Nuussi Qarettiya Gita Kahiniya Yesuusa Qoppa

1-2. (a) Yihoowi ba Naꞌaa saꞌaa kiittidoy aybissee? (b) Ha huuphe yohuwan nuuni ay beꞌanee? (Ibraawe 5:7-9)

YIHOOWI 2,000 gidiya layttaappe kase, keehi alꞌꞌo gidida ba Naꞌaa ha saꞌawu kiittiis. Aybissi? Issi gaasoy asaa nagaraappenne hayquwappe laꞌa kessanaassanne Seexaanay ehiido meto ubbaa xayssanaassa. (Yoh. 3:16; 1 Yoh. 3:8) Qassi Yesuusi asa gididi saꞌan deꞌiyogee I nuussi qarettiya Gita Kahine gidanaadan maaddana danddayiyogaa Yihoowi erees. Yesuusi 29 M.Ln, haattan muuketti simmidi Gita Kahine gidiis.a

² Ha huuphe yohuwan, Yesuusi asa gididi saꞌan deꞌidoogee qarettiya Gita Kahine gidanaadan A waati maaddidaakko beꞌana. Nuuni hegaa akeekiyogee keehi koshshiyaba; ayssi giikko, hegaa eriyogee nu nagaraa gaasuwan hidootaa qanxxiyo wodekka Yihoowakko woossanaadaaninne akko shiiqanaadan nuna keehi maaddees.—Ibraawe 5:7-9 nabbaba.

XOOSSAY SIIQIYO NAꞌAY SAꞌAA YIIS

3-4. Yesuusi saꞌaa yiido wode ay aggi bayidee, qassi I saꞌan deꞌido deꞌoy ay malee?

³ Nuuppe daroti nu dosiyo keettaa, nu soo asaanne nu laggeta aggidi biyogaa mala laamiya nu deꞌuwan oottida. Yaatiyogee metiyaba gidana danddayees. Shin Yesuusaagaadan ba deꞌuwan daro laamiya oottida asi mule baawa. Saluwan deꞌiya Yihoowa kiitanchchatu ubbaappe I aadhdhees. Yihoowi A keehi siiqees; qassi I sittan ba Aawaara issippe oottido gishshawu ubbatoo ufayttees. (Maz. 16:11; Lee. 8:30) Gidikkonne, Piliphphisiyusa 2:7y yootiyogaadan I saluwan “bawu deꞌiya ubbabaa aggi bayidi,” nagaranchcha asaara saꞌan deꞌanawu eeno giis.

⁴ Qassi Yesuusi saꞌan deꞌido koyro layttata ane qoppa. Yesuusa yelidaageeti I yeletti simmin qeeri kafota yarshshido gishshawu, eti hiyyeesa gidiyogaa erana danddayoos. (Wog. 12:8; Luq. 2:24) Iita Kawoy Heeroodisi Yesuusi yelettidoogaa erido wode A woranawu maliis. Yaatin Yesuusa deꞌuwa ashshanawu A yelidaageeti Gibxxen bete gididi guutta wodiyawu deꞌidosona. (Mat. 2:13, 15) Yesuusi saꞌan deꞌido deꞌoy I saluwan deꞌido deꞌuwappe keehi dummatees!

5. Yesuusi saꞌan deꞌido wode ay akeekidee, qassi I saꞌan deꞌidoogee qarettiya Gita Kahine gidanaadan A waati maaddidee? (Misiliyakka xeella.)

⁵ Yesuusi saꞌan deꞌiyo wode, daro asay waayettiyogaa beꞌiis. Yesuusi geella A dichchida aawaa Yooseefa gujjin, I siiqiyo daro asay hayqqishin beꞌidoogee qoncce. Yesuusi saꞌan haggaazido wode, inchchirichchay oyqqidoogeeta, qooqeta, hemettanawu danddayennaageetanne naꞌi hayqqido yelidaageeta beꞌidi etawu keehi qarettiis. (Mat. 9:2, 6; 15:30; 20:34; Mar. 1:40, 41; Luq. 7:13) Yesuusi saluwan deꞌiyo wodekka asay waayettiyogaa beꞌidoogee tuma. Shin I asa gididi saꞌan deꞌiyo wode, asay waayettiyogee etawu aybi siyettanaadan oottiyakko loyttidi akeekiis. (Isi. 53:4) Yesuusi saꞌan deꞌidoogee asawu siyettiyabaa, eta unꞌꞌissiyabaanne eta waayiya akeekanaadan A maaddiis. Qassi Yesuusi hara asaagaadan daafuriis, unꞌꞌettiisinne azzaniis.

