SHEMPPUWAA 13

Xoossaa Ufayssenna Baalata

“Godaa ufaissiyaabai aibakko tamaarite.”—EFISOONA 5:10.

1. Yihooway baakko ehiyoogeeti ay mala asatee? Eti ayyaanaaban tishshi giidi deꞌana bessiyoy aybissee?

YESUUSI: “Aawau tumaappe goinniyaageeti ayyaanaaninne tumatettan goinniyo wodee matattiis; . . . asi baayyo goinnana mala, Aawai koyiyoogeeti hageetu malaa” yaagiis. (Yohaannisa 4:23) Yihooway nena demmidoogaadan, hegaa mala asata demmiyo wode, eta baakkonne ba Naꞌaakko ehees. (Yohaannisa 6:44) Hegee gita bonchoba! Gidikkonne, Seexaanay cimmiyoogan erettidaagaa gidiyo gishshau, Geeshsha Maxaafaa tumaa siiqiyaageeti, “Godaa ufaissiyaabai aibakko” ubbatoo shaakki erana bessees.—Efisoona 5:10; Ajjuutaa 12:9.

2. Tumu haymaanootiyaa worddo haymaanootiyaara walakkiyaageeta Yihooway waati xeelliyaakko qonccissa.

² Siina Deriyaa matan Israaꞌeeleti banttau xoossa medhanaadan Aaroona oychido wode aybi hanidaakko qoppa. Aarooni loꞌꞌo woy iita geennan eta qofaa maayidi worqqaappe maraa medhiis; yaatidi, hegee Yihoowa kalꞌꞌatiyoogaadan yootiis. I: “Wontto GODAA baalaa gallassa gidana” yaagiis. Tumu haymaanootiyaa worddo haymaanootiyaara walakkiyo he hanotan, Yihoowayyo aybinne siyettibeennee? Akkay. I, eeqau goynniya heezzu shaꞌa gidiyaageeti hayqqanaadan oottiis. (Kessaabaa 32:1-6, 10, 28) Hegaappe nuuni ay tamaariyoo? Nuuni Xoossaa siiquwan deꞌanau koyiyaaba gidikko, ‘tunabaa bochana’ bessenna. Qassi tumau mishettiyoogan, tumaa moorana danddayiya aybippenne naagana bessees.—Isiyaasa 52:11; Hizqqeela 44:23; Galaatiyaa 5:9.

3, 4. Erettida meezetanne baalata, Geeshsha Maxaafaa baaso siraataa, qofan wottidi pilggana bessiyoy aybissee?

³ Kaddiyo timirttiyaa teqqiya, kiitettidaageeti hayqqi simmin, Geeshsha Maxaafaa tumaa siiqenna, banttana Kiristtaane giyaageeti denddidosona. Eti eeqa goyno meezeta, baalatanne Kiristtaanetikka bonchana bessees yaagiyo boncho geetettiya gallassata maayidi hegaadan oottiyoogaa doommidoogee azzanttiyaaba. (2 Tasalonqqe 2:7, 10) Ha baalatuppe amaridaageeta neeni beꞌiyo wode, he baalaati Xoossaagaa gidennan, ha alamiyaa ayyaanaa waati qonccissiyaakko akeeka. Xaaxi waaxi xeelliyo wode, alamiyaa baalata issi mala oottiya hanotay deꞌees. Hegeekka, eti ashuwaa amuwaa denttettoosona; qassi “Gita Baabiloono” erissiya malaata gidida, worddo haymaanoote ammanuwaanne iita ayyaanaa oosuwaa minttettoosona.a (Ajjuutaa 18:2-4, 23) Erettida meezeti daroti doommidoy, sheneyiya eeqa goyno meezetuppe gidiyoogaa Yihooway ba huuphe eriyoogaakka hassaya. Hegaa mala baalata i ha wodiyankka ixxiyoogau siree baawa. Yihooway ha allaalliyaa xeelliyo hanotay, nuna keehippe qofissiyaaba gidana bessennee?—2 Yohaannisa 6, 7.

⁴ Nuuni tumu Kiristtaane gidiyoogaadan, daro baalati Yihoowa ufayssennaagaa eroos. SHin nuuni etappe issuwaaninne shaahettennaadan wozanappe murttana koshshees. Hegaa mala baalatun Yihooway ufyttennay aybissakko akeekiyoogee, nuuni Xoossaa siiquwan deꞌennaadan oottiya aybippenne haakkanau murttido murttiyan minnanaadan oottees.

