XANNAꞌIYO HUUPHE YOHUWA 42
MAZAMURE 44 Unꞌꞌettida Ura Woosaa
Kaseegaappe Aaruwan Woossanawu Waatana Danddayay?
“ Abeet GODAU, kumetta wozanaappe neeyyo waassaas; taayyo alla.”—MAZ. 119:145.
TAMAARANABAA
Geeshsha Maxaafan odettida woosata wotti dentti qoppiyogee loytti woossanaadan nuna waati maaddana danddayiyakko beꞌana.
1-2. (a) Nuuni woossiyo wode nu wozanaabaa Yihoowawu loytti yootennaadan aybi diggana danddayii? (b) Yihoowi nu woosaa loytti ezggiyogaa waati eriyoo?
NEENI ubbatoo issi malabaa woossiyabadaaninne ne wozanaabaa darotoo Yihoowawu yootennabadan neeyyo siyettii? Yaanikko, hegaadan siyettiyoy ne xalaalaassa gidenna. Nu ubbawukka oosoy dariyo gishshawu, qantta woosa xalaalaa woossidi adussi woossiyogaa issi issitoo dogana danddayoos. Woy nuuni Yihoowa haasayissanawu bessennabadan qoppidi nu wozanaabaa awu yootanawu metootana danddayoos.
2 Nuuni makkisidi woossiyogaa gidennan, nuna ziqqi oottidi wozanappe woossiyogaa Yihoowi xoqqu ootti xeelliyogaa Geeshsha Maxaafay yootees. I “banttana ziqqissiyaageetu” woosaa siyees. (Maz. 10:17) I nuussi keehi qoppiyo gishshawu, nuuni woossiyo ubbabaa loytti ezggees.—Maz. 139:1-3.
3. Ha huuphe yohuwan nuuni pilggana oyshati awugeetee?
3 Ha huuphe yohuwan kallidi deꞌiya oyshata beꞌana: Nuuni Yihoowa woossanawu mule yayyana koshshennay aybissee? Loytti woossanawu waatana danddayiyoo? Geeshsha Maxaafan odettida wozanappe woossido woosata wotti dentti qoppiyogee kaseppe loytti woossanaadan nuna waati maaddana danddayii? Qassi keehi unꞌꞌettido gishshawu nu wozanaabaa qonccissanawu metootikko waatana danddayiyoo? Ha oyshatu zaaruwa ane beꞌoos.
YIHOOWA WOOSSANAWU MULE YAYYOPPA
4. Nuuni yayyennan Yihoowa woossanaadan aybi maaddana danddayii? (Mazamure 119:145)
4 Yihoowi nuussi ushachchanaadan koyiya ammanttiya dabbo gidiyogaa nuuni akeekikko, yayyennan A woossana danddayoos. Mazamure 119 xaafidaagee hegaadan Yihoowara dabbotaa minttanawu baaxetiis. Deꞌuwan A metoy gakkiis. Issi issi asati abaa worddobaa haasayidosona. (Maz. 119:23, 69, 78) Qassi I ba oottido mooruwa gaasuwankka issi issitoo hidootaa qanxxiis. (Maz. 119:5) Gidikkonne, I ba wozanaabaa Yihoowassi yootanawu yayyibeenna.—Mazamure 119:145 nabbaba.
5. Nuuni nubaa iitabaa qoppiyogee woossiyogaa agganaadan oottana koshshennay aybissee? Leemisuwa yoota.
5 Yihoowi gita nagaraa oottidaageetikka A woossanaadan koyees. (Isi. 55:6, 7) Yaaniyo gishshawu, nuuni nubaa iitabaa qoppiyogee woossiyogaa agganaadan oottana bessenna. Leemisuwawu, neeni erenna ooratta sohuwa manddaridabadan ane qoppa. Biidosan ogiya baladasa. Shin he heeraa asi likke ogiya nena bessana danddayees. Neeni ogiya balido gishshawu yeellatada he izaawa maaduwa oychchanawu yayyana koshshii? Koshshennaagee qoncce! Hegaadankka, nuuni issi issitoo ay kuuyanaakko erennaba woy nagaraa oottidaba gidikkokka, yayyennan Yihoowa woossana danddayoos.—Maz. 119:25, 176.
