Eesuwan Laaꞌiya Harggiyabaa Geeshsha Maxaafay Woygii?

Geeshsha Maxaafay yootiyobaa

Wurssetta gallassatun eesuwan laaꞌiya harggee, (ubbasaa gakkiya woy wurssiya harggee) denddanaagaa Geeshsha Maxaafay kasetidi yootiis. (Luqaasa 21:11) Hegaa mala eesuwan laaꞌiya harggee Xoossaa qixaate gidenna. Xoossay ba Kawotettaa baggaara, eesuwan laaꞌiya harggiya gujjin ubba qommo harggiya matan xayssana.

Geeshsha Maxaafay eesuwan laaꞌiya harggiyabaa kasetidi yootidee?

Koronaa, Eedisiya woy Ispanish flu giyo eesuwan laaꞌiya harggiyabaa Geeshsha Maxaafay dummayidi qonccissenna. Shin ‘eesuwan laaꞌiya harggeenne’ wurssiya ‘harggee’ denddanaagaa kasetidi yootiis. (Luqaasa 21:11; Ajjuutaa 6:8) Hegeeti ‘wurssetta gallassatussi’ woy “wodiya wurssettawu” malaata.—2 Ximootiyosa 3:1; Maatiyosa 24:3.

Xoossay harggiyan asaa qaxxayi erii?

Xoossay harggiyan asaa qaxxayido amarida hanotata Geeshsha Maxaafay yootees. Leemisuwawu, issi issi asay gogaa harggiyan oyqettanaadan I oottiis. (Qoodaabaa 12:1-16; 2 Kawotu Maxaafaa 5:20-27; 2 Hanidabaa Odiya 26:16-21) Gidoppe attin, hegee eesuwan laaꞌiya harggiyadan aynne mooribeenna asaa oyqqibeenna. Shin, hegaa mala hanotay sittan Xoossaa bolli makkalidaageeti pirddettido pirdda.

Ha wodiyan gakkiya eesuwan laaꞌiya harggee Xoossaa qixaatee?

Chiikka. Xoossay eesuwan laaꞌiya harggiyanne hara sahuwa goꞌettidi, ha wodiyan asaa qaxxayees giidi amaridaageeti ammanoosona. Shin, he qofaa Geeshsha Maxaafay kaafenna. Aybissi?

Issi gaasoy, beni wode deꞌidanne ha wodiyan deꞌiya Xoossawu goynniya amaridaageeti harggiyan waayettidosona. Leemisuwawu, Xoossawu ammanettidi haggaaziya Ximootiyosi “darotoo [A] sakkiyo gishshawu ” waayettiis. (1 Ximootiyosa 5:23) Shin hegee Xoossay A nashshibeennaagaa bessiya malaata giidi Geeshsha Maxaafay yootenna. Ha wodiyankka hegaadan, Xoossawu haggaaziya amaridaageeti sahuwan woy caddi oyqqiya harggiyan waayettoosona. Darotoo, hegaa mala asati qoppennan merettiya issi issibaa gaasuwan harggana danddayoosona.—Eranchchaa 9:11.

Hegaa bollikka, Xoossay iitata qaxxayiyo wodee gakkichchibeennaagaa Geeshsha Maxaafay tamaarissees. Shin, nuuni ubba asay akko shiiqanaadaaninne attanaadan Xoossay ufayssan shoobbiyo, I ‘ashshiyo gallassan’ deꞌoos. (2 Qoronttoosa 6:2) I hegaadan oottiyo issi ogee, “Xoossaa Kawotettaa mishiraachchoy” kumetta saꞌan odettanaadan oottiyogaana.—Maatiyosa 24:14.

Eesuwan laaꞌiya harggee xayanee?

Ee. Ooninne sahettenna wodee matan yaanaagaa Geeshsha Maxaafay kasetidi yootiis. A kawotettay haariyo wode, Xoossay ubba qommo harggiya xayssana. (Isiyaasa 33:24; 35:5, 6) I waayiya, sahuwanne hayquwa xayssana. (Ajjuutaa 21:4) Ha saꞌan wottiyobi baynnaageeta gididi loꞌꞌo payyatettan ufayttanaadan hayqqidaageeta I denttana.—Mazamure 37:29; Oosuwa 24:15.

Harggiyabaa yootiya Geeshsha Maxaafaa xiqiseta

Maatiyosa 4:23: “[Yesuusi] Galiilan ubbasaa yuuyidi, eta shiiqo keettatun tamaarissiis, Kawotettaa mishiraachchuwa yootiisinne hargge ubbaappenne saho ubbaappe asaa pattiis.”

Birshshettaa: Yesuusi oottido malaalissiyabay Xoossaa Kawotettay matan asa ubbawu oottanabaa amarida hanotan bessees.

Luqaasa 21:11: “Eesuwan laaꞌiya harggee denddana.”

Birshshettaa: Ubba sohuwa gakkiya harggee wurssetta gallassatu malaatatuppe issuwa.

Ajjuutaa 6:8: “Taani washalaala parai kiyidaagaa be7aas. He paraa toggidaagaa sunttai Haiquwaa; a geeduwaa Si7oolee kaalliis . . . Harggiyan . . . worissana mala, etau maatai imettiis.”

Birshshettaa: Ha oyddu bashshiya paraasatubaa yootiya hiraagay, eesuwan laaꞌiya harggee ha wodiyan denddanaagaa qonccissees.