Haratussi Woossana Koshshiyogaa Hassaya

1. Yihoowi nu woosaa xoqqu ootti xeelliyogaa waati eriyoo?

WOOSAY malaalissiya imota. Hagaa qoppa: Kiitanchchati issi issibaa oottanaadan Yihoowi etawu aawatettaa immiis. (Maz. 91:11) I ba Naꞌaa Yesuusassikka gita aawatettaa immiis. (Mat. 28:18) Shin, nu woosaa siyanaadan I hara urawu aawatettaa immidee? Chiikka. Yihoowi ba huuphen nu woosaa siyanawu dooriis. ‘Woosaa siyiya’ Yihoowi nuuni issoy issoy woossiyo woosaa siyees.—Maz. 65:2.

2. Haratuyyo woossiyogaara gayttidaagan kiitettida Phawuloosi nuussi leemiso gidiyabaa ay oottidee?

² Nuuni nuna hirggissiyabaa Yihoowawu woosan laꞌatettan yootana danddayikkonne, haratussikka woossana koshshees. Kiitettida Phawuloosi hegaadan oottiis. Leemisuwawu, I Efisoona galchchawu hagaadan giis: “Intteyyo Xoossaa woossiyogaakka aggabeykke.” (Efi. 1:16) Phawuloosi issi issi urawukka woossiis. Leemisuwawu, I Ximootiyosawu hagaadan giis: “Taani qamminne gallassi wozanappe woossiyo wode nena ubbatoo hassayaydda, . . . Xoossaa galatays.” (2 Xim. 1:3) Phawuloosi ba xalaalawu woossanaadan oottiya metoy A gakkiiddi deꞌees. (2 Qor. 11:23; 12:7, 8) Shin, I haratussi woossanawu wodiya bazziis.

3. Nuuni haratussi woossiyogaa dogana danddayiyoy aybissee?

³ Nuuni haratussi woossiyogaa issi issitoo dogana danddayoos. Aybissi? Sabrinoa giyo michchiya issi gaasuwa qonccissaasu. A hagaadan gaasu: “Ha alamiyan deꞌoy keehi bichchaarissees. Nuuni nu metuwabaa qoppidi nuussi koshshiyabaa xalaalaa woossana danddayoos.” Neenikka issi issitoo hegaadan ootta eray? Yaatikko, ha huuphe yohoy nena maaddana danddayees. Ha huuphe yohoy (1) neeni haratussi woossiyogee keehi koshshiyoy aybissakko qonccissees, qassi (2) neeni hegaadan waata oottana danddayiyakko amarida qofaa yootees.

NUUNI HARATUSSI WOOSSANA KOSHSHIYOY AYBISSEE?

4-5. Nuuni haratussi woossiyo woosay “wolqqaamabaa” waati oottana danddayii? (Yaaqooba 5:16)

⁴ Haratussi woossiyogee “wolqqaamabaa oottees.” (Yaaqooba 5:16 nabbaba.) Haratussi woossiyogee eta hanotay laamettanaadan tumuppe maaddana danddayii? Ee, maaddana danddayees. Yesuusi, kiitettida Pheexiroosi A kaddanaagaa eriyo gishshawu hagaadan giis: “Ne ammanoy xayenna mala taani wozanappe woossaas.” (Luq. 22:32) Nuuni woossiyogee issi ura hanotay laamettanaadan maaddana danddayiyogaa Phawuloosikka eriis. I Roomen mooribeennabaa gaasuwan qashettido wode, Pilimoonawu hagaadan giis: “Intte woosaappe denddidaagan, taani qashuwappe birshshettada inttekko beennan waaya aggana.” (Plm. 22) Hanidabaykka hegaa. Phawuloosi qashuwappe sohuwara birshshettidi sabbakiyogaa zaarettidi doommiis.

⁵ Shin, hegaa giyogee nuuni woossiyogan Yihoowi nuussi aybanne oottanaadan A wolqqanttana danddayoos giyogaa gidenna. Yihoowi ba ashkkarati woossiyobay eta ay keena qofissidaakko eranawu koyees; qassi issi issitoo eti oychchidoogaadan oottees. Hegaa eriyogee nuuni issi metuwa xeelliyagan Yihoowa wozanappe woossanaadaaninne I hegaa ubbaappe loꞌꞌo ogiyan giigissanaagaa ammanettanaadan nuna maaddana danddayees.—Maz. 37:5; 2 Qor. 1:11.