LOYTTA WOOSSANAWU WAATANA DANDDAYAY?
6-7. Yihoowa eeshshatubaa wotti dentti qoppiyogee nuuyyo siyettiyabaanne nu wozanaabaa woosan Yihoowawu yootanaadan nuna waati maaddana danddayii? Leemisuwa yoota. (Tohossa qofaakka xeella.)
6 Nuussi siyettiyabaanne nu wozanaabaa woosan Yihoowawu yootiyo wode kaseegaappe aaruwan akko shiiqoos. Yaatin, hegaadan woossanawu nuna aybi maaddana danddayii?
7 Yihoowa eeshshatubaa wotta dentta qoppa.a Nuuni Yihoowa eeshshatubaa kaseegaappe aaruwan wotti dentti qoppikko, nuuyyo siyettiyabaanne nu wozanaabaa awu loytti yootana danddayoos. (Maz. 145:8, 9, 18) Makkalanchcha aaway deꞌiyo Kiristiino giyo michchee hanotaa beꞌa. A hagaadan gaasu: “Siiqiya Aawadan Yihoowa haasayissiyogee tana keehi metiis. Ta oottido nagaraa gaasuwan Yihoowi tana aggidabadan tawu siyettiis.” Yaatin Yihoowa eeshshatuppe O maaddidaagee awugee? A hagaadan gaasu: “Aggenna Yihoowa siiqoy taani woppu gaanaadan oottiis. I tana ubbatoo maaddiyogaa haꞌꞌi taani eraas. Taani nagaraa oottiyabaa gidikkokka, I tana siiqeesinne maaddees. Hegee tana keehi ufayssidabaakka azzanttidabaakka awu yootanaadan maaddiis.”
8-9. Woossanaappe kase qoppiyogee demissiyo goꞌꞌay aybee? Leemisuwa yoota.
8 Woyga woossanaakko qoppa. Woossanaappe kase amarida oyshata nena oychchana danddayaasa. Leemisuwawu: ‘Tana haꞌꞌi gakkiiddi deꞌiya metoy aybee? Taani atto gaana koshshiyo asi deꞌii? Taani xoonanawu Yihoowa maadoy koshshiyo paacee tana gakkiiddi deꞌii?’ (2 Kaw. 19:15-19) Qassi Yihoowa sunttaa, A Kawotettaanne A sheniya xeelliyagan woygi woossanaakko qoppiyogan Yesuusa leemisuwa kaallana danddayoos.—Mat. 6:9, 10.
9 Aliskko giyo michchiya I azinaa wolqqaama guuggiya kansseree oyqqidoogaa erido wode woossanawu metootaasu. A hagaadan gaasu: “Taani keehi unꞌꞌettido gishshawu woossiyogaa doommiyo wode tawu giyobay xayees.” Yaatin O maaddidabay aybee? A hagaadan gaasu: “Woossanaappe kase Yihoowawu yootanabaa qoppidoogee tabaanne ta azinaa harggiyabaa xalaalaa woossennaadan tana keehi maaddiis. Taani yaatiyo wode woppu gays; qassi dumma dummabaa xeelliyagan Yihoowa loytta woossana danddayays.”
10. Nuuni adussidi woossana koshshiyoy aybissee? (Misiliyakka xeella.)
10 Adussada woossa. Qanttan woossiyogeekka Yihoowakko shiiqanawu maaddiyogee tuma; shin wodiya bazzidi adussidi woossiyogeeb nuussi siyettiyabaa Yihoowawu loytti yootanaadan maaddana danddayees. Aliskki azinay Eliyaji hagaadan giis: “Taani gallassaa giddon darotoo woossanawu baaxetays; shin wodiya bazzada adussada woossidoogee Yihoowakka shiiqanaadan tana maaddiis. Taani ta woosaa wurssana gakkanaashin Yihoowi danddayan ezggees; yaaniyo gishshawu, wodiya bazzada woossana danddayays.” Ne qofay shaahettennan woossana danddayiyo wodiyanne sohuwa doora; neeni adussa woosaa woossiyo wode geella cenggurssaa sissayddakka woossana danddayaasa. Yaatada ubbatoo hegaadan woossanawu baaxeta.
