Geeshsha Gididi Deꞌana Danddayoos
“Intte kushiyaa meecettite. . . . intte wozanaa geeshshite.” —YAAQOOBA 4:8.
1. Geeshshatettaa asay waati xeellii?
GEESHSHATETTAY daro asay dosiyo eeshsha gidenna. Dosennaagee ha wodiyan keehi erettidaba. Daro biittan, attuma asay attuma asaara, qassi macca asay macca asaara zinꞌꞌiyoogaanne aqo laggiyaappe hara uraara zinꞌꞌiyoogaa asay iitabadan xeellenna. Pilimiyan, maxaafan, yettaaninne erissuwan shori baynnabay kumiis. (Maz. 12:8) SHori baynnabay ubbasan meeze gidido gishshawu, ‘Geeshsha gididi deꞌiyoogee danddayettiyaabee?’ gaada neeni qoppennan waaya aggana. SHin, Yihooway maaddin tumu Kiristtaaneti geeshsha gididi deꞌana danddayiyoogee qoncce.—1 Tasalonqqe 4:3-5 nabbaba.
2, 3. (a) Iitabaa amottennaadan baaxetana koshshiyoy aybissee? (b) Ha huuphe yohuwan nuuni ay beꞌanee?
2 Gidoppe attin, nuuni geeshsha gididi deꞌanawu shori baynnabaa amottiyoogaa aggana bessiyoogaa erana koshshees. Miyoobaa wottido piree moliyaa cimmana danddayiyoogaadan, issi Kiristtaanee sohuwaara aggana xayikko, shori baynnabaa qoppiyoogeenne pokkobaa amottiyoogee gubaaꞌiyaappe kiyanaadan a cimmana danddayees. Hegee nu ashuwaa ufayssana danddayiyo gishshawu, shori baynnabaa oottanaadan denttettees. Gamꞌꞌidi, iitabaa amoy keehi wolqqaamana danddayees. He wode, Yihoowa ashkkara gidida urikka ba amottidobaa polana danddayees. Ee, “amoi . . . nagaraa yelees.”—Yaaqooba 1:14, 15 nabbaba.
3 Amottiyoobay waatidi iita nagaran yeggana danddayiyaakko keehi qoppana koshshees. SHin nuuni iita amoy diccennaadan teqqikko, shori baynnabaa oottidi hegee kaalettiyo metuwan gelennaagaa eriyoogee keehi minttettiyaaba! (Gal. 5:16) Iitabaa amottennaadan baaxetiyo wode nuna maaddiya heezzubaa ane beꞌana; hegeetikka Yihoowaara nuuni dabbotiyoogaa, a Qaalan deꞌiya zoriyaanne ayyaanaaban kayma Kiristtaanetu maaduwaa.
“XOOSSAAKKO SHIIQITE”
4. Yihoowakko shiiqiyoogee keehi koshshiyoy aybissee?
4 Geeshsha Maxaafay ‘Xoossaakko shiiqanawu’ koyiyaageeta, “Intte kushiyaa meecettite . . . intte wozanaa geeshshite” yaagees. (Yaaq. 4:8) Yihoowaara nu dabbotaa minttiyo wode, nu qoppiyoobaa gujjin, nu deꞌo macara ubban a ufayssanawu baaxetoos. Nuuni geeshshabaa, loꞌꞌobaanne galatissiyaabaa qoppiyoogan “wozanai geeshsha” gididoogeeta gidanawu amottoos. (Maz. 24:3, 4; 51:6; Pili. 4:8) Yihooway nuuni nagarancha gidiyoogaa akeekiyoogee qoncce. Nuuni iitabaa qoppana danddayiyoogaa i erees. SHin, nuuni danddayettida ubban iita qofaa eqettiyoogaa aggidi ubbatoo hegaa qoppikko Yihooway azzananaagaa eroos. (Doo. 6:5, 6) Hagaa wotti dentti qoppiyoogee nuuni qofan ubbatoo geeshsha gidanawu keehi murttanaadan oottees.
5, 6. Iitabaa amottiyoogaa eqettanaadan woosay nuna waati maaddana danddayii?
