Ipakita an Pagtahod ha Regalo han Dios nga Pag-asawa

“Sanglit an tawo mabaya han iya amay ngan han iya iroy, ngan tumampo ha iya asawa: ngan hira magigin usa nga unod.”—GEN. 2:24.

1. Kay ano nga hi Jehova takos gud han aton pagtahod?

HI Jehova nga Dios, an nagpatikang han pag-asawa, takos gud han aton pagtahod. Sugad nga aton Maglalarang, Soberano, ngan langitnon nga Amay, husto nga iginhuhulagway hiya nga Humaratag han “ngatanan nga maopay nga hatag ngan [han] ngatanan nga hingpit nga hatag.” (Jak. 1:17; Pah. 4:11) Pagpakita niya ini han iya daku nga gugma. (1 Juan 4:8) Ngatanan nga iya igintututdo ha aton, ngatanan nga iya ginhahangyo, ngatanan nga iya iginhahatag ha aton para gud ha aton kaopayan ngan kapulsanan.—Isa. 48:17.

2. Ano nga mga instruksyon an iginhatag ni Jehova ha siyahan nga mag-asawa?

² Iginsasaysay han Biblia nga an pag-asawa usa han “maopay” nga mga regalo han Dios. (Prob. 19:14) Han ginkasal ni Jehova an siyahan nga mag-asawa nga hira Adan ngan Eva, gintagan niya hira hin espisipiko nga mga instruksyon kon paonan-o maglalampos. (Basaha an Mateo 19:4-6.) Kon ginsunod nira an sugo han Dios, magigin malipayon unta hira ha waray kataposan. Kondi nagtalapas hira ngan nag-antos han makasurubo nga mga resulta hito.—Gen. 3:6-13, 16-19, 23.

3, 4. (a) Ha ano nga paagi iginpapakita han damu yana an kawaray pagtahod ha pag-asawa ngan kan Jehova nga Dios? (b) Ano nga mga ehemplo an aton hihisgotan hini nga artikulo?

³ Pariho ha siyahan nga mag-asawa, damu yana an diri nagpapagiya kan Jehova kon nagdidesisyon may kalabotan ha pag-asawa. An iba nadiri magpakasal, ngan an iba naghihimo han ira kalugaringon nga suruklan ha pag-asawa. (Roma 1:24-32; 2 Tim. 3:1-5) Ginbabalewaray nira an kamatuoran nga an pag-asawa regalo han Dios, ngan tungod kay diri nira gintatahod ito nga regalo, diri liwat nira gintatahod an naghatag hito, hi Jehova nga Dios.

⁴ Usahay, bisan an iba nga Kristiano nahingangalimot ha panhunahuna ni Jehova ha pag-asawa. An iba nagbubulag o nagdidiborsyo bisan kon waray Kasuratanhon nga hinungdan. Paonan-o ini malilikyan? Paonan-o an instruksyon han Dios ha Genesis 2:24 makakabulig ha inasaw-an nga mga Kristiano nga maparig-on an ira pag-asawa? Ngan paonan-o makakapangandam an mga nagpaplano pag-asawa? Aton hisgotan an tulo nga malampuson nga pag-asawa ha kadaan nga panahon nga nagpapakita kon kay ano nga importante an pagtahod kan Jehova basi magin malampuson an pag-asawa.

Magin Maunungon

5, 6. Ano nga kahimtang an bangin nagin pagsari kanda Sakarias ngan Elisabet, ngan paonan-o ginbendisyonan an ira pagkamaunungon?

⁵ Susbaranan nga mag-asawa hira Sakarias ngan Elisabet. Pariho hira nagpili hin maunungon nga alagad ni Jehova sugad nga ira padis. Matinumanon nga ginbuhat ni Sakarias an iya responsabilidad sugad nga saserdote, ngan ira ginsunod an Balaud han Dios ha ira bug-os nga mahihimo. Damu gud an ira hinungdan nga magpasalamat. Pero kon kumadto ka ha ira balay ha Juda, maoobserbaran mo dayon nga may kulang ha ira. Waray hira anak. Baog hi Elisabet, ngan lagas na hira nga mag-asawa.—Luk. 1:5-7.