AWAU GOYNNIYOOGEE SUNTTAY LAAMETTIN UFAYSSA MASQQALA GEETETTIIS

5. Yesuusi Tisaase 25n yelettibeennaagaa waatidi erana danddayiyoo?

⁵ Geeshsha Maxaafay Yesuusi yelettido gallassay bonchettidoogaa yootenna. Ubba i yelettido gallassay erettenna. SHin i yelettido biittan balggo wode gidida, Tisaase 25n yelettibeennaagaa erana danddayoos.b Yesuusi yelettido wode, bantta “dorssaa wudiyaa qamma heemmiiddi, dembban aqiya asati [deꞌiyoogaa]” Luqaasi xaafidoogaappe hegaa erana danddayoos. (Luqaasa 2:8-11) Eti kumetta layttaa ‘dembban aqiyaaba’ gidikko, hegaadan xaafiyoogee koshshiyaaba gidenna. Gidikkokka, Beetaliheemen iray bukkiyoonne shachay wodhiyo he balggo wodiyan, dorssa wudee soo geliyo gishshau, henttanchati ‘dembban aqokkona.’ Hegaa bollikka, Roome biittaa kawoy, Augisxxoosi asay qoodettanaadan awaajjido gishshau, Yooseefinne Mayraama Beetaliheeme biidosona. (Luqaasa 2:1-7) Roome haaruwan kasenne undduudiiddi deꞌiya asaa, Kawoy wolqqaama balgguwan bantta yelettido biitti baanaadan azazennaagee qoncce.

6, 7. (a) Ufayssa masqqalaa meezetuppe darotu doomettay aybippee? (b) Ufayssa Masqqalaa wode imotaaninne Kiristtaaneti immiyo imotan deꞌiya dummatettay aybee?

⁶ Ufayssa Masqqalaa doomettay Geeshsha Maxaafaappe gidenna. SHin, Satern geetettiya goshsha xoossa bonchiyo, Saternaaliyaa geetettiya Roometu baalaa milatiya beni eeqa baalatuppe doommiis. Hegaadankka, Niwu Kaatolik Insaykiloppiidee, Mitra geetettiya xoossau goynniyaageetu qoodaadan, Tisaase 25y “ooninne xoonenna awa ayfiyaa yeletaa bonchiyo gallassa” yaagees. Gujjidikka, “Ufayssa Masqqalay doomettidoy, awau goynniyoogee Roome biittan keehippe aakkido wodiyaana” yaagees. Hegeekka, Yesuusa hayquwaappe simmin heezzu xeetu laytta gidiya wodee aadhi simmiina.

Tumu Kiristtaaneti siiqoy denttettin immoosona

⁷ Eeqau goynniyaageeti bantta baalata bonchiyo wode, issoy issuwau imotaa immoosonanne gibiraa kessoosona; hegee ha wodiyankka ufayssa masqqalaa wode meeze gididaba. Asay ha wodiyankka issoy issuwau imota immiyaaba gidikkokka, beni Roome biittan ufayssa masqqalaa wode immiyo imotaappe daro baggay, “Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo” yaagiya, 2 Qoronttoosa 9:7 maaraadaana gidenna. Tumu Kiristtaaneti siiqoy denttettin immoosona; issi gallassa naagidi immana bessiyaabadan etau siyettenna. Qassi hara uray kushiyaa zaarees giidikka naagokkona. (Luqaasa 14:12-14; Oosuwaa 20:35) Hegaa bollikka, eti ufayssa masqqalaa wode dirbbaappenne he wodiyan daroti geliyo wolqqaama acuwaappe shemppidoogan keehippe ufayttoosona.—Maatiyoosa 11:28-30; Yohaannisa 8:32.

8. Xoolinttiyaa paydiyaageeti Yesuusau imotaa i yelettido gallassi immidonaa? Qonccissa.

⁸ SHin issi issi asati, xoolinttiyaa paydiyaageeti Yesuusi yelettido gallassi ayyo imota immibookkonaayye? yaagidi palamettana danddayoosona. Akkay; eta imotay beni wode issi erettida ura bonchiyoogaa bessanau oottiyo meeze gididaba. (1 Kawotu 10:1, 2, 10, 13; Maatiyoosa 2:2, 11) Ubba eti yiidoy Yesuusi yelettido qammaana gidenna. Eti yiyo wode Yesuusi deꞌiyoy mehiyau miyoobaa wottiyo qoriyaana gidennan soona. He wode i biron yelettida gacino naꞌa gidennan, daro agina gidido naꞌa.

TAANI HA BAALAN SHAAHETTANA BESSII?

Baaso siraataa: “Godai ‘Eta giddoppe kiyite; etappe shaahettite. Tunabaakka bochchoppite. Taani inttena mokka ekkana’ . . . yaagees.”—2 Qoronttoosa 6:17.

Erettida baalata woykko meezeta xeelliyaagan nena ne huuphe oychana bessiya issi issi oyshata

Hegee iita ayyaanaa oosuwaa gujjiya, worddo haymaanoote meeziyaappe woykko timirttiyaappe doommidabee?—Isiyaasa 52:11; 1 Qoronttoosa 4:6; 2 Qoronttoosa 6:14-18; Ajjuutaa 18:4.
Hegee issi ura, issi dirijjitiyaa woykko issi biittaa malaataa bessenna ogiyan bonchanaadan oottiyaabee?—Ermmaasa 17:5-7; Oosuwaa 10:25, 26; 1 Yohaannisa 5:21.
Hegee issi biittaa woykko issi zariyaa haraappe xoqqu xoqqu oottiyoobee?—Oosuwaa 10:34, 35; 17:26.
Hegee Xoossaa geeshsha ayyaanaara eqettiya, “sa7aa ayyaanaa” qonccissiyaabee?—1 Qronttoosa 2:12; Efisoona 2:2.
Taani hegan shaahettiyoogee harata xubbiyaabee?—Roome 14:21.
Taani hegan shaahettennan agganau dooriyaaba gidikko, hegaa haratuyyo bonchuwan waatada qonccissana danddayiyaanaa?—Roome 12:1, 2; Qolasiyaasa 4:6.