YESUUSI ASAWU QARETTIYOGAA BESSIIS

6. Yesuusi asawu qarettiyogaa xeelliyagan Isiyasa hiraagaappe ay tamaariyoo? (Maatiyosa 12:17, 20)

⁶ Yesuusi saꞌan haggaazido wode, harati naaqqido asatussi keehi qarettiyogaa bessiis. Yaatiyogan, Xoossay erissidobaa yootiya Isiyasa baggaara Yihoowi yootido hiraagay polettanaadan oottiis. Ibraawettuwan Xaafettida Geeshsha Maxaafay Yihoowa mintti ammaniya asata haattaa loytti ushshido ataakiltte sohuwara woy adussanne mino mittatuura issi issitoo geeddarssees. (Maz. 92:12; Isi. 61:3; Erm. 31:12) Shin qassi maaddiyabi baynnaageetanne naaqettidaageeta duuxxana haniya maataaranne toꞌana haniya muqaaddaara geeddarssees. (Maatiyosa 12:17, 20 nabbaba.) Yihoowi harati naaqqiyo he asata Yesuusi siiqanaagaanne etawu qarettanaagaa qonccissanawu ba erissidobaa yootiya Isiyasa baggaara ha geeddarssuwa kasetidi yootiis.

7-8. Yesuusi Isiyasa hiraagaa waati polidee?

⁷ Maatiyosi Isiyasa hiraagay Yesuusa bolli polettidoogaa yootiis; I hagaadan giis: “[Yesuusi] duuxxana haniya maataa duuttenna, toꞌana haniya muqaaddaakka toyssenna.” Yesuusi harati naaqqidoogeetussinne hidooti baynnaageetussi malaalissiya darobaa oottiis. Leemisuwawu, Yesuusi inchchirichchay oyqqido bitaniyara gayttiis; qassi he bitanee he harggiyappe denddidaagan hara asaara gayttana danddayenna. He bitanee paxanawu hidooti baynnabadan woy ba so asaaranne ba laggetuura gayttana danddayennabadan qoppiis. (Luq. 5:12, 13) Qassi Yesuusi hara wode haasayanawu metootiyanne tulle bitaniyara gayttiis. He bitanee harati issoy issuwara haasayiyogaa beꞌiyo wode, eti haasayiyobaa I akeekana danddayenna gishshawu awu aybi siyettidaakko qoppa. (Mar. 7:32, 33) Shin A metoy hegaa xalaala gidenna.

⁸ Yesuusa wode daro Ayhudati issi uri hargganchcha woykko sila gidiyoy I, woy A yelidaageeti oottido nagaraa gaasuwana giidi qoppoosona. (Yoh. 9:2) He bala qofaappe denddidaagan, hegaa mala harggee deꞌiyogeeti banttana pattennabadan xeelloosona. Yesuusi eta pattiyogaaninne Xoossay etawu qoppiyogaa eti eranaadan maaddiyogan Isiyasa hiraagaa poliis. Ha wodiyan hegaappe Yesuusabaa ay tamaariyoo?