5 Nuuni Yihoowan wozanappe ammanettiyoogaa bessiyo issi ogee iita qofaa eqettanawu woossiyoogaa. Nuuni woosan Yihoowakko shiiqiyo wode, i nuukko shiiqees. I nuussi ba geeshsha ayyaana kehatettan immees; hegee nuuni iitabaa qoppiyoogaa aggidi, geeshsha gididi deꞌanaadan maaddees. Hegaa gishshawu, nuuni Xoossaa ufayssanawu wozanappe qoppiyoogaa ayyo yootiyaageeta gidoos. (Maz. 19:14) Nuuni nagaran gelanaadan oottana danddayiya ‘iita’ qofay, hegeekka bessenna amoy woy koshshay nu wozanan deꞌiyaakkonne nuuni erana mala i nuna qoranaadan nu huuphiyaa kawushshidi a oychiyoo? (Maz. 139:23, 24) Nuna paacee gakkiyo wode, suure gididi deꞌanawu maaddana mala muletoo a mintti woossiyoo?—Maa. 6:13.
6 Nu diccido hanotay woy nu kase eeshshay Yihooway ixxiyoobaa dosanaadan oottana danddayees. Gidikkonne, i nuuni issi issibaa laammanaadan maaddin ubbatoo a ufayssiya ogiyan assi haggaazana danddayoos. Kawuwaa Daawiti hegaa akeekiis. Daawiti Berssaabiira wodiraa laammi simmidi, “Geeshsha wozanaa ta giddon medhdha; ammanettiya ayyaanaa ta giddon ooraxissa” yaagidi Yihoowa woossiis. (Maz. 51:10-12) Nuuni nagarancha gidiyo gishshawu, iita eeshshaa keehi dosana danddayoos; shin Yihooway baayyo nuuni eeno giidi azazettanaadan maaddana danddayees. Iitabaa amoy wolqqaamidi nu geeshsha qofaa moorana hanikkonne, Yihooway nuuni a higgiyaa azazettidi deꞌiyoogan goꞌettanaadan nu hemetaa suurissana danddayees. I nuna qohiya aybinne haarennaadan oottana danddayees.—Maz. 119:133.
Iitabaa qaaqqatiyoogee nu wozanan xaphuwaa yeddiyoogaa doommikko, hegaa shoddana koshshees (Mentto 6 xeella)
‘XOOSSAA QAALAADAN OOTTITE’
7. Xoossaa Qaalay nuuni iita qofaa qoppennaadan waati maaddana danddayii?
7 Nuuni maaduwaa demmanawu woossiyo woosaa Yihooway ba Qaalaa Geeshsha Maxaafaa baggaara zaarana danddayees. Xoossaa Qaalan deꞌiya aadhida eratettay “ubbaappe kase geeshsha.” (Yaaq. 3:17) Nuuni Geeshsha Maxaafaa galla galla nabbabiyoogeenne nabbabidobaa wotti denttidi qoppiyoogee iitabaa qoppennaadan naagettana mala nuna maaddana danddayees. (Maz. 19:7, 11; 119:9, 11) Gujjidikka, Geeshsha Maxaafay issi issi asatubaa yootiyoobaynne i zoriyo zoree nuuni iita qofaa qoppennaadan maaddana danddayees.
8, 9. (a) Issi wodallay shaaramuxa maccaaseera shori baynnabaa oottanaadan denttettidabay aybee? (b) Leemiso shemppo 7n deꞌiya zoriyaa nuuni ha wodiyan aybin oosuwan peeshshana danddayiyoo?
8 Leemiso 5:8y, “SHaaramuxa maccaasee heeri booppa; i keettaa penggiyaakko shiiqoppa” yaagees. Ha zoriyaa xaasayidi xeelliyoogan gakkiya daafabay issi shaaramuxa maccaasee keettaa mataara kanttanawu biida wodallabaa yootiya Leemiso shemppo 7n odettiis. Saꞌay qammiis. Kalluwaa bessiya maayuwaa maayida, ogiyaa doonan eqqida issi maccaaseekko i biis. Maccaasiyaa a oyqqada yeraasu. I sheleeshsho haasayay i eqettana danddayibeenna iitabaa amottanaadan oottiis. Qassi eti shori baynnabaa hanidosona. He wodallay shori baynnabaa hananawu kase waayi qoppana. I akeekay paccido asa. Ubba qassi, i oottidobay a bolli daafabay gakkanaadan oottiis. Hegaa i akeekiyaakko maccaaseeppe baqatana!—Lee. 7:6-27.