Kaallidi deꞌiya xiqiseti, erettida baalatuura gayttidaagan denddiya oyshata zaaranau maaddana danddayoosona:

“[Ammanettibeenna Israaꞌeeleti] he asatuura geletti ehettidi, walahettidosonanne; eta de7uwaa wogaa kaallidosona.”—Mazamure 106:35.
“Daro guuttaban ammanettiya urai qassi gitaban ammanettees. Daro guuttaban ammanettenna urai gitabankka ammanettenna.”—Luqaasa 16:10.
“Intte sa7aabaa gidekketa.”—Yohaannisa 15:19.
“Godaa masoofiyaaninne qassi xalahetu masoofiyan maanaukka danddayekketa.”—1 Qoronttoosa 10:21.
“Aihuda gidenna asai oottanau dosiyoogaa intte oottiiddi, shaaramuxanau qaaqqatiyoogan, amuwan, mattuwan, yettan, ushshan, pokkiya eeqau goinniyoogan, de7ido kase aadhdhida wodee intteyyo gidana.”—1 PHeexiroosa 4:3.

YELETTIDO GALLASSAA BONCHIYOOGAA XEELLIYAAGAN GEESHSHA MAXAAFAY YOOTIYOOBAA

9. Geeshsha Maxaafay yootiyo, yelettido gallassaa bonchido baalatun aybi hanidee?

⁹ Naꞌi yelettiyoogee ubbatoo keehi ufayssiyaaba gidikkokka, Xoossaa ashkkarati bantta yelettido gallassaa bonchidoogaa Geeshsha Maxaafay yootenna. (Mazamure 127:3) Hegee balettidi odettennan attidabee? CHii; ayssi giikko, naaꞌꞌu asati, giishin Gibxxe Kawoynne Heeroodis Anttiphaasi yelettido gallassaa bonchidoogee xaafettiis. (Doomettaabaa 40:20-22; Marqqoosa 6:21-29) Gidikkokka, he naaꞌꞌu hanotatunkka iitabay oosettidoogaa, ubba qassi naaꞌꞌantto hanotan Xammaqiya Yohaannisa qooree muucettidoogaa yootees.

10, 11. Beni wode Kiristtaaneti yelettido gallassaa bonchiyoogaa aybidan xeellidonaa? Aybissi?

¹⁰ Ze Worild Buuk Insaykiloppiidiyaa geetettiya maxaafay, “Beni Kiristtaaneti o yeleta gallassa bonchiyoogaanne gidin, eeqa goyno meezedan xeelloosona” yaagees. Leemisuwau, beni wode Giriiketi, yelettiya urassi huuphiyan huuphiyan issi ayyaana meretay he sohuwaa yiyoogaanne sinttappekka a naagiyoogaa ammanoosona. Ze Loor of Berzideys geetettiya maxaafay, he ayyaana merettay, “yeleta gallassay he naꞌaa yeleta gallassaara issi mala gidido issi xoossaara geema gidida ogiyan gayttidaagaa” yaagees. Yeleta gallassay, daro layttau xoolinttiyaa paydiyoogaaranne i deꞌiyo ginaa xeelliyoogaara gayttidaba gididi deꞌiis.

Boncho Geetettiya Gallassatanne Seexaanau Goynniyoogaa

Seexaanau Goynniyoogaa geetettiya haymaanootiyan, keehippe bonchettiya gallassay, issi uri yelettido gallassaa gidiyoogee garamissiyaaba. Aybissi? Seexaanau goynniyaageeti, issi uri bana xoossa ootti xeellanau koyiyaaba gidikko, xoossa gidees giidi ammaniyo gishshataassa. Yaatiyo gishshau, issi uri ba yelettido gallassaa bonchiyoogaa, xoossay yelettido gallassaa bonchiyoogaadan xeelloosona. Daro asau, ba xallaa siqiyo hegaa mala xeelay deꞌennaagee tuma. Gidikkokka, Ze Loor of Berzideys geetettiya maxaafay: “Hara baalati wozanaa ufayssoosona; shin yelettido gallassaa bonchiyoogee bana keehippe xoqqu oottidi xeellanaadan oottees” yaagees.

Seexaanau goynniyaageeti, naꞌꞌantto xekkan bonchiyoy Wolppirgis Nayit geetettiyaanne Halowiine geetettiya baalata. Meeriyam Weebistters Kooliigeet Dikshineeree, Wolppirgis Nayitiyaa “shareechoti gayttanau keerido sohuwaa toggidi boosona yaagidi ammaniyo, Mey Dey geetettiya baalaappe kase qammaa” yaagidi birshshees.

