YELAGATI OYCHCHIYO OYSHAA
Aqo Oyqqanawu Qoppidi Wodiya Aattiyogaa—Shaaho 3: Nuuni Shaahettana Koshshii?
Aqo oyqqanawu qoppidi wodiya aattiyogaa doommin amarida wodiyappe simmin siriyogaa doommadasa. Neeni kaseegaadan siiqettiyogaa aggennan sinttawu sugana koshshiiyye, shaahettana koshshii? Ha huuphe yohoy neeni kuuyanaadan maaddanawu giigiis.
Ha huuphe yohuwan
Siriyogaa
Issi yelaga attumaageenne maccaara aqo oyqqanawu qoppidi wodiya aattiyogaa doommin amarida wodiyappe simmin, eta hanotay eti koyro qoppidoogaappe keehi dummatiyogaa akeekana danddayoosona. Leemisuwawu:
Issoy abbaa doonan allaxxiyogan ufayttees; haray qassi deriya kiyanawu koyees.
Issoy haratuura kaaꞌiyogaa dosiyagaa; haray qassi dungguuxa.
Issoy darotoo cimmees; haray qassi ubbatoo ammanettees.
Ha ubba hanotatikka issoy haraappe dummatiyogaa akeeka. Koyroogee, koshshay dummatiyogaa qonccissees; naaꞌꞌanttoogee, eeshshay dummatiyogaa qonccissees; heezzanttoogee, xoqqu ootti xeelliyobay dummatiyogaa qonccissees.
Qoppana koshshiyabaa: Ha heezzu hanotatuppe geella intte aqo oyqqikko inttena keehi waayissanaagee awugee? Hegeetuppe awugaanne gidikko, intte naaꞌꞌaykka hegaa giigissana danddayeetii?
Azinaynne machchiya koshshan woy eeshshan issoy issuwappe dummatana danddayikkonne, eti bantta aqo deꞌuwan ufayttana danddayoosona. Hegaa bollikka, issoy issuwawu haniya asa giyogee ubbaban issi mala giyogaa gidenna. Amarida hanotatun, issi azinaynne machchiya issuwa ufayssiyaban haraykka ufayttana, woy ubba issoy issuwa eeshshaappe goꞌettana danddayoosona.a
Hara baggaara, neeni ekkiyo woy geliyo uri ne xoqqu oottada xeelliyobata, hegeetikka ayyaanaabaanne kandduwabaa neegaadan xeelliya ura gidiyogee keehi koshshiyaba. I woy A yaatennaba gidikko, hegee intte shaahettana koshshiyogaa qonccissiya malaata.
Leemisuwawu, haymaanootiyara gayttidaagan dummatiyogaa qoppa. Ne Aqo Deꞌuwawu Oletiyogaa giya maxaafay hagaadan gees: “Pilggidobay loytti qonccissiyogaadan, haymaanootiyan dummatiya azinaynne machchiya paraman shaahettana danddayiyo hanotay keehi aaho.”
Geeshsha Maxaafaa maaraa: “Ammanenna asatuura zuppetidi, giigenna oosuwaa oottoppite.”—2 Qoronttoosa 6:14.
Kuuyiyogaa
Geeshsha Maxaafay aqo oyqqidaageeti “bantta bolli waayiyaa ehaana” yaagees. (1 Qoronttoosa 7:28) Yaatiyo gishshawu, intte aqo oyqqanawu qoppidi wodiya aattiyo wode hegaa malabay hanikko malaalettoppite.
Guuttabatun maayettennaagee shaahettana bessiyogaa ubbatoo qonccissiyaba gidenna. Neeni neeyyo zaarana koshshiya oyshay hagaa: Sarotettan hegaa giigissana danddayay? Intte eketti gelettiyaba gidikko, naaꞌꞌaykka yaatana koshshiyogee qoncce.
Geeshsha Maxaafaa maaraa: “Issoi issuwaayyo kehitenne qarettite; . . . issoi issuwaayyo atto giite.”—Efisoona 4:32.
Hara baggaara, darotoo woy gitaban maayettennaagee intte issoy issuwawu haniya asa gidana danddayennaagaa qonccissana danddayees. Hanotay hegaa mala gidikko, aqo oyqqanaappe kasetidi hegaa eriyogee keehi loꞌꞌo!
Darotoo woy gitaban maayettennaagee intte issoy issuwawu haniya asa gidana danddayennaagaa qonccissana danddayees.
Kulkka qofaa: Intte aqo oyqqanawu qoppidi wodiya aattiyo uraabaa, woy aqo oyqqanawu giigettidoogaabaakka gidin keehi sirikko, he siriya sheneho gaana koshshenna!
Geeshsha Maxaafaa maaraa: “Cincca asi iitaa be7idi, qosetti aattees; shin akeeki paccido asi metuwan gelidi qohettees.”—Leemiso 22:3.
Shaahettanawu kuuyikko
Shaahettiyogee keehi azzananaadan oottana danddayees. Gidikkokka, siiqettiyogaa xeelliyagan intteppe issoy woy naaꞌꞌaykka ubbatoo siriyo gitabay deꞌikko, shaahettiyogee keehi loꞌꞌoba gidana danddayees.
Hegaadan waata oottana danddayay? Ammanttiya gaasoy deꞌana xayikko, kiitaa silkkiyan woy imeeliyan xaafidi shaahettennaakko daro loꞌꞌo. Yaatiyogaappe, ha gitabaa issippe gayttidi haasayanawu haniya wodiyanne sohuwa doora.
Geeshsha Maxaafaa maaraa: “Issoi issuwaara tumaa haasayite.”—Zakkaariyaasa 8:16.
Shaahettikko intte issippe aattido wodee hada attiis giyogee? Ubbatoo hegaadan giyogaa gidenna. Aqo oyqqanawu qoppidi wodiya aattiyogee neeni aqo oyqqana woy aggana koshshiyakko kuuyanawu maaddiyogaa akeeka. Haray atto, intte shaahettiyaba gidikkokka, hegaappe maaddiyabaa tamaarana danddayaasa.
Nena hagaadan oychcha: ‘Ha nuuni siiqettidoogaappe tabaa ay tamaaridanaa? Hagaappe eridobay taani aqo oyqqanawu giigettanaappe kase oottana bessiyabay deꞌiyogaa akeekissii? Taani aqo oyqqanawu qoppada wodiya aattiyogaa zaarettada doommanawu koyiyo wode kaseegaappe dummatiyabaa ay oottana koshshii?’
a Ha metiyabati azinaanne machchiyo waati qohana danddayiyakko loytta akeekanawu, “So Asaa Maaddiyabaa—Qofaa Dummatettaa Giigissiyogaa,” qassi “So Asaa Maaddiyabaa—Hanqqetissiya Eeshshaa Loꞌꞌobadan Xeelliyogaa” giya huuphe yohota nabbaba.