9 Nuuni gakkiya daafabaa akeekennaagaappe denddidaagan he wodallaagaa mala akeeki paccidobaa oottana danddayoos. Leemisuwawu, televizhiiniyan hara saatiyan diggiyoobaa qammi qammi diggennan aggana danddayoosona. Issi issitoo nuuni dumma dumma xaabiyaa dooyikko shin? Woy qassi pokkobaa bessiyaabaa Intternneetiyan beꞌanaadan shoobbiya sayttiyaa yuushshi qoppennan goꞌettana danddayoos. Hegaa mala hanotay nuuni iitabaa amottanaadaaninne geeshsha gididi deꞌanawu baaxetiyoogaa xaasayi xeellanaadan oottana danddayennee?
10. Lambbeechiyoogee qohiyaaba gidiyoy aybissee? (Ha huuphe yohuwaa doomettan deꞌiya misiliyaa xeella.)
10 Geeshsha Maxaafay nuna maaddiyo hara ogee nuugaappe dummatiya mattumay deꞌiyoogeetuura gayttiyo wode oottana koshshiyaabaa zoriyoogaa. (1 Ximootiyoosa 5:2 nabbaba.) He zoree lambbeechenna mala diggiyoogee qoncce. Issoti issoti issi uraa bochana xayikko, qaaqqatidi xeelliyoogee, qimꞌꞌotiyoogeenne hegaa malabay qohennabadan xeelloosona. SHin lambbeechiyoogee nagaraa oottanaadan denttettiya iita amuwaa amottanaadan oottana danddayees. Hegee kase haniis; zaarettidikka hanana danddayees.
11. Yooseefi aybin nuussi loꞌꞌo leemiso gidii?
11 Yooseefi hegaara gayttidaagan akeekancha gidiyooga bessiis. A godaa PHoxiifaara keettayiyaa Yooseefa cimmanawu malin, i o eqettiis. SHin a hidootaa qanxxabeykku. Banaara zinꞌꞌanaadan ubba gallassi Yooseefa shoobbaasu. (Doo. 39:7, 8, 10) PHoxiifaara keettaayiyaanne Yooseefi banttarkka takkikko, a bana i amottanabadan qoppidoogaa Geeshsha Maxaafaa eranchay issoy yootiis. SHin a Yooseefa sheleeshshanawu haasayidobaa i siyennan ixxiis. I qofaa Yooseefi eqettiis; qassi o lambbeechibeenna. Yaatido gishshawu, ba wozanan iitabaa amottibeenna. A banaara Yooseefi zinꞌꞌanaadan wolqqanttin, i sohuwaara “ba afalaa i kushiyan yeggidi, sooppe kare woxxidi kiyiis.”—Doo. 39:12.
12. Nuuni beꞌiyoobay nu wozanaa qohana danddayiyoogaa aybin eriyoo?
12 Geeshsha Maxaafay nu ayfee nu wozanaa wora zaarennaadankka zorees. Qaaqqatiyoogee shori baynnabaa keehi amottanaadan oottana danddayees. Yesuusi, “Maccaaro xeellidi amottiya ubbai, ba wozana giddon he wode iira shaaramuxiis” yaagiis. (Maa. 5:28) Kawuwaa Daawiti waanidaakko hassayoos. ‘Daawiti keettaa bollan dembbayidi oottidosan hemettiiddi bollaa meecettiya issi mishiriyo beꞌiis.’ (2 Sam. 11:2) I maccaaseeppe harasaa xeellennaaninne ba qofaa laammennan aggiis. Hegee i hara ura machiyo amottanaadan oottiis; amottidi iira wodiraa laamiis.
13. Nu ‘ayfiyaara maachaa maacettana’ koshshiyoy aybissee, qassi hegawu waatana koshshii?
13 SHori baynnabaa amottenna mala, nuuni ammanettida Iyyoobaagaadan nu ‘ayfiyaara maachaa maacettana’ koshshees. (Iyy. 31:1, 7, 9) Nu ayfiyaa naaganawunne shori baynnabaa qaaqqatidi issi ura xeellenna mala murttana bessees. Hegaadankka kompputeriyan, kaqettida erissuwan, maxeetiyaa koohuwan, woy awaaninne pokkobaa bessiya misiliyaappe sohuwaara nu ayfiyaa wora zaarana koshshees.
