanchchatu halaqay Mikaaꞌeeli ammanettida kiitanchchata kaalettees. Mikaaꞌeeli Yesuusawu hara suntta. Mikaaꞌeeli ay keena wolqqaamee? Ajjuutaa 12:7-9 nabbabite; yaatidi ha oyshata tobbite:

• Mikaaꞌeelinne A kiitanchchati wolqqaameeyye Seexaanaynne daydanttati wolqqaamee?

• Yesuusa kaalliyaageeti Seexaanaanne daydanttata yayyana bessii?

Neeni Seexaanaaranne daydanttatuura olettada xoonana danddayaasa. Yaaqooba 4:7 nabbabite; yaatidi ha oyshaa tobbite:

• Seexaanaappenne daydanttatuppe naagettanawu waatana danddayay?

AY AKEEKADII?

Ammanettida kiitanchchati nuna maaddoosona. Seexaanaynne daydanttati Yihoowa morkke; qassi eti iita ayyaana oosotun asaa cimmoosona.

Zaaretuwaa

• Asay Yihoowabaa eranaadan A kiitanchchati waati maaddiyoonaa?

• Seexaanaynne daydanttati oonee?

• Neeni iita ayyaanatuura gayttidaban shaalettana koyennay aybissee?

PILGGA

Yesuusi kiitanchchatu halaqaa Mikaaꞌeela gidiyoogaa nuuni aybin eriyaakko akeeka.

“Kiitanchchatu Halaqaa Mikaaꞌeeli Oonee?” (Nu websaytiyan deꞌiyaaba)

Dabloosi tumuppe deꞌiya ura gidiyoogaa bessiya naqaashaa akeeka.

“Dabloosi Tumuppe Deꞌii?” (Nu websaytiyan deꞌiyaaba)

Issi maccaasiyaa daydanttatu qohuwaappe waana laꞌa kiyidaakko akeeka.

“Deꞌuwan Waana Ufayttanaakko Akeekaasu” (Wochchiyo Keelaa huuphe yohuwaa)

Seexaanay iita ayyaanatu oosuwan asaa waati cimmiyaakko akeeka.

“Kaayuwaa, Bitaanne Goromootiyaa Xeelliyaagan Tumaa” (Merinaa Deꞌuwau Efiya Ogiyaa, shaaho 5)