YELAGATI OYCHCHIYO OYSHAA
Asaara Haasayiyogan Waana Qara Gidana Danddayiyanaa?
Ha huuphe yohuwan
Gayttidi haasayiyogee koshshiyoy aybissee?
Amaridaageeti, kiitaa xaafiyogaara geeddarssiyo wode issippe gayttidi haasayiyogee waayissiyabanne unꞌꞌissiyaba goosona.
“Issippe gayttidi haasayiyogee keehi unꞌꞌissiyaba, ayssi giikko neeni haasayido aybanne giigissana woy quccana danddayakka.”—Aano.
“Silkkiyan kiitaa xaafiyogee duuqqi wottido prograamiya beꞌiyogaa mala, shin issippe gayttidi haasayiyogee shiiqida asaa sinttan issibaa bessiyogaa mala. Taani issi uraara haasayiyo wode, haasayiyoban balennaadan ubbatoo ta wozanan qoppays!”—Jiino.
Gidikkonne, ne deꞌuwan asaara gayttada haasayiyogee koshshiyo wodee deꞌana danddayees. Leemisuwawu, oorattatuura laggetanawu, oosuwa demmanawunne aggennan oottanawu, woy aqo oyqqanawu gakkidaba gidikko, siiqettiyogaa doommanawu hegee koshshana danddayees.
Ufayssiyabay, issippe gayttidi haasayiyogee unꞌꞌissiyaba gidenna. Neeni dungguuxa gidikkonne hegaadan oottana danddayaasa.
“Neeni issi issitoo balabaa haasayiyogeenne zilꞌꞌettiyogee attenna. Nena mule balenna asadan xeellana koshshenna.”—Neela.
Haasayaa waata doommana danddayiyanaa?
Oyshata oychcha. Asay haasayanawu koyiyo issi huuphe yohuwa doora, yaatada he allaalliyan haasayiyogaa doomma. Leemisuwawu:
“Aadhdhida balgguwan neeni manddaridosi dii?”
“Hagee loꞌꞌo web sayte. Neeni kase hagaa beꞌa eray?”
“Neeni hagaabaa siya eray?”
Issi uraara loytta haasayanawu nenanne he ura issi mala oottiyabaa qoppa. Leemisuwawu, neeninne he uri issi timirtte keettan tamaaridetii, woy issi mala oosuwa ootteetii? Nenanne he ura issi mala oottiya allaalliya xeelliyagan oychchana danddayaasa.
“Nena ufayssiyanne asay zaaruwa yootishin neeni siyanawu koyiyo oyshata qoppa.”—Maritso.
Naagettana koshshiyabaa: Keehi daro oyshata oychchiyogan he uri hirgganaadan woy yayyanaadan oottoppa. Qassi, yeellayana danddayiya oyshata oychchennan agganawu baaxeta. “Nena keehi yashshiyabay aybee?” woy “Neeni ubbatoo salo mera maayuwa maayiyoy aybissee?” giyogaa mala oyshati he uri yeellatanaadan oottana danddayoosona. Ubba, naaꞌꞌantto oyshay boranawu oychchiyoba milatana danddayees!
He uri ne oyshaa zaaranaappe kase gidin woy zaari simmin oyshan qoriyaba milatennaadan naagetta, he oyshaa xeelliyagan ne qofaa yoota. Hara guussan, oysha zaaro gidennan, issoy issuwara haasayiyoba ootta.
Neeni oychchiyo oyshay qoranawu oychchiya ura milatissii?
Geeshsha Maxaafaa maaraa: “Asaa wozanaa halchchoi ciimma ollaa giddon de7iya haattaa mala; shin wozannaama asi hegaa duuqqidi kessees.”—Leemiso 20:5.
Loyttada ezgga. Ne haasayay qanxxettennaadan oottiyay, darotoo neeni haasayan qara gidiyogaa gidennan loytta ezggiyogaa.
“Taani haasayissiyo uraabaa issibaa eranawu halchchays. Yaatada, hara galla gayttiyo wode loytta oychchanawu I yootidobaappe issibaa qoppays.”—Taamaaro.
Naagettana koshshiyabaa: Kaallada gaanabawu unꞌꞌettoppa. Neeni loytta ezggiyaba gidikko, he uri yootidobaappe denddada issibaa gaana danddayaasa.
Geeshsha Maxaafaa maaraa: “Asai ubbai siyanau eesoto; shin haasayanau . . . eesotoppo.”—Yaaqooba 1:19.
He urawu tumuppe qoppiyogaa bessa. Neeni haasayissiyo urawu qoppiyaba gidikko, haasayay ufayssiyagaa gidana.
“Neeni ayyo woy iyyo qoppiyogaa haasayissiyo uri akeekikko, haasayay ufayssiyagaa gidana—issi issitoo neeni yeellatiyaba gidikkokka.”—Maariyo.
Naagettana koshshiyabaa: He ura buzo allaalliya oychchoppa. “Ne kootee loꞌꞌees. Aappunaa wurssidee?” giyagaa mala qofay bessennaba gidana danddayees!
Geeshsha Maxaafaa maaraa: “Issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:4.
Haasayaa waata kuuyana danddayay? Jorddan giyo issi yelagay hagaadan giis: “Issi loꞌꞌobaa gaada kuuya. Leemisuwawu, ‘Nu haasayan keehi ufayttaas’ woy ‘Ufayssan takka’ giyagaa malabay hara galla gayttiyo wode ufayssiya haasayaa haasayanaadan oottana danddayees.”