⁶ Ha kadaan nga Israel, importante gud an pagkaada anak, ngan kasagaran na nga damu an anak ha kada pamilya. (1 Sam. 1:2, 6, 10; Sal. 128:3, 4) Hito nga panahon bangin himoon han lalaki nga Israelita nga pasangil ha pakigdiborsyo an pagin baog han iya asawa. Kondi maunungon hi Sakarias kan Elisabet. Waray hiya mamiling hin pasangil basi bulagan an iya asawa, ngan waray liwat ito buhata ni Elisabet. Bisan kon nasubo hira nga waray hira anak, padayon nga magkaupod hira nga nag-alagad kan Jehova hin matinumanon. Han lagas na hira, hura nga ginbendisyonan hira ni Jehova han milagroso nga nagkaanak hira hin lalaki.—Luk. 1:8-14.

7. Ano an usa pa nga paagi nga nagmaunungon hi Elisabet ha iya bana?

⁷ Iginpakita ni Elisabet an pagkamaunungon ha usa pa nga paagi. Han igin-anak niya hi Juan, diri nakakayakan hi Sakarias tungod kay nangula hiya han waray hiya tumoo ha ginsiring han anghel han Dios. Kondi, sigurado nga naghimo hin paagi hi Sakarias nga isumat kan Elisabet nga ginsidngan hiya han anghel ni Jehova nga “Juan” an igngaran ha ira anak. Karuyag han ira mga amyaw ngan paryente nga an ngaran han bata ipariho ha iya tatay. Kondi maunungon nga ginsunod ni Elisabet an tugon han iya bana. Hiya nagsiring: “Diri, kondi hiya pagngangaranan kan Juan.”—Luk. 1:59-63.

8, 9. (a) Paonan-o an pagkamaunungon nagpaparig-on han pag-asawa? (b) Ano an pipira nga espisipiko nga paagi nga maipapakita han bana ngan asawa an pagkamaunungon?

⁸ Pariho kanda Sakarias ngan Elisabet, an mga mag-asawa yana nakakaeksperyensya hin mga kapakyasan ngan iba pa nga problema. Diri mag-iiha an pag-asawa kon an mag-asawa diri maunungon ha usa kag usa. An pagpikat, pornograpiya, adulteryo, ngan iba nga maraot nga buhat mahimo makawara han pagsarig ngan makadaot han pag-asawa. Ngan kon an mag-asawa waray pagsarig ha usa kag usa, an gugma hinay-hinay nga mawawara. Ha pipira nga paagi, an pagkamaunungon pariho hin alad ha palibot han balay nga proteksyon basi diri makasulod an diri-kilala nga mga tawo ngan an iba pa nga peligro, ngan tungod hito talwas an pamilya ha sulod han balay. Salit kon maunungon an mag-asawa ha usa kag usa, magigin murayaw an ira pagkaupod ngan maisusumat nira ha usa kag usa an ira nahuhunahuna ngan inaabat, ngan hito nga paagi maghihilarom an ira gugma. Oo, importante an pagkamaunungon.

⁹ Hi Jehova nagsiring kan Adan: “An tawo mabaya han iya amay ngan han iya iroy, ngan tumampo ha iya asawa.”a (Gen. 2:24) Ano an karuyag sidngon hito? Kinahanglan bag-uhon han mag-asawa an ira pakig-upod ha kasangkayan ngan mga paryente. An ira panahon ngan atensyon kinahanglan ihatag nira siyahan ha ira padis. Diri na puydi himoon nga prayoridad an ira kasangkayan o paryente kon mapapabay-an nira an ira padis; diri liwat nira sadang tugotan an ira mga kag-anak nga manginlabot ha ira mga desisyon o diri pagsinabtanay. Kinahanglan magmaunungon hira ha usa kag usa. Ito an sugo han Dios.