¹¹ Beni wode deꞌida Xoossaa ashkkarati, yelettido gallassaara gayttida meezeti eeqaa goynuwaappenne iita ayyaanaa oosuwaappe doommido gishshau ixxiyoogaa xalla gidennan, bantta kaalliyo kandduwaa maaraappe denddidaagankka ixxoosona. Hegaadan giyoy aybissee? He asati bantta yeleta gallassaa bonchettana bessiya keehi gitabadan xeellenna, bantta huuphiyaa kawushshiya asata.c (Mikiyaasa 6:8; Luqaasa 9:48) Hegaappe, eti alꞌꞌo gidida deꞌo imotau Yihoowa bonchoosonanne galatoosona.d—Mazamure 8:3, 4; 36:9; Ajjuutaa 4:11.

12. Nuuni hayqqiyo gallassay nu yeleta gallassaappe waanidi loꞌꞌo gidana danddayii?

¹² Ammanettidi hayqqidaageeta ubbata Xoossay hassayiyo gishshau, sinttanau eti deꞌuwaa demmanaagee tuma gididaba. (Iyyooba 14:14, 15) Eranchchaa 7:1y: “Waagai al77o gidido lo77o shittuwaappe lo77o sunttai aadhdhees; yelettiyo gallassaappekka haiqqiyo gallassai lo77o” yaagees. Nu “sunttay,” nuuni ammanettidi oottiyo oosuwan Xoossay nuna xoqqu ootti xeelliyoogaa malaatees. Kiristtaaneti bonchanaadan azazettido mexi issi baalay, yeleta gallassaara gidennan hayqo gallassaara gayttidaba; hegeekka a xoqqa “sunttay” nu atotettau waannaba gidido Yesuusa hayquwaara gayttidaba.—Luqaasa 22:17-20; Ibraawe 1:3, 4.

YELETTIYOOGAU GOYNNIYOOGEE PAASIKA GEETETTIYA BAALAU LAAMETTIIS

13, 14. Paasikaa baalaara gayttidaagan aahuwan erettida meezetuyyo denddoy aybee?

¹³ Kiristtoosa dendduwaa baala giidi asay ubbasan yootiyo Paasikaa geetettiya baalau denddoy worddo haymaanootiyaa. Phuuphulleenne harbbaynnoy Paasikaa baalaara waanidi gayttidonaa? Insaykiloppiidiyaa Biritaanikaa geetettiya maxaafay, phuuphullee “ooratta deꞌuwaaranne dendduwaara gayttidaagan keehippe erettida malaata” yaagees. Asay harbbaynnuwaa daro wodiyaassi yelettiyoogau malaata oottidi goꞌettiiddi takkiis. Yaatiyo gishshau, Paasikaa baalay Kiristtoosa dendduwaa bonchiyoogaa milatanaadan laamettidaba gidikkonne, hegee tumuppe yelettiyoogaa bonchiyo baala.e

¹⁴ Yelettiyoogaa bonchiyo hegaa mala sheniyaabaa ba Naꞌaa dendduwaa hassayanau goꞌettiyoogan Yihooway ufyttanee? Mule ufayttenna! (2 Qoronttoosa 6:17, 18) Geeshsha Maxaafay ubba, Yesuusa dendduwaa bonchanaadan azazenna. Yaatiyo gishshau, Paasikaa Yesuusa dendduwaa hassayanau bonchiyoogee, ammanettennaagaa keehippe bessiyaaba.

BONCHO GEETETTIYA HALOWIINE BAALAY BONCHO GIDENNA

15. Halowiine baalau denddoy aybee? He baalaa bonchiyo gallassaa doorido gaasoy ayba gidana danddayii?

¹⁵ SHareechotanne azzaqo malatissiya, daganttiyaabatuuninne hara alleeqettida hegaa malabatun erettida, Halowiine woykko Geeshshatu Ubbaa Gallassaappe kasetiya qammaa giidi bonchiyoogee, beni wode Biritaaniyaaninne Ayrilandde biittan deꞌida, Seltte geetettiya asatun doomettiis. Etu qoodan Hidaare 1 heeran, aginay goobaniyo wode, eti Samahin geetettiya baalaa bonchoosona. Hegau birshshettay “Boniyaa Wurssettaa” yaagiyoogaa. Eti Samahina bonchiyo wodiyan, asaanne ayyaana alamiyaa shaakkiyaabay qaarettiyoobadan ammanoosona. Loꞌꞌo ayyaanatinne iita ayyaanati he wodiyan saꞌan toylattoosona giidikka ammanoosona. Hayqqida asatu shemppoti bantta soo simmoosona giidi qoppoosona. So asay qassi he simmi yiida moytilleta ufayssanau giidi qumaanne ushshaa wottees. Ha wodiyan naati, moytille woykko shareecho malatissiyaabaa maayidi sooppe soo biyo wode, asay eta mokki ekkana xayikko, daganttana yaagidi yashissoosona. Yaatiyoogan, eti halchennan Samahina baalaa bonchiyoogee haꞌꞌikka deꞌanaadan oottoosona.

NE BULLACHAA GEESHSHA OOTTA

16, 17. (a) Ekkanaunne gelanau giigetti uttida Kiristtaaneti, heeran bullachaa wode meeze oottidobata Geeshsha Maxaafaa baaso siraataa maaran pilggana koshshiyoy aybissee? (b) Ruuziyaa woykko hegaadan harabaa laaliyoogaa malatiya meezeta xeelliyaagan, Kiristtaaneti akeekana koshshiyaabay aybee?