Adussada woossanawu injjetiya wodiyanne sohuwa doora (Mentto 10 xeella)
GEESHSHA MAXAAFAN ODETTIDA WOZANAPPE WOOSSIDO WOOSATA WOTTA DENTTA QOPPA
11. Geeshsha Maxaafan odettida wozanappe woossido woosata wotti dentti qoppiyogee nuna waati maaddii? (“Etaagaadan Neeyyokka Siyettii?” giya saaxiniyakka xeella.)
11 Geeshsha Maxaafan odettida wozanappe woossido woosatanne Yihoowa sabbanawu yexxido mazamureta wotta dentta qoppiyogee nena maaddana danddayees. Xoossaa ashkkarati bantta wozanaabaa Yihoowawu waati qonccissidaakko pilggiyogee neenikka ne wozanaabaa Yihoowawu qonccissanaadan denttettana danddayees. Neeni woossiyo wode goꞌettana danddayiyo ooratta qofatakka akeekana danddayaasa. Qassi ne hanotaara issi mala gidida woosatakka demmana danddayaasa.
12. Geeshsha Maxaafan odettida woosata nabbabiyo wode nuna woygidi oychchana danddayiyoo?
12 Geeshsha Maxaafan odettida woosata nabbabiyo wode nena hagaadan oychcha: ‘Hagaa woossiday oonee, qassi A hanotay ay malee? Taayyo siyettiyabay ha woosan qonccidabaara issi malee? Taani hagaappe ay tamaarana danddayiyanaa?’ He oyshata zaaranawu gujjada pilggiyogee koshshana danddayees; qassi yaatiyogee keehi maaddees. Ane amarida leemisota beꞌoos.
13. Woosaa xeelliyagan Haannippe tamaarana danddayiyo issibay aybee? (1 Sameela 1:10, 11) (Misiliyakka xeella.)
13 Koyro Sameela 1:10, 11 nabbaba. Haanna ha woosaa woossiyo wode naaꞌꞌu metota genccaydda deꞌawusu. A mayne, qassi I dawuttiya deꞌoy iyyo cammanaadan oottawusu. (1 Sam. 1:4-7) Neenikka adussa wodiyawu metuwa genccaydda deꞌiyabaa gidikko, Haanni woosaappe ay tamaarana danddayay? A adussada woossiyogaaninne ba wozanaabaa Xoossawu yootiyogan woppu gaasu. (1 Sam. 1:12, 18) Nuunikka nuna gakkida metuwa xeelliyagan nuussi siyettidabaa woosan qonccissiyogan ‘nu toohuwa Yihoowa bolli wottikko’ woppaa demmana danddayoos.—Maz. 55:22.
Haanna mayne gidiyo gishshawunne I dawuttiya ubbatoo O cayiyo gishshawu ba wozanaabaa woosan Yihoowawu yootaasu (Mentto 13 xeella)
14. (a) Haannippe harabaa ay tamaariyoo? (b) Geeshsha Maxaafaa xiqiseta wotti dentti qoppiyogee nuuni woygi woossanaakko eranaadan waati maaddii? (Tohossa qofaa xeella.)
14 Haanna I naꞌay Sameeli yelettin amarida layttaappe simmin Gita Kahiniya Eelakko efaasu. (1 Sam. 1:24-28) Yihoowi ammanettida ba ashkkarata naagiyogaanne etawu qoppiyogaa Haanna mintta ammaniyogaa wozanappe woossido woosan qonccissaasu.c (1 Sam. 2:1, 8, 9) Haanna son O gakkiya metoy xayibeennaba gidikkonne, Yihoowi O anjjidobaa bolli xeelaa wottaasu. Nu hegaappe ay tamaariyoo? Hanno gakkanawu Yihoowi nuna maaddidobaa bolli xeelaa wottikko, nuna gakkiya metuwa kaseegaappe aaruwan genccana danddayoos.