10. Ano an mabulig ha mag-asawa nga magin maunungon?

¹⁰ Bisan ha mag-asawa nga an usa diri Saksi, an pagkamaunungon nagriresulta hin mga bendisyon. Usa nga bugto nga babaye nga diri Saksi an bana nagsiring: “Nagpapasalamat gud ako kan Jehova nga Iya ako gintutdoan kon paonan-o magpasakop ha akon bana ngan magpakita hin hilarom nga pagtahod ha iya. Tungod han pagkamaunungon, 47 ka tuig na nga natipigan namon nga mag-asawa an gugma ngan pagtahod ha usa kag usa.” (1 Kor. 7:10, 11; 1 Ped. 3:1, 2) Salit pangalimbasugi nga ipaabat ha imo padis nga hinigugma mo hiya. Ha imo pulong ngan buhat, pamiling hin mga paagi nga pasarigon hiya nga para ha imo, hiya an pinakaimportante nga tawo ha bug-os nga kalibotan. Tubtob han imo maaakos, ayaw tuguti an bisan hin-o o bisan ano nga makadaot han relasyon niyo nga mag-asawa. (Basaha an Proberbios 5:15-20.) Hira Ron ngan Jeannette nga sobra 35 ka tuig na nga malipayon nga mag-asawa nagsiring, “Tungod kay maunungon kami ha Dios, maunungon liwat kami ha usa kag usa, salit malipayon ngan malampuson an amon pag-asawa.”

An Pagbuhat nga Pirme Magkaupod Nagpaparig-on han Pag-asawa

11, 12. Paonan-o nagbuligay hira Akila ngan Prisila ha (a) balay, (b) trabaho, ngan (c) ministeryo?

¹¹ Kon gin-uunabi ni apostol Pablo an iya duok nga kasangkayan nga hira Akila ngan Prisila, pirme niya hira gin-uunabi nga magkaupod. Iginpakita hini nga mag-asawa kon ano gud an iginpapasabot han Dios han nagsiring hiya nga an bana ngan asawa sadang magin “usa nga unod.” (Gen. 2:24) Pirme hira magkaupod ha balay, ha trabaho, ngan ha ministeryo. Pananglitan, han siyahan nga inabot hi Pablo ha Korinto, malipayon nga gin-imbitar hiya nira Akila ngan Prisila nga umukoy ha ira balay, ngan posible nga katapos hito, an ira balay an iya ginhimo nga sentro han iya mga buruhaton ha pipira ka panahon. Ha urhi, ha Efeso, iginpagamit nira an ira balay sugad nga katirokan han kongregasyon ngan ginbuligan nira an mga bag-ohan sugad kan Apolo nga mag-uswag ha espirituwal. (Buh. 18:2, 18-26) Han inin madasigon nga mag-asawa kinadto ha Roma, ira na liwat iginpagamit an ira balay sugad nga katirokan. Ha urhi, binalik hira ha Efeso ngan ginparig-on an kabugtoan.—Roma 16:3-5.

¹² Ha pipira ka panahon, nakaupod liwat nira Akila ngan Prisila hi Pablo ha trabaho nga panhimo hin tolda. Maoobserbaran naton nga ini nga mag-asawa nagbubuligay liwat ha pagtrabaho nga waray kompetisyon o away. (Buh. 18:3) Kondi, sigurado nga an ira pirme pagkaupod ha Kristiano nga mga buruhaton an hinungdan nga nagin marig-on ngan malipayon an ira pag-asawa. Ha Korinto man, Efeso, o Roma, kilala gud hira nga “kaburulig hin pagbuhat kan Kristo Jesus.” (Roma 16:3) Diin man hira kumadto basi bumulig ha pagpauswag han pagsangyaw han Ginhadian, magkaupod hira nga nag-aalagad.

13, 14. (a) Ano an mahimo magin hinungdan nga diri magkauyon an mag-asawa? (b) Ano an pipira nga puydi buhaton han mag-asawa basi maparig-on an ira pagin “usa nga unod”?

¹³ Oo, an pagkaada pariho nga tumong ngan pagbuhat nga pirme magkaupod nagpaparig-on han pag-asawa. (Ekles. 4:9, 10) Makasurubo nga damu nga mag-asawa yana an haros diri na nagkakaupod. Nagtatrabaho hira hin damu ka oras ha magkaiba nga trabaho. An iba nagbibiyahe hin maiha tungod han ira trabaho o nagtatrabaho ha iba nga nasud basi makapadara hin kwarta ha ira pamilya. May mga mag-asawa liwat nga bisan kon magkaupod ha balay naabat nga baga hin hirayo hira ha usa kag usa tungod han panahon nga ira ginagamit ha pagkinita hin TV, ha mga hilangkagan, isport, video game, o ha Internet. Ito ba an nahitatabo ha iyo? Kon amo, mahimo ba ito niyo bag-uhon basi magkaada kamo mas damu nga panahon nga magkaupod? Kay ano nga diri magbuhat nga magkaupod ha adlaw-adlaw nga buruhaton sugad han pagluto, panhugas, o paglimpyo ha libong? Puydi ba kamo magbuligay ha pag-ataman ha iyo mga anak o ha iyo lagas na nga mga kag-anak?