¹⁶ Mata wode, “machchiyaagaa cenggurssainne bullashettiyaari cenggurssai sinttanau [Gita Baabilooni] giddon siyettenna.” (Ajjuutaa 18:23) Aybissi? Issi gaasoy, bullacha gallassaappe doommidi aqo deꞌuwaa tunissana danddayiya, a oottiyo iita ayyaanaa oosuwaa gishshataassa.—Marqqoosa 10:6-9.

¹⁷ Meezee ubbasan issi mala gidenna. Qohennaba milatiya issi issi meezetuyyo doomettay, machiyaagaunne bullashettiyaariyyo woykko eta imattatuyyo loꞌꞌo ‘qaada’ amottiyo, Baabiloonetu oosuwaara gayttidaba gidana danddayees. (Isiyaasa 65:11) Hegaa mala meezetuppe issoy ruuziyaa woykko hegaadan harabaa eta bolli laaliyoogaa gujjees. Hegaa mala oosoy, qumay hanqqettida iita ayyaanatu hanqqoy wodhanaadaaninne machiyaagaanne bullashettiyaaro eti qohennaadan oottees giidi ammaniyoogaappe doommiis. Gujjidikka, daro wodiyaappe doommidi, ruuzee yelettiyoogaara, ufayssaaranne adussa wodiyau deꞌiyoogaara geema ogiyan gayttiis. Xoossaa siiquwan deꞌana koyiyaageeti ubbay, hegaa mala moorettida meezetuppe haakkiyoogee qoncce.—2 Qoronttoosa 6:14-18.

18. Bullachaa kessanau keeridaageeta gidin bullachau xeegettidaageetikka kaallana koshshiya Geeshsha Maxaafaa baaso siraatay awugee?

¹⁸ Hegaara issi mala hanotan, Yihoowa ashkkarati bullachaaninne bullachaa giigissotun, Kiristtaaneti bessiyaagaadan bonchettennadan oottiya ha alamiyaa meezetuppe woykko haratu zoriya wozanaa qumꞌꞌana danddayiyaabaappe haakkoosona. Leemisuwau, qohiya cashshay woykko pokko qiree eta doonaappe kiyenna. Qassi mati ekkidanne gelidaageeta gidin, haratakka yiilloyana danddayiya hanotan haasayiyoogaappe woykko qiriyoogaappe haakkoosona. (Leemiso 26:18, 19; Luqaasa 6:31; 10:27) Hegaadankka, eti bantta huuhpiyaa kawushshiyoogaa gidennan, ‘miishshan ceeqettiyoogaa’ qonccissiya wolqqaamanne aaho bullachaa kessiyoogaappekka haakkoosona. (1 Yohaannisa 2:16) Neeni bullachanau qoppidaba gidikko, ne bullachay aadhi simmin neeni hegaa hassayiyo wode, zilꞌꞌettiyooba gidennan ufayttiyooba gidanaadan Yihooway koyiyoogaa dogoppa.f

USHSHAA UYIYO WODE BURCCUKKUWAA DENTTIYOOGEE WOYKKO DOMꞌꞌISSIYOOGEE HAYMAANOOTIYAARA GAYTTIDABEE?

19, 20. Burccukkuwaa denttiyoogaa woykko domꞌꞌissiyoogaa doomettaa xeelliyaagan issi xuufee woygii? Ha meezee Kiristtaanetussi bessennaba gididoy aybissee?

¹⁹ Bullachaaninne issippe shiiqidi miyo uyiyo hegaa mala sohuwan, burccukkuwaa denttiyoogee woykko domꞌꞌissiyoogee meeze gididaba. Intternaashinaal Handdibuuk on Alkkoohool end Kalcher geetettiya 1995n kiyida xuufee: “Ushshsaa burccukkuwaa denttiyoogee woykko domꞌꞌissiyoogee . . . beni wode worddo xoossatuyyo shiishshiyo, boncho geetettiya ushshaa yaarshshuwaa meeziyaappe attidaba gidida . . . ‘gamꞌꞌa!’ woykko ‘ne payyatettaassi!’ yaagidi loꞌꞌobaa amottidi qanttan woossiyoogau malaata” yaagees.

²⁰ Daro asay burccukkuwaa denttiyoogee woykko domꞌꞌissiyoogee, haymaanootiyaara woykko malaara gayttidaba gidiyoogaa akeekennan aggana danddayees. SHin woyniyaa burccukkuwaa xoqqu oottiyoogee, “saluwau” giishin, asappe bolla gidida wolqqau woosaa shiishshiyoogaadan xeelettana danddayees; hegee Geeshsha Maxaafan deꞌiyaagaara moggenna hanotan anjjuwaa demmanau woossiyoogaa.—Yohaannisa 14:6; 16:23.g

“YIHOOWA SIIQIYAAGEETOO, IITABAA IXXITE”

21. Etau denddoy haymaanootiyaara gayttidaba gidana xayikkonne, Kiristtaaneti haakkana bessiya erettida baalati awugeetee? Aybissi?