14. Geeshsha gididi deꞌanaadan immettida zoriyan waani goꞌettana danddayiyoo?
14 Nuuni hanno gakkanawu beꞌidobaappe iita amuwaa loytta eqettana koshshiyoobaa akeekikko, bessiyaabaa sohuwaara ootta. Neeni iitabaa oottennaadaaninne geeshsha gidada deꞌanaadan maaddiya Xoossaa Qaalaa zoriyaa eeno gaada azazetta.—Yaaqooba 1:21-25 nabbaba.
‘CIMATA XEESA’
15. Nuuni shori baynnabaa amottiyoogaa agganawu baaxetiyaaba gidikko, maaduwaa oychana koshshiyoy aybissee?
15 Nuuni shori baynnabaa amottiyoogaa agganawu baaxetikko, nu mala Kiristtaanetikka nuna maaddana danddayoosona. Hegaa mala metuwaa hara urawu yootiyoogee metennaba gidenna. SHin ayyaanaaban kaymida Kiristtaanee kehatettan maaddanaadan xalan yootiyoogee, nuuni iitabaa amottennaadan oottana danddayees. (Lee. 18:1; Ibr. 3:12, 13) Nuuni azalla gididobaa ayyaanaaban kaymida Kiristtaaniyawu yootiyoogee akeekibeennabaa akeekanaadan maaddana danddayees. Hegee nuuni Yihoowa siiquwan deꞌanawu giigissana koshshiyaabaa giigissanaadan maaddana danddayees.
16, 17. (a) SHori baynnabaa amottiyoogaa agganawu baaxetiyaageeta gubaaꞌe cimati waati maaddana danddayiyoonaa? Leemisuwaa yoota. (b) Pornograafiyaa beꞌiyaageeti eesuwaara maaduwaa oychana koshshiyoy aybissee?
16 Gubaaꞌiyaa cimati nuna maaddana danddayoosona. (Yaaqooba 5:13-15 nabbaba.) Brazile biittan deꞌiya issi yelagay daro layttawu iita amuwaa agganawu baaxetiis. I, “Ta qoppiyoobay Yihoowa ufayssennaagaa taani erays; shin taassi siyettiyaabaa haratussi yootanawu keehi yeellataas” yaagiis. A gubaaꞌiyan deꞌiya assi qarettiya cimay maaduwaa i oychanaadan minttettiis. He yelagay hagaadan giis: “Cimati taassi daro kehanne keehi qoppiyaageeta gidido gishshawu garamettaas; hegee taassi bessiyaabadan qoppabeykke. Ta metuwaa eti loyttidi siyidosona. Yihooway tana siiqiyoogaa eti Geeshsha Maxaafaappe yootidosona; qassi tanaara woossidosona. Hegee taani eti Geeshsha Maxaafaappe zoridobaa metootennan ekkanaadan maaddiis.” I ayyaanaaban minnidi daro layttappe simmin, “Nu toohuwaa nurkka tookkiyoogaappe maaduwaa oychiyoogee keehi koshshiyoogaa akeekaas” yaagiis.
17 SHori baynnabaa amottanaadan oottiyaabay pornograafiyaa beꞌiyoogaa gidikko, maaduwaa oychiyoogee keehi koshshiyaaba. Maaduwaa oychanawu keehi takkikko, shori baynnabaa amottiyo “amoi shahaaridi, nagaraa yelees”; hegee qassi harata qoheessinne Yihoowa sunttay borettanaadan oottees. Yihoowa ashkkaratuppe daroti a ufayssanawunne Kiristtaane gubaaꞌiyan deꞌanawu amottiyo gishshawu, maaduwaa eeno giidi ekkidosona.—Yaaq. 1:15; Maz. 141:5; Ibr. 12:5, 6.
GEESHSHA GIDADA DEꞌANAWU MURTTA
18. Ay oottanawu murttadii?
18 Seexaanaa alamee kandduwan yaa iiti iiti biyo wode, Yihooway baassi aqidaageeti geeshshabaa qoppanawunne i kessido kandduwaa maaraadan deꞌanawu wozanappe baaxetiyoogaa beꞌidi keehi ufayttiyoogee erettidaba! Nuuni ubbay Yihoowakko shiiqanawunne i ba Qaalaa baggaaranne Kiristtaane gubaaꞌiyaa baggaara immiyo kaaletuwaa kaallana mala murttanawu amottoos. Geeshsha gididi deꞌiyoogee ufayssaaninne sarotettan deꞌanaadan maaddees. (Maz. 119:5, 6) Sinttappe Seexaanay xayi simmin, iitabaa ubbaappe geeyida alamiyan merinawu deꞌana danddayoos.