6. Haratuyyo woossiyogee nuuni etawu qoppiyogaa bessanaadan waati oottii? (1 Pheexiroosa 3:8)

⁶ Haratussi woossiyogee nuuni ‘qarettiyageeta’ gidanaadan maaddees. (1 Pheexiroosa 3:8 nabbaba.) Qarettiya uri hara asa metuwa akeekeesinne A maaddanawu issibaa oottanawu koyees. (Mar. 1:40, 41) Mikaaꞌeela giyo galchchaa cimay hagaadan giis: “Taani haratussi koshshiyabawu woossiyo wode, eta metuwa loytta akeekays; qassi hegee taani eta kaseegaappe aaruwan siiqanaadan oottees. Taani hegaadan oottiyogaa eti erennaba gidikkonne, etakko keehi shiiqidabadan tawu siyettees.” Richardda giyo galchchaa cimay hara goꞌꞌaakka yootiis. I hagaadan giis: “Nuuni issi urawu woossiyogee A maaddanawu issibaa oottanaadan nuna denttettees.” I gujjidikka hagaadan giis: “Nuuni woossido urawu issibaa oottiyo wode, A xeelliyagan nu woossidobay simmanaadan maaddoos giyogaa mala.”

7. Haratussi woossiyogee nu metuwa bessiyagaadan xeellanaadan waati maaddana danddayii? (Piliphphisiyusa 2:3, 4) (Misiliyakka xeella.)

⁷ Nuuni haratussi woossiyogee nu metuwa bessiyagaadan xeellanaadan maaddees. (Piliphphisiyusa 2:3, 4 nabbaba.) Nuuni Dabloosi haariyo alamiyan deꞌiyo gishshawu, nuna ubbaa metoy gakkees. (1 Yoh. 5:19; Ajj. 12:12) Nuuni haratussi ubbatoo woossiyo wode, ‘nu ishati ubbay nuugaadan waayettiiddi gencciyogaa’ hassayoos. (1 Phe. 5:9) Katiriino giyo aqinyiya hagaadan gaasu: “Taani haratussi woossiyogee etakka metoy gakkiyogaa hassayanaadan maaddees. Taani hegaa hassayiyo wode, ta metuwabaa keehi qoppiyogaa aggays.”

NU WOOSAY ETAWU KOSHSHEES

8. Nuuni oossi woossana danddayiyoo?

⁸ Nuuni oossi woossana danddayiyoo? Sahettiyageetussi, timirtte keettan harati qillicciyonne iitabaa oottanaadan pacciyo yelagatussi, woy cimatettaa gaasuwan metootiyageetussi woossana danddayoos. Nu ishanttuppenne michchonttuppe daroti so asaappe woy kawotettaappe gakkiya naaquwa genccoosona. (Mat. 10:18, 36; Oos. 12:5) Qassi nu ishanttuppe amaridaageeti polotikaa gaasuwan woppay xayido gishshawu, bantta keettaa aggidi baqatana koshshiis. Harati qassi meretay gattiyo daafaban qohettidosona. Nuuni he ishanttanne michchontta erennan aggana danddayoos. Shin nuuni etawu woossiyo wode Yesuusi, “issoy issuwa siiqite” giidi azazido azazuwa kaalliyogaa bessoos.—Yoh. 13:34.

9. Yihoowa dirijjitiyan sintta xeera gididi kaalettiya ishanttussinne eta machchotussi nuuni woossana koshshiyoy aybissee?