9. Ibraawe 4:15, 16y nu Gita Kahinee nagaranchcha asawu tumuppe qarettiyogaa waati qonccissii?

⁹ Ibraawe 4:15, 16 nabbaba. Yesuusi nuussi ubbatookka qarettiyogaa ammanettana danddayoos. Hegaa giyogee woygiyogee? ‘Qarettiyogaa’ geetettidi birshshettida Giriiketto qaalay haratu metuwanne waayiya loytti akeekiyogaa giyogaa. Qashettidaageetussi nuuni qarettiyogaa bessanaadan, Phawuloosi Ibraawe 10:34n hegaara issi mala gidida Giriiketto qaalaa goꞌettidoogee malaalissiyaba. Yesuusi oottido malaalissiyabata yootiya taariketi I waayettiya asawu keehi qarettiyogaa qonccissoosona. Yesuusi asaa pattidoy pattana koshshiyo gishsha xalaalaassa gidennan, I etawu keehi qoppiyonne eta maaddanawu koyiyo gishshataassa. Leemisuwawu, Yesuusi inchchirichchay oyqqido bitaniya pattanawu A bochchana koshshenna; shin I bochchidi pattiis! Qassi hegee daro layttaappe simmin asi A bochchido koyro wode gidennan aggenna. Qassi Yesuusi tulle bitaniya asi baynnasaa efiidi pattiis. Hegaa bollikka, nagaraappe simmida issi maccaasiya afuttaa Yesuusa tohuwan tigada ba binnaanan quccin Parisaawee O borido wode, Yesuusi iyyo minttidi exatiis. (Mat. 8:3; Mar. 7:33; Luq. 7:44) Yesuusi sahettidaageeta woy gita nagaraa oottidaageeta shenetibeenna. Hegaappe dumma hanotan, I hegaa mala asati baakko yaanaadan shoobbiisinne etawu qarettiyogaa bessiis. I nuussikka qarettiyogaa ammanettana danddayoos.

HA WODIYAN NU GITA KAHINIYA LEEMISUWA KAALLIYOGAA

10. Tulletanne qooqeta maaddanawu nuuni ha wodiyan ay goꞌettana danddayiyoo? (Misiliyakka xeella.)

¹⁰ Nuuni Yesuusa leemisuwa kaallanawu koyiyo gishshawu, harata siiqanawunne etawu qarettanawu keehi baaxetoos. (1 Phe. 2:21; 3:8) Nuuni tulleta woy qooqeta pattana danddayennaba gidikkonne, ayyaanaaban eta maaddana danddayoos. Leemisuwawu, Geeshsha Maxaafaa qofay deꞌiyo nu xuufeti haꞌꞌi 100ppe dariya malaata doonatun deꞌoosona. Qassi ayfee loytti xeellennaageetussi woy qooqetussi 60ppe dariya doonatun bireele xuufeti deꞌoosona. Hegaa bollikka, nu biidotun beettiyabaa qonccissiya cenggurssati haꞌꞌi 100ppe dariya doonatun deꞌoosona. He ubbabati tulletinne qooqeti Yihoowakkonne A Naꞌaakko shiiqanaadan maaddoosona.

11. Ha wodiyan Yihoowa dirijjitee Yesuusaagaadan ubba qommo asawu qarettiyogaa waati bessii? (Oosuwa 2:5-7, 33) (Misiliyakka xeella.)

¹¹ Yihoowa dirijjitee ubba qommo asaa maaddanawu keehi baaxetees. Yesuusi hayquwappe denddi simmidi bana kaalliyageetu bolli geeshsha ayyaanaa gussin, eti Phenxxaqosxxe baalawu shiiqida asa ubbawu “eta qaalan qaalan” mishiraachchuwa yootidosona. (Oosuwa 2:5-7, 33 nabbaba.) Ha wodiyan, Yihoowa dirijjitee Yesuusi kaalettin Geeshsha Maxaafaa qofay deꞌiyo nu xuufeta qoodan guutta asay haasayiyo amarida doonata gujjin, 1,100ppe dariya doonatun giigissees. Leemisuwawu, Amerinddiyane doonatuppe amaridaageeta Huuphessanne Tohossa Amarkkan deꞌiya guutta asaa xalaalay haasayees. Gidikkonne, 160ppe dariya he doonatun nu xuufeti giigido gishshawu, daro asay mishiraachchuwa siyana danddayees. Qassi 20ppe dariya Roomaniya doonatunkka nu xuufeti deꞌoosona. Hegaa gishshawu, he doonaata haasayiya daro shaꞌan qoodettiyageeti Yihoowawu haggaaziyogaa doommidosona.

12. Ha wodiyan Yihoowa dirijjitee asaa maaddanawu oottiyo harabay aybee?

¹² Yihoowa dirijjitee mishiraachchuwa siyanaadan asaa maaddiyogaa xalaala gidennan, meretay gattiyo daafaban qohettidaageetakka maaddees. Hegaa gishshawu, daro shaꞌu ishatinne michchoti qohettidaageeta bantta dosan maaddoosona. Qassi Yihoowa dirijjitee Xoossay asa ubbaa siiqiyogaa eti loytti eranaadan maaddana mala goynnanawu issippe shiiqiyo giiga keettatakka keexxees.