²¹ Ha wodiyan alamiyan kanddoy shoraa xayi xayi bees; hegeekka, Gita Baabiloona tamaarissiyooban woykko oottiyooban minttettiyooba. Issi issi biittan, attuma asay attuma asaaranne maccaasay maccaasaara asho gaytotettaa polees. He biittati he asatu deꞌuwaa nashshiyoogaa bessiya, shori baynna durssay deꞌiyo baalaa bonchiyoogaa kaafoosona. Hegaa mala hanotay deꞌiyoosan beettiyoogee woy hegaa beꞌiyoogee ‘Yihoowa siiqiya urau’ bessiyaabee? I hegaadan oottiyoogee iitabaa wozanappe ixxiyoogaa bessii? (Mazamure 1:1, 2; 97:10, NW) “Pattennabaa xeellenna mala, ta aifeta teqqa” yaagidi woossida yettanchaagaa mala xeelaa oyqqiyoogee ayba loꞌꞌobee!—Mazamure 119:37.

22. Issi Kiristtaanee issi baalan shaahettana bessiyaakko bessennaakko ba zoriya wozanan goꞌettidi qofaa qachana danddayiyoy awudee?

²² Alamiyaa baalati bonchettiyo wodetun, issi Kiristtaaniyaa hanotay, i he baalaa bonchiyaaba haratuyyo milatenna mala, naagettana bessees. PHauloosi “Simmi intte ai miikkonne, woi ai uyikkonne, woi intte ai oottikkonne, ubbabaa Xoossaa bonchchuwaassi oottite” yaagidi xaafiis. (1 Qoronttoosa 10:31; sinttaa 158-9n deꞌiya, “Eratettan Qofaa Qachiyoogaa” yaagiya saaxiniyaa xeella.) Gidikkokka, issi meezee woykko baalay worddo haymaanootiyaara gayttidaba gidana xayikko, polotikaara woykko ba biittaa siiqiyoogaara gayttidaba gidana xayikko, qassi Geeshsha Maxaafaa baaso siraataa kanttennaagaa gidikko, issi Kiristtaanee hegan shaahettana bessiyaakko woy bessennaakko baayyo qofaa qachana danddayees. Hegaadankka, haratuyyo xube gidenna mala qoppana bessees.

HAASAYIYOOBAANINNE OOTTIYOOBAN XOOSSAA BONCHISSA

23, 24. Yihoowa geeshshatetta maarata xeelliyaagan waatidi loꞌꞌo ogiyan markkattana danddayiyoo?

²³ Daro asay erettida baalata bonchiyoogaa so asaaranne laggetuura gayttiyo loꞌꞌo injjedan xeellees. Issi uri nuuni kaalliyo Geeshsha Maxaafaa maaraa, siiqo bessenna hanotadan woykko bessennabadan bala ogiyan xeelliyaaba gidikko, Yihoowa Markkati so asaaranne laggetuura ufayssiya wodiyaa issippe aattiyoogaa xoqqu ootti xeelliyoogaa kehatettana qonccissana danddayoos. (Leemiso 11:25; Eranchchaa 3:12, 13; 2 Qoronttoosa 9:7) Nuuni siiqiyoogeetuura layttaa giddon ubbatoo issippe gayttiyoogan ufayttoos. SHin Xoossaanne a geeshsha maarata siiqiyo gishshau, hegaa mala ufayssiya wodeti i ixxiyo meezetun moorettana mala koyokko.—Sinttaa 156n deꞌiya, “Tumu Goynoy Daro Ufayssaa Demissees” yaagiya saaxiniyaa xeella.

TUMU GOYNOY DARO UFAYSSAA DEMISSEES

Yihoway “ufayttiya Xoossaa” gidiyo gishshau, a ashkkaratikka ufayttanaadan koyees. (1 Ximootiyoosa 1:11, NW) Hegee tuma gidiyoogee kaalliya xiqisetun qoncciis:

“Ufaittiya asati ubbatonkka bantta de7uwaa aloosona.”—Leemiso 15:15.
“Asi ba de7ido laittan lo77iyaabaa oottiyoogaappenne, ufaittiyoogaappe aadhdhiyaabi aibinne bainnaagaa taani akeekaas. Qassi, asassi au a daafurau waaga gidiyaabi muussaaninne ushshan bana ufaissiyoogaa; hegeekka au Xoossaappe imettida imota.”—Eranchchaa 3:12, 13.
“Lo77o uri lo77obaa halchchees; he lo77o halchchuwan minnidi de7ees.”—Isiyaasa 32:8.
“Daafuranchchatoo, deexuwaa tookkiyaageetoo, ubbati taakko haa yiite; taani [Yesuusi] inttena shemppissana. . . . Aissi giikko, ta qambbarai giiga; qassi taani inttena toossidoogeekka kaushsha.”—Maatiyoosa 11:28, 30.
“Intte tumatettaakka erana; qassi tumatettai inttena ailletettaappe kessana.”—Yohaannisa 8:32.
“Xoossai ufaissan immiya uraa siiqiyo gishshau, qarettiiddi woi dosennan immiyoogaa gidennan, immiya urai huuphen huuphen ba wozanan qoppidobaa immo.”—2 Qoronttoosa 9:7.
“Ayyaanaa aifee, siiquwaa, ufaissaa, sarotettaa, . . . kehatettaa, lo77otettaa.”—Galaatiyaa 5:22.
“Poo7oi lo77otettaa, xillotettaanne tumatettaa ubbaa aifees.”—Efisoona 5:9.