⁹ Yihoowa dirijjitiyan sintta xeera gididi kaalettiyageetuyyokka woossana danddayoos. Hegeeti Oosuwa Kaalettiya Citaanne eta maaddiyageeta, Macara Biiruwa Kontteta, macara biiruwan ooso kifileta xomoosiyageeta, woradaa xomoosiyageeta, galchchaa cimatanne galchchawu haggaaziyageeta. He ishanttuppe daroti bantta metuwa gencciiddi nuna maaddanawu minni oottoosona. (2 Qor. 12:15) Leemisuwawu, woradaa xomoosiya Marka giyo ishay hagaadan giis: “Tana yelidaageeti cimidoogeenne taani etappe keehi haakkada deꞌiyogee tana keehi unꞌꞌissees. Eti naaꞌꞌaykka sahettoosona. Ta michchiyanne I azinay etawu koshshiyabaa kunttikkonne, taani yaa baada eta loytta maaddana danddayenna gishshawu keehi azzanays.” Minni oottiya ha ishantta hirggissiya ubbabaa nuuni erennaba gidikkonne, etawu woossana koshshiyogaa hassayoos. (1 Tas. 5:12, 13) He ishantti banttawu imettida aawatettaa aggennan polanaadan ammanettidi maaddiya eta machchotussikka nuuni woossana danddayoos.

10-11. Nu ishanttussinne michchonttussi ubbawu woossiyogee Yihoowa ufayssii? Qonccissa.

¹⁰ Qommoora beꞌidoogaadan, nu ishanttussinne michchonttussi nuuni darotoo woossoos. Leemisuwawu, issi uraabaa xalaalaa qoppidi gidennan, Yihoowi qashettidaageeta maaddanaadan woy siiqiyo uri hayqqin kayyottiyageeta minttettanaadan woossana danddayoos. Donald giyo galchchaa cimay hagaadan giis: “Metuwa gencciiddi deꞌiya daro ishanttinne michchontti deꞌiyo gishshawu issi issitoo ubbawu woossoos; qassi waayettiya ubbawukka woossana danddayoos.”

¹¹ Hegaa mala woosay Yihoowa ufayssii? Ufayssiyogee qoncce! Nuuni nu ishanttussinne michchonttussi huuphiyan huuphiyan aybi koshshiyakko erokko. Hegaa gishshawu, nu ishanttussinne michchonttussi ubbawu woossiyogee bessiyaba. (Yoh. 17:20; Efi. 6:18) Hegaa mala woosay nuuni nu ‘ishata ubbaa siiqiyogaa’ bessees.—1 Phe. 2:17.

ISSI ISSI URAWU WOOSSIYO WODE

12. Akeekan xeelliyogee nuuni issi issi urawu woossanaadan waati maaddana danddayii?

¹² Akeekan xeella. Nu ishanttussinne michchonttussi ubbawu woossiyogaa xalla gidennan, eta sunttaa xeesidi issi issi urawu woossana koshshees. Wolqqaama harggiyara baaxetiya uri intte galchchan deꞌii? Timirtte keettan aara tamaariyageeti iitabaa oottanaadan paaccin hidootaa qanxxida yelagay intte galchchan deꞌii? ‘Yihoowa seeraaninne zoriyan’ naata banttarkka dichchiya yelidaageeti deꞌiyonaa? (Efi. 6:4) Neeni akeekan xeelliyagaa gidikko, harata loytta siiqananne etawu qarettana; qassi hegee neeni etawu woossanaadan nena denttettana.b—Rom. 12:15.

13. Nunaara kase mule gaytti erennaageetussi woossanawu waatana danddayiyoo?

¹³ Haratu sunttaa xeegada etawu woossa. Nunaara kase mule gaytti erennaageetussikka hegaadan woossana danddayoos. Leemisuwawu, Kiriyamiya, Erttira, Ruusiyanne Singgaapoore mala biittatun qashettida nu ishanttanne michchontta qoppa. Qashuwan deꞌiyageetu sunttaa jw.org saytiyan demmana danddayaasa.c Briyan giyo woradaa xomoosiya ishay hagaadan giis: “Taani qashettida issi ishaa woy michchee sunttaa xaafada, hegaa cenggurssaa xoqqu oottada xeegiyogee taani buzuwan woossiyo wode he uraabaa hassayada woosan qonccissanaadan maaddiis.”

14-15. Nuuni dummayidi waati woossana danddayiyoo?

¹⁴ Dummayada woossa. Qommoora abaa denttido Mikaaꞌeeli hagaadan giis: “Qashettida ishanttubaa jw.org saytiyan taani nabbabiyo wode, eta sohuwan deꞌiyakko tawu aybi siyettaneeshsha gaada qoppanawu malays. Ta machcheebay tana hirggissanaagaa erays; qassi iyyo koshshiyabaa kunttanawu koyays. Yaaniyo gishshawu aqo oyqqida, qashettida ishanttuyyo taani woossiyo wode dummayada etawu ay woossana danddayiyakko eranaadan hegee tana maaddiis.”—Ibr. 13:3.

