“Kingisli Danddayidoogaa Taanikka Danddayana!”

KINGISLA hashiyaa bochin, i Tiꞌokiraase Haggaazo Timirtte Keettan bawu imettida koyro kifiliyaa Geeshsha Maxaafaappe nabbabiyoogaa doommiis. I ubba qaalaakka aynne balennan maara nabbabees. Gido shin, i Geeshsha Maxaafaa xeellennan nabbabiyoy aybissee?

Siri Lankka biittan deꞌiya Kingisli qooqe. Qassi i siyanawu metootees; hegaa bollikka, awanne baanawu awu gaare koshshees. I Yihoowabaa waati tamaaridi, Tiꞌokiraase Haggaazo Timirtte Keettan mazggabettana danddayidee? Ane hegaa yootays.

Taani Kingislaara koyro gayttiyo wode i Geeshsha Maxaafaa tumaa keehi saamettidoogan garamettaas. I kase daro Yihoowa Markkatuura Geeshsha Maxaafaa xannaꞌꞌiis; qassi Bireeliyan giigida Merinaa Deꞌuwawu Kaalettiya Eraa giyo a maxaafay keehi galꞌꞌiis.a I tanaara zaarettidi xannaꞌanaadan oychin eeno giis, shin naaꞌꞌubay wayssiis.

Koyroogee, Kingisli cimidaageetinne bollay qohettido daroti deꞌiyo keettan deꞌiyoogaa. Yan asay wocamiyo gishshawunne Kingisli siyanawu metootiyo gishshawu, taani cenggurssaa keehi xoqqu oottada haasayana koshshiis. Nuuni saaminttan saaminttan xannaꞌiyo wode, yan deꞌiyaageeti ubbay siyoosona!

Wayssida naaꞌꞌanttoogee, Kingisli xannaꞌiyo wode, kase erennabaa nabbabidi akeekana danddayiyoobay guutta gidiyoogaa. Xannaꞌiyo wode goꞌettanawu Kingisli loytti giigettees. I xannaꞌanaappe kasetidi xuufiyaa zaaretti zaarettidi nabbabees, Bireeliyan giigida ba Geeshsha Maxaafaappe xiqiseta nabbabees; yaatidi oyshata waatidi zaaranaakko qoppees. Yaatiyoogee keehi maaddiis. Nuuni xannaꞌiyo wode, i ba tohuwaa qaxxidi minxxaafiyan uttidosan, ba cenggurssaa xoqqu oottidi ufayssan saꞌaa baqqiiddi tamaaridobaa yootees. Guutta wodiyaappe guyyiyan saaminttan saaminttan naaꞌꞌutoo xannaꞌiyoogaa doommida; issitoo xannaꞌiyoogee naaꞌꞌu saatiyan wurees!

SHIIQUWAA SHIIQIYOOGAANNE KOYETTIYABAA OOTTIYOOGAA

Kingisli shiiquwawu Kawotettaa Addaraashaa baanawu amottees; shin hegee a metiyaaba. A gaariyaaninne kaamiyan utissanawunne hegaappe wottanawu, qassi Kawotettaa Addaraashaa gelissanawunne yaappe kessanawu asi maaddana koshshees. SHin daro ishatinne michoti kayan kayan a maaddiyoogaa gita maatadan xeelloosona. SHiiquwaa saatiyan, Kingisli loytti ezggiiddinne ubba qassi minttettiya qofaa yootiiddi cenggurssaa xoqqissiya miishshaa ba hayttaa matan wottees!

Kingisli guutta wodiyawu xannaꞌi simmidi, Tiꞌokiraase Haggaazo Timirtte Keettan mazggabettanawu qofaa qachiis. He timirtte keettan i nabbabana koyro Geeshsha Maxaafaa nibaabiyaa kifiliyaappe naaꞌꞌu saaminttaa kasetada, meezettiiddi deꞌiyaakkonne a oychaas. I, “Ee, ta ishawu taani baa giishin 30too meezetaas” yaagidi, mammottennan yootiis. I oottidobawu a nashshaas; qassi i tawu nabbabana mala oychaas. I ba Geeshsha Maxaafaa kessidi, ba biradheta Bireeliyaa xuufiyan wottidi, nabbabiyoogaa doommiis. SHin i haroodeegaadan ba biradheta woraqataa bolli qaattennaagaa akeekaas. I nabbabana qaalaa ubbaa hassayees!

Taani ammananawu metootada, afuttaa tigaydda a xeellaas. Kingisli 30too xallaa meezetidi waatidi ubbabaa loytti hassayidakko a oychaas. I, “CHii, taani galla galla baa giishin 30too meezetaas” yaagidi zaariis. Kingisli hassayana gakkanaashin, issi aginappe dariya wodiyawu ba minxxaafiyan uttidi zaaretti zaarettidi nabbabiis.

I ba kifiliyaa Kawotettaa Addaraashan Geeshsha Maxaafaappe nabbabiyo gallassay gakkiis. Kingisli ba nibaabiyaa wurssi simmin, ishatinne michoti ufayttidi kushiyaa keehi baqqidosona; qassi he ooratta tamaaree murttidoogaa beꞌidi daroti yeekkidosona. Timirtte keettan kifiliyaa shiishshiyoogaa yayyiyo gishshawu aggida issi michiyaa zaarettada mazggabettanawu oychaasu. Aybissi? A, “Kingisli danddayidoogaa taanikka danddayana!” yaagaasu.

Kingisli Geeshsha Maxaafaa heezzu laytti xannaꞌi simmidi, ba huuphiyaa Yihoowayyo geppidi Masqqala 6, 2008n xammaqettiis. Uddufune 13, 2014n hayqqana gakkanaashin ammanettidi deꞌida Kingisli saꞌay Gannate gidin sinttappe kumetta wolqqaaninne payyatettan ammanettidi oottanaagaa mintti ammanees. (Isi. 35:5, 6)—Powul Makmenaasi yootidoogaa.