²⁴ Issi issi Yihoowa Markkati, wozanappe eranau koyiyaageetuyyo, Tumuppe Geeshsha Maxaafay Tamaarissiyoy Aaybee?h yaagiya maxaafaa shemppuwaa 16n deꞌiya qofaa qonccissidi, loꞌꞌo ayfiyaa demmidosona. Gidikkonne, nu hoollee he uri tumu goynuwaa kaallanaadan maaddanaassappe attin, palamettidi xoonanaassa gidennaagaa hassaya. Yaatiyo gishshau, ne “haasayai ubba wode, siyanau kehiyaagaanne ufaissiyaagaa,” qassi bonchuwaanne ashkketettaa bessiyaagaa gido.—Qolasiyaasa 4:6.

25, 26. Yelidaageeti bantta naati ammanuwaaninne Yihoowa siiqiyoogan diccanaadan waati maaddana danddayiyoonaa?

²⁵ Nuuni Yihoowa Markkata gidiyoogaadan, loytti tamaarida. Nuuni issi issibata ammaniyoynne oottiyoy, qassi harabatuppe haakkiyoy aybissakko eroos. (Ibraawe 5:14) Yaatiyo gishshau, yelidaageetoo, intte naati Geeshsha Maxaafaa baaso siraatata akeekanaadan tamaarissite. Hegaadan oottiyoogan, eta ammanuwaa mintteeta; bantta ammanuwaa xeelliyaagan oychiyaageetuyyo Geeshsha Maxaafan baasettida zaaruwaa immanaadan maaddeeta; qassi Yihooway eta siiqiyoogaa ammanettenaadan ootteeta.—Isiyaasa 48:17, 18; 1 PHeexiroosa 3:15.

²⁶ Xoossaayyo “ayyaanaaninne tumatettan” goynniyaageeti ubbay, Geeshsha Maxaafan baasettibeenna baalatuppe haakkiyoogaa xalla gidennan, bantta deꞌo ubban ammanettidaageeta gidanaukka baaxetoosona. Ha wodiyan daroti ammanettiyoogaa danddayettennabadan xeelloosona. SHin Xoossaa ogeti ubbatoo aybippenne aadhiyoogaa, kaalliya shemppuwan beꞌana.

a Sinttaa 148-9n deꞌiya, “Taani ha Baalan SHaahettana Bessii?” yaagiya saaxiniyaa xeella. Asay boncho giyo gallassatanne baalata xeelliyaagan, Yihoowa Markkatun Attamettida Xuufetu Indekisiyan keehi darotubay deꞌees.

b Geeshsha Maxaafaa wodiyaa qoodaynne alamiyaa taarikee bessiyoogaadan, Yesuusi yelettidoy 2 K.K., Ayhudatu qoodan Etaaniima geetettiya, ha wodiyaa qoodan qassi Masqqalaa/Xiqimitaa agina heeraana milatees.—Yihoowa Markkatun attamettida, Geeshsha Maxaafaa Loytti Akeekiyoogaa Paydo 2, sinttaa 56-7 xeella.

c Sinttaa 150n deꞌiya, “Boncho Geetettiya Gallassatanne Seexaanau Goynniyoogaa” yaagiya saaxiniyaa xeella.

d Issi maccaasiyaa naꞌa yela simmada Xoossaayyo nagaraa yarshshuwaa shiishshanaadan Higgiyaa maachay azazees. (Wogaabaa 12:1-8) Higgee azaziyo ha allaallee, asay ba naatussi nagaraa laatisiyoogaa Israaꞌeeletussi loytti akeekissiyaaba; qassi eti naꞌa yeliyoogaa bessiya ogiyan xeellanaadan maaddiisinne yelettido gallassaara gayttida eeqaa goyno meezeta kaallennaadan teqqiis.—Mazamure 51:5.

e Ostter (Isttere) geetettiyaara beni yelettiyoogaa macca xoossa. Zi Dikshineri of Mitiyoloji giyo maxaafay, “a phuuphulliyaa dosiya, aginaa giddon deꞌiya harbbaynnee goda gidiyoogaa, qassi issi issitoo harbbaynnuwaa huuphee deꞌiyooba milatada qoncciyaaba gidiyoogaa” yootees.

f Xiqimita 15, 2006 Wochiyo Keelan, sinttaa 18-31n deꞌiya, bullachaara gayttidabaanne asay issippe shiiqidi miyoonne uyiyoogaabaa oyqqida heezzu huuphe yohota xeella.

g Wochiyo Keelaa, Usuppune 15, 2007, sinttaa 30-1 xeella.

h Yihoowa Markkatun attamettidaagaa.