¹⁵ Qashettida nu ishanttu deꞌoy ay malakko qoppiyo wode etawu dummayidi woossana koshshiyo harabatakka akeekana danddayoos. Leemisuwawu, qasho keettaa naagiyageeti etawu kehanaadan, qassi kawotettaa sunttati nu ishantti laꞌatettan goynnanaadan eeno gaana mala woossana danddayoos. (1 Xim. 2:1, 2) Qashettida nu ishanttu ammanuwan heeran deꞌiya galchchay minettanaadan woy qashettida ishantti bessiyo loꞌꞌo eeshshaa ammanennaageeti akeekidi nu yootiyo mishiraachchuwa siyanaadan woossana danddayoos. (1 Phe. 2:12) Qassi hara metuwa gencciiddi deꞌiya nu ishanttussinne michchonttussi woossiyo wodekka hegaadan oottana danddayoos. Akeekan xeelliyogan, haratu sunttaa xeegidi woossiyogaaninne dummayidi woossiyogan wozanappe ‘issoy issuwa siiqiyogaa’ bessana danddayoos.—1 Tas. 3:12.

NU WOOSAA BESSIYAGAADAN XEELLANA KOSHSHEES

16. Nu woosaa bessiyagaadan waati xeellana danddayiyoo? (Maatiyosa 6:8)

¹⁶ Nuuni qommoora beꞌidoogaadan, nu woossiyo woosay issi ura hanotay laamettanaadan maaddana danddayees. Gidikkonne, nu woosaa bessiyagaadan xeellana koshshees. Nuuni woossiyo wode Yihoowi erennabaa awu yootiiddi deꞌennaagaa, qassi I issibaa waati oottanaakko nu zoree awu koshshennaagaa nuuni hassayana bessees. Yihoowi ba ashkkaratussi koshshiyabaa eti woy nu woossanaappe kasekka erees. (Maatiyosa 6:8 nabbaba.) Yaatin, nuuni haratussi woossana koshshiyoy aybissee? Nuuni ha huuphe yohuwan beꞌido gaasotu xalaalawu gidennan, haratussi keehi qoppiyogaa bessiyo oge gidiyo gishshawukka etawu woossoos. Siiqoy nuuni issoy issuwawu woossanaadan denttettees. Qassi Yihoowi ba ashkkarati siiquwa bessiyogan A milatiyogaa beꞌiyo wode keehi ufayttees.

17-18. Nu mala Kiristtaanetussi woossiyogaa xeelliyagan leemisuwa yoota.

¹⁷ Nu woosay issi hanotay laamettanaadan oottennabaa milatikkokka, nuuni woossiyogee nu ishanttanne michchontta siiqiyogaa bessees; qassi hegaa Yihoowi xoqqu ootti xeellees. Hegaa ha leemisuwan qonccissana danddayoos: Issi guutta naꞌaynne naꞌiya deꞌiyo so asaa qoppa. Naꞌay sahettidi hiittan zinꞌꞌiis. Yaatin naꞌiya ba aawaa hagaadan gaada woossaasu: “Hayyanaa ta ishaayyo issibaa oottarkkii. I keehi sahettees!” Aaway kasetidi maaddiiddi deꞌees; I ba naꞌaa siiqees; qassi awu koshshiyabaa loytti kunttees. Shin, kaalo naꞌiya ba ishawu keehi qoppada A maaddanaadan woossiyogaa beꞌidi aaway keehi ufayttees.

¹⁸ Hegaadan, nuuni issoy issuwawu qoppanaadaaninne woossanaadan Yihoowi nuna minttettees. Nuuni yaatiyo wode, nu woosay nuuni nu xalaalaa siiqiyogaappe haratussi qoppiyogaa qonccissees; qassi Yihoowi hegaa xoqqu ootti xeellees. (2 Tas. 1:3; Ibr. 6:10) Hegaa bollikka, nuuni beꞌidoogaadan, issi issitoo nu woosay issi ura hanotay laamettanaadankka oottana danddayees. Simi yaakko, issoy issuwawu woossanawu nuussi danddayettida ubbabaa oottiyageeta gidoos.