Pakiana han Magbarasa . . .
Kay Ano nga Igintatanyag han Dios ha mga Tawo an Kinabuhi nga Waray Kataposan?
▪ An Biblia nasiring nga igintatanyag han Dios ha aton an pribilehiyo nga magkaada “kinabuhi nga waray kataposan.” (Juan 6:40) Kondi, ano an nag-aghat ha iya ha pagtanyag hito? Hustisya la ba?
An hustisya nag-uupod ha makatadunganon ngan husto nga pagtratar ha mga tawo. Kondi, takos gud ba kita han kinabuhi? Diri. An Biblia nasiring: “Waray uusa ka tawo nga matadong dida ha tuna, nga nagbubuhat hin maopay, ngan diri nakakasala.” (Eklesiastes 7:20) An tawo nakakasala, ngan an sala takos hin sirot. Ginpahamangnoan han Dios hi Adan, an siyahan nga tawo, nga ha adlaw nga hiya makasala hiya gud mapatay. (Genesis 2:17) Ha urhi, hi apostol Pablo gin-giyahan ha pagsurat: “An suhol han sala amo an kamatayon.” (Roma 6:23) Salit kon an ngatanan nga tulin ni Adan takos mamatay, kay ano nga igintatanyag han Dios an kinabuhi nga waray kataposan?
An kinabuhi nga waray kataposan, regalo nga “waray bayad.” Kapahayagan ito han daku hinduro ngan waray-tubtoban nga gugma ngan kalooy han Dios nga diri kita takos. An Biblia nasiring: ‘An ngatanan nagpakasala ngan nawad-an han himaya han Dios; Ha pagpakamatadong ha ira nga waray bayad tungod han iya grasya [nga diri kita takos] pinaagi ha pagtubos ni Kristo Jesus.’—Roma 3:23, 24.
Bisan kon kita ngatanan takos mamatay, nagdesisyon an Dios ha paghatag han kinabuhi nga waray kataposan ha mga nahigugma ha iya. Makatadunganon ba ito? An Biblia nasiring: ‘Ano ba an isisiring ta? Nga diri matadong an Dios? Ipahirayo ini ha Dios! Kay hiya nagsiring kan Moises: Malolooy ako ha akon kalolooyan, ngan maghihinuklog ako ha akon paghihinuklogan. Hin-o ka ba nga nagbabaton kontra ha Dios?’—Roma 9:14-20.
Ha iba nga lugar, an hitaas nga opisyal o huwes han gobyerno mahimo maghatag hin parol ha kriminal nga mabug-at an sentensya. Kon disidido an kriminal ha pag-abot han kahikayan ha sirot ngan nagbag-o, an presidente o huwes mahimo magdesisyon ha paghatag ha iya hin parol pinaagi ha pagpagaan han sentensya o pagwara hito. Ini nga proseso kapahayagan gud han kalooy nga diri takos makarawat.
Ha pariho nga paagi, mahimo magdesisyon hi Jehova nga diri sirotan an magpakasasala han sirot nga takos ha ira. Lugod, tungod han iya gugma, mahimo niya ihatag an kinabuhi nga waray kataposan ha mga nahigugma ha iya ngan nagkikinabuhi uyon ha iya mga suruklan. An Biblia nasiring: “An Dios waray ginpasulabi han mga tawo; Kondi tikang ha ngatanan nga mga nasud hiya nga nahadlok ha iya, ngan nagbubuhat hin matadong, naruruyagan niya.”—Buhat 10:34, 35.
An gidadakui nga kapahayagan han gugma ni Jehova amo an pagsugo ha iya Anak nga mag-antos ngan mamatay para ha aton. Mahitungod ha iya Amay, hi Jesus nagsiring: “An Dios naghigugma gud han kalibotan, nga iya iginhatag an iya Bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.”—Juan 3:16.
Ginkakarawat ni Jehova an ngatanan nga nahigugma ha iya ngan nagbubuhat han iya kaburut-on, anoman an ira gintikangan. Salit, an paglaom nga kinabuhi nga waray kataposan an nangunguna nga kapahayagan han kalooy nga diri kita takos, usa nga kapahayagan han waray katupong nga gugma han Dios.
[Blurb ha pahina 29]
Ito an nangunguna nga kapahayagan han kalooy nga diri kita takos, usa nga kapahayagan han waray katupong nga gugma