ERATETTAN QOFAA QACHIYOOGAA

Issi issi wode, nuuni Yihoowa siiqiyoogaanne Geeshsha Maxaafaa baaso siraataa akeekidi oosuwan peeshshiyoogaa xeelliyaagan paacciya hanotay merettana danddayees. Leemisuwau, issi ammanennaagee Kiristtaane gidida ba aqo laggiyaa, alamiyaa asay bonchiyo baala gallassi ba dabbotuura qumaa maanaadan shoobbana danddayees. Issi issi Kiristtaanetu zoriya wozanay he shoobiyaa ekkanau eta qumꞌꞌennan aggana danddayees; harata qassi qumꞌꞌana danddayees. Issi Kiristtaanee he shoobiyaa ekkiyaaba gidikko, a hanotay i he baalaa bonchanau gidennan, dabbotuura qumaa maana xallau biidoogaa qonccissiyaagaa gidana koshshees.

Issi Kiristtaanee he sohuwaa baanaappe kase, dabboti baalaa bonchiyoogaara gayttidabaa oottiyo wode, i woy a ixxis giin merettana danddayiya yeellayiya hanotaa, ba aqo laggiyaassi bonchuwan yootiyoogee eratetta. Ammanenna aqo laggee hara wode biidi gayttanau qofaa qachana danddayees.—1 PHeexiroosa 3:15.

Ammanenna azinay ba machiyaa yootiyoobaa siyi makkidikka, banaara baana bessees giyaaba gidikko, waatana danddayettii? I so asau huuphe gidiyoogaadan, ba soo asau koshshiya qumaa kunttiyo aawatettay deꞌiyoogaa qoppana danddayausu. (Qolasiyaasa 3:18) Ha hanotan, qumay giigidoy a dabbotusoona. Ubba a he sohuwan loꞌꞌo hanotan markkattana danddayausu. Baala gallassi miido gishsha xallau, he qumay tunaba gidenna. (1 Qoronttoosa 8:8) He Kiristtaanee he qumaa awudenne miyo qumadan xeellana danddayees. SHin baalaara gayttida sarotan, yettan, ushsha burccukkuwaa denttiyoogaaninne hegaa mala haraba aybiininne shaahettenna.

Hara qoppana bessiyaabay qassi, hegaa mala sohuwan beettiyoogee haratu bolli gattana danddayiyo hanotaa. Issi Kiristtaane machiyaa, a he gallassi ammanenna dabbotukko biidoogaa eriyo wode, harati xubettana danddayiyoogaa akeekana koshshees.—1 Qoronttoosa 8:9; 10:23, 24.

Hegaa bollikka, dabbotu sugettay he Kiristtaane machiyaa ba equwaa laammanaadan oottana danddayii? Harata ufayssanau koyiyoogee, he uri ba equwaa laammanaadan oottana danddayees! Yaatiyo gishshau, ba kahaa moorana danddayiyaabaa gujjada, ha hanotata ubbaa kasetada akeekan qoppiyoogee keehippe koshshiyaaba.—Oosuwaa 24:16.

Ufayssa Masqqalaa wode Damoozaa Bolli Gujjidi Immiyoobaa Taani Ekkana Bessii?

Issi Kiristtaaniyaa ootissiyaagee, Ufayssa Masqqalaa wode ayyo imota woykko damoozaa bolli gujjidi immana danddayees. He Kiristtaanee hegaa ixxis gaana bessii? Bessennan aggana danddayees. Ubba he ootissiyaagee, damoozaa bolli gujjidoogaa ekkida uri Ufayssa Masqqalaa bonchiyaabadan qoppennan aggana danddayees. Hegee, ootissiyaagee ba dirijjitee demmido woriyaappe ubba oosanchatuyyo immiyooba gidana danddayees. Woykko, damoozaa bolli gujjidobay, laytta kumettaa oottido oosuwau galatiyoogaa bessanaassa, qassi minnidi oottanaadan minttettanaassa gidana danddayees. Ootissiyaagee oosanchatu ubbaassi, giishin Ayhudatussi, Islaamatussi woykko haratussi, eti Ufayssa Masqqalaa bonchin aggin hegaa qoppennan immiyooba gidana danddayees. Hegaa gishshau, he imotay issi baalaaranne he baalay bonchettiyo wodiyaara gayttidaba gidiyoogee, issi Yihoowa Markkay hegaa ekkennaadan oottees giyoogaa gidenna.

He imotay imettidoy issi haymaanoote baalaa gaasuwaana gidikkonne, he imotaa ekkiyaagee he haymaanootiyan deꞌiya asatuugaa mala xeelaa oyqqiis giyoogaa gidenna. Yihoowa Markkaara oottiya issi uri woykko a dabbotuppe issoy, “Neeni ha baalaa bonchennaagaa taani erays; shin taani neeyyo ha imotaa immana koyays” gaana danddayees. He Kiristtaaniyaa zoriya wozanay qumꞌꞌennaba gidikko, baalaara gayttida qaalaa goꞌettennan he imotaa galatidi ekkanau koyana danddayees. (Oosuwaa 23:1) Geella harata hanqqetissennabaa milatiyo wode, he Kiristtaanee hiillan ba equwaa qonccissana danddayees.

Gidoppe attin, he Kiristtaanee ba ammanuwan shugo woykko miishsha demmanaassi giidi ba equwaa laammees giyo qofan immiyoogaa bessiya imota gidikko waatana danddayettii? Hegaa mule ekkanau bessenna. Nuuni Yihoowa xallau aqana koyiyoogee erettidaba.—Maatiyoosa 4:8-10.