NU GITA KAHINEE NENA MAADDANA DANDDAYEES

13. Yesuusi nuna maaddiyo amarida ogeti awugeetee?

¹³ Yesuusi loꞌꞌo henttanchcha gidiyo gishshawu, nuuni ubbay ayyaanaaban minnidi deꞌanaadan koshshiya ubbabaa nuussi giigissees. (Yoh. 10:14; Efi. 4:7) Issi issitoo nu deꞌuwan gakkiya metooti duuxxana haniya maataa mala woy toꞌana haniya muqaadda mala gididabadan nuussi siyettanaadan oottana danddayoosona. Nuuni keehi sahettido gishshawu, moorobaa oottido gishshawu, woy geella nu mala Kiristtaaniyara maayettibeenna gishshawu hidootaa qanxxana danddayoos. Qassi haꞌꞌi nuna gakkiya metuwa woy unꞌꞌissiyabaa aggidi sinttanaa hidootan xeelaa wottanawu metootana danddayoos. Gidikkonne, Yesuusi nena gakkiiddi deꞌiyabaanne neeyyo siyettiyabaa akeekiyogaa hassaya. Yesuusi neeyyo qarettiyo gishshawu nena maaddanawu koyees. Leemisuwawu, neeni daafuriyo wode geeshsha ayyaanaa baggaara I nena minttettana danddayees. (Yoh. 16:7; Tit. 3:6) Hegaa bollikka, Yesuusi nena minttettanawunne maaddanawu ‘imota gidida attuma asatanne’ hara ne mala Kiristtaaneta goꞌettana danddayees.—Efi. 4:8.

14. Nuuni hidootaa qanxxiyo wode ay oottana danddayiyoo?

¹⁴ Neeni hidootaa qanxxikko, Yesuusi nu Gita Kahine gidiyogaa hassaya; qassi I nena waati maaddanaakko loytta qoppa. Yihoowi Yesuusa saꞌaa kiittidoy I ba deꞌuwa wozo oottidi immana xalaalaassa gidennan, nagaranchcha asaa gakkiya metuwa I loytti akeekanaadan A maaddanaassa gidiyogaakka hassaya. Nu nagaraa woy nu balaa gaasuwan hidootaa qanxxiyo wode, Yesuusi ‘koshshiyo wodiyan’ nuna maaddanawu giigi uttiis.—Ibr. 4:15, 16.

15. Issi ishay galchchaakko simmanaadan maaddidabay aybee?

¹⁵ Yihoowappe haakkidaageeta nuuni koyanawunne maaddanawu baaxetiyo wodekka Yesuusi nuna kaalettees. (Mat. 18:12, 13) Isttifanob hanotaa beꞌa. I galchchaappe kiyosaappe 12 layttay aadhdhi simmin shiiquwa shiiqanawu koyiis. I hagaadan giis: “Hegee tawu keehi deexxiis; shin zaarettada ta ishatuuranne michchotuura Yihoowawu haggaazanawu koyaas. Cimati ufayssan tana mokki ekkidosona. Taani Yihoowa aggido gishshawu issi issitoo keehi azzanaasinne hidootaa qanxxaas. Shin Yihoowinne Yesuusi taani hidootaa qanxxanaadan koyennaagaa cimati tana hassayissidosona. Taani Yihoowakko simmido wode galchchan deꞌiya ubbay tana ufayssan mokkiis. Guyyeppe ta machchiya Geeshsha Maxaafaa xannaꞌiyogaa doommaasu; qassi haꞌꞌi nuuni issippe Yihoowawu haggaazoos.” Siiqiya nu Gita Kahinee bantta nagaran zilꞌꞌettidi laamettidaageeti galchchaakko simmanaadan nuuni ubbay maaddiyogaa beꞌiyo wode keehi ufayttees!

16. Qarettiya Gita Kahinee nuussi deꞌiyo gishshawu neeni galatiyoy aybissee?

¹⁶ Yesuusi saꞌan deꞌiiddi koshshiyo wodiyan daro asaa maaddiis. Ha wodiyankka, maadoy nuussi koshshiyo wode ubban I nuna maaddanaagaa ammanettoos. Qassi sinttappe matan yaana ooratta alamiyan azazettiya asaa I nagaraappe muleera laꞌa kessana. Nu Xoossay Yihoowi nuna keehi siiqidi, nuussi qarettiya ba Naꞌaa Gita Kahine oottidi sunttido gishshawu A keehi galatoos!