15. Naaqoy nuna gakkiyo wode Xoossay erissidobaa yootiya Ermmaasi woossido woosaappe ay tamaarana danddayiyoo? (Ermmaasa 12:1)
15 Ermmaasa 12:1 nabbaba. Xoossay erissidobaa yootiya Ermmaasi issi wode iitatuyyo ushachchidoogaa beꞌidi unꞌꞌettiis. Hara Israaꞌeelati A qilliccido gishshawukka I darotoo hidootaa qanxxiis. (Erm. 20:7, 8) Iitatuyyo ushachchiyogaa beꞌiyo wode woy harati nuna qilliicciyo wode nuuyyokka aagaadan siyettana danddayees. Ermmaasi unꞌꞌettidoogaa yootidaba gidikkonne, Xoossay suure pirddiyogaa I mule siribeenna. Makkalanchcha gidida ba asaa Yihoowi seeridoogaa I beꞌido wode, Xoossay suure pirddiyogaa kaseegaappe loytti ammanidoogee qoncce. (Erm. 32:19) Nuunikka Yihoowi ba keerido wodiyan haꞌꞌi nuna gakkiya naaqo ubbaa xayssanaagaa ammanettiyogan, nuuyyo siyettiyabaa woosan qonccissidi yootana danddayoos.
16. Leewa bitanee woossidobaappe ay tamaarana danddayiyoo? (Mazamure 42:1-4) (Misiliyakka xeella.)
16 Mazamure 42:1-4 nabbaba. Ba mala Israaꞌeelatuura Xoossaa garuwan goynnana danddayibeenna Leewa bitanee ha mazamuriya xaafiis. I xaafido mazamuree awu siyettidabaa loytti qonccissees. Nuuni sahettidi sooppe kiyana danddayennaba woy nu ammanuwa gaasuwan qashettidaba gidikko, nuussikka aagaadan siyettana danddayees. Nuuyyo siyettiyabay eesuwan eesuwan laamettana danddayees; shin hegaa woosan qonccissiyogee loꞌꞌo. Hegee nu qofaanne nuussi keehi koshshiyabaa shaakki eranaadan maaddana danddayees. Leemisuwawu, he Leewa bitanee Yihoowa sabbana danddayiyo hara injjee deꞌiyogaa akeekiis. (Maz. 42:5) Qassi I Yihoowi A waati maaddidaakko wotti dentti qoppiis. (Maz. 42:8) Wozanappe woossiyogee nu qofaa akeekanaadan, zaarettidi woppu gaanaadaaninne genccanawu wolqqaa demmanaadan maaddana danddayees.
Mazamure 42 xaafida Leewa bitanee ba wozanaabaa woosan Xoossawu yootiis. Nuuni nuuyyo siyettiyabaa woosan Yihoowawu yootiyo wode nuussi koshshiyabaa shaakki erana danddayoos (Mentto 16 xeella)
17. (a) Yoonaasa woosaappe ay tamaariyoo? (Yoonaasa 2:1, 2) (b) Metoy gakkiyo wode Mazamure maxaafan deꞌiya qofati nuna waati maaddiyonaa? (Tohossa qofaa xeella.)
17 Yoonaasa 2:1, 2 nabbaba. Xoossay erissidobaa yootiya Yoonaasi gita moliya uluwan deꞌiiddi Yihoowa woossiis. Yoonaasi Yihoowawu azazettibeennaba gidikkonne, A woosaa Xoossay siyanaagaa ammanettiis. Yoonaasi woossiyo wode Mazamure maxaafand deꞌiya daro qofaa goꞌettiis. Mazamure maxaafan deꞌiya he xiqiseta I loytti erennan aggenna. I hegeeta wotti dentti qoppiyogan Yihoowi A maaddanaagaa ammanettiis. Hegaadan, nuunikka amarida Geeshsha Maxaafaa xiqiseta hassayanawu baaxetikko, metoy gakkin Yihoowa woossiyo wode hegeeta qoppananne minettana danddayoos.
WOOSAN YIHOOWAKKO UBBATOO SHIIQA
18-19. Nuuyyo siyettiyabaa issi issitoo woosan qonccissanawu metootiyo wode Roome 8:26, 27n deꞌiya qofay nuna waati minttettii? Leemisuwa yoota.