¹⁴ Labaw ha ngatanan, pirme paggahin hin panahon nga magkaupod kamo ha mga buruhaton nga may kalabotan ha pagsingba kan Jehova. An paghisgot han inadlaw nga teksto ngan an pagsingba han pamilya makakabulig gud basi magpabilin nga nagkakauruyon an panhunahuna ngan mga tumong han iyo pamilya. Sugad man, magkaupod nga makigbahin ha ministeryo. Kon mahihimo, pagdungan kamo pagpayunir, bisan kon usa la ka bulan o usa ka tuig an igintutugot han iyo kahimtang. (Basaha an 1 Korinto 15:58.) Usa nga bugto nga nagpayunir upod han iya bana an nagsiring: “An ministeryo usa nga paagi nga magkaupod kami ngan magkaistorya. Tungod kay tumong namon nga duha nga buligan an iba ha espirituwal, inabat ko nga nagkakauyon gud kami. Nagin mas duok ako ha iya diri la sugad nga akon bana kondi sugad nga sangkay liwat.” Samtang magkaupod kamo nga nagbubuhat hin mapulsanon nga buruhaton, an iyo mga naruruyagan, prayoridad, ngan hilig sugad nga mag-asawa hinay-hinay nga magkakauyon tubtob nga pariho kanda Akila ngan Prisila, an iyo panhunahuna, pag-abat, ngan panggios magpapakita nga kamo “usa nga unod.”

Unaha an Dios ha Iyo Pag-asawa

15. Ano an ginkikinahanglan basi magin malampuson an pag-asawa? Isaysay.

¹⁵ Maaram hi Jesus nga ha pag-asawa, importante nga unahon an Dios. Nakita niya han ginkasal ni Jehova an siyahan nga mag-asawa. Naobserbaran niya an duro nga kalipay nira Adan ngan Eva han ginsusunod nira an instruksyon han Dios, ngan nakita liwat niya an maraot nga resulta han gintalapas nira ito. Salit han nagtututdo hi Jesus ha iba, iya ginkotar an instruksyon han iya Amay nga mababasa ha Genesis 2:24. Katapos nagsiring hiya: “An gintig-ob han Dios, diri pagbulagon han tawo.” (Mat. 19:6) Salit an hilarom nga pagtahod kan Jehova importante pa gihapon basi magin malipayon ngan malampuson an pag-asawa. May kalabotan hini, maopay gud nga susbaranan an mga kag-anak ni Jesus dinhi ha tuna nga hira Jose ngan Maria.

16. Paonan-o iginpakita nira Jose ngan Maria nga gin-uuna nira an Dios ha ira pamilya?

¹⁶ Hi Jose buotan ngan matinalahuron kan Maria. Han hinbaroan niya nga burod hi Maria, karuyag niya nga magpakita hin kalooy bisan han waray pa hiya sumati han anghel han Dios kon ano an nahitabo kan Maria. (Mat. 1:18-20) Sugad nga mag-asawa, ginsunod liwat nira an balaud ni Cesar ngan nangalimbasog gud nga tumanon an Mosaiko nga Balaud. (Luk. 2:1-5, 21, 22) Ngan bisan kon kalalakin-an la an obligado nga tumambong ha importante nga mga piyesta ha Jerusalem, hira Jose ngan Maria magkaupod nga natambong kada tuig upod han ira mga kapamilya. (Deut. 16:16; Luk. 2:41) Hini ngan ha iba pa nga paagi, inin mahadlukon ha Dios nga mag-asawa nangalimbasog nga lipayon hi Jehova ngan nagpakita hin hilarom nga pagtahod ha espirituwal nga mga butang. Salit diri urusahon nga hira an ginpili ni Jehova nga magmangno han iya Anak ha siyahan nga bahin han kinabuhi ni Jesus dinhi ha tuna.

17, 18. (a) Ha ano nga mga paagi maipapakita han mag-asawa nga gin-uuna nira an Dios ha ira pamilya? (b) Ano an magigin kapulsanan hini ha ira?

¹⁷ Gin-uuna ba liwat han iyo pamilya an pagsingba ha Dios? Pananglitan, kon naghihimo hin importante nga mga desisyon, ginsasaliksik ba anay niyo an mga prinsipyo ha Biblia, igin-aampo ito, ngan nangangaro hin sagdon ha hamtong nga mga Kristiano? O may tendensya kamo nga sulbaron an mga problema pinaagi ha pagsunod ha iyo inaabat o ha opinyon han iyo pamilya ngan kasangkayan? Nangangalimbasog ba kamo nga iaplikar an damu nga praktikal nga suhestyon mahitungod han pag-asawa ngan kinabuhi ha pamilya nga iginpublikar han matinumanon nga uripon? O nasunod la kamo ha mga kustomre ha iyo lugar o ha popular nga mga sagdon nga diri basado ha Kasuratan? Pirme ba kamo magkaupod nga nag-aampo ngan nag-aaram, naghihimo hin espirituwal nga mga tumong, ngan naghihisgot han iyo mga prayoridad sugad nga pamilya?

¹⁸ May kalabotan ha ira 50 ka tuig nga malipayon nga pag-asawa, hi Ray nagsiring, “Waray gud kami problema nga diri namon nalalamposan tungod kay hi Jehova pirme kaapi han amon ‘tinulotulo nga lubid.’” (Basaha an Eklesiastes 4:12.) Nauyon hito hira Danny ngan Trina. Hira nagsiring: “Samtang magkaupod kami nga nag-aalagad ha Dios, mas nagigin marig-on an amon pag-asawa.” Sobra 34 ka tuig na nga malipayon hira nga mag-asawa. Kon uunahon niyo pirme hi Jehova ha iyo pag-asawa, mabulig hiya ha iyo nga maglampos ngan hura nga bibendisyonan niya kamo.—Sal. 127:1.

Padayon nga Ipakita an Pagtahod ha Regalo han Dios

19. Kay ano nga igintagana han Dios an regalo nga pag-asawa?

¹⁹ Para ha damu yana, an ira la kalugaringon nga kalipay an importante. Pero diri sugad hito an panhunahuna han mga alagad ni Jehova. Maaram kita nga igintagana han Dios an pag-asawa sugad nga regalo basi matuman an Iya katuyoan. (Gen. 1:26-28) Kon gintahod nira Adan ngan Eva ito nga regalo, nagin paraiso unta an bug-os nga tuna nga puno hin maglipayon ngan magtadong nga alagad han Dios.

20, 21. (a) Kay ano nga sadang naton tagdon nga sagrado an pag-asawa? (b) Ano nga regalo an aton hihisgotan ha sunod nga semana?

²⁰ Labaw ha ngatanan, an pag-asawa gintatagad han mga alagad han Dios sugad nga higayon ha paghimaya kan Jehova. (Basaha an 1 Korinto 10:31.) Sugad han aton ginhisgotan, an pagkamaunungon, pagbuhat nga pirme magkaupod, ngan pag-una kan Jehova nga Dios nakakapalipay ha iya ngan nagpaparig-on han pag-asawa. Salit nagpaplano man kita pag-asawa, nagpaparig-on hito, o nangangalimbasog nga diri ito mabungkag, kinahanglan masabtan anay naton kon ano gud an pag-asawa—usa nga sagrado nga kahikayan han Dios. An pirme paghunahuna hito magpapagios ha aton nga buhaton an aton gimaopayi nga ibasar ha Pulong han Dios an aton mga desisyon may kalabotan ha pag-asawa. Hito nga paagi, iginpapakita naton an pagtahod diri la ha regalo nga pag-asawa kondi pati na ha naghatag hito, hi Jehova nga Dios.

²¹ Syempre, diri la an pag-asawa an regalo ha aton ni Jehova; diri la liwat ito an paagi basi magin malipayon. Ha sunod nga artikulo hihisgotan naton an usa pa nga birilhon nga regalo han Dios—an pagin solo.

[Footnote]

Ano an Imo Baton?

• Kay ano nga sadang magin maunungon an inasaw-an nga mga Kristiano?

• Kay ano nga an pagbuhat pirme nga magkaupod nagpaparig-on han pag-asawa?

• Ano an pipira nga paagi nga maipapakita han mga inasaw-an nga gin-uuna nira an Dios ha ira pag-asawa?

• Paonan-o naton maipapakita an pagtahod kan Jehova, an nagpatikang han pag-asawa?

[Mga Retrato ha pahina 15]

An pagbuhat nga magkaupod nabulig basi pirme magkauyon an mag-asawa