18 Roome 8:26, 27 nabbaba. Nuuni issi issitoo keehi unꞌꞌettiyogaappe denddidaagan nuuyyo siyettiyabaa qonccissanawu metootana danddayoos. Shin nuna maaddiyabay deꞌees. Hegaa mala wodetun Xoossaa geeshsha ayyaanay nuussi gaannatees. Waatidi? Yihoowi ba ayyaanaa baggaara, nuugaa mala metoy gakkido ba ashkkarati woossido daro woosati Geeshsha Maxaafan xaafettanaadan oottiis. Nuuni nu qofaa loytti qonccissana danddayenna wode, Yihoowi eti woossido he woosaa nuugaadan oottidi siyananne zaarana danddayees.
19 Ha qofay Ruusiyan deꞌiya Yeleno giyo michchiyo maaddiis. A Yihoowa woossiyonne Geeshsha Maxaafaa nabbabiyo gishshawu qashettaasu. Yelena keehi unꞌꞌettido gishshawu Yihoowa woossanawu metootaasu. A hagaadan gaasu: “Taani unꞌꞌettidonne woyga woossanaakko erabeenna wode Xoossaa ashkkarati kase woossido woosata ta woossido woosaadan Yihoowi xeellanaagaa akeekaas. Hegee waayissiya wodiyan tana keehi minttettiis.”
20. Nuuni unꞌꞌettiyo wode nu qofaa shiishshi ekkidi woossanawu waatana danddayiyoo?
20 Nuuni unꞌꞌettiyo wode nu qofaa shiishshi ekkidi woossanawu metootana danddayoos. Yaatin nuna aybi maaddanee? Mazamure maxaafaappe amaridaagaa cenggurssaa sissiiddi nabbabiyogee maaddana danddayees. Qassi Kawuwa Daawitaagaadan nuuyyo siyettiyabaa xaafi oyqqana danddayoos. (Maz. 18, 34, 142; huuphessa qofata.) Woossiyo wode nu qofaa shiishshi ekkanawu oottana koshshiyabaa xeelliyagan yaata yaatoppa giya higgee baynnaagee qoncce. (Maz. 141:2) Neessi injjetiyagaa oottana danddayaasa.
21. Nuuni nu kumetta wozanaappe woossiyoy aybissee?
21 Nuuni woossanaappe kasekka Yihoowi nu qofaa akeekiyogaa eriyogee keehi minttettees. (Maz. 139:4) Qassi I nuuni ammanettidi A woossiyogaa ufayttidi siyees. Yaaniyo gishshawu, saluwan deꞌiya ne Aawaa woossanawu mammottoppa. A Qaalan odettida woosatuppe tamaara. Ne kumetta wozanaappe woossa. Nena ufayssiyabaakka azzanttiyabaakka ayyo yoota. Yihoowi neeyyo tumu Dabbo gidiyo gishshawu ubbatookka ne miyyiyan deꞌees!
MAZAMURE 45 Ta Wozanaa Qofaa
a Kiristtaanetu Duussawu Maaddiya Xiqiseta (Amaarattuwa) giya xuufiyan, “Yihoowa” giyagaa garssan odettida “malaalissiya Yihoowa eeshshatuppe amaridaageeta” pilgga.
b Galchchan woossiyo woosay qantta gidana bessees.
c Haanna woossaydda qonccissido qofay Muusee xaafidobaara issi mala. A Geeshsha Maxaafaa xiqiseta wotta dentta qoppanawu wodiya bazzidoogee qoncce. (Zaa. 4:35; 8:18; 32:4, 39; 1 Sam. 2:2, 6, 7) Daro layttaappe simmin, Yesuusa aayyiya Mayraama Yihoowa sabbanawu woossido woosay Haanni woosaara issi mala.—Luq. 1:46-55.
d Leemisuwawu, Yoonaasa 2:3-9; Mazamure 69:1; 16:10; 30:3; 142:2, 3; 143:4, 5; 18:6; 3:8ra gatta xeella. Ha sohuwan kasiya kaaluwa maaraadan odettida xiqiseti Yoonaasa woosaa